BIBLE MUTAL
Psalm 41
[Psalm lal David]
Pre Lun Sie Mwet Mas
Insewowo elos su nunku ke mwet sukasrup;
Tuh LEUM GOD El ac fah kasrelos in pacl elos sun ongoiya.
LEUM GOD El ac fah karinganulos ac liyaung moul lalos;
El ac fah oru tuh elos in engan fin facl selos;
El ac fah tia fuhlelosyang nu inpoun mwet lokoalok lalos.
LEUM GOD El ac fah kasrelos in pacl in mas lalos
Ac akkeyalosla.
Nga fahk, “Nga oru ma koluk lain kom, LEUM GOD;
Pakomutuk ac akkeyeyula.”
Mwet lokoalok luk elos fahk kas upa keik.
Elos kena tuh nga in misa ac in mulkinyukla.
Elos su tuku liyeyu tia pwaye insialos;
Elos porongo sramsram sutuu puspis keik
Na elos som srumun yen nukewa.
Elos su srungayu elos mahma nu sin sie sin sie keik,
Elos kinauk ma na koluk ac finsrak mu in sikyak nu sik.
Elos fahk, “Mas in na misa se pa lal inge;
El ac fah tia ku in sifil tukakek liki mwe oan kial uh.”
Finne mwet kawuk na wowo luk, el su nga lulalfongi oemeet,
Su wiyu ipeis ke mwe mongo nak,
El forla likiyu.1
Pakomutuk, LEUM GOD, ac akkeyeyula,
Na nga fah foloksak nu sin mwet lokoalok luk.
Elos ac fah tia kutangyula,
Ac nga fah etu lah kom insewowo sik.
Kom ac kasreyu mweyen nga oru ma suwohs;
Kom ac fah sruokyuwi yurum nwe tok.
Kaksakin LEUM GOD, God lun Israel!
Kaksakunul inge ac nu tok ma pahtpat!
Amen! Amen!2
Source notes (2)
- Cross-reference Mt 26:23; Mk 14:18; Lk 22:21; Jn 13:18
- Cross-reference Psa 106:48
BIBLE MUTAL. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.