BIBLE MUTAL
Psalm 96
God, Tokosra Fulatlana
(Sie Chronicle 16:23–33)
Yuk soko on sasu nu sin LEUM GOD.
On nu sin LEUM GOD, faclu nufon.
On nu sin LEUM GOD, ac kaksakunul.
Fahkak pweng wo ke len nukewa lah El molikutla.
Fahkak wolana lal nu sin mutanfahl uh,
Ac orekma sakirik lal nu sin mwet nukewa.
LEUM GOD El fulat, ac arulana fal in kaksakinyuk
Ac akfulatyeyuk El yohk liki god nukewa.
Tuh god lun mutunfacl saya nukewa ma sruloala na,
A LEUM GOD El pa orala kusrao.
Wolana ac wal fulat raunella,
Ku ac oasku nwakla Tempul lal.
Kaksakin LEUM GOD, kowos mwet nukewa fin faclu,
Kaksakin wolana ac ku lal.1
Kaksakin wolana lun Inen LEUM GOD;
Us mwe sang lowos ac utyak nu in Tempul lal.
Epasrla ye mutun El su Mutal ke El sikyak in wolana lal,
Ac rarrar ye mutal, kowos mwet faclu nufon!
Fahk nu sin mutunfacl nukewa, “LEUM GOD El tokosra.
Faclu oakwuki ku in acn se, ac tia ku in mukuikui;
El fah nununku mwet nukewa ke nununku suwohs.”
Lela kusrao ac faclu in engan!
Lela meoa ac ma nukewa loac in ngirngir.
Lela inima uh ac ma nukewa fac in engan.
Sak nukewa insak uh in sasa ke engan
Ke LEUM GOD El tuku in leumi faclu.
El ac fah nununku mwet fin faclu
Ke suwoswos ac pwaye.
Source notes (1)
- Cross-reference 96:7–9; Psa 29:1–2
BIBLE MUTAL. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.