Konda Porja Bible
୨ ପିତର 3:9
Verse 9 is marked below, with the whole chapter around it. Read from the start
ପ୍ରବୁଦି ୱାନିଦିନ୍
ଏ ନା ତଡ଼୍କୁ, ନାନ୍ ଇଲେଇ ମି ଲାକ୍ତୁ ଇୟା ମାରିଉଣ୍ଡ୍ରି ଆକୁ ରାସ୍ସିନା । ଇୟା ରୁଣ୍ତି ବଇଆଙ୍ଗ୍ ଇୟାୱିଜୁ ବିସୟ୍ ଏତ୍ କିବିସିକିଜି ମି ମନ୍ତୁ ନେଗି ଚିନ୍ତା ଜିବନ୍ କିନି ଉଣ୍ତିଙ୍ଗ୍ ସେସ୍ଟା କିଜିନା । ପୁର୍ବେକାଡ଼ାଦୁ ପବିତ୍ର ବାବବାଦିର୍ ଆମାୱିଜୁ ବାବବାଣି ୱେର୍ତା ମାର୍ହାର୍ ମାରି ରକିୟା କିନି ପ୍ରବୁଦି ଆମାୱିଜୁ ବାକ୍ୟ ମିଙ୍ଗିଁ ପ୍ରେରିତ୍ ସିସୁର୍ ସିତାମାନାର୍, ଆକା ମିଙ୍ଗିଁ ଏତ୍ କିବିସ୍ କିଦେଙ୍ଗ୍ ନାନୁ ଅଡ଼୍ବିନା । 1ପାର୍ତୁମ୍ ମିରୁ ନେସ୍ତେଙ୍ଗ୍ ଆନାତ୍ ଜେ, ଇୟା ସାରାସାରି ଦିନ୍କାଙ୍ଗ୍ ଏସଲୋକ୍ ସତ୍ ପାଣିଦୁ ଡ଼ିସ୍ସି କେବଲ୍ ନିଜେଦି ତାଗ୍ଇପାଣିଦାନ୍ ବୁଲାନାର୍; ୱାର୍ ମିଙ୍ଗିଁ ସେମାର୍ କିଜି ୱେନ୍ବାନାର୍, “ଜିସୁ ୱାନାନ୍ ଇଜି ପାର୍ମାଣ୍ କିତିମାରିଇଦେର୍, ସିଲେ ନୋ ? ୱାନ୍ ଇଲେଇ ଏମେମାନୁ ? ମା ପୁର୍ବେଦିଡକ୍ରାଦାଦାର୍ ସାତାସୋର୍ହାର୍, ମାତର୍ ୱିଜୁ ବିସୟ୍ ଦୁନିଆ ତିଆର୍ଆତି ଆଗ୍ଡ଼ିରାନ୍ ଏଣ୍ତେସ୍ ମାର୍ହାତ୍, ଇଲେଇବା ୱିଜୁ ଆୟାୱାଜା ମାନାତ୍ !” ୱାର୍ ନେସ୍ସି ନେସ୍ସି ବାଣାନାର୍ ଜେ, ତିଆର୍ଆତିଆଗ୍ଡ଼ିରାନ୍ ମାପୁରୁ ମାଟା ଇର୍ହାନ୍ ମାରି ବାଦ୍ଡ଼ ନି ଦୁନିଆ ତିଆର୍ ଆତାତ୍, ଦୁନିଆ ଏରୁଦାନ୍ ଏରୁ ମିସାଆଜି ତିଆର୍ ଆତାତ୍; ମାରି, ଆୟା ପୁର୍ବେକାଡ଼ାଦି ପୃତିବି ଅର୍ଲେନ୍ ଗାଲିପିରୁଦାନ୍ ଦଂସ ଆନାତ୍ । ମାତର୍ ଇଲେଇ ଆମା ବାଦ୍ଡ଼ ନି ଦୁନିଆ ମାନାତ୍, ଆକା ମାପୁରୁଦି ୱେର୍ତି ମାଟାଦାନ୍ ସିସୁଦୁ ଦଂସ ଆନି ଉଣ୍ତିଙ୍ଗ୍ ଇଡାଇଆତାମାନାତ୍ । ଆମା ନାଣ୍ତିଙ୍ଗ୍ ଅଦାର୍ମୁଦି ଲୋକୁ ବିସାର୍ ଆଜି ନାସ୍ଟୁ ଆନାର୍, ଆୟା ଦିନ୍ ସାନ୍ଦି ଆକା ନେଗେନ୍ତାନ୍ ତେବାନାତ୍ ।
