Konda Porja Bible
ନିହିମିୟା 2
ନିହିମିୟା ଜିରୁସାଲାମଦୁ ସନିକା
ଅର୍ତ୍ତକ୍ଷସ୍ତ ରାଜାଦି ସାସନ୍ତି କଡ଼େ ବାର୍ସେକ୍ତୁ ନୀସନ୍1 ଲେଜୁଦୁ ଇୟାୱାଜା ଗଟେଆତାତ୍ ଜେ, ରାଜାଦି ଆଗ୍ଡ଼ି ଅଙ୍ଗୁର୍ରସ ମାନି ୱାଲେ ନାନୁ ଆୟା ଅଙ୍ଗୁର୍ରସ ଅସି ରାଜେଙ୍ଗ୍ ସିତା । ଇୟା ଆଗ୍ଡ଼ି ନାନୁ ୱାନି ବେଟ୍ଆନିକା ଏସ୍କାଙ୍ଗ୍ ଦୁଃକ୍ ଆଏ ମାର୍ହା । ଇବେନୁ ରାଜା ନାଙ୍ଗିଁ ୱେନ୍ବାତାନ୍, “ନିନ୍ ତ ନବ୍ ଆଇ, ଏନ୍ଧା ନି ମକମ୍ ଦୁଃକ୍ ଆତାମାନାତ୍ ? ଇକା ମନ୍ତି ଦୁଃକ୍ ଡ଼ିସ୍ତିଙ୍ଗ୍ ମାରି ଇନିକା ସିଲେ ।” ଆବେଟ୍ ନାନ୍ ନାଣ୍ତ ତିଲାତା । ମାରି, ନାନୁ ରାଜେଙ୍ଗ୍ ଇର୍ହା, “ପେରିରାଜା ୱିଜୁଦିନ୍ ଜିଆ; ଏମେ ଗାଡ଼୍ ପୁର୍ବେଦି ଡକ୍ରାଦାଦାରି ମୁସ୍ତିମାନି ବାଡି, ଆକା ଏସ୍ତିୱାଲେ ରେଆଜି ତେବାତାମାନାତ୍ ମାରି ଆବେଣି ସେର୍ଲେଙ୍ଗ୍ ୱିଜୁ ସିସୁଦୁ ୱେତେ ମାନେ, ନାସ୍ତିୱାଲେ ଏନ୍ଧା ନା ମକମ୍ ଦୁଃକ୍ ଆଏତ୍ ?”
ଆବେଟ୍ ରାଜା ନାଙ୍ଗିଁ ଇର୍ହାନ୍, “ଆର୍ତିଙ୍ଗ୍ ନିନୁ ଇନି ବିସୟ୍ତାନ୍ ୱେର୍ସିନି ?” ଆବେଟ୍ ନାନୁ ମୁସ୍କୁପୁର୍ତି ମାପୁରୁଦି ଲାକ୍ତୁ ପାର୍ତନା କିତା । ମାରି, ନାନୁ ରାଜେଙ୍ଗ୍ ଇର୍ହା, “ଏସ୍କାଙ୍ଗ୍ ପେରିରାଜାଦି ୱେଡ଼ିକା ଆନାତ୍ ମାରି ନି ଦାସ୍ ଏସ୍କାଙ୍ଗ୍ ନି ଆଗ୍ଡ଼ି ଦୟା ପୟ୍ନାମାନାନ୍, ଆର୍ତିଙ୍ଗ୍ ଜିହୁଦା ଦେସ୍ତିଙ୍ଗ୍, ନା ବୁବାରିଲୋକା ମୁସ୍ତିମାନି ବାଡିଦି ଗାଡ଼୍ତୁ ନାଙ୍ଗିଁ ପୋକ୍ନି ଉଣ୍ତିଙ୍ଗ୍ ଇନିଆ, ଆବେଟ୍ ନାନ୍ ଆକା ଡ଼େସି ତିଆର୍ କିନା ।”
ତାନିୱେନେକା ନାଙ୍ଗିଁ ରାଜା ୱେନ୍ବାତାନ୍, “ରାଣି ବା ୱାନି ଲାକ୍ତୁ ବାସ୍ତା ମାର୍ହାତ୍ ନିନୁ ସନ୍ଡ୍ରେଙ୍ଗ୍ ଏସ ଦିନ୍ ଆସ୍ନାତ୍ ? ମାରି ନିନୁ ଏସ୍କାଙ୍ଗ୍ ଡ଼େସି ୱାନି ?” ଇୟାୱାଜା ନାନୁ ୱାନି ଲାକ୍ତୁ ବେଡ଼ା ଟିକ୍ କିତି ୱେନ୍କା ରାଜା ନାଙ୍ଗିଁ ପୋକନି ଉଣ୍ତିଙ୍ଗ୍ ବଦା କିତାନ୍ ।
