Konda Porja Bible
୨ ପିତର 1
ସିମୋନ ପିତର, ଜିସୁ କ୍ରିସ୍ତଦି ଅରେନ୍ ଦାସ୍ ମାରି ସିସୁ ମା ମାପୁରୁ ମାରି ରକିୟାକିନି ଜିସୁ କ୍ରିସ୍ତଦି ଦାର୍ମୁଦି ଉଣ୍ତିଙ୍ଗ୍ ଆମାକାର୍ ମା ୱାଲେ ସାମାନ୍ତାନ୍ ନାଣ୍ତଦାରାଦି ବିସ୍ବାସ୍ ପୟ୍ତାମାନାର୍, ୱାରି ଲାକ୍ତୁ ସିଟି ରାସ୍ସିନା ।
ମାପୁରୁ ମାରି ମା ପ୍ରବୁ ଜିସୁ କ୍ରିସ୍ତଦି ବିସୟ୍ତାନ୍ ମି ବୁଦି ଦାନ୍ ମି ଉଣ୍ତିଙ୍ଗ୍ ଦୟା ମାରି ସାନ୍ତି ନାଣ୍ତ୍ଦାନ୍ ନାଣ୍ତ୍ ଆପିତ୍ ।
ମାପୁରୁଦି କୁକ୍ନିକା ମାରି ଆସ୍କିନିକା
ଦାର୍ମୁ ଜିବନ୍ କାଟେକିନି ଉଣ୍ତିଙ୍ଗ୍ ମାଦି ଆମାକା ୱିଜୁ ଦର୍କାର୍, ଆକା ମାପୁରୁ ନିଜେଦି ସାକ୍ତି ଦାନ୍ ମାଙ୍ଗିଁ ଦାନ୍ କିତାମାନାନ୍ । ଏନ୍ ନିଜେଦି ଗୌରବ୍ ମାରି ଦାର୍ମୁପାଣିଦୁ ମିସାନି ଉଣ୍ତିଙ୍ଗ୍ ମାଙ୍ଗିଁ କୁକ୍ତାମାନାନ୍ । ୱାନିଙ୍ଗ୍ ନେସ୍ତି ମାଣୁକୁ ମାପ୍ ଇୟା ଦାନ୍ ପୟ୍ତା ମାନାପ୍ । ଇୟାୱାଜା ୱାନ୍ ମାଙ୍ଗିଁ ୱାନି ପାର୍ମାଣ୍ତି ଇସାବ୍ତାନ୍ ନାଣ୍ତଦାରାଦିକା ମାରି ପୁରାପେରିକା ଦାନ୍ ସିତାମାନାନ୍ । ଇୟାୱିଜୁ ଦାନ୍ସିତି ସାକାଦାନ୍ ମିରୁ ଇୟା ଦୁନିଆଦି ଦଂସକିନି ପାଣିଦାନ୍ ରକିୟା ପୟ୍ଜି ମାପୁରୁଦି ନିଜେଦି ଗୁଣ୍ତୁ ମିସାଦେଙ୍ଗ୍ ଆଟ୍ନିଦେର୍ । ଇୟାଉଣ୍ତିଙ୍ଗ୍ ମିରୁ ଜାତୁନ୍ତାନ୍ ବିସ୍ବାସ୍ ୱାଲେ ନେଗିଗୁଣୁ, ନେଗିଗୁଣୁତି ୱାଲେ ବୁଦି, ବୁଦିଦି ୱାଲେ ତିର୍ଇଡ୍ନିକା, ତିର୍ଇଡ୍ନିଦି ୱାଲେ ସାସ୍, ସାସ୍ତି ୱାଲେ ଦାର୍ମୁଦିପାଣିକିନିକା, ଦାର୍ମୁପାଣିଦି ୱାଲେ କ୍ରିସ୍ତଦି ତଡ଼ାନ୍କାଙ୍ଗ୍ ଜିବନ୍ନୋନିକା, ମାରି ମଣ୍ତଲିଦିଙ୍ଗ୍ ଜିବନ୍ନୋନି ୱାଲେ ଜିବନ୍ନୋନିକା ମିସାକିଦୁ । ଇୟା ନେଗିଗୁଣୁକୁ ମିଙ୍ଗିଁ ଦର୍କାର୍; ଇୟାୱିଜୁଦୁ ମିର୍ ପୁରାବର୍ତି ଆତିଙ୍ଗ୍, ମିର୍ ପୟ୍ତିମାନି ପ୍ରବୁ ଜିସୁ କ୍ରିସ୍ତଦି ବୁଦି ମିଙ୍ଗିଁ ସିତ୍ଡ଼ି ମାରି ପଲ୍ସିଜି ଇଡିନାତ୍ । ମାତର୍ ଇୟାୱିଜୁ ଗୁଣୁକୁ ଆମାୱାନିମାନୁ ସିଲେତ୍, ୱାନ୍ ଆକସଲ୍ଏଣ୍ଗା କାଣା ଆତାମାନାନ୍, ମାରି ନିଜେଦି ଆଗ୍ଡ଼ିରି ପାପ୍ତାନ୍ ନେଗେନ୍ ଆତାମାନାନ୍ ଇଜି ୱାନ୍ ବାଣାତାମାନାନ୍ ।
ମାରି, ଏ ତଡ଼ାନ୍କୁ ନି ତାଙ୍ଗିଁକ୍ ମାପୁରୁ ଜେ ମିଙ୍ଗିଁ ଆସ୍କିତାନ୍ନୋ କୁକ୍ତାମାନାନ୍, ଇୟା ଏତ୍କିନିତାନିଙ୍ଗ୍ ୱିଜୁଦିନ୍ କିନି ଉଣ୍ତିଙ୍ଗ୍ ନାଣ୍ତ ଜାତୁନ୍ଆଦୁ, ଇୟାୱାଜା କିତିଙ୍ଗ୍ ମିର୍ ଏସ୍କାଙ୍ଗ୍ବା ମି ବିସ୍ବାସ୍ତାନ୍ ତାକାଇଦେର୍ । ମାରି ଇୟାୱାଜା ମା ପ୍ରବୁ ମାରି ରକିୟାକର୍ତ୍ତା ଜିସୁ କ୍ରିସ୍ତଦି ଏସ୍କାଙ୍ଗ୍ୱିଜିଇ ରାଜିଦୁ ସନି ଉଣ୍ତିଙ୍ଗ୍ ମିଙ୍ଗିଁ ପୁରା ଅଦିକାର୍ ସିଆୟ୍ଆନାତ୍ ।
ମାରି, ମିର୍ ଜଦି ଇୟାୱିଜୁ ବିସୟ୍ ନେସ୍ତିମାନିଦେର୍ ମାରି ମିର୍ ପୟ୍ତିମାନି ସତ୍ତୁ ତିର୍ ଆସ୍ତିମାନିଦେର୍, ନାନ୍ ଇୟାୱିଜୁ ବିସୟ୍ ମିଙ୍ଗିଁ ଏତ୍ କିବିସ୍ତେଙ୍ଗ୍ ୱିଜୁଦିନ୍ ତିଆର୍ ଆନା ତେବାନା । ନାନ୍ ଜିବନ୍ମାନି ସାନ୍ଧି ଇୟାୱିଜୁ ବିସୟ୍ ଉଣ୍ତିଙ୍ଗ୍ ମିଙ୍ଗିଁ ଜାଗ୍ରାତା କିବିସ୍କିନିକା ନା ଟିକ୍ ପାଣି ଇଜି ଅଡ଼୍ବିନା । ମା ପ୍ରବୁ ଜିସୁ କ୍ରିସ୍ତ ନାଙ୍ଗିଁ ଏଣ୍ତେସ୍ ୱେର୍ତା ମାନାନ୍, ଆୟାଇସାବ୍ତାନ୍ ବେଗି ନାଙ୍ଗିଁ ଇୟା ସାନିମେନ୍ଦଲ୍ ଡ଼ିସ୍ନା ସନା ଇଜି ନାନ୍ ନେସ୍ତାମାନା । ମାରି ନାନ୍ ସାତି ୱେନ୍କା ମିର୍ ଏଣ୍ତେସ୍ ଇୟାୱିଜୁ ବିସୟ୍ ୱିଜୁଦିନ୍ ଏତ୍ ଇଡ୍ନିଦେର୍, ଇୟାକା କିନି ଉଣ୍ତିଙ୍ଗ୍ ନାନ୍ ବଦା କିଜିନା ।
କ୍ରିସ୍ତଦି ମହିମାଦି ସାକି
