Konda Porja Bible
୨ ତିମତି 3
ସାରାସାରି ଦିନ୍
ମନେ ଇଡ୍ଦୁ, ସାରାସାରି ଦିନ୍ତୁ ଗାଦି ରାଓକୁ ୱାଜି ଇନେ । ଲୋକୁ ନିଜେଦିଙ୍ଗ୍ ତରାନିକା, ଦନ୍ଲୋବ୍, ଗର୍ବ, ନିନ୍ଦା; ୱାର୍ ବୁବାୟାୟାଙ୍ଗେ ମାନାଏଣ୍ଗା ୱାରିଙ୍ଗ୍ ଅପ୍ମାନ୍ କିନାର୍; ୱାରି ମୋନ୍ତାନ୍ ଦୟା ମାରି ଦାର୍ମୁ ମାରାଗ୍ନାତ୍, ୱାର୍ ଆନାର୍ ଆଇ ଲୋକା ସୁରି କିନିକାର୍, ରିସାଆନିକା ମାରି ବୟଙ୍କାକାର୍ତିକାର୍; ୱିଜୁ ନେଗି ବିସୟ୍ତିଙ୍ଗ୍ କାଡ଼ାନାନ୍ । ୱାର୍ ଗର୍ବଦାନ୍ କେଇନିକା ଆଜି ବିସ୍ବାସ୍ ଆରାକିଜି ମାରି ବିଚାର୍ସିଲିକାର୍ ଆନାର୍; ୱାର୍ ମାପୁରୁଦି ବକ୍ତିମାଣାନ୍ ଉଣିତିନିମାନୁ ନାଣ୍ତ୍ ସୁକ୍ କିନାର୍ । ଦାର୍ମୁଦି ସତ୍ତି ସାକ୍ତିଦିଙ୍ଗ୍ ମାନାଏଣ୍ଗା ୱାର୍ ଆତ୍ରେରି ଦାର୍ମୁପାଣିଦିଙ୍ଗ୍ ୱିଜୁ ଅଡ଼୍ବିନାର୍ । ଇୟାୱାରିମାଣୁକୁ ମିର୍ ଆକ ମାନ୍ଡ୍ରୁ । ଇୟାୱାଜା ଲୋକୁ ଏସଲୋକା ଇଲ୍କାଙ୍ଗ୍ ସୋଲ୍ସି ବପୁସିଲି ଆଇମେକା ମୁସ୍କୁ ଆସା ଇଡ୍ନାର୍ । ଆମା ଆଇମେକ୍ ଇନିଇନି ଆସାଦି ଲାକ୍ତୁ ଆଜି ନିଜେଦି ପାପ୍ ବୋଜୁଦୁ ଆଜି ପଡ଼େଆନେମାନେ । ଆମାକେଙ୍ଗ୍ ୱିଜୁଦିନ୍ ସତ୍ ନେସ୍ତେଙ୍ଗ୍ ସେସ୍ଟା କିଜିମାନେ, ମାତର୍ ତାନି ବିସୟ୍ ପୟ୍ଉ, ଇୟାୱାଜା ଆଇମେକାଙ୍ଗ୍ଁ ୱାର୍ ୱାରିଆଡ୍ଗି କିନାର୍ । ଆଉ ଯନ୍ନିସ ମାରି ଯମ୍ୱ୍ରୀସ ଏଣ୍ତେସ୍ ମୋସାଦି ବିରୁଦ୍ କିତାମାର୍ହାର୍, ଆୟାୱାଜା ୱେନ୍କାରି ଦିନ୍ତୁ ଇୟା ତାଗ୍ଇକାର୍ ସତ୍ତିଙ୍ଗ୍ ବିରୁଦ୍ କିନାର୍ ୱାରି ବୁଦି ପାଣି ସିଏଜିନାତ୍ ମାରି ୱାରି ଦାର୍ମୁବିସ୍ବାସ୍ ବେକାର୍ ଆତାତ୍ । ମାତର୍ ୱାର୍ ନାଣ୍ତ୍ ଆଗ୍ଡ଼ି ଆଦେଙ୍ଗ୍ ଆଟ୍ଏର୍ । ଅର୍ଲେନ୍ ୱିଜେରେ ନେସ୍ନାର୍, ୱାର୍ ଏସ ବୁଦିସିଲିକାର୍ । ଯନ୍ନିସ ମାରି ଯମ୍ୱ୍ରିସଦି ଜିବନ୍ତୁ ଆମାକା ଗଟାତା ମାର୍ହାତ୍, ୱାରି ଜିବନ୍ତୁ ଆକାନେ ଗଟାନାତ୍ ।
ସାରାସାରି ମାଟା
