ମାପୁରୁଦି ସତ୍ ବାକ୍ୟ
ପ୍ରକାଶିତ 22
ପୁନି ଦୁନିଆଦୁ କାୟାଦି ୱାଜା ନେଗି ଜିବନ୍ ଏରୁଦି ଉଣ୍ତ୍ରି ଗାଡା ଦୁତ୍ ନାଙ୍ଗିଁ ତର୍ତାତ୍ । ଇୟା ଗାଡା ମାପୁରୁ ନି ମେଷସାବକତି ସିଂହାସନ୍ଦାନ୍ ସହସି ମାରି ଗାଡ଼୍ତି ପେର୍ଜାରି ନାଡ଼୍ମି ସିଜି ସୋର୍ହାମାର୍ହାତ୍ । ଗାଡାଦି ରିଆଙ୍ଗାଁ ତର୍ନି ଜିବନ୍ ମାରାନ୍ ମାର୍ହାତ୍ । ଆକା ବାର୍ସେକ୍ତି ୱିଜୁ ଲେଜ୍କାଙ୍ଗ୍, ମାରି ବାର୍ସେକ୍ତିଙ୍ଗ୍ଁ ବାର ଦେବେଙ୍ଗ୍ ପଲ୍ ଆସ୍ନାତ୍ ମାରି ଇୟାତେନି ଆକୁ ଲୋକାଙ୍ଗ୍ ନେଗେନ୍ କିନାତ୍ । ମାପୁରୁଦି ଅବିସାପ୍ତି ମାଟା ଏମେ ବିସୟ ଆୟା ଗାଡ଼୍ତୁ ସୁଡ଼ୁଦେଙ୍ଗ୍ ପୋୟ୍ଇକାନି । ମାପୁରୁ ମାରି ମେଷସାବକତି ରାଜାଗାଦି ଆୟା ଗାଡ଼୍ତି ନାଡ଼ିମି ତେବାନାତ୍ ମାରି ଆବେନୁ ୱାରି ସେବା କିନିକାର୍ ୱାନି ଆରାଦନା କିନାର୍ ! ୱାର୍ ୱାନି ମୋକମ୍ ସୁଣାର୍ ମାରି ୱାରି କାପାଲ୍ତୁ ୱାରି ଦରୁ ରାସାନାତ୍ । ଆବେନୁ ମାରି ନାଡ଼ା ଆଏତ୍ ମାରି ଦିୱା ବା ୱେଡ଼ାଜାୟ୍ ୱାରିଙ୍ଗ୍ ମାରି ଲୋଡ଼ା ଆଏତ୍ନି, ଇରିଙ୍ଗ୍ ପ୍ରବୁ ମାପୁରୁ ୱାରି ଜାୟ୍ ଆନାନ୍ ମାରି ୱାର୍ ଜୁଗ୍ ଜୁଗ୍ ସାସନ୍ କିନାର୍ ।
ଜିସୁଦି ମାରିଡ଼େସି ୱାନିକା
ଦୁତ୍ ନାଙ୍ଗିଁ ଇର୍ହାତ୍, “ଇୟାୱିଜୁ କାବୁର୍ ସତ୍ ନି ଆସାଦିକା । ଆମା ଆମାକା ବେଗି ଗଟାନାତ୍, ଆକା ୱାରି ସେବାକିନିୱାରିଙ୍ଗ୍ ୱେର୍ନି ଉଣ୍ତିଙ୍ଗ୍ ବାବବାଦିରିଙ୍ଗ୍ ଆତ୍ମିକ ବୁଦି ସିଜିମାନି ମାପୁରୁ ୱାନି ଦୁତ୍ତିଙ୍ଗ୍ ପୋକ୍ତାମାନାନ୍ ।”
ଜିସୁ ଇଜିନାନ୍, “ୱେନ୍ଣ୍ତ୍ରୁ ! ନାନୁ ବେଗି ୱାଜିନା ! ଏମେକାର୍ ଇୟା ବଇଦୁ ୱେଙ୍ଗିଁତିମାନି ବାବବାଣି ଉଣ୍ତିଙ୍ଗ୍ ମୋନ୍ସିଜି ମାନାନାର୍, ୱାର୍ ଦନ୍ୟ !”
ନାନୁ ଜୋହନ, ଇୟାୱିଜୁ ବିସୟ୍ ନିଜେ ୱେର୍ଆମାନା ମାରି ସୁଡ଼ୁତାମାନା । ଇୟାୱିଜୁ ୱେନିଜି ମାରି ସୁଡ଼ୁତି ୱିସ୍ତି ୱେନ୍କା, ଏମେ ଦୁତ୍ ନା ଲାକୁତୁ ଆକା ୱିକିତାତ୍, ନାନୁ ୱାନି କାଲ୍କା ଆଡିଗି ୱାନିଙ୍ଗ୍ ପୁଜା କିଦେଙ୍ଗ୍ ସଲ୍ସିମାର୍ହା । ମାତର୍ ୱାନ୍ ଇର୍ହାନ୍, “ଆୟାୱାଜା କିମାଟ୍, ଇରିଙ୍ଗ୍ ନାନୁ ବା ମି ୱାଜା ଅରେନ୍ । ମି ଏମେ ବାବବାଦି ତଡ଼ାନ୍କୁ ମାରି ଆମା ୱିଜେରେ ଇୟା ବଇଦି ମାଟା ଇସାପ୍ତାନ୍ ମାନାଜି ମାନାର୍, ୱାରି ୱାଜା ନାନୁ ଅରେନ୍ ସେବକ ମାତ୍ର । ମାପୁରୁଦି ଆରାଦନା କିଦୁ ।” ୱାଦ୍ ନାଙ୍ଗିଁ ମାରି ଇର୍ହାତ୍, “ଇୟା ବଇଦି ବବିସ୍ୟତ୍ମାଟା ୱିଜୁ ଆଡ଼କ୍ସ ଇଡ୍ମାଟ୍, ଇରିଙ୍ଗ୍ ଇୟାୱିଜୁ ବିସୟ୍ ଗଟେଆନି ବେଡ଼ା ଲାକୁତୁ ଆଜିୱାତାତ୍ନି । ଆଦେଙ୍ଗ୍ ଇୟା ମାଟା ନେସ୍ସି ଏନ୍ ଏମେକା ବଦା, ଆକା କିପିନ୍ । ଅଦାର୍ମୁ ଜଦି ବଦାକିନାନ୍, ମାରି ଅଦାର୍ମୁପାଣି କିପିନ୍; ଅସୁଚି ଲୋକ୍ ଅସୁଚିଆଜି ମାନିନ୍; ମାତର୍ ଏନ୍ ନେଗିକାନ୍, ୱାନ୍ ନେଗିପାଣିଦୁ ନେଗେନ୍ ମାନିନ୍; ଏନ୍ ପବିତ୍ର, ୱାନ୍ ପବିତ୍ର ଆଜି ମାନିନ୍ ।”
ଜିସୁ ଇଜିନାନ୍, “ୱେନ୍ଣ୍ତ୍ରୁ ! ନାନୁ ବେଗି ୱାଜିନା ! ୱିଜେରିଙ୍ଗ୍ ନିଜେ ନିଜେଦି ପାଣି ଇସାପ୍ତାନ୍ ପଲ୍ ସିନି ଉଣ୍ତିଙ୍ଗ୍ ନାନୁ ପୁରସ୍କାର୍ ଆସ୍ସି ୱାନା । 1ନାନୁ ଆଗିଡ଼ି ମାରି ୱେନେକା, ପାର୍ତୁମ୍ ମାରି ସାରାସାରି ।”
ଏମେକାର୍ ନିଜେ ନିଜେଦି ଆଙ୍ଗିଁଙ୍ଗ୍ ନର୍ବାଜି ନେଗେନ୍ କିତାମାନାର୍, ୱାର୍ ବାଗ୍ୟବାନ୍ । ଜିବନ୍ ମାରାତି ପଲ୍ ତିନ୍ଡ୍ରେଙ୍ଗ୍ ମାରି ସେର୍ଲା ସିଜି ଗାଡ଼୍ ଲୋଇ ଡ଼ୁଗୁଦେଙ୍ଗ୍ ଇଜି ୱାରି ଅଦିକାର୍ ମାନାତ୍ । ନୁକୁଡ଼ିଙ୍ଗ୍ ମାତର୍ ତାଗ୍ଇକାର୍, ତନ୍ତ୍ରମନ୍ତ୍ର ଜାଦୁକିନିକାର୍, ଲୋକାଙ୍ଗ୍ ସାପିସ୍କିନିକାର୍, ଦିୟାମ୍ପୁଜାକିନିକାର୍, ବାଣ୍ତିସ୍କିନିକାର୍, ଟକେକିନିକାର୍ ୱିଜୁ ତାଗିଇ ଲୋକ୍ ୱିଜେରେ ଗାଡ଼୍ତି ଆତ୍ରେ ତେବାନାର୍ ।
