ପୁନାଦ୍ ଆର୍ର୍
୧ କରନ୍ତିୟ 10:13
Verse 13 is marked below, with the whole chapter around it. Read from the start
ପୁତ୍ଲାକ୍ ବିରୁଦ୍ତେ ସତର୍କତା
ଦାଦାଲଡ଼ି ନୁ ଏଲାସ୍କ୍ ନଡ଼ି ମୋଶାନ୍ ପେର୍କେ ଆଞ୍ଜ ମାନ୍ ଆନିଦାଦିଡ଼୍ ବାତ୍ ଗଟେମ୍ ଆସ୍ମାତ୍ତଡ଼୍, ମିଡ଼୍ ଆଦ୍ ଏର୍କା ମାଡ଼ାଟ୍, ଇଦ୍ ନାୟାଦ୍ ଇଚ୍ଛା । ଅଡ଼୍ ସାର୍ରେତଡ଼୍ ମାବ୍ ତଡ଼୍ ଲେକାମ୍ ମାତ୍ତଡ଼୍, ନେତୁର୍ ବେଡ଼େଡ଼୍ତିଙ୍କ୍ ତିପାଲ୍ ଆୟ୍ୱେ ଜିଡ଼୍ତଡ଼୍ । ମୋଶାନ୍ ପେର୍କେ ଆଦାନଡ଼୍ ଲେକାମ୍ ଅଡ଼୍ ସାର୍ରେତଡ଼୍ ମାବ୍ ନୁ ବେଡ଼େଡ଼୍ତାଗ୍ ଏର୍ଦିକ୍ୟା ପାଏମ୍ ଆସ୍ମାତ୍ତଡ଼୍ । ଅଡ଼୍ ସାର୍ରେତଡ଼୍ ଅଣ୍ଡୟ୍ ଆତ୍ମାତେ କାଦି ନୁ ଉନ୍ଦାନାଦ୍ ଗ୍ରହନ୍ ମାଡ଼ିମାତ୍ତଡ଼୍, ବାତେଙ୍କ୍ଇତ୍କେ ଅଡ଼୍ ତଡ଼୍ ଚାଲେମ୍ ଆଦାନ୍ ଦାର୍ମାମ୍ ଉପାୟ୍ତଡ଼୍ ଅଡ଼୍ କାଲ୍ ଉଞ୍ଜ ମାତ୍ତଡ଼୍, ମେଣ୍ଡେ ଆଦ୍ କାଲ୍ ଆଦୁତନ୍ ନିଜେ କ୍ରିଷ୍ଟ । ଆଗେକ୍ବା ଇଶ୍ୱର୍ ଅଡ଼୍ ସାର୍ରେତଡ଼୍ ସେଙ୍ଗେ ଶାନ୍ତି ଇଲ୍ୱେମାତ୍ତଣ୍ଡ୍ । ଆଦିଙ୍କ୍ ଅଡ଼ାଦ୍ ଡଲ୍ତେ ମେନ୍ଦୁଲ୍ ଉଚ୍କନେଲ୍ତାଗ୍ ଏକାମ୍ ଆସ୍ ରାୟିମାତ୍ତା ।
ଅଡ଼୍ ଲେକାମ୍ କାରାପ୍ ଚିନ୍ତେ ମାଡ଼ାନାଦ୍ ଆୟ୍ୟ କି ଇୱୁ ସାର୍ରେ ୱେଷଡ଼୍ ଇନା ଆସ୍ ମାନ୍ ଏର୍କା ଇଦୁତ୍ । ଅଡ଼୍ ଲୋପେଙ୍କ୍ ବେସ୍କ୍ତୁଡ଼୍ ପୁତ୍ଲାମ୍ ପୂଜେ ମାଡ଼ାନାଦ୍ ଆୟ୍ୟ, ଦର୍ମଶାସ୍ତ୍ରତାଗ୍ ଲେକ୍ତାଦ୍ ମିନ୍ଦେ, “ନାରୁଡ଼୍ ତିନ୍ଦାନଙ୍କ୍ କୁଦ୍ତଡ଼୍ ନୁ ତାନ୍ପେର୍କେ ତେଦି ମୂର୍ତ୍ତି ପୂଜା ପାଡ଼୍ୟି ମାଡ଼ାନଙ୍କ୍ ପସ୍ପ୍ତ୍ତଡ଼୍ ।” ଅଡ଼୍ ଲୋପେଙ୍କ୍ ବେସ୍କ୍ତୁଡ଼୍ ବେବିଚାର୍ ମାଡ଼୍ତାଙ୍କ୍ ୱେରଡ଼୍ ଦିନେତେ ତେଇସ୍ ହଜାର୍ ନାରୁଡ଼୍ ଡଲ୍ତଡ଼୍ । ଆଦ୍ ରକମ୍ ପାପାମ୍ ମାଡ଼୍ୱାଡ଼୍ । ଅଡ଼୍ ଲୋପେଙ୍କ୍ ବେସ୍କ୍ତୁଡ଼୍ ପ୍ରବୁନ୍ ପରିକ୍ଷା ମାଡ଼ି ତାଡ଼ାମ୍ କାସି ଡଲ୍ତଡ଼୍ । ମାନାଡ଼୍ ଆଦ୍ଲେକାମ୍ ପ୍ରବୁଙ୍କ୍ ପରିକ୍ଷା ମାଡ଼ାନାଦ୍ ଆୟ୍ୟ । ଅଡ଼୍ ଲୋପେଙ୍କ୍ ବେସ୍କ୍ତୁଡ଼୍ ଇଶ୍ୱର୍ତିଙ୍କ୍ ବିରୁଦ୍ ମାଡ଼ି ଆୱୁକାନାଦ୍ ଦୂତ୍ତଡ଼୍ ଦଂସ ଆଦ୍ତଡ଼୍ । ମିଡ଼୍ ଆଦ୍ଲେକାମ୍ କପାମ୍ ଗଟି କେଲ୍ମାଟ୍ ।
ଅଡ଼୍ ସେଙ୍ଗେ ଇଦ୍ ସାର୍ରେ ଗଟ୍ନା ୱେରେନାରୁଡ଼ାଦ୍ ୱେଷଡ଼୍ ଇନା ଆତ୍ତେ ନୁ ମାନ୍ ସତର୍କ ମାଡ଼ାନ୍ ସେଙ୍ଗେ ଆୱୁ ଲେକାଆତ୍ତା । ବାତେଙ୍କ୍ଇତ୍କେ ମାନାଡ଼୍ ଯୁଗ୍ ତେରାନ୍ୱେଲେ ବାଦ୍କୁତାଡ଼୍ । ବେନ ଗାଡ଼୍ସ୍ ଇଞ୍ଜ ଆଲ୍ସିତିଡ଼୍, ଅଣ୍ଡ୍ ସାବ୍ଦାନ୍ ମାନୁଟ୍ । ଅନାଦ୍ ବେଲା ରାଲି ଆନ୍ମାକିଣ୍ଡ୍ । ମିଡ଼୍ ବେନ୍ ପରିକ୍ଷା ଇତ୍ତିଡ଼୍, ନାରୁଡ଼୍ ଗାଲା ଆଦେରକମ୍ ପରିକ୍ଷା ଇସ୍ମାନ୍ତଡ଼୍, ଇତ୍କେ ଇଶ୍ୱର୍ ତାନ୍ ପ୍ରତିଜ୍ଞାତାଗ୍ ବିଶ୍ୱାସ୍ ମିନ୍ଦେଣ୍ଡ୍ । ଅଣ୍ଡ୍ ମିକିଂଙ୍କ୍ ମିୟାଦ୍ ଶାତ୍ୱାମ୍ତେ ବାୟିଦେ ପରିକ୍ଷା ଇଦାନଙ୍କ୍ ଇୱଣ୍ଡ୍ । ମିଡ଼୍ ପରିକ୍ଷା ଇଦାନ୍ୱେଲେ, ଗାଡ଼୍ସ୍ ଆଦାନଙ୍କ୍ ଇଶ୍ୱର୍ ମିକିଂଙ୍କ୍ ଶାତ୍ୱାମ୍ ଇଦ୍ତଣ୍ଡ୍ ନୁ ମୁକ୍ତିତେ ଆର୍ର୍ ତଅସିଦ୍ତଣ୍ଡ୍ ।
ଆଦିଙ୍କ୍ ହୋ ପ୍ରିୟ ସାଙ୍ଗଡ଼ି, ମିଡ଼୍ ପୁତ୍ଲାମ୍ ପୁଜା ବନ୍ଦ୍ ମାଡ଼ାଟ୍ । ମିକିଂଙ୍କ୍ ବୁଦ୍ନାରୁଣ୍ଡ୍ ଇଞ୍ଜ ନାନ୍ ଇଦ୍ କେତୁତାନ୍, ନାନ୍ ବାତ୍ କେତୁତାନ୍, ଆଦିଙ୍କ୍ ଆଲ୍ସାଟ୍ । 1ପ୍ରବୁବୋଜ୍ତାଗ୍ ମାନାଡ଼୍ ବେନ୍ ଉନ୍ଦାନାଦ୍ ଗିନେ ବ୍ୟବହାର୍ ମାଡ଼ିତାଡ଼୍, ଆଦିନ୍ ସେଙ୍ଗେ ମାନାଡ଼୍ ଇଶ୍ୱର୍ତିଙ୍କ୍ ଦନ୍ୟବାଦ୍ ଇଦ୍ତାଡ଼୍ । ଇଦ୍ ଉନ୍ଦାନ୍ ଗିନେତାଗାଙ୍କ୍ ଉନ୍ଦାନ୍ ୱେଲେ ମାନାଡ଼୍ କ୍ରିଷ୍ଟନ୍ ନେତୁର୍ତାଗ୍ ବାଗି ଆଦ୍ତାଡ଼୍ । ମେଣ୍ଡେ ରୂଟି ଉହୁସ୍ ତିତ୍କେ କ୍ରିଷ୍ଟନ୍ ମେନ୍ଦୁଲ୍ତାଗ୍ ବାଗି ଆଦ୍ତାଡ଼୍ । ମାନାଡ଼୍ ନାର୍ଗେ ଆତ୍କେ ଗାଲା ରୂଟି ଅଣ୍ଡୟ୍ ଆତ୍ତାଙ୍କ୍ ମାନାଡ଼୍ ୱେରଡ଼୍ ମେନ୍ଦୁଲ୍ ଆଦ୍ତାଡ଼୍, ବାତେଙ୍କ୍ଇତ୍କେ ମାନାଡ଼୍ ସାର୍ରେତଡ଼୍ ଆଦ୍ ଅଣ୍ଡୟ୍ ରୂଟିତାଗ୍ ପାଲ୍କିନ୍ ସେଙ୍ଗେ ଆଦ୍ତାଡ଼୍ ।
ଇସ୍ରାୟେଲ୍ ନାରୁଡ଼୍ତେ ଗଟ୍ ଆଲ୍ସାଟ୍ । ଅଡ଼୍ ଲୋପେଙ୍କ୍ ବେନଡ଼୍ ପୁଜ୍ତାୱୁ ଆଉଙ୍ଗ୍ ତିନ୍ତଡ଼୍, ଅଡ଼୍ ବାତ୍ ବେଦିତ୍ ଉପାସନାତାଗ୍ ପାଲ୍କ୍ ଆୟଡ଼୍ କି ? ଆଲେକେ ନାନ୍ ବାତ୍ କେତୁତାନ୍ ଜେ, ପୁତ୍ଲାମ୍ ନୁ ତାଙ୍କ୍ ଇତ୍ତେ ପୁଜ୍ତାଦ୍ ବାତ୍ ମୁଲ୍ୟ ମିନ୍ଦେ ? ଇଲ୍ଲେ, ବେସୁଟ୍ ଆୟ୍ୟ । ନାୟାଦ୍ କେତାନାଦ୍ ଇତ୍କେ ଆଦୁତ୍ତେ ଜେ, ପୁତ୍ଲାମ୍ ପୁଜାମାଡ଼ାନଡ଼୍ ଇତ୍ତେ ବଲି ଇଶ୍ୱର୍ତେ ମାୟ୍ଦିଙ୍କ୍ ଆୟ୍ୟ, ଆଦ୍ ଶୟ୍ତାନ୍ତେ ମାୟ୍ଦିଙ୍କ୍ ଇତ୍ତାଦ୍ । ଶୟ୍ତାନ୍ ତଡ଼୍ ମିୟାଦ୍ ବାତ୍ଆଇ ସମ୍ବନ୍ଦ୍ ମାନୀ ଇଞ୍ଜ ନାନ୍ ଇଚ୍ଛା ମାଡ଼ନ୍ । ପ୍ରବୁ ନୁ ବୁତ୍, ଇର୍ୱୁଡ଼ାଦ୍ ଉନ୍ଦାନ୍ ଗିନେତାଗାଙ୍କ୍ ମିଡ଼୍ ଉନ୍ଦାନଙ୍କ୍ ପାର୍ୱିଡ଼୍ । ପ୍ରବୁ ନୁ ବୁତ୍, ଇର୍ୱୁଡ଼ାଦ୍ ଟେବୁଲ୍ତାଗ୍ ମିଡ଼୍ ବାଗ୍ ଆଦାନଙ୍କ୍ ପାର୍ୱିଡ଼୍ । ମାନାଡ଼୍ ବାତ୍ ପ୍ରବୁନ୍ ମନ୍ତାଗ୍ ଇର୍ଷା ପୁଟ୍ସ୍ପିତାଡ଼୍ ? ମାନାଡ଼୍ ବାତ୍ ଇଶ୍ୱର୍ତାଗାଙ୍କ୍ ନାର୍ଗେ ଶାତ୍ୱାମ୍ତଡ଼୍ ? 2
ଅଡ଼୍ କେତୁତଡ଼୍, “ସାର୍ରେ ମାଡ଼ାନ୍ ସେଙ୍ଗେ ମାନ୍ ଅଦିକାର୍ ମିନ୍ଦେ ।” ନିଜାମ୍ ଗଟ୍, ଇତ୍କେ ସାର୍ରେ ବିଷୟ୍ ଲେକେତାୱୁ ଆୟ୍ୟ । ମାନାଡ଼୍ ସାର୍ରେ ମାଡ଼ାଙ୍କ୍ ପାର୍ଦ୍ତାଡ଼୍, ଇତ୍କେ ସାର୍ରେ ବିଷୟ୍ ସାୟେ ଆୟ୍ୟ । ମାତର୍ ନିଜେତ୍ ସ୍ୱାର୍ତତ୍ ସେଙ୍ଗେ ମାନ୍ ଇୱକନ୍ସ୍, ସାର୍ରେତଡ଼୍ ଅନ୍ନାରୁଡ଼୍ତେ ସ୍ୱାର୍ତତ୍ ସେଙ୍ଗେ ମାଡ଼ାନାଦ୍ ସାୟେ ।
ବିବେକ୍ତିଙ୍କ୍ ସାୟେ ନେଃଏତାନ୍ ସେଙ୍ଗେ ବାତ୍ବା ପାଚ୍ରା ମାଡ଼୍ୱେ ଆଟିନାଗ୍ ୱାମାନ୍ ଆଉଙ୍ଗ୍ ମିଡ଼୍ ନିଜେତ୍ ଇଚ୍ଛାତେ ତିନ୍ଦାନଙ୍କ୍ ପାର୍ଦ୍ତିନ୍, ବାତେଙ୍କ୍ ଇତ୍କେ ଶାସ୍ତ୍ରବାକ୍ୟ ଇସାବ୍ତେ, “ପୃତିବି ନୁ ତାନାଦ୍ ସାର୍ରେ ବିଷୟ୍ ପ୍ରବୁନାଦ୍ ।”
ଅବିଶ୍ୱାସୀ ନାରୁଡ଼୍ ଲୋପେଙ୍କ୍ ବେନ ଯଦି ମିକିଂଙ୍କ୍ କାର୍ଙ୍ଗିତଣ୍ଡ୍ ନୁ ମିଡ଼୍ ଆଦ୍ କେଞ୍ଜିତିଡ଼୍, ଆଲେକେ ମିୟାଦ୍ ମନ୍ତିଙ୍କ୍ ବାତ୍ବା ପାଚ୍ରା ମାଡ଼୍ୱେକନ୍ସ୍, ବାତ୍ ତୁଃସିତ୍ତଡ଼୍, ଆଦ୍ ତିନ୍ତିଡ଼୍ । ଇତ୍କେ ଆଦ୍ ଦେୟାମ୍ ପ୍ରାସାଦ୍ତେ ଇଞ୍ଜ ଯଦି ବେନ କେତିତଣ୍ଡ୍, ଅନାଦ୍ ଲେକେତ୍ ସେଙ୍ଗେ ନୁ ବିବେକ୍3 ସେଙ୍ଗେ ଆଦ୍ ତିନ୍ମାଟ୍ । ଇଗେ ନାନ୍ ମିୟାଦ୍ ମନ୍ତାଦ୍ ଗଟ୍ ଇଞ୍ଜ ନାନ୍ କେଲନ୍, ଅନାଦ୍ ମାନ୍ତେ ସେଙ୍ଗେ ଇଦ୍ ଗଟ୍ କେତୁତାନ୍ । ମିଡ଼୍ ଆତ୍କେ ପାଚ୍ରା ମାଡ଼େ ପାର୍ଦ୍ତିନ୍, “ମାନ୍ ସ୍ୱାଦୀନତା ବାତେଙ୍କ୍ ମେଣ୍ଡେଅର୍ତୁନ୍ ବିବେକ୍ ତଡ଼୍ ବିଚାର୍ ଆଦ୍ତେ ? ଯଦି ନାନ୍ ଇଶ୍ୱର୍ତିଙ୍କ୍ ଦନ୍ୟବାଦ୍ ଇସ୍ ବେନ୍ କାଦି ତିନ୍ଦୁତାନ୍, ଆଦିଙ୍କ୍ ଦନ୍ୟବାଦ୍ ଇତ୍ତେ ବିଷୟ୍ ସେଙ୍ଗେ ନାକିଂଙ୍କ୍ ବାତେଙ୍କ୍ ବେନ ମିଟିଙ୍କ୍ ମାଡ଼ିତନ୍ ?”
ଆଦିନ୍ସେଙ୍ଗେ ମିଡ଼୍ ତିନ୍ଦାନ୍ ଉନ୍ଦାନ୍ କି ବାତ୍ମେଣ୍ଡେ ମାଡ଼ିତିଡ଼୍, ଆଦ୍ ଇଶ୍ୱର୍ତେ ଗୌରବ୍ତେ ସେଙ୍ଗେ ମାଡ଼ାଟ୍ । ମିଡ଼୍ ମେଣ୍ଡେଅନ୍ ଦେଶ୍ତଡ଼ି, ଇହୁଦୀ ବା ଅଣଇହୁଦୀ, ଇଶ୍ୱର୍ତେ ମଣ୍ଡଲି, ବେନ ତିପାଲ୍ ଲେକାମ୍ ଆୟ୍ମାଟ୍ । ମିଡ଼୍ ନା ଲେକାମ୍ ବ୍ୟବହାର୍ ମାଡ଼ାଟ୍ । ନାନ୍ ସାର୍ରେ ବିଷୟ୍ତେ ସାର୍ରେତଡ଼୍କିଙ୍କ୍ ଶାନ୍ତି ମାଡ଼ାନଙ୍କ୍ ଆଲ୍ସି ମାଡ଼ୁତାନ୍ । ନିଜେତାଦ୍ ଚିନ୍ତେ ମାଡ଼୍ୱେକନ୍ସ୍, ମେଣ୍ଡେଅଡ଼୍ତିଡ଼୍ ପରିତ୍ରାଣ୍ ସେଙ୍ଗେ ସାର୍ରେତଡ଼୍ୱାଦ୍ ଲେକେତ୍ ମାଡ଼ୁତାନ୍ ।
Source notes (3)
- Cross-reference ମାତିଉ ୨୬:୨୬-୨୮; ମାର୍କ ୧୪:୨୨-୨୪; ଲୁକ ୨୨:୧୯,୨୦.
- Cross-reference ୧ କରନ୍ତିୟ ୬:୧୨.
- Footnote ସାୟେ ନୁ କାରାପ୍ ବିଚାର୍ ମାଡ଼ାନାଦ୍ ବୁଦ୍ତେ
ପୁନାଦ୍ ଆର୍ର୍. Copyright © 2020 The Word for the World International and Koya Translation Samithi, Malkangiri, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.