ମାତର୍ ଏ ନା ତଡ଼୍କୁ, ପ୍ରବୁଦି ଲାକ୍ତୁ ଉଣ୍ତ୍ରି ଦିନ୍ ଜେ ଅଜାର୍ଅଜାର୍ ବାର୍ସେକ୍ ୱାଜା ମାରି ଅଜାର୍ଅଜାର୍ ବାର୍ସେକ୍ ଜେ ଉଣ୍ତ୍ରି ଦିନ୍ ୱାଜା, ଇୟା ଉଣ୍ତ୍ରି ବିସୟ୍ ମିରୁ ବାଣାମାଟ୍ । ୱେଡ଼ାଆନାତ୍ ଇଜି ଏଣ୍ତେସ୍ ଏସଲୋକ୍ ଅଡ଼୍ବିନାର୍, ପ୍ରବୁ ନିଜେଦି ପାର୍ମାଣ୍ ପୁରା କିଦେଙ୍ଗ୍ ୱେଡ଼ା କିଏନ୍, ମାତର୍ ଏଣ୍ତେସ୍ ଏନ୍ ନାସ୍ଟୁ ଆଏର୍, ୱିଜେରେ ମୋନ୍ତିଙ୍ଗ୍ ବାଦ୍ଲେ କିନାର୍, ଇକା ବଦା କିଜି ୱାନ୍ ମି ଉଣ୍ତିଙ୍ଗ୍ ୱିଜୁଦିନ୍ ସାସ୍ ଆସ୍ସି ତେବାତାମାନାନ୍ । 2
ମାତର୍ ପ୍ରବୁଦି ଦିନ୍ ଡଙ୍ଗାଁର୍ଏନ୍ ୱାଜା ୱାନାତ୍ । ଆୟା ନାଣ୍ତିଙ୍ଗ୍ ବାଦଡ଼ୱିଜୁ ଉନ୍ଡ୍ରି ନାଣ୍ତ ଆଉଲିଦାନ୍ ୱିଜୁ ମାର୍ଗାନାତ୍, ମାରି ବାଦଡ଼ତି ଗ୍ରହ ସୁକେଙ୍ଗ୍ୱିଜୁ ୱେଜି କାସ୍ସି ଦଂସ ଆନେ ମାରି ଦୁନିଆ ସିକିୟାଦାନ୍ ତାନି ୱିଜୁ ଜିନିସ୍କା ୱାଲେ ଦଂସ ଆନାତ୍ । ଜଦି ଇୟାୱାଜା ୱିଜୁ ବିସୟ୍ ଦଂସ ଆନାତ୍, ଆର୍ତିଙ୍ଗ୍ ଅଡ଼୍ବିଜ ସୁଡ଼ୁଦୁ, ମି ଜିବନ୍ ଏଣ୍ତେସ୍ନାନିକା ଆନିକା ମାନାତ୍ । ଆକା ପବିତ୍ର ମାରି ମାପୁରୁଦିମାନୁ ସିଆୟ୍ ଆନିକା ଅରେନ୍ ଦର୍କାର୍ । ମିରୁ ପ୍ରବୁଦି ଦିନ୍ତିଙ୍ଗ୍ କାପ୍କିଜି ତେବାନି ୱାଲେ, ଆକା ଏଣ୍ତେସ୍ ବେଗି ୱାନାତ୍, ଇୟାଉଣ୍ତିଙ୍ଗ୍ ନିଜେଦିଙ୍ଗ୍ ତିଆର୍ ଆଦୁ । ଆୟା ନାଣ୍ତିଙ୍ଗ୍ ବାଦଡ଼ୱିଜୁ କାସ୍ସି ଦଂସ ଆନାତ୍ । ବାଦଡ଼ତି ଗ୍ରହ ସୁକେଙ୍ଗ୍ୱିଜୁ ପୁରାନାଣ୍ତ ତାତିଦାନ୍ ତର୍ଲେଆନେ ସନେ । 3ମାତର୍ ମାପ୍ ମାପୁରୁ ପାର୍ମାଣ୍ କିତିମାନି ଉଣ୍ତ୍ରି ପୁନି ବାଦଡ଼ ମାରି ପୁନି ଦୁନିଆଦିଙ୍ଗ୍ କାପ୍କିଜି ମାନାପ୍, ଆବେନୁ ଦାର୍ମୁଦିଲୋକୁ ତିଆର୍ ଆନାତ୍ ।
