BIBLE MUTAL
Psalm 146
Kaksakin God, Mwet Lango
Kaksakin LEUM GOD!
Kaksakin LEUM GOD, O ngunik!
Nga fah kaksakin LEUM GOD in moul luk nufon;
Nga fah on ac kaksakin God luk ke lusenna moul luk.
Nik kom filiya lulalfongi lom fin mwet kol lun faclu.
Wangin mwet ku in molikomla.
Ke elos misa, elos folokla nu ke kutkut;
In len sacnna akoo lalos nukewa wanginla.
Insewowo mwet se su eis God lal Jacob tuh Elan kasrel,
Ac su filiya lulalfongi lal in LEUM GOD lal,
Su orala kusrao, ac faclu, ac meoa,
Ac ma nukewa loac.
El karingin wulela lal pacl e nukewa.1
El oru nununku suwohs nu sin mwet su akkeokyeyuk,
Ac El sang mwe mongo nu selos su masrinsral.
LEUM GOD El tulala mwet kapir,
Ac El sang liyaten nu sin mwet kun.
El tulokunulosyak su ikori.
El lungse mwet suwoswos lal.
El karingin mwetsac su muta in facl sesr;
El kasru mwet mukaimtal ac katinmas,
Ac El usla mwet koluk nu ke kunausten.
LEUM GOD El tokosra ma pahtpat.
God lom, O Zion, fah leum ke fwil nu ke fwil.
Kaksakin LEUM GOD!
Source notes (1)
- Cross-reference Orek 4:24; 14:15
BIBLE MUTAL. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.