Konda Porja Bible
୧ କରିନ୍ତିୟ 12
ପବିତ୍ରଆତ୍ମାଦିମାଣୁକୁ ଦାନ୍
ଏ ତଡ଼ାନ୍କୁ ନି ତାଙ୍ଗିଁକି, ପବିତ୍ରଆତ୍ମାଦି ଦାନ୍ତି ବିସୟ୍ତାନ୍
ନାନ୍ ମିଙ୍ଗିଁ ପୁରା ସତ୍ ୱେର୍ତେଙ୍ଗ୍ ଅଡ଼୍ବିଜିନା । ମିର୍ ନେସ୍ନିଦେର୍ ଜେ, ଏସ୍ତିୱାଲେ ମିର୍ ଅଣଜିହୁଦି ମାର୍ଇୱାଲେ, ନାସ୍ତିୱାଲେ ଜିବନ୍ସିଲି ଦିୟାମ୍କାଙ୍ଗାଁ ପୁଜା କିଜି ମିର୍ ଅଲଗାସାରି ଆତିମାର୍ଇଦେର୍ । ଆୟାଉଣ୍ତିଙ୍ଗ୍ ନାନ୍ ମିଙ୍ଗିଁ ଜାଣେକିଜିନା, ମାପୁରୁଦି ଆତ୍ମାଦାନ୍ ସାଲାନି ଲୋକ୍ “ଜିସୁ ଅବିସାପ୍” ଇଜି ଇନ୍ଏନ୍, ମାରି ଏମେ ଲୋକ୍ ପବିତ୍ର ଆତ୍ମା ପୟ୍ଏଣ୍ଗା “ଜିସୁ ପ୍ରବୁ” ଇଜି ୱେର୍ତେଙ୍ଗ୍ ଆଟ୍ଏନ୍ । 1
ଆତ୍ମାଦି ଦାନ୍ ଗାଦି ଜାତିଙ୍ଗ୍, ମାତର୍ ଆୟା ଉନ୍ଡ୍ରେ ପବିତ୍ରଆତ୍ମା ଆୟାୱିଜୁ ସିନାତ୍ । ସେବା ଗାଦି ରକମ୍ତିକେଙ୍ଗ୍ କିଜିନାର୍, ମାରି, ଉନ୍ଡ୍ରେ ପ୍ରବୁଦି ସେବା ଆନାତ୍ । ପାଣି କିନି ୱାରିଙ୍ଗ୍ ଗାଦି ରକମ୍ତି ସାକ୍ତି ସିନାନ୍, ମାତର୍ ମାପୁରୁ ଅରେନ୍, ୱାନ୍ ୱିଜେରିମାନୁ ଆୟାୱିଜୁ ସିନାନ୍ । ୱିଜେରି ନେଗି ଉଣ୍ତିଙ୍ଗ୍ ୱିଜେରେ ଲୋକାମାନୁ ପବିତ୍ରଆତ୍ମାଦି ସାକ୍ତି ଗାଦି ରକମ୍ତିକେଙ୍ଗ୍ ତରାନାତ୍ । ଇରିଙ୍ଗ୍ ଅରେନ୍ୱାନିଙ୍ଗ୍ ଆତ୍ମାଦି ମାଣ୍କୁ ବୁଦିଦି ବାକ୍ୟ, ମାରି ଅରେନ୍ୱାନିଙ୍ଗ୍ ଆୟା ଆତ୍ମାଦି ସିକିୟା ଇସାବ୍ତାନ୍ ବୁଦିଦି ମାଟା ଇନାନ୍, ମାରି ଅରେନ୍ୱାନିଙ୍ଗ୍ ଆୟା ଆତ୍ମାଦି ମାଣ୍କୁ ବିସ୍ବାସ୍ ସିନାତ୍, ମାରି ଅରେନ୍ୱାନିଙ୍ଗ୍ ଆୟା ଉନ୍ଡ୍ରେ ଆତ୍ମାଦି ମାଣ୍କୁ ନେଗେନ୍ କିନି ସାକ୍ତି, ଆଇୱାନିଙ୍ଗ୍ ଗାଦି ରକମ୍ତି