BIBLE MUTAL
Psalm 47
[Psalm Lun Tulik Natul Korah]
Mwet Kol Fulatlana
Paspas ke engan, kowos mwet nukewa!
On ac kaksakin God ke pusra lulap!
LEUM GOD, El Su Fulatlana, fal mwet in sangeng sel;
El sie tokosra kulana, su leumi faclu nufon.
El ase kutangla nu sesr fin mwet uh;
El oru tuh kut in kol mutanfahl uh.
El sulela facl se kut in muta we, ac kut insewowo kac,
Kut tulik natul Jacob, su God El lungse.
God El fahsryak nu ke tron lal.
Mwet uh wowoyak ke engan, ac yohk pusren mwe ukuk
Ke LEUM GOD El utyak.
Yuk on in kaksak nu sin God;
On kaksak nu sin tokosra lasr!
God El tokosra fin faclu nufon;
Kaksakunul ke on!
God El muta fin tron mutal lal;
El leum fin mutunfacl uh.
Mwet kol lun mutunfacl uh elos tukeni
Nu yurin mwet lun God lal Abraham.
El ku liki un mwet mweun nukewa;
El fulat liki leum nukewa.
BIBLE MUTAL. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.