BIBLE MUTAL
Psalm 99
God, Tokosra Fulatlana
LEUM GOD El tokosra,
Ac mwet uh rarrar.
El muta fin tron lal lucng liki cherub uh,1
Ac faclu kusrusrsrusr.2
LEUM GOD El ku in acn Zion,
Ac El fulat liki mutunfacl nukewa.
Mwet nukewa in kaksakin Ine fulat ac ku lal.
El mutal!
Tokosra kulana, kom lungse ma suwohs;
Kom oakiya nununku suwohs in Israel,
Ac kom ase suwoswos ac ma wolana.
Kaksakin LEUM GOD lasr,
Alu nu sel ye mutun tron lal.
El mutal!
Moses ac Aaron eltal mwet tol lal,
Ac Samuel el sie su pre nu sel.
Elos pang nu sin LEUM GOD, ac El topkolos.
El kaskas nu selos liki sru in pukunyeng.
Elos akos ma sap ac ma oakwuk lal su El sang nu selos.3
O LEUM GOD lasr, kom topuk mwet lom.
Kom akkalemye nu selos lah kom sie God su nunak munas,
Kom finne kaelos ke ma koluk lalos.
Kaksakin LEUM GOD lasr,
Ac alu nu sel ke eol mutal4 sel!
LEUM GOD lasr El mutal.
Source notes (4)
- Footnote cherub uh: liye ke Kalmen Kutu Kas.
- Cross-reference Exo 25:22
- Cross-reference Exo 33:9
- Footnote eol mutal: liye Psa 2:6
BIBLE MUTAL. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.