Psalm 140

[Psalm lal David]

Sie Pre In Siyuk Ke Lango

1LEUM GOD, moliyula liki mwet koluk;

Langoeyula liki mwet sulallal.

2Pacl nukewa elos pwapa in oru ma koluk;

Elos purakak akukuin in pacl e nukewa.

3Lohulos oana serpent sulallal;

Kas lalos oana pwasin ke wet cobra.1

4LEUM GOD, moliyula liki ku lun mwet koluk;

Langoeyula liki mwet sulallal

Su kena tuh nga in ikori.

5Mwet filang elos kena sruokyuwi;

Elos oakiya mwe kwasrip lalos,

Ac filiya sruhf pe inkanek uh in sruokyu.

6Nga fahk nu sin LEUM GOD, “Kom God luk.”

LEUM GOD, porongeyu ke nga pang in suk kasru sum!

7LEUM GOD Fulatlana luk, ke ku lom

Kom langoeyula in pacl in mweun.

8LEUM GOD, nikmet sang nu sin mwet koluk ma lungse lalos;

Nikmet akfahsrye pwapa koluk lalos.

9Nikmet sang kutangla nu sin mwet lokoalok luk,

Lela tuh ma koluk elos akoo nu sik in folokyang nu faclos.

10Lela tuh mulut firir in putati faclos;

Lela in sisila elos nu in luf loal ma elos tia ku in sifil illa liki.

11Lela mwet su kinauk kas sutuu ke mwet saya in tia akilenyuk,

A ma koluk in ukweya na mwet sulallal ac kunauselosla.

12LEUM GOD, nga etu lah kom loango sripa lun mwet sukasrup

Ac orala nununku suwohs nu sin mwet enenu.

13Pwayena lah mwet suwoswos elos fah kaksakin kom.

Elos fah muta ye motom.