BIBLE MUTAL
Psalm 113
Psalm In Kaksakin Wolana Lun LEUM GOD
Kaksakin LEUM GOD!
Kowos mwet kulansap lun LEUM GOD,
Kaksakin Inel.
Lela tuh Inel in kaksakinyuk
Inge ac nu tok ma pahtpat.
Liki kutulap nu roto
Lela Inen LEUM GOD in kaksakinyuk.
LEUM GOD El leum fin mutunfacl nukewa;
Ac wolana lal oan lucng liki kusrao.
Wangin sie oana LEUM GOD lasr.
El muta lucng yen fulat,
Tusruktu El ngeta nu ten
Tuh Elan liye kusrao ac faclu.
El tulokunak mwet sukasrup liki nien sisi kutkut;
El srukak mwet enenu liki infohk uh
Ac oru tuh elos in mwet kawuk lun fisrak,
Aok, mwet fisrak lun mwet lal.
El akfulatye mutan talap in lohm sel sifacna,
Ac akenganyal ke El sang in oasr tulik natul.
Kaksakin LEUM GOD!
BIBLE MUTAL. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.