ସାକ୍ତିଦି ପାଣି କିଦେଙ୍ଗ୍ ଅଦିକାର୍, ମାରି ଅରେନ୍ୱାନିଙ୍ଗ୍ ମାପୁରୁଦି ବାକ୍ୟ ୱେର୍ନି ସାକ୍ତି, ଆଇୱାନିଙ୍ଗ୍ ଆଇ ଆଇ ରକମ୍ତି ଆତ୍ମା ସିନିସ୍ତେଙ୍ଗ୍ ସାସ୍, ମାରି ଅରେନ୍ୱାନିଙ୍ଗ୍ ଗାଦି ଜାତିଦି ପୁନି ବାସାଦାନ୍ ୱାର୍ଗିନି ସାକ୍ତି, ମାରି ଅରେନ୍ୱାନିଙ୍ଗ୍ ବାସାଦି ଅର୍ତ କିଦେଙ୍ଗ୍ ସାକ୍ତି ସିଆୟ୍ଆତାମାନାତ୍ । ମାତର୍ ଆୟା ଉନ୍ଡ୍ରେ ପବିତ୍ରଆତ୍ମା ନିଜେଦି ଇଚ୍ଛାଦାନ୍ ୱିଜୁ ଲୋକାଙ୍ଗ୍ ଗାଦିରକମ୍ତି ଦାନ୍ ସିଜି ଇୟାୱିଜୁ ପାଣି ପୁରା କିନାତ୍ ।
ଗାଦି ବାଗ୍ତି ତିଆର୍ତି ଉନ୍ଡ୍ରେ ମେନ୍ଧଲ୍
କ୍ରିସ୍ତ ଗାଦିଜାତିଦି ଉନ୍ଡ୍ରେ ମେନ୍ଦଲ୍, ମାରି ଆବେଣି ବାଗ୍ତି ଗାଦି, ମାତର୍ ମେନ୍ଦଲ୍ତି ୱିଜୁ ବାଗ୍ତି ଗାଦି ଆତିଙ୍ଗ୍ବା ଉନ୍ଡ୍ରେ ମେନ୍ଧଲ୍ । ଆୟାୱାଜା ଜିହୁଦି, ଅଣଜିହୁଦି, କଟିସାକର୍ ମାରି ଅଦିକାର୍ରି ଲୋକୁ ଆପିନ୍, ୱିଜେରେ ଉନ୍ଡ୍ରି ଆତ୍ମାଦି ମାଣ୍କୁ ଉନ୍ଡ୍ରେ ମେନ୍ଧଲ୍ ଆନି ଉଦେସ୍ତାନ୍ ଡୁବନ୍ ଅତିମାନିକା, ମାରି ୱିଜେରେ ଉନ୍ଡ୍ରେ ଆତ୍ମାଦାନ୍ ଉଟି ମାନିକା ।
ଇରିଙ୍ଗ୍ ମେନ୍ଧଲ୍ ଉନ୍ଡ୍ରେ ବାଗ୍ ଆଏତ୍, ମାତର୍ ଗାଦି ବାଗ୍ତାନ୍ ତିଆର୍ । ପାଦାମ୍ ଜଦି ଇନାତ୍, “ନାନୁ କିୟୁ ସିଲେ, ଆଦେଙ୍ଗ୍ ମେନ୍ଦଲ୍ତି ବାଗ୍ ଆଏ,” ଆର୍ତିଙ୍ଗ୍ ଇୟାଉଣ୍ତିଙ୍ଗ୍ ଆକା ଜେ ମେନ୍ଦଲ୍ତି ବାଗ୍ ଆଏ, ଆର୍ତିଙ୍ଗ୍ ଇୟା କାରଣତାନ୍ ଆକା ମେନ୍ଦଲ୍ତୁ ମିସାଏଣ୍ଗା ମାଡ୍ରେଙ୍ଗ୍ ଆଟ୍ଏତ୍ । ମାରି ଗିତଣି ଜଦି ଇନାତ୍, “ନାନ୍ କାଣ୍ଗା ସିଲେ, ଆଦେଙ୍ଗ୍ ମେନ୍ଦଲ୍ତି ବାଗ୍ ଆଏ,” ଆର୍ତିଙ୍ଗ୍ ଇୟାଉଣ୍ତିଙ୍ଗ୍ ୱାଦ୍ ବା