Konda Porja Bible
ପ୍ରେରିତ 14
ଇକନିୟାଦୁ ସେବା ପାଣି
ଇକନିୟାଦୁ ଆୟା ଗଟନାଦି ବିସୟ୍ ମାରିଡ଼େସି ଆତାତ୍ : ପାଉଲ ନି ବର୍ଣ୍ଣବା ପାର୍ତନା ଇଲୁଦୁ ସଲ୍ସି ଇୟାୱାଜା ପ୍ରଚାର୍ କିତାନ୍ ଜେ ନାଣ୍ତ ଜିହୁଦି ଲୋକୁ ନି ଅଣଜିହୁଦିର୍ କ୍ରିସ୍ତଦିମାନୁ ବିସ୍ବାସ୍ କିତାର୍ । ମାତର୍ ଅବିସ୍ବାସି ଜିହୁଦିର୍ ଅଣଜିହୁଦିରିଙ୍ଗ୍ ବେମ୍ରି କିଜି ତଡ଼ାନ୍କା ବିରଦ୍ତାନ୍ ମନ୍ତିଙ୍ଗ୍ ଏଗ୍ରିସ୍କିତାର୍ । ଆତିଙ୍ଗ୍ବା ପ୍ରେରିତ ସିସୁର୍ ପ୍ରବୁଦି ବିସୟ୍ତାନ୍ ଆଟ୍ୱାଦାନ୍ ପ୍ରଚାର୍ କିଜି ନାଣ୍ତ ଦିନ୍ ଆବେ ତେବାତାର୍ । ସାକ୍ତିଦି ପାଣି ନି କାବାଆନି ପାଣିୱିଜୁ କିନି ମାଣ୍କୁ ୱାର୍ ପାର୍ମାଣ୍ କିତାର୍ ଜେ, ମାପୁରୁଦି ଦୟା ବିସୟ୍ତାନ୍ ୱାରି ପ୍ରଚାର୍ ଆତି ମାଟା ସତ୍ତାନ୍ ସତ୍ । ଗାଡ଼୍ତି ଲୋକୁ ରୁଣ୍ତି ଦଲ୍ତୁ ବାଗ୍ ଆତାର୍ । ୱାରି ଲୋଇ ଏସ ଲୋକୁ ଜିହୁଦିରିଙ୍ଗ୍ଁ ନି ମାରି ଏସ ପ୍ରେରିତ ସିସୁରିଙ୍ଗ୍ ମାନେଆତାର୍ ।
ତାନିୱେନ୍କା ଏସ ଅଣଜିହୁଦିଲୋକ୍ ନି ଜିହୁଦିଲୋକୁ ୱାରି ନେତାର୍ରି ୱାଲେ ଏକ୍ଜୁଟ୍ ଆଜି ପ୍ରେରିତ ସିସୁରି ଉଣ୍ତିଙ୍ଗ୍ଁ ତାଗ୍ଇ ବ୍ୟବହାର୍ କିନି ଉଣ୍ତିଙ୍ଗ୍ଁ ନି ୱାରିଙ୍ଗ୍ଁ କାଲ୍କାଣ୍ ଡାକ୍ସି ସାପିସ୍ କିଦେଙ୍ଗ୍ଁ ଇଜି ୱାର୍ଗିସାଜି ତିର୍ କିତାର୍ । ପ୍ରେରିତ ସିସୁର୍ ଇୟା ବିସୟ୍ତାନ୍ ନେସ୍ତେଙ୍ଗ୍ଁ ଆଟ୍ସି ଲୁକାନିଆଦି ଲୁସ୍ତ୍ରା ନି ଦର୍ବି ଗାଡ଼୍ତୁ ମାରି ଆୟା ସାରିବେଡ଼୍ତି ମାନି ରାଜିଦୁ ଉର୍କ୍ତାର୍, ମାରି ଆବେ ନେଗିକାବୁର୍ ପ୍ରଚାର୍ କିତାର୍ ।
