BIBLE MUTAL
Psalm 110
[Psalm lal David]
LEUM GOD Ac Tokosra Su El Sulela
LEUM GOD El fahk nu sin tokosra, su leum luk,
“Muta siskuk layot
Nwe ke nga filiya mwet lokoalok lom ye niom.”1
LEUM GOD El fah oru tuh ku lom in fahla Zion lac nu saya.
El fahk, “Kom fah leum fin mwet lokoalok lom.”
In len se kom ac mweuni mwet lokoalok lom,
Mwet srahm elos ac fah engan in sifacna eisalosyang in wi mweun.
Mwet fusr lom ac fah tuku nu yurum nu fineol mutal,
Oana sikyak lun aunfong ke lotutang.
LEUM GOD El orala wulela ku lal, su El ac fah tia ekulla.
El fahk ouinge: “Kom ac fah sie mwet tol nwe tok
In oana Melchizedek.”2
LEUM GOD El tu siskom layot;
Ke pacl El kasrkusrak, El ac kutangla tokosra uh.
El ac fah nununku mutunfacl uh
Ac oru tuh nien mweun in sessesla ke monin mwet misa;
El ac fah kutangla tokosra yen nukewa fin faclu.
Tokosra el ac fah nim kof ke infacl srisrik sisken inkanek uh,
Ac el fah eis ku lal kac, ac keyak ac kutangla.
Source notes (2)
- Cross-reference Mt 22:44; Mk 12:36; Lk 20:42–43; Orek 2:34–35; 1 Cor 15:25; Eph 1:20–22; Col 3:1; Heb 1:13; 8:1; 10:12–13
- Cross-reference Heb 5:6; 6:20; 7:17, 21
BIBLE MUTAL. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.