BIBLE MUTAL
Psalm 6
[Psalm lal David]
Sie Pre In Suk Kasru In Pacl Koluk
O LEUM GOD, nik kom kutongyu in mulat lom,
Ku kaiyu in kasrkusrak lom.1
O LEUM GOD, pakomutuk tuh nga arulana totola.
Ase ku nu sik tuh nga munaslana,
Ac ngunik arulana foroti.
O LEUM GOD, kom ac tupan putaka?
LEUM GOD, fahsru ac moliyula;
Loangeyula liki misa, ke lungkulang lom.
In facl sin mwet misa wangin esamyom.
Wangin mwet ac kaksakin kom ingo.
Nga totola ke sripen asor luk;
Fong nukewa mwe oan kiuk sroksrok ke sroninmutuk,
Ac ilul luk uh sroksroki ke tung luk.
Nga koflana ngetnget wo;
Mutuk fafwak
Ke tungiyen orekma lun mwet lokoalok luk.
Fahsr likiyu, kowos mwet orekma koluk!
LEUM GOD El lohng pusren tung luk;2
El lipsre pusren kwafe luk,
Ac El ac fah topuk pre luk.
Mwet lokoalok luk elos ac fah pulakin mwekin lulap ke kutangyukla elos;
Elos fah sa na in akfohsyeyukyak ac lillilla.
Source notes (2)
- Cross-reference Psa 38:1
- Cross-reference Mt 7:23; Lk 13:27
BIBLE MUTAL. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.