ଇରିଙ୍ଗ୍ ମାପୁ ଏସ୍ତିୱାଲେ ମା ପ୍ରବୁ ଜିସୁ କ୍ରିସ୍ତଦି ସାକ୍ତି ମାରି ମାରିଡ଼େସିୱାନି ମାଟା ମିଙ୍ଗିଁ ୱେର୍ତାପ୍, ନାସ୍ତିୱାଲେ ସାଲାକିଦାନ୍ ୱାର୍ଇ କାତା ୱେର୍ଏପ୍ ମାର୍ହାପ୍, ମାତର୍ ୱାନି ମହିମାଦିଙ୍ଗ୍ ନିଜେଦି କାଣ୍ଗାଦୁ ସାକି ଆତାମାନାପ୍ । 1ବୁବା ମାପୁରୁଦି ମାଣାନ୍ ୱାନ୍ ସନ୍ମାନିତ ମାରି ଗୌରବ୍ନିତ ଆନିୱାଲେ ମାପ୍ ଆବେ ମାର୍ହାପ୍ । ପେରି ଗୌରବ୍ତାନ୍ ୱାନି ବିସୟତାନ୍ ଆଉଲି ଆନି ଇୟା ମାଟା ମାପ୍ ୱେର୍ଆପ୍; “ଏ ମା ଲାଡ୍ତି ମାରିନ୍, ୱେନିମାନୁ ମା ନାଣ୍ତ୍ ୱେଡ଼ିକା ।” ମାପ୍ ୱାନି ୱାଲେ ପବିତ୍ର ଗରନ୍ ମୁସ୍କୁ ମାର୍ଇୱାଲେ ମାପ୍ ନିଜେ ଇୟା ବାଦଡ଼୍ତାନ୍ ୱାତି ଇୟା ବଲୁ ୱେରାପ୍ ।
ଆଦେଙ୍ଗ୍ ବାବବାଦିରିମାଣୁକୁ ପ୍ରଚାର୍ଆତିମାନି କାବୁର୍ତାନ୍ ମା ବିସ୍ବାସ୍ ନାଣ୍ତ ଆଟ୍ୱା ଆତାମାନାତ୍ । ଆୟାଉଣ୍ତିଙ୍ଗ୍ ମିରୁ ବା ମୋନଦିୟାନ୍ସିନିକା ମାନାତ୍, ଇରିଙ୍ଗ୍ ଆକା ସିକାଟିଦି ବାଡିଦୁ କାସ୍ସିମାନି ଦିୱା ୱାଜା । କରୁକେଡ଼େପିନେ ୱିଗାପି ସୁକାଦି ଜାୟ୍ ମି ଜିବନ୍ତୁ ଡ଼ୁଗୁନି ସାନ୍ଦି ଇକା କାସ୍ସି ତେବାଜିମାନାତ୍ । ମିର୍ ପୁରା ନିସ ନେସ୍ତୁ ଜେ, ଦାର୍ମୁସାସ୍ତ୍ରଦୁ ରାସାତିମାନି ଇନି ବାବବାଣି ଏନ୍ ନିଜେଦି ବୁଦିଦାନ୍ ବୁଜାଦେଙ୍ଗ୍ ଆଟ୍ଏର୍ । ବାବବାଣି ଏସ୍କାଙ୍ଗ୍ବା ଲୋକାଦି ବଦାଦାନ୍ ତିଆର୍ ଆଏତ୍, ମାତର୍ ମାପୁରୁ ପୋକ୍ତାତିମାନି ଦାସ୍କୁ ପବିତ୍ରଆତ୍ମାଦି ମାଣୁକୁ ସାଲାଜି ମାପୁରୁଦିମାଣାନ୍ ପୟ୍ତିମାନି କାବୁର୍ ୱେର୍ତାମାନାର୍ ।
Source notes (1)
- Cross-reference ମାତିଉ ୧୭:୧-୫; ମାର୍କ ୯:୨-୭; ଲୁକ ୯:୨୮-୩୫.
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.