ଲୁସ୍ତ୍ରା ନି ଦର୍ବିଦୁ ସେବା ପାଣି
ଲୁସ୍ତ୍ରାଦୁ ଅରେନ୍ ଜନମ୍ତାନ୍ ସଟାଲୋକ୍ ମାର୍ହାନ୍ । ୱାଦ୍ ଅଡ଼ପ୍ବା ବୁଲାଦେଙ୍ଗ୍ଁ ଆଟ୍ଏଜି ମାର୍ହାନ୍ । ଆବେ ବାସ୍ସି ୱାନ୍ ପାଉଲ୍ତି ସିକିୟା ୱେନ୍ଜି ମାର୍ହାନ୍ । ୱାନି ମନ୍ତୁ ବିସ୍ବାସ୍ ଆତାତ୍ ମାରି ୱାନ୍ ନେଗେନ୍ ଆନାନ୍ ଇଜି ପାଉଲ ନେସ୍ତେଙ୍ଗ୍ ଆଟ୍ତାନ୍ । ଆଦେଙ୍ଗ୍ଁ ୱାନି ତରିନ୍ ସିଦା ସୁଡ଼୍ଜି ପାଉଲ ନାଣ୍ତ ଆଉଲିଦାନ୍ ଇର୍ହାନ୍, “ପାଦାମ୍ତାନ୍ ସାହାସ୍ଆଜି ସିଦା ନିଲ୍ଆ !” ଆକାନ୍ ଗାତ୍ସି ସାରିବେଡ଼୍ତି ବୁଲାଦେଙ୍ଗ୍ଁ ଆସ୍ତାନ୍ । ଉଣ୍ତାତିମାର୍ହି ଲୋକୁ ପାଉଲତି ଇୟା ପାଣି ସୁଡ଼୍ଜି ୱାରି ଲୁକାନିଆ ବାସାଦାନ୍ ଆଉଲି ଆଜି ଇନ୍ଡ୍ରେଙ୍ଗ୍ଁ ଆସ୍ତାର୍, “ଦିୟାମ୍କୁ ଲୋକୁ ବେସ୍ତାନ୍ ମାବାନୁ ୱାତାମାନାର୍ ।” ୱାର୍ ବର୍ଣ୍ଣବାଦିଙ୍ଗ୍ଁ ଜିଅସ୍ ମାରି ପାଉଲ ପେରିକାନ୍ ମାନିଙ୍ଗ୍ ୱାନିଙ୍ଗ୍ ହେରମିସ୍ ଇର୍ହାର୍ । ଗାଡ଼୍ତି ଆତ୍ରେ ମାନି ଜିଅସ୍ ମନ୍ଦିର୍ତି ପୁଜାରି, ସେର୍ଲା ଲାକ୍ତୁ ଏସ ସଣ୍ତଙ୍ଗ୍ଁ ନି ପୁଙ୍ଗୁଁ ତାତାନ୍, ଇରିଙ୍ଗ୍ ୱାନ୍ ମାରି ଆବେ ଉଣ୍ତାତିମାର୍ହି ଲୋକୁ ପ୍ରେରିତ ସିସୁରି ଉଦେସ୍ତାନ୍ ପୁଜା ସିଦେଙ୍ଗ୍ ଇଜି ବଦାକିତା ମାର୍ହାର୍ ।
ୱାର୍ ଏମେ ପାଣି କିଦେଙ୍ଗ୍ଁ ସଲ୍ସିମାର୍ହାର୍, ସିସୁର୍ ଅର୍ତାତ୍ ବର୍ଣ୍ଣବା ନି ପାଉଲ ଆକା ୱେର୍ଇଦାପ୍ରେ ନିଜେଦି ଆଙ୍ଗିଁଙ୍ଗ୍ କିସ୍ତା ପକ୍ତାର୍, ଲୋକା ଲୋଇ ଉର୍କିସି ସଲ୍ସି ଆଉଲି ଆଜି ଇର୍ହାର୍, “ମିର୍ ଏନ୍ଦା ଇକା କିଜିନିଦେର୍ ? ମାପ୍ ମି