ମେନ୍ଦଲ୍ତାନ୍ ଆକ ଆଜି ତେବାଦେଙ୍ଗ୍ ଆଟ୍ଏତ୍ । ୱିଜୁ ମେନ୍ଦଲ୍ ଜଦି କାଣ୍ଗା ଆନାତ୍, ଆର୍ତିଙ୍ଗ୍ ୱେନ୍ଡ୍ରେଙ୍ଗ୍ ଆଟ୍ନିକା ଏଣ୍ତେସ୍ ? ମାରି ଆକା ଜଦି କେବଲ ଗିତଣି ଆନାତ୍, ଆର୍ତିଙ୍ଗ୍ ମୁଜିନିକା ଏମେମାନୁ ? ମାତର୍ ମାପୁରୁ ବାଗ୍ବାଗ୍ତିଙ୍ଗ୍ ଉନ୍ଡ୍ରେ ଉନ୍ଡ୍ରେ କିଜି ମେନ୍ଦଲ୍ତୁ ନିଜେଦି ଇଚ୍ଛାଦାନ୍ ତିଆର୍କିତାମାନାନ୍ । ମାରି, ଆୟାୱିଜୁ କେବଲ୍ ଉନ୍ଡ୍ରେ ବାଗ୍ ଆତିମାରିଙ୍ଗ୍, ମେନ୍ଦଲ୍ ଆତାତ୍ମାନ୍ଦି ଏଣ୍ତେସ୍ ? ମାତର୍ ସତ୍ତାନ୍ ଗାଦି ବାଗ୍କୁ ଆତିଙ୍ଗ୍ବା ମେନ୍ଦଲ୍ ଉନ୍ଡ୍ରେ ।
ଆୟାୱାଜା “ନି ମାନୁ ନାଙ୍ଗିଁ ଦରକାର୍ ସିଲେତ୍ ଇଜି କାଣ୍ଗା କିୟୁଦିଙ୍ଗ୍ ଇନ୍ଡ୍ରେଙ୍ଗ୍ ଆଟ୍ଏତ୍,” ମାରି “ନି ମାନୁ ନା ପାଣି ସିଲେତ୍ ଇଜି ତାଲା ପାଦାମ୍ତିଙ୍ଗ୍ ଇନ୍ଡ୍ରେଙ୍ଗ୍ ଆଟ୍ଏତ୍ ।” ଆଇତରିନ୍ ମେନ୍ଦଲ୍ତି ଆମାୱିଜୁ ବାଗ୍କୁ3 ନାଣ୍ତ ଦୁର୍ବଳ ଇଜି ଏତ୍ ୱାନାତ୍, ଆୟାୱିଜୁ ଦରକାର୍ ସିଲିକେଙ୍ଗ୍; ମାରି, ମେନ୍ଦଲ୍ତି ଆମାୱିଜୁ ଅଙ୍ଗ ନାଣ୍ତ ଦରକାର୍ ସିଲେତ୍ ଇଜି ଏତ୍କିଇକା, ଆୟାୱିଜୁ ଅଙ୍ଗଆଙ୍ଗାଁ ନାଣ୍ତ ଜାତୁନ୍ ଅନିକା; ମାରି ମା ନେଗେନ୍ତାନ୍ ତର୍ଇ ଅଙ୍ଗଆଙ୍ଗାଁ ନାଣ୍ତ ମୋନ୍ସିନିକା । ମାରିବା ମା ମେନ୍ଦଲ୍ତି ଅଙ୍ଗପ୍ରତ୍ୟଙ୍ଗ୍ ଉଣ୍ତିଙ୍ଗ୍ ମାଡୁ ନାସ ମୋନ୍ଦିୟାନ୍ ସିଇକା । ମାତର୍ ଏଣ୍ତେସ୍ ମେନ୍ଧଲ୍ ଲୋଇ ଇନି ମାଟା ଗଟାଏତ୍, ମାରି ଗାଦିଜାତିଦି ଅଙ୍ଗପ୍ରତ୍ୟଙ୍ଗ ସାମାନ୍ତାନ୍ ନିଜେନିଜେଦିଙ୍ଗ୍ ନେଗି ସିନ୍ତା କିନେ । ମାରି, ମେନ୍ଦଲ୍ତି ଉନ୍ଡ୍ରି ଅଙ୍ଗଦିଙ୍ଗ୍ କାସ୍ଟୁ ଆତିଙ୍ଗ୍, ଆୟାୱିଜୁ ଅଙ୍ଗପ୍ରତ୍ୟଙ୍ଗ ତାନି ୱାଲେ କାସ୍ଟୁ ଏତ୍ କିନେ, ମାରି ଉନ୍ଡ୍ରି ଅଙ୍ଗ ଦନ୍ୟବାଦ ଆତିଙ୍ଗ୍ ୱିଜୁ ଅଙ୍ଗପ୍ରତ୍ୟଙ୍ଗ ତାନି ୱାଲେ ୱେଡ଼ିକା କିନେ ।