ମାତର୍ ନିନ୍ ନା ସିକିୟା, ନା ବ୍ୟବହାର୍ ମାରି ନା ଜିବନ୍ତି ପାଣି ସୁଡ଼ୁତିମାନିଦେର୍ । ନା ବିସ୍ବାସ୍, ସାସ୍, ଜିବନ୍ନୋନିକା, ସାନ୍ତି, 1ନା କାସ୍ଟୁ ମାରି ଦୁଃକ୍ବୋଗ୍ ନିନ୍ ସୁଡ଼ୁତିମାନି । ନିନ୍ ନେସ୍ତିମାନି, ଏଣ୍ତେସ୍ ଆଣ୍ଟିୟକ, ଇକନିୟା, ଲୁସ୍ତ୍ରାଦୁ ନାନ୍ ନାଣ୍ତ୍ କାସ୍ଟୁ ପୟ୍ତା ମାର୍ଆ । ମାତର୍ ଏଣ୍ତେସ୍ ୱାନ୍ ୱିଜୁଦାନ୍ ପ୍ରବୁ ନାଙ୍ଗିଁ ଉଦାର୍ କିତାମାନାନ୍ । ସତ୍ତାନ୍ ଆମାକାର୍ କ୍ରିସ୍ତ ଜିସୁଦି ୱାଲେ ମିସାଜି ଦାର୍ମୁଜିବନ୍ତାନ୍ ଜିଦେଙ୍ଗ୍ ଇଚ୍ଛା କିନାନ୍, ୱାରିଙ୍ଗ୍ ଦୁଃକ୍କାସ୍ଟୁଦିଙ୍ଗ୍ ସାମ୍ନା ଆଦେଙ୍ଗ୍ ପଡ଼ାନାତ୍ । ମାତର୍ ସୁରିୱାର୍ଗିନି ଲୋକ୍ ମାରି ପୁକାପୁଲିକିନିୱାରି ସାରି ପୁରାସେସ୍ ଆନିତରିନ୍ ୱାର୍ ଆଇୱାରିଙ୍ଗ୍ ଟକେ କିନାର୍ ସାରାସାରି ୱେନ୍କା ନିଜେ ଗୁଟାଦୁ ଆର୍ନାର୍ । ମାତର୍ ଆମା ୱିଜୁ ସତ୍ ସିକିୟା କିଜି ଡାଟ୍ତାନ୍ ବିସ୍ବାସ୍ କିଜିନିଦେର୍, ଆୟାୱିଜୁଦୁ ନିନ୍ ଡାଟ୍ତାନ୍ ତେବାଆ । ନି ଗୁରୁର୍ ଏନ୍, ନିନ୍ ନେସ୍ତିମାନି । କ୍ରିସ୍ତ ଜିସୁଦିମାନୁ ବିସ୍ବାସ୍ କିଜି ରକିୟା ପୟ୍ନି ବୁଦି ଆମା ପବିତ୍ର ଦାର୍ମୁସାସ୍ତ୍ରଦୁ ସୁଡ଼ିତିମାନିଦେର୍, ମିର୍ କଡ଼ୱାଲେରାନ୍ ଆୟାୱିଜୁ ସାସ୍ତ୍ର ପଡ଼ାଜି ବୁଜାତିମାନିଦେର୍ । ୱିଜୁ ଦାର୍ମୁସାସ୍ତ୍ର ମାପୁରୁଦି ମାଣାନ୍ ସିଆୟ୍ଆତା ମାନାତ୍ ମାରି ସତ୍ ବାକ୍ୟ, ସିକ୍ୟା, ମିଚ୍ତି ବିରୁଦ୍ କିଜି ମାରି ବୁଲ୍ତିଙ୍ଗ୍ ଟିକ୍ କିନି ଉଣ୍ତିଙ୍ଗ୍ ୱେର୍ସି, ସତ୍ ଜିଦେଙ୍ଗ୍ ଦାର୍ମୁସାସ୍ତ୍ର ସାହାଜ୍ୟ କିନାତ୍, ଏଣ୍ତେସ୍ ମାପୁରୁଦି ଲୋକୁ ପୁରା ଆଜି ୱିଜୁ ନେଗି ପାଣି ଉଣ୍ତିଙ୍ଗ୍ ଜଗ୍ ପୟ୍ଦେଙ୍ଗ୍ ଆଟ୍ନାନ୍ ।
Source notes (1)
- Cross-reference ପ୍ରେରିତ ୧୩:୧୪-୫୨ ପ୍ରେରିତ ୧୪:୧-୭ ପ୍ରେରିତ ୧୪:୮-୨୦.
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.