“ନାନ୍ ଜିସୁ । ମଣ୍ତଲିଙ୍ଗାଁ ମି ନେଗି ତାନିଙ୍ଗ୍ ଇୟାୱିଜୁ ବିସୟ୍ ସାକ୍ୟ ସିନି ଉଣ୍ତିଙ୍ଗ୍ ନା ଦୁତ୍ତିଙ୍ଗ୍ ପୋକ୍ତାମାନା । ନାନୁ ଦାଉଦଦି କୁଟୁମ୍ତିକାନ୍ । ନାନୁ ଆୟା ଜାୟ୍ତି ୱିଗାପି ସୁକା ।”
ପବିତ୍ରଆତ୍ମା ମାରି ଆୟା ପୁନିକାନ୍ୟା ଇଜିନେ “ରାଦୁ !” ୱେନିଲୋକୁ ୱିଜେରେ ବା ଇନାର୍ : “ରାଦୁ !” ଏନ୍ ଜଦି ଏରିକିସାନାନ୍, ୱାନ୍ ରାପିନ୍ । ଜିବନ୍ସିନି ଏରୁ ଉଣ୍ତେଙ୍ଗ୍ଁ ଏନ୍ ଇଛା କିନାନ୍, ୱାନ୍ ୱାଜି ଆରେଏଦାନ୍ ଆକା ଅପିନ୍ ।
ସାରାସାରି ମାଟା
ନାନୁ ଜୋହନ । ଏମେକାର୍ ଇୟା ବଇଦି ବବିସ୍ୟତ୍ମାଟା ୱିଜୁ ୱେନାର୍, ୱାରିଙ୍ଗ୍ ନାନୁ ସାକି ସିଜିନା : ଜଦି ଇବେନୁ ଏନ୍ ଇନିକା ମିସା କିନାନ୍, ଆର୍ତିଙ୍ଗ୍ ଇୟା ବଇଦୁ ରାସାତିମାନି ମର୍ଡିଦାନ୍ ମାପୁରୁ ୱାନିଙ୍ଗ୍ ସାସ୍ତି ସିନାନ୍ ମାରି ଇୟା ବଇଦି ବବିସ୍ୟଦ୍ମାଟାଦାନ୍ ଏନ୍ ଜଦି ଇନି ବାଦା କିନାନ୍, ଆର୍ତିଙ୍ଗ୍ ମାପୁରୁ ୱାନିଙ୍ଗ୍ ଇୟା ବଇଦୁ ରାସାତି ଜିବନ୍ ମାରାନ୍ତି ପଲ୍ତାନ୍ ମାରି ପବିତ୍ର ଗାଡ଼୍ତାନ୍ ପେର୍ନାନ୍ ।
ଏନ୍ ଇୟାୱିଜୁ ବିସୟ୍ତାନ୍ ସାକ୍ୟ ସିଜିନାନ୍, ୱାନ୍ ଇଜିନାନ୍, “ଇକା ସତ୍ । ନାନୁ ବେଗି ୱାଜିନା ।” ଆକାନେ ଆପିତ୍ । ପ୍ରବୁ ଜିସୁ, ରାପିନ୍ !
ପ୍ରବୁ ଜିସୁଦି ଦୟା ୱିଜେରି ମୁସୁକୁ ଆପିତ୍ । ଆମେନ୍ ।
Source notes (1)
- Cross-reference ପ୍ରକାଶିତ ୧:୮; ପ୍ରକାଶିତ ୧:୧୭; ୨:୮.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.