ମିର୍ କ୍ରିସ୍ତଦି ମେନ୍ଧଲ୍, ମାରି ମିର୍ ୱିଜୁଲୋକୁ ଆୟା ମେନ୍ଦଲ୍ତି ଉନ୍ଡ୍ରି ଉନ୍ଡ୍ରି ଅଙ୍ଗ । 4ମାରି, ମାପୁରୁ ମଣ୍ତଲିଦୁ ପାର୍ତୁମ୍ ପ୍ରେରିତ ସିସୁରିଙ୍ଗ୍, ତାନିୱେନ୍କା ବାବବାଦିରିଙ୍ଗ୍, ଆୟାତାନିୱେନ୍କା ସିକିୟାଗୁରୁରିଙ୍ଗ୍; ତାନିୱେନ୍କା ସାକ୍ତିଦି ପାଣି, ତାନିୱେନ୍କା ରଗ୍ତିଙ୍ଗ୍ ନେଗେନ୍ କିନି ଦାନ୍ତି ସାକ୍ତି, ସାହାଜ୍ୟକିନିକା, ସାଲାବୁଲାକିନି ପାଣିଦି ଅଦିକାର୍ ମାରି ଜାତିଜାତିଦି ବାସାଦାନ୍ ୱାର୍ଗିନି ଲୋକାଙ୍ଗ୍ ଆସ୍କିତାମାନାନ୍ । ୱାର୍ ୱିଜେରେ ପ୍ରେରିତ ସିସୁ, ବାବବାଦିରି, ସିକିୟାଗୁରୁ, ମାରି କାବାଆନି ସାକ୍ତିଦି ପାଣିକିନିକା ସିଆୟ୍ଆତାମାନାତ୍ । ୱିଜେରେ ରୋଗ୍ତିଙ୍ଗ୍ ନେଗେନ୍ କିଦେଙ୍ଗ୍ ଆଟ୍ନାର୍, ଜାତିଜାତିଦି ବାସାଦାନ୍ ୱାର୍ଗିଦେଙ୍ଗ୍ ଆଟ୍ନାର୍, ମାରି ଆୟାୱିଜୁ ବାସାଦି ଅର୍ତ କିଦେଙ୍ଗ୍ ଆଟ୍ନାର୍ । ମାତର୍ ମିର୍ ପେରି ଦାନ୍ ୱିଜୁ ପୟ୍ନି ଉଣ୍ତିଙ୍ଗ୍ ୱେଡ଼ିକା ଆଦୁ ।
ନାନ୍ ମିଙ୍ଗିଁ ଉନ୍ଡ୍ରି ନେଗି ସାରି ତର୍ସିନା ।
Source notes (4)
- Cross-reference ରୋମିୟ ୧୨:୬-୮.
- Cross-reference ରୋମିୟ ୧୨:୪,୫.
- Footnote ମେନ୍ଦଲତି ଅଙ୍ଗପ୍ରତ୍ୟଙ୍ଗ ମାନେ ଇୟାୱାନିକାଙ୍ଗ୍ ବାଗ୍ ଇଜି ରାସ୍ତା ମାନାପ୍ ।
- Cross-reference ଏପିସିୟ ୪:୧୧.
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.