Konda Porja Bible
ପ୍ରେରିତ 6
ସାତ୍ ଲୋକୁ ସେବାକିନିକାର୍
ଏସ ସମୟ ୱେନ୍କା ସିସୁରି ଦଲ୍ ପିର୍ନି ଦାପେ ଦାପେ ଏବ୍ରି ବାସାଦି ଜିହୁଦିର୍ ମାରି ଆବେ ମାନି ଜିହୁଦି ଲୋକା ଲୋଇ ଜାଟିଙ୍ଗ୍ଁ ଆତାର୍ । ଦିନାମିଦି କାଦି କି ଡାବୁଙ୍ଗୁଁ ବାଟାକିନିୱାଲେ ୱାରି ରାଣ୍ତିଆଇମେକାଙ୍ଗ୍ଁ ନେଗେନ୍ ସୁଡ଼ୁଏଜିନାର୍ ଇଜି ଗ୍ରିକ୍ବାସା ୱାର୍ଗିନି ଜିହୁଦିର୍ ଦାବି କିତାର୍ । ଆବେଟ୍ ବାର୍ ଲୋକୁ ପ୍ରେରିତ ସିସୁର୍ ୱିଜୁ ବିସ୍ବାସି ଦଲ୍ତିଙ୍ଗ୍ ଉଣ୍ତା କିଜି ଇର୍ହାନ୍, “ଡାବୁଙ୍ଗୁଁ ସାଲାକିନି ଉଣ୍ତିଙ୍ଗ୍ ମାପୁରୁଦି ବାକ୍ୟ ପ୍ରଚାର୍ କିଦେଙ୍ଗ୍ ଗାଡ଼୍ୟା ଆନିକା ମା ଉଣ୍ତିଙ୍ଗ୍ ଟିକ୍ ସିଲେ । ଆଦେଙ୍ଗ୍ ଏ ତଡ଼ାନ୍କୁ ନି ତାଙ୍ଗିଁକି ମି ମାଣ୍କୁ ପବିତ୍ର ଆତ୍ମା ନି ବୁଦିଦୁ ପୁରା ଆତିମାନି ସାତ୍ ଲୋକାଙ୍ଗ୍ ଆସ୍କିଦୁ । ମାଡ୍ ୱାରିଙ୍ଗ୍ ଇୟା ବିସୟ୍ତୁ ଦାୟିତ୍ ସିନାଟ୍ । ଆର୍ତିଙ୍ଗ୍ଁ ପାର୍ତାନା ନି ପ୍ରଚାର୍ ସେବା ପାଣିଦୁ ମାଡ୍ ପୁରା ସମୟ ସିଦେଙ୍ଗ୍ ଆଟ୍ନିକା ।”
ଦଲ୍ତି ୱିଜେରେ ପ୍ରେରିତ ସିସୁରି ଇୟା ମାଟାଦୁ ୱେଡ଼ିକା ଆତାର୍ ମାରି ଇୟା ପାଣି ଉଣ୍ତିଙ୍ଗ୍ ବିସ୍ବାସ୍ ନି ପବିତ୍ର ଆତ୍ମାଦୁ ପୁରା ଆତିମାନି ସ୍ତିପାନ୍ ଦର୍ତି ଅରେନ୍ ଲୋକ୍ତିଙ୍ଗ୍, ମାରି ପିଲିପ୍ପ, ପ୍ରକର, ନିକାନୋର, ତିମୋନ, ପାର୍ମନା ମାରି ଆଗ୍ଡ଼ି ଜିହୁଦି ଦର୍ମଦୁ ବାଦ୍ଲେ ଆତିମାର୍ଇ ଆଣ୍ଟିୟୋକତି ଅଣଜିହୁଦି ନିକୋଲାୟତିଙ୍ଗ୍ ଆସ୍କିତାର୍ । ପ୍ରେରିତ ସିସୁର୍ ଇୟା ସାତ୍ ଲୋକା ଉଣ୍ତିଙ୍ଗ୍ ପାର୍ତନା କିଜି ୱାରି ମୁସ୍କୁ କିକୁ ଇଟ୍ତାର୍ ।
ଇୟାୱାଜା ମାପୁରୁଦି ବାକ୍ୟ ପ୍ରଚାର୍ କିତାର୍ । ଜିରୁସାଲାମ୍ତୁ ସିସୁରି ଦଲ୍ ନାଣ୍ତଦାନ୍ ନାଣ୍ତ ପିର୍ଦେଙ୍ଗ୍ ଆସ୍ତାର୍; ନାଣ୍ତ ଜାଜକର୍ ବା କ୍ରିସ୍ତ ବିସ୍ବାସ୍ସିର୍ ଆତାର୍ ।
ସ୍ତିପାନ୍ତିଙ୍ଗ୍ ତର୍ତାର୍
ମାପୁରୁମାଣାନ୍ ନାଣ୍ତବାବେ ଆସିର୍ବାଦ୍ ପୟଜି ମାରି ସାକ୍ତିଦୁ ପୁରା ଆତିମାନି ସ୍ତିପାନ୍, ଲୋକା ଲୋଇ ନାଣ୍ତ ସିନା ନି କାବାଆନି ପାଣି କିତାନ୍ । ମାତର୍ କୁରିଣି ମାରି ଆଲେକ୍ଜାଣ୍ତ୍ରିଆ ତ୍ରିଆଦି ଦାସ୍ପାଣିଦାନ୍ ମୁକ୍ଡ଼ାତି ମାର୍ଇ ଜିହୁଦିରିଙ୍ଗ୍ଁ ଅସି ତିଆର୍ଆତି ପାର୍ତନା ଇଲୁଦୁ ମାନି ଏସଲୋକ୍ ସ୍ତିପାନତି ବିରୁଦ୍କିତାର୍ । ୱାର୍ ମାରି କିଲିକିୟା ନି ଆସିଆ ଦେସ୍ତି ଆଇ ଜିହୁଦିର୍ ସ୍ତିପାନତି ୱାଲେ ଜାଟି କିଦେଙ୍ଗ୍ ଆସ୍ତାର୍ । ମାତର୍ ପବିତ୍ର ଆତ୍ମା ସ୍ତିପାନତିଙ୍ଗ୍ ଇୟାୱାଜା ବୁଦି ସିତାତ୍ ଜେ, ଏନ୍ ୱାନି ବିରୁଦ୍ତାନ୍ ୱେର୍ତେଙ୍ଗ୍ ଆଟ୍ଏତାନ୍ । ଆର୍ତିଙ୍ଗ୍ଁ “ୱାନ୍ ମୋସାଦି ବିରଦ୍ତାନ୍ ମାରି ମାପୁରୁଦି ବିରଦ୍ତାନ୍ ମାଟା ଇଜିମାନିକା ମାପ୍ ୱେର୍ଆପ୍,” ଇୟା ମିସ୍ ସାକି ସିନି ଉଣ୍ତିଙ୍ଗ୍ ୱାର୍ ଏସ ଲୋକାଙ୍ଗ୍ ଲାଚ୍ ସିଜି ପୁସେରେକିତାର୍ । ଇୟାୱାଜା ୱାର୍ ଲୋକାଙ୍ଗ୍, ଦାର୍ମୁ ନେତାର୍ ମାରି ଗୁରୁରିଙ୍ଗ୍ ଉତ୍ତାର୍ ମାରି ସ୍ତିପାନତିଙ୍ଗ୍ ଆସ୍ସି ପେରିମିଟିଙ୍ଗ୍ତୁ ଅତାର୍ । ତାନିୱେନ୍କା ୱାର୍ ୱାନି ବିରଦ୍ତାନ୍ ମିସ୍ ସାକି ସିଦେଙ୍ଗ୍ ଇଜି ଏସ ଲୋକାଙ୍ଗ୍ ଲୋଇ ତାତାର୍ । ୱାର୍ ଇର୍ହାର୍, “ଇୟା ଲୋକୁ ୱିଜୁଦିନ୍ ମା ପବିତ୍ର ମନ୍ଦିର୍ ନି ମୋସାଦି ନିୟମ୍ ବିରୁଦ୍ଧତାନ୍ ୱେର୍ସିନାନ୍ । ନାଜରିୟତିୟ ଜିସୁ ମନ୍ଦିର୍ତିଙ୍ଗ୍ ରୁକ୍ନା ପକ୍ନାନ୍ ମାରି ମୋସାଦି ମାଣାନ୍ ମାପ୍ ପୟ୍ତିମାନି ୱିଜୁ ରିତିନିତି ବାଦ୍ଲେ କିନା ଇଜି ଇୟା ଲୋକୁ ଇଜିମାନିକା ମାପ୍ ୱେର୍ଆମାନାପ୍ !” ନାସ୍ତିୱାଲେ ଆବେନ୍ ବାସ୍ତିମାର୍ଇ ୱିଜେରେ ଅର୍ସେ ସ୍ତିପାନ୍ତି ତରିନ୍ ସୁଡ଼ୁତାର୍ ଜେ ୱାନି ମକମ୍ ମୁସ୍କୁପୁର୍ତି ଦୁତ୍ତି ମକମ୍ତି ୱାଜା ତର୍ଜିମାର୍ହାପ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.