ୱାଜା ଲୋକୁ ମାତର୍ । ମି ଲାକ୍ତୁ ନେଗି କାବୁର୍ ପ୍ରଚାର୍ କିଦେଙ୍ଗ୍ଁ ଇଜି ମାରି ଇୟା ଅସାର୍ ବିସୟ୍ତାନ୍ ସୁପ୍ ଆଜି, ବାଦଡ଼୍, ଦୁନିଆ, ସାମ୍ଦୁର୍ ନି ଆବେମାନି ୱିଜୁ ବିସୟ୍ତି ତିଆର୍କିତି ଜିବନ୍ମାନି ମାପୁରୁଦି ତରିନ୍ ମିଙ୍ଗିଁ ଅତେଙ୍ଗ୍ଁ ଇଜି ମାପ୍ ଇବେ ୱାତାମାନାପ୍ । ଆଗ୍ଡ଼ି ନିଜେଦିବଦାଦାନ୍ ନିଜେଦି ସାରିଦୁ ସନ୍ଡ୍ରେଙ୍ଗ୍ଁ ଇଜି ମାପୁରୁ ଲୋକାଙ୍ଗ୍ ଡ଼ିସ୍ତା ସିତାମାର୍ହାନ୍ । ମାତର୍ ୱାନି ୱିଜୁ ନେଗି ପାଣିଦାନ୍ ୱାନ୍ ୱିଜୁଦିନ୍ ୱାନି ୱିଜୁଦିନ୍ମାନି କାବୁର୍ ସିତାମାନାନ୍; ୱାନ୍ ବାଦଡ଼୍ତାନ୍ ପିର୍ରୁ ମାରି ଟିକ୍ ୱେଡ଼ାଦୁ ପାସି ସିନାନ୍, କାଦି ଜଗେକିନାନ୍ ମାରି ୱେଡ଼ିକାଦାନ୍ ମି ଜିବନ୍ ପୁରା କିନାନ୍ ।” ଇୟାୱିଜୁ ମାଟା ଇନ୍ଜି ପ୍ରେରିତ ସିସୁର୍ ଏଣ୍ତେସ୍କିଜିବା ପୁଜା ସିନିମାଣାଟ୍ ୱାରିଙ୍ଗ୍ଁ ତେବାକିତାର୍ ।
ପିସିଦିଆଦି ଆଣ୍ଟିୟକ ନି ଇକନିୟାଦାନ୍ ଏସ ଜିହୁଦି ଲୋକୁ ୱାତାମାର୍ହାର୍, ୱାର୍ ଲୋକାଙ୍ଗ୍ ଏଗ୍ରିସ୍କିଜି ପାଉଲତିଙ୍ଗ୍ଁ କାଲ୍କାଣୁକୁ ଡାକ୍ତାର୍ ମାରି ୱାନିଙ୍ଗ୍ଁ ସାତାନ୍ ଇଜି ଅଡ଼୍ବିଜି ଗାଡ଼୍ତି ଆତ୍ରେ ରେଲ୍ଜି ଅତାର୍ । ମାତର୍ ସିସୁର୍ ୱାଜି ୱାନି ସାରିବେଡ଼୍ତି ଉଣ୍ତାଜି ନିର୍ହି ୱେନ୍କା ୱାନ୍ ନିଙ୍ଗିଁଜି ଗାଡ଼୍ତୁ ଡ଼େସିସର୍ହାନ୍ । ମାରିନାଣ୍ତିଙ୍ଗ୍ଁ ୱାନ୍ ନି ବର୍ଣ୍ଣବା ଦର୍ବିଦୁ ସର୍ହାର୍ ।
ସିରିଆଦି ଆଣ୍ଟିୟକଦୁ ଡ଼େସିୱାତାର୍