ମାରି, ନା ତଡ଼୍କୁ, ଆୟା ନାଣ୍ତିଙ୍ଗ୍ କାପ୍କିନି ୱାଲେ ମିରୁ ମାପୁରୁଦି କାଣାଗାଦୁ ନେଗେନ୍ ମାରି ଦୋସ୍ସିଲିକା ଆଜି ସାନ୍ତିଦାନ୍ ତେବାନି ଉଣ୍ତିଙ୍ଗ୍ ସେସ୍ଟା କିଦୁ । ଅଡ଼୍ବିଜ ସୁଡ଼୍ଦୁ, ପ୍ରବୁ ଏସ ନେଗିକାନ୍ । ମି ରକିୟା ଉଣ୍ତିଙ୍ଗ୍ ୱାନ୍ ଏସ ସୁଜୋଗ୍ ସିଜିନାନ୍ । ମା ଲାଡ୍ତି ତଡ଼ାନ୍ ପାଉଲ ବା ମାପୁରୁଦିମାଣୁକୁ ପୟ୍ତିମାନି ବୁଦିଦାନ୍ ମି ଲାକ୍ତୁ ଆୟାୱାଜା ଆକୁ ରାସ୍ତାମାନାନ୍ । ୱାନି ନିଜେଦି ୱିଜୁ ବଇଙ୍ଗାଁ ବା ଇୟାୱିଜୁ ବିସୟ୍ ରାସ୍ସି ଆୟାୱାଜା ୱେର୍ନାନ୍; ଆୟାୱିଜୁଦୁ ଇୟାୱାଜା ଏସ ବିସୟ୍ ମାନାତ୍, ଆମାକାକି ବୁଜାଦେଙ୍ଗ୍ ଆଟ୍ଇକା । ମାରି ଅସିକିତ୍, ଦାନ୍ଦାଆନି ଲୋକୁ ସାସ୍ତ୍ରଦି ଆଇଆଇ ପାଟ୍ ୱାଜା ପାଉଲତି ବଇଙ୍ଗାଁ ବା ତାଗ୍ଇ ଅର୍ତ କିନାର୍ । ଇୟାଉଣ୍ତିଙ୍ଗ୍ ୱାର୍ ନିଜେ ନିଜେଦି ସାନିକା ପାଣି କିଜିନାର୍ । ମାତର ନା ତଡ଼୍କୁ, ମିରୁ ଇୟାୱିଜୁ ଆଗ୍ଡ଼ିରାନ୍ ନେସ୍ତିମାନିଦେର୍ । ଆର୍ତିଙ୍ଗ୍ ଜାଗ୍ରାତା ଆଜମାନ୍ଡ୍ରୁ, ଏଣ୍ତେସାତିଙ୍ଗ୍ ତାଗ୍ଇଲୋକା ବାୟାନାନି ସିକିୟାଦୁ ସୋଲ୍ସି ମି ଆଟୁୱା ବିସ୍ବାସ୍ତାନ୍ ଆକ ସଲ୍ମାଟ୍ । ମାତର୍ ମା ପ୍ରବୁ ମାରି ରକିୟାକର୍ତ୍ତା ଜିସୁ କ୍ରିସ୍ତଦି ଦୟା ମାରି ବୁଦିଦାନ୍ ମିରୁ ପିର୍ଦୁ । ଇଲେଇ ମାରି ୱିଜୁଦିନ୍ ସାନ୍ଦି ୱାନି ଗୌରବ୍ ଆପିତ୍, ଆମେନ୍ ।
Source notes (3)
- Cross-reference ଜିହୁଦା ୧:୧୮.
- Cross-reference ମାତିଉ ୨୪:୪୩; ଲୁକ ୧୨:୩୯; ୧ ତେସଲନିକିୟ ୫:୨; ପ୍ରକାଶିତ ୧୬:୧୫.
- Cross-reference ପ୍ରକାଶିତ ୨୧:୧.
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.