ମାରିବା, ନାନ୍ ରାଜେଙ୍ଗ୍ ଇର୍ହା, “ଏସ୍କାଙ୍ଗ୍ ପେରିରାଜାଦି ୱେଡ଼ିକା ଆନାତ୍, ଆର୍ତିଙ୍ଗ୍ ପରାତ୍ ଗାଡା ଆୟା ପାଡ଼ାକାଦି ଦେସ୍କାଣି ପେରିକାର୍ ଏଣ୍ତେସ୍ ଜିହୁଦା ଦେସ୍ତୁ ଇନି ସାନ୍ଧି ସନି ଉଣ୍ତିଙ୍ଗ୍ ନାଙ୍ଗିଁ ଡ଼ିସ୍ନା ସିନାର୍, ଇୟାଉଣ୍ତିଙ୍ଗ୍ ୱାରି ଲାକ୍ତୁ ନାଙ୍ଗିଁ ସିଟି ସିଆୟ୍ଆପିତ୍; ମାରି, ମନ୍ଦିର୍ତୁ ମିସାଦେଙ୍ଗ୍ କଟି ସେର୍ଲା ମାରି ଗାଡ଼୍ତି ଗଡା ମାରି ନାନୁ ଡ଼ୁଗୁନି ଇଲୁ ଉଣ୍ତିଙ୍ଗ୍ ପାଟିଆ କିନି ଉଣ୍ତିଙ୍ଗ୍ ନାଙ୍ଗିଁ ୱେର୍କୁ ସିଦେଙ୍ଗ୍ ପେରିରାଜାଦି ବନ୍ କାପ୍କିନି ଆସପ ଲାକ୍ତୁ ଉଡ୍ରି ସିଟି ସିଆୟ୍ଆପିତ୍ ।” ଆବେଟ୍ ନା ଉଣ୍ତିଙ୍ଗ୍ ନା ମାପୁରୁଦି ନେଗି କିୟୁଦି ସାକାଦାନ୍ ରାଜା ଆକା ନାଙ୍ଗିଁ ସିତାନ୍ ।
ଇୟାୱେନେକା ନାନୁ ପରାତ୍ ଗାଡା ଆୟାପାଡ଼ାକାଦି ଦେସ୍କାଣି ପେରିୱାରି ଲାକ୍ତୁ ସୋଲ୍ସି ୱାରିଙ୍ଗ୍ ରାଜାଦି ସିଟି ସିତା । ମାରିବା, ରାଜା ନା ୱାଲେ ସେନାପତି ନି ଗଡ଼େଙ୍ଗ୍ ସାଲାକିନିୱାରିଙ୍ଗ୍ ପୋକ୍ତା ମାର୍ହାନ୍ । ମାତର୍ ଇସ୍ରାଏଲତି ଲୋକା ନେଗେନ୍ କିନି ଉଣ୍ତିଙ୍ଗ୍ ଅରେନ୍ ଲୋକ୍ ୱାତାମାନାନ୍ ଇଜି ୱେନ୍ଜି ହରୋଣିୟ ସନ୍ବଲ୍ଲଟ୍ ନି ଅମ୍ମୋନିୟ ସାକର୍ ଟୋବିୟ ନାଣ୍ତ ଦୁଃକ୍ ଆତାର୍ ।
ଇୟାୱାଜା ନାନୁ ଜିରୁସାଲମତୁ ଇତାନୋ ଆବେନୁ ମୁନେନ୍ ତେବାତା । ଆବେଟ୍ ନାଡ଼ା ନାନୁ ମାରି ନା ୱାଲେ ଏସ ଲୋକ୍ ନିଙ୍ଗିଁତାପ୍; ମାରି, ନା ମାପୁରୁ ଜିରୁସାଲମ ଉଣ୍ତିଙ୍ଗ୍ ଆମାକା କିଦେଙ୍ଗ୍ ନା ମନ୍ତୁ ୱେର୍ତା ମାର୍ହାନ୍, ଆକା ନାନୁ ଏଙ୍ଗ୍ ୱେର୍ଏତା; ମାରି ନାନ୍ ଏମେ ଜାତୁ ମୁସ୍କୁ ଏକ୍ତାମାର୍ହା, ଆକା ଡ଼ିସ୍ତିଙ୍ଗ୍ ଆଇ ଜାତୁ ନା ୱାଲେ ସିଲେତାତ୍ । ମାରି, ନାନ୍ ନାଡ଼ା ସୋସି ବାଟା ସେର୍ଲା ସିଜି ନାଗ କୁଇଁକାଲ୍ ନି ଗାତାମ୍ ଗୁଟାଦୁ ସନି ସେର୍ଲା ସାନ୍ଧି ସର୍ଆ ମାରି ଜିରୁସାଲମତି ରୁଙ୍ଗିଁତି ଗଡା ମାରି ଆବେଣି ସିସୁଦାନ୍ ୱେତିମାନି ସେର୍ଲେଙ୍ଗ୍ ୱିଜୁ ସୁଡ଼ୁତା । ଆବେଟ୍ ନାନ୍ ଜଲାଏରୁ ସେର୍ଲା ମାରି ରାଜାଦି ବାନ୍ଦୁ ସାନ୍ଧି ସର୍ହା; ମାତର୍ ଆବେନୁ ନାଙ୍ଗିଁ ପିଣ୍ତିତିମାର୍ହି ଜାତୁ ସନ୍ଡ୍ରେଙ୍ଗ୍ ସାରି ସିଲେତାତ୍ । ଆର୍ତିଙ୍ଗ୍ ନାନ୍ ନାଡ଼ା ଗାଡା ଲାକ୍ତୁ ସିଜି ମୁସ୍କୁ ବୁଲାଜି ଗଡା ସୁଡ଼ୁତା; ଆବେଟ୍ ନାନ୍ ବୁଲାଜି ବାଟା ସାରି ସିଜି ଡ଼ୁଗୁଜି ଡ଼େସି ୱାତା ।