ପାଉଲ ନି ବର୍ଣ୍ଣବା ଦର୍ବିଦୁ ସୁସମାଚାର୍ ପ୍ରଚାର୍ କିଜି ନାଣ୍ତ ସିସୁରିଙ୍ଗ୍ ଲାବ୍ କିତାର୍ । ତାନିୱେନ୍କା ୱାର୍ ଲୁସ୍ତ୍ରା, ଇକନିୟା ନି ପିସିଦିଆଦି ଆଣ୍ଟିୟକଦୁ ଡ଼େସିସର୍ହାର୍ । ୱାର୍ ବିସ୍ବାସିରିଙ୍ଗ୍ଁ ନିଜେଦି ବିସ୍ବାସ୍ତୁ ଡାଟ୍ତାନ୍ ମାନ୍ଡ୍ରେଙ୍ଗ୍ଁ ଇଜି ମନ୍ତିଙ୍ଗ୍ ୱେଡ଼ିକା କିବିସ୍କିତାର୍ । ୱାର୍ ସିକିୟା ସିଜି ଇର୍ହାର୍, “ମାପୁରୁଦି ରାଜିଦୁ ଡ଼ୁଗ୍ଦେଙ୍ଗ୍ଁ ଇଜି ମାଙ୍ଗିଁ ନାଣ୍ତ କାସ୍ଟୁଦୁକୁ ବା ସିଜି ସନ୍ଡ୍ରେଙ୍ଗ୍ଁ ଆନାତ୍ ।” ୱିଜୁ ମଣ୍ତଲିଦୁ ୱାର୍ କିକୁ ଇଡ୍ଜି ମଣ୍ତଲିଦି ପେରି ନେତାର୍ରିଙ୍ଗ୍ ବାସେ କିତାର୍ ମାରି ଏମେ ପ୍ରବୁଦିମାନୁ ୱାର୍ ବିସ୍ବାସ୍ କିତାମାର୍ହାର୍, ପାର୍ତନା ନି ଉପବାସତି ୱାଲେ ୱାରିଙ୍ଗ୍ଁ ଆୟା ପ୍ରବୁଦି ଲାକ୍ତୁ ସର୍ପେ କିତାର୍ ।
ପିସିଦିଆ ରାଜି ସିଜି ୱାର୍ ପାମ୍ଫିଲିଆଦୁ ୱାତାର୍ । ଆବେ ପର୍ଗାଦୁ ପ୍ରଚାର୍ କିଜି ଆତ୍ତାଲିଆଦୁ ସର୍ହାର୍ । ଆବେଟ୍କୁ ୱାର୍ ଜାହାଜ୍ତାନ୍ ଆଣ୍ଟିୟକଦୁ ଡ଼େସି ୱାତାର୍ । ଇୟା ଆଣ୍ଟିୟକଦୁ ଇଲେଇ ଆତି ମାନି ପାଣି ଉଣ୍ତିଙ୍ଗ୍ଁ ମାପୁରୁଦି ଦୟା ଦାନ୍ ୱାର୍ ସର୍ପେ ଆତାମାର୍ହାର୍ ।
ୱାର୍ ଆଣ୍ଟିୟକଦୁ ଇଜି ମଣ୍ତଲିଦି ଲୋକାଙ୍ଗ୍ ଉଣ୍ତାକିତାର୍ । ମାପୁରୁ ୱାରି ଉଣ୍ତିଙ୍ଗ୍ଁ ଆମା ୱିଜୁ କିତାମାର୍ହାନ୍ ମାରି ଅଣଜିହୁଦିରି ବିସ୍ବାସ୍ ଉଣ୍ତିଙ୍ଗ୍ଁ ଏଣ୍ତେସ୍ ସାରି ରେତା ସିତାମାର୍ହାନ୍, ଆୟାୱିଜୁ ୱାରିଙ୍ଗ୍ଁ ୱେର୍ତାର୍ । ଆବେ ବିସ୍ବାସିରି ୱାଲେ ୱାନ୍ ନାଣ୍ତ ଦିନ୍ ସାନ୍ଧି ତେବାତାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.