ପୁନାଦ୍ ଆର୍ର୍
୧ କରନ୍ତିୟ 12
ପବିତ୍ର ଆତ୍ମାତେ କନ୍ସ୍ ଦାନ
ଦାଦାଲଡ଼ି ନୁ ଏଲାସ୍କ୍, ପବିତ୍ର ଆତ୍ମାତେ ଦାନ ବିଷୟ୍ତେ ନାନ୍ ମିକିଂଙ୍କ୍ ନିଜାତାଦ୍ ସତ୍ କେତାନଙ୍କ୍ ଆଲ୍ସୁତାନ୍ । ମିଡ଼୍ ପୁତ୍ତିଡ଼୍ ଜେ, ଅଣଇହୁଦୀ ମାତ୍ତେ ୱେଲେ, ଜିୱୁଣ୍ଡ୍ ଇଲ୍ୱା ପୁତ୍ଲାକିଙ୍କ୍ ପୁଜାମାଡ଼ି ଆର୍ ବୁଲ୍କା ଆସ୍ମାତ୍ତିଡ଼୍ । ଆଦିନ୍ ସେଙ୍ଗେ ମିଡ଼୍ ପୁନ୍ଦାନାଦ୍ ଦର୍କାର୍ ଜେ, ଇଶ୍ୱର୍ତେ ଆତ୍ମାତଡ଼୍ ଚାଲେମ୍ ଆସ୍ ବେନ କେତାନଙ୍କ୍ ପାର୍ୱଣ୍ଡ୍, “ଜିସୁ ଅବିଶାପ୍” ମେଣ୍ଡେ ପବିତ୍ର ଆତ୍ମାତଡ଼୍ ଚାଲେମ୍ ଆୟକ୍, ବେନ ଜିସୁଙ୍କ୍ ପ୍ରବୁ ଇଞ୍ଜ ସ୍ୱୀକାର୍ ମାଡ଼ାନଙ୍କ୍ ପାର୍ୱଣ୍ଡ୍ । 1
ପବିତ୍ର ଆତ୍ମାତାଦ୍ ଦାନ ନାର୍ଗେ ଲେକାତ୍, ଇତ୍କେ ଆଦ୍ ଅଣ୍ଡୟ୍ ପବିତ୍ର ଆତ୍ମା ଆୱୁ ସାର୍ରେ ଇଦ୍ତେ । ନାର୍ଗେ ଲେକାତ୍ ସେବା ପାଡ଼୍ୟି ମାଡ଼ମାତ୍କେ ଗାଲା ଅଣ୍ଡୟ୍ ପ୍ରବୁନାଦ୍ ସେବା ଆଦ୍ତେ । ପାଡ଼୍ୟି ମାଡ଼ାନ୍ ଶାତ୍ୱାମ୍ ନାର୍ଗେ ଲେକାତ୍, ଇତ୍କେ ଅଣ୍ଡୟ୍ ଇଶ୍ୱର୍ ଆୱୁ ସାର୍ରେ ଶାତ୍ୱାମ୍ ଇଦ୍ତେ । ସାର୍ରେତଡ଼୍ୱାଦ୍ ଲେକେତ୍ ମାଡ଼ାନ୍ ସେଙ୍ଗେ ସାର୍ରେ ନାରୁଣ୍ଡ୍ ଲୋପେ ପବିତ୍ର ଆତ୍ମାତେ ଶାତ୍ୱାମ୍ ନାର୍ଗେ ରକମ୍ ତଅନ୍ଦିତ୍ । ପବିତ୍ର ଆତ୍ମାତ୍ ଅନୁଗ୍ରହତେ ବେନ ବୁଦ୍ ନାରୁଡ଼୍ ଆଦ୍ତନ୍ ନୁ ମେଣ୍ଡେ ବେନ ଜ୍ଞାନି ଆଦ୍ତନ୍ । ଆଦ୍ ୱେରଡ଼୍ ପବିତ୍ର ଆତ୍ମା ବେନଙ୍କ୍ ଇଦ୍ତେ ବିଶ୍ୱାସ୍ ନୁ ବେନଙ୍କ୍ ଇଦ୍ତେ ସୁସ୍ଥ ମାଡ଼ାନାଦ୍ ଶାତ୍ୱାମ୍; ବେନଙ୍କ୍ ଇଦ୍ତେ ଆଶ୍ଚର୍ଯ୍ୟ ପାଡ଼୍ୟି ମାଡ଼ାନ୍ ଶାତ୍ୱାମ୍, ବେନଙ୍କ୍ ଇଦ୍ତେ ଇଶ୍ୱର୍ତେ ବାକ୍ୟ କେତାନଙ୍କ୍ ଶକ୍ତି ନୁ ବେନଙ୍କ୍ ବାତ୍ବାତ୍ ପବିତ୍ର ଆତ୍ମା ନୁ କାରାପ୍ ଆତ୍ମା ଏଞ୍ଚାନ୍ ଶକ୍ତି; ମେଣ୍ଡେ ଅଣ୍ଡ୍ ବେନଙ୍କ୍ ଇଦ୍ତଣ୍ଡ୍ ବାତ୍ବାତ୍ ଗଟିନେ ତିର୍ୟାନାଦ୍ ଶକ୍ତି ନୁ ମେଣ୍ଡେ ବେନଙ୍କ୍ ଇଦ୍ତଣ୍ଡ୍ ଆଦ୍ ଗଟ୍ତାଦ୍ ଇତ୍କେ ବୁଜାମାଡ଼ାନାଦ୍ ଶକ୍ତି । ଇତ୍କେ ଇୱୁସାର୍ରେ ଆଦ୍ ୱେରଡ଼୍ ଆତ୍ମା କେ ମାଡ଼ିତ୍ । ଅଣ୍ଡ୍ ନିଜେତ୍ ଇଚ୍ଛା ଲେକାମ୍ ସାର୍ରେ ନାରୁଙ୍କ୍ ୱେକ୍ ୱେକ୍ ବିଷୟ୍ ଦାନ ମାଡ଼ିତନ୍ ।
ଅଣ୍ଡୟ୍ ମେନ୍ଦୁଲ୍, ଇତ୍କେ ନାର୍ଗେ ଦୁଡ଼ା
କ୍ରିଷ୍ଟ ନାର୍ଗେ ଦୁଡ଼ା କାୟ୍ଲ୍ତେ ଅଣ୍ଡୟ୍ ମେନ୍ଦୁଲ୍ ଲେକାମ୍ । ନାର୍ଗେ ଅଂକିଙ୍କ୍ ତଡ଼୍ କାୟ୍ଲିମାତ୍କେ ଗାଲା, ମେନ୍ଦୁଲ୍ ଅଣ୍ଡୟ୍ । ଆଦେରକମ୍ ଇହୁଦୀ, ଅଣଇହୁଦୀ, କ୍ରୀତଦାସ ନୁ ସ୍ୱାଦିନ୍ ନାରୁଡ଼୍ ସାର୍ରେପେର୍କେ ମାନାଡ଼୍ ସାର୍ରେତଡ଼୍ ଅଣ୍ଡୟ୍ ଆତ୍ମାତେ ତଡ଼୍ ଏର୍ଦିକ୍ଷାତାଗ୍ ବାପ୍ତିସ୍ମ ଅସ୍ ଆଦ୍ ଅଣ୍ଡୟ୍ ମେନ୍ଦୁଲ୍ତାଗ୍ କାୟ୍ଲ୍ତମ୍, ଅଣ୍ଡୟ୍ ଆତ୍ମାତିଙ୍କ୍ ଉନ୍ଦୁତାଡ଼୍ ।
ମେନ୍ଦୁଲ୍ ଅଣ୍ଡୟ୍ ଦୁଡ଼େ ତଡ଼୍ ତିୟାର୍ ଆୟ୍ୟ । ମାତର୍ ଇଦ୍ ନାର୍ଗେ ଦୁଡ଼େ ତଡ଼୍ ତିୟାର୍ ଆତ୍ତେ । ଡେକେ ଯଦି କେତିତ୍, “ନାନ୍ କାୟ୍ ଆୟନ୍, ଆଦିଙ୍କ୍ ମେନ୍ଦୁଲ୍ତେ ଦୁଡ଼େ ଆୟନ୍,” ଆଲେକେ ଇଦ୍ କାରନ୍ତେ ମାୟ୍ଦିଙ୍କ୍ ଆଦ୍ ମେନ୍ଦୁଲ୍ତଡ଼୍ କାୟ୍ଲ୍ୱେକଞ୍ଚ୍ ମାନ୍ଦାନଙ୍କ୍ ପାର୍ୱ । କେୱୁ ଯଦି କେତିତ୍, “ନାନ୍ କଣ୍ଡା ଆୟନ୍, ଆଦିଙ୍କ୍ ମେନ୍ଦୁଲ୍ତେ ଦୁଡ଼େ ଆୟନ୍,” ଆଲେକେ ଇଦ୍ ବାତେଙ୍କ୍ ଇତ୍କେ ମାୟ୍ଦିଙ୍କ୍ ଆଦ୍ ମିକା ମେନ୍ଦୁଲ୍ତାଗାଙ୍କ୍ ୱେର୍ରେ ଆସ୍ ମାନ୍ଦାନଙ୍କ୍ ପାର୍ୱ । ସାର୍ରେ ମେନ୍ଦୁଲ୍ ଯଦି ଆସାମ୍ କଣ୍ଡା ଆଦ୍ତେ, ଆଲେକେ ବେଲା କେଞ୍ଜାନଙ୍କ୍ ଆଦ୍ତେ ? ମେଣ୍ଡେ ଆଦ୍ ଯଦି ଆସାମ୍ କେୱୁକ୍ ଆଦ୍ତେ, ଆଲେକେ ବେଲା ନେସ୍କାନଙ୍କ୍ ଆଦ୍ତେ ? ନିଜାମ୍, ଇଶ୍ୱର୍ ୱେର୍ରେ ୱେର୍ରେ ଦୁଡ଼େ ମେନ୍ଦୁଲ୍ତେ ୱେକ୍ୱେକ୍ ପଡ଼୍ୟେତାଗ୍ ନିଜେତ୍ ଇଚ୍ଛାତେ ଉର୍ସ୍କିତ୍ତଣ୍ଡ୍ । ଆୱୁସାର୍ରେ ମାତର୍ ଅଣ୍ଡୟ୍ ମେନ୍ଦୁଲ୍ ଆସ୍ମାତ୍କେ, ମେନ୍ଦୁଲ୍ ବେଲା ତିୟାର୍ ଆୟେଡ଼୍ ? ଆଦିଙ୍କ୍ ନାର୍ଗେ ଦୁଡ଼ା ଆତ୍କେ ମିକା ମେନ୍ଦୁଲ୍ ଅଣ୍ଡୟ୍ ।
ଆଦିଙ୍କ୍ କଣ୍ଡା କାୟ୍ଦିଙ୍କ୍ କେତାନଙ୍କ୍ ପାର୍ୱ, “ନାନ୍ ନିକିଂଙ୍କ୍ ଦର୍କାର୍ ଆୟନ୍ ।” କି ତାଲ୍ଲେ ରେଣ୍ଡ୍ ଡେକାଙ୍କ୍ କେତାନଙ୍କ୍ ପାର୍ୱ, “ନିୟାଗ୍ ନାୟାଦ୍ ବାତ୍ ଦର୍କାର୍ ଆୟ୍ୟ ।” ମେଣ୍ଡେଅଣ୍ଡ୍ ରକମ୍, ମେନ୍ଦୁଲ୍ତାଗ୍ ବେନ୍ ଦୁଡ଼ା ଶକ୍ତି ଇଲ୍ଲେ ଇଞ୍ଜ ଆଲ୍ସ୍କେ, ଆୱୁ ଦର୍କାର୍ ଆୟ୍ୟ । ମେନ୍ଦୁଲ୍ତାଗ୍ ବେନ୍ ଦୁଡ଼ା ମାନାଡ଼୍ ଗାଟି ଦର୍କାର୍ ଆୟ୍ୟ ଇଞ୍ଜ ଆଲ୍ସିତାଡ଼୍, ଆୱିଙ୍କ୍ ମାନାଡ଼୍ ଗାଟି ଜତନ୍ ଆଦ୍ତାଡ଼୍ । ମେଣ୍ଡେ ମେନ୍ଦୁଲ୍ତାଗ୍ ମିଞ୍ଜିମାନ୍ଦାନ୍ ଦୁଡ଼ା ସେଙ୍ଗେ ମାନାଡ଼୍ ଗାଟି ମାନ୍ ଇଦ୍ତାଡ଼୍, ମେନ୍ଦୁଲ୍ତାଗ୍ ସୁନ୍ଦର୍ ଦୁଡ଼ା ସେଙ୍ଗେ ମାନାଡ଼୍ ଆସର୍ ମାନ୍ ଇୱାଡ଼୍ । ଇଶ୍ୱର୍ ନିଜେ ମେନ୍ଦୁଲ୍ତିଙ୍କ୍ ଇଦ୍ ରକମ୍ ତିୟାର୍ ମାଡ଼୍ତଣ୍ଡ୍ ଜେ, ବେନ୍ ଦୁଡ଼ାକିଙ୍କ୍ ଯତନ୍ ଦର୍କାର୍, ନିଜାମ୍ ଆୱିଙ୍କ୍ ଗାଟି ସାର୍ଦେ ଦର୍କିତ୍ । ଆଦିଙ୍କ୍ ମେନ୍ଦୁଲ୍ ଲୋପେ ବାତ୍ବା ଗଲ୍କ୍ ତିୟାର୍ ଆୟ୍ୟ, ଇତ୍କେ ୱେକ୍ ୱେକ୍ ଦୁଡ଼ା ତାମ୍ତାମ୍ ଲୋପେ ଦର୍କାର୍ ବୁଜେମ୍ ଆଦ୍ତେ । ମେନ୍ଦୁଲ୍ତେ ଅଣ୍ଡୟ୍ ଦୁଡ଼େତାଗ୍ କଷ୍ଟ ଆତ୍କେ, ମେଣ୍ଡେ ସାର୍ରେ ଦୁଡ଼ା ଆଦ୍ କଷ୍ଟ ପାଏମ୍ ଆଦ୍ତେ । ୱେରଡ଼୍ ଦୁଡ଼ା ଗୌରବ୍ ଆତ୍କେ, ମେଣ୍ଡେ ସାର୍ରେ ଦୁଡ଼ା ଆଦ୍ ୱେଡ଼୍କେତାଗ୍ ପାଲ୍କ୍ ଆଦ୍ତା ।
ମିଡ଼୍ କ୍ରିଷ୍ଟନ୍ ମେନ୍ଦୁଲ୍ । ମିଡ଼୍ ସାର୍ରେତଡ଼୍ ଆଦ୍ ମେନ୍ଦୁଲ୍ତେ ଅଣ୍ଡୟ୍ ଦୁଡ଼ା । 3ମଣ୍ଡଲିତାଗ୍ ଇଶ୍ୱର୍ ମୁନେନ୍ ପ୍ରେରିତ୍ ଶିଷ୍ୟଡ଼୍କିଂଙ୍କ୍, ଦ୍ୱିତୀୟଦାମ୍ ବବିଷ୍ୟତ୍ ବକ୍ତାଲଡ଼୍କିଙ୍କ୍, ତୃତୀୟଦାମ୍ ଶିକ୍ଷା ଗୁରୁଡ଼୍କ୍, ତାନ୍ପେର୍କେ ଆଶ୍ଚର୍ଯ୍ୟ ପାଡ଼୍ୟି ମାଡ଼ାନଡ଼୍କ୍, ରୋଗ୍ ସାୟେ ମାଡ଼ାନଡ଼୍କ୍, ସାହାଯ୍ୟ ମାଡ଼ାନଡ଼୍କ୍, ଶାସନ୍ ମାଡ଼ାନଡ଼୍କ୍ ନୁ ନାର୍ଗେପ୍ରକାର୍ ଗଟି ତିର୍ୟାନଡ଼୍କ୍ ନିଯୁକ୍ତି ମାଡ଼୍ତଣ୍ଡ୍ । ଅଡ଼୍ ସାର୍ରେତଡ଼୍ ପ୍ରେରିତ୍ ଶିଷ୍ୟ, ବବିଷ୍ୟତ୍ବକ୍ତା କି ମେସ୍ତେରିଡ଼୍ ଆୟ୍ୟଡ଼୍ । ଆଶ୍ଚର୍ଯ୍ୟ ପାଡ଼୍ୟି ମାଡ଼ାନ୍ ଶକ୍ତି ସାର୍ରେତଡ଼ାଗ୍ ଇଲ୍ଲେ । ସାର୍ରେତଡ଼୍ ରୋଗ୍ ସାୟେ ମାଡ଼ାନଙ୍କ୍, ୱେକ୍ୱେକ୍ ଗଟି ତିର୍ୟାନଙ୍କ୍ ନୁ ଆୱୁ ସାର୍ରେତାୱିନ୍ ଇତ୍କେ ବୁଜାମାଡ଼ାନଙ୍କ୍ ପାର୍ୱଡ଼୍ । ମିଡ଼୍ ସାୟେତ୍ ଦାନ ପାଏମ୍ ଆଦ୍ଦାନ୍ ସେଙ୍ଗେ ତିୟାର୍ ଆୟି ମାନୁଟ୍ । ନାନ୍ନେ ମିକିଂଙ୍କ୍ ଇଦିନାଗାଙ୍କ୍ ସାୟେତ୍ ଅଣ୍ଡୟ୍ ଉପାୟ୍ ତଅତିତାନ୍ ।
Source notes (3)
- Cross-reference ରୋମୀୟ ୧୨:୬-୮.
- Cross-reference ରୋମୀୟ ୧୨:୪,୫.
- Cross-reference ଏଫିସିୟ ୪:୧୧.
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.