ମାତର୍ ନାନ୍ ଏମେ ତରିନ୍ ସର୍ଆ ମାରି ଇନିକା କିତା, ଇକା ପେରିକାର୍ ନେସ୍ଏତାର୍, ମାରି, ଆୟାସାନ୍ଧି ନାନୁ ଜିହୁଦିୟରିଙ୍ଗ୍ କି ଜାଜକରିଙ୍ଗ୍ କି ଅଦିକାରିକାଙ୍ଗ୍ କି ପେରିୱାରିଙ୍ଗ୍ କି ଆଇ ପାଣିକିନିୱାରିଙ୍ଗ୍ ଆକା ୱେରେଏ ମାର୍ହା । ଇୟାୱେନେକା ନାନୁ ୱାରିଙ୍ଗ୍ ଇର୍ହା, “ମାଡୁ ଏଣ୍ତେସ୍ନାନି ତାଗ୍ଇ ଅବସ୍ତାଦାନ୍ ମାନାଟ୍, ଜିରୁସାଲମ ଏଣ୍ତେସ୍ ରୁଙ୍ଗିଁତାଦ ତେବାତା ମାନାତ୍ ମାରି ଆବେଣି ସେର୍ଲେଙ୍ଗ୍ ୱିଜୁ ସିସୁଦୁ ୱେତେମାନେ, ଇକା ମିରୁ ସୁଡ଼ୁତି ମାନିଦେର୍, ରାଦୁ, ମାଡୁ ଏଣ୍ତେସ୍ ମାରି ନିନ୍ଦାଦି ଲୋକୁ ଆଇକା, ଇୟାଉଣ୍ତିଙ୍ଗ୍ ଜିରୁସାଲମତି ଗଡା ତିଆର୍ କିନାଟ୍ ।” ଆବେଟ୍ ନା ଉଣ୍ତିଙ୍ଗ୍ ନା ମାପୁରୁଦି ନେଗି କିୟୁ ବିସୟ୍, ମାରିବା ନା ଉଣ୍ତିଙ୍ଗ୍ ରାସାତିମାନି ରାଜାଦି ମାଟା ବିସୟ୍ ନାନୁ ୱାରିଙ୍ଗ୍ ୱେର୍ତା । ଆବେଟ୍କୁ ୱାର୍ ଇର୍ହାର୍, “ରାଦୁ, ମାଡୁ ନିଙ୍ଗିଁଜି ତିଆର୍ କିନାଟ୍ ।” ଇୟାୱାଜା ୱାର୍ ଆୟା ନେଗି ପାଣି ଉଣ୍ତିଙ୍ଗ୍ ନିଜେଦି କିକୁ ଡାଟ୍ କିତାର୍ ।
ମାତର୍ ହରୋଣିୟ ସନ୍ବଲ୍ଲଟ୍ ନି ଅମ୍ମୋନିୟ ସାକର୍ ଟୋବିୟ ନି ଆରବିୟ ଗେସମ୍ ଇକା ୱେନ୍ଜି ମାଙ୍ଗିଁ ସିକ୍ସି ନି ସେମାର୍ କିଜି ଇର୍ହାର୍, “ମିରୁ ଇକା ଇନି ପାଣି କିଜିନିଦେର୍ ? ମିରୁ ଇନି ରାଜା ବିରୁଦ୍ କିନିଦେର୍ ?”
ଆର୍ତିଙ୍ଗ୍ ନାନୁ ୱାରିଙ୍ଗ୍ ଇର୍ଆ, “ଏନ୍ ମୁସ୍କୁପୁର୍ତି ମାପୁରୁ, ୱାନ୍ ମା ପାଣି ପୁରା କିନାନ୍; ମାଡୁ ୱାରି ସାକର୍ ଇୟାଉଣ୍ତିଙ୍ଗ୍ ନିଙ୍ଗିଁଜି ତିଆର୍ କିନାପ୍; ମାତର୍ ଜିରୁସାଲମତୁ ମି ଇନି ବାଗ୍ କି ଅଦିକାର୍ କି ଏତ୍କିନି ସିନା ତେବାଏତ୍ ।”
Source notes (1)
- Footnote ନୀସନ୍ କାଡ଼୍କା ଲେଜୁ
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.