BIBLE MUTAL
Psalm 128
Mwe Insewowo Nu Selos Su Akos LEUM GOD
Insewowo elos nukewa su akos LEUM GOD,
Su moul fal nu ke lungse lal.
Orekma lom ac fah asot mwe enenu lom.
Kom fah engan ac kapkapak.
Mutan kiom el fah oana soko sak ma isus fahko pus nu in lohm sum,
A tulik nutum fah oana sak olive fusr su apunla tepu lom.
Mwet se su akos LEUM GOD
El fah akinsewowoyeyuk ouinge.
Lela tuh LEUM GOD Elan akinsewowoye kom Zion me!
Lela kom in liye kapkapak lun acn Jerusalem
In len nukewa in moul lom.
Lela tuh kom in moul ac liye tulik nutin tulik nutum!
Lela tuh Israel in muta in misla!
BIBLE MUTAL. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.