ମାପୁରୁଦି ସତ୍ ବାକ୍ୟ
ପ୍ରକାଶିତ 2
ଏପିସସ୍ ମଣ୍ତଲି ଉଣ୍ତିଙ୍ଗ୍ କାବୁର୍
ଏପିସ୍ ମଣ୍ତଲିଦି ଦୁତ୍ଦି ଲାକୁତୁ ରାସ୍ତୁ : ଏମେୱାନି ଉଣିକିୟୁଦୁ ସାତଗୋଟା ସୁକେଙ୍ଗ୍ ମାରି ଏନ୍ ସାତଗୋଟା ବାଙ୍ଗାଁରାମ୍ ଦିୱେଙ୍ଗ୍ ମାଣାନ୍କୁ ବାଟା କିନାନ୍, ୱାନି ଇୟା କାବୁର୍ । ମି ପାଣିକିତିମାନିକା, ନାଣ୍ତକାସ୍ଟୁ ପାଣି ମାରି ସାସ୍ତି ବିସୟ୍ ନାନୁ ନେସ୍ନା । ନାନୁ ବା ନେସ୍ନା ଜେ, ନିନୁ ତାଗ୍ଇପାଣିକିନିୱାରିଙ୍ଗ୍ ସାସ୍ କିଦେଙ୍ଗ୍ ଆଟ୍ଇ । ଏମେକାର୍ ପ୍ରେରିତ ସିସୁ ଇଜି ନିଜେଦି ପରିଚୟ ସିନାର୍, ସତ୍ତାନ୍ ସିସୁ ଆଏର୍, ପରିକା କିଜି ୱାରିଙ୍ଗ୍ ମିଚ୍ୱେର୍ନିକାର୍ ଇଜି ନିନ୍ ପାରାମାଣ୍ କିତିମାନି । ମାରି ନିନ୍ ସାସ୍ ଆସ୍ସି ମା ଉଣ୍ତିଙ୍ଗ୍ ଦୁଃଖକାସ୍ଟୁ ସାସ୍ କିତିମାନି ମାରି ନିରାସ୍ ଆଇ । ମାତର୍ ନି ବିରୁଦ୍ତାନ୍ ନା ଇୟା ମାଟା ମାନାତ୍ : ମିର୍ ଆଗ୍ଡ଼ି ଏଣ୍ତେସ୍ ନାଙ୍ଗିଁ ଜିବନ୍ନୋଜି ମାରିଇଦେର୍, ଇଲେଇ ଆୟାୱାଜା ମାରି ଜିବନ୍ନୋଇଦେର୍ । ମିଦି ଏସା ଆଡିଗିଆତା ମାନାତ୍, ସିନ୍ତା କିଦୁ । ପାପ୍ତାନ୍ ଡ଼େସିୱାଜି ଆଗ୍ଡ଼ିରି ୱାଜା ସତ୍ପାଣି କିଦୁ । ଜଦି ପାପ୍ତାନ୍ ଡ଼େସି ରେଇଦେର୍, ଆର୍ତିଙ୍ଗ୍ ନାନୁ ମି ଦିୱାଦିଙ୍ଗ୍ ଆଇ ବାଡିଦୁ ଅନା । ମାତର୍ ମି ଉଣ୍ତିଙ୍ଗ୍ ଉନ୍ଡ୍ରି ବିସୟ୍ ମାନାତ୍ । ଆକା ଆଜିନାତ୍, ମାପ୍ ନୀକଲାୟତିୟରି ଆମା ୱିଜୁ ପାଣି କାଡ଼ିଜିନା, ନିନ୍ ବା ଆୟାୱିଜୁ କାଡ଼ିଜିନି । 1
ୱେନ୍ଡ୍ରେଙ୍ଗ୍ ଗିତଣି ମାରିଙ୍ଗ୍, ମଣ୍ତଲିଆଙ୍ଗ୍ ଉଣ୍ତିଙ୍ଗ୍ ପବିତ୍ରଆତ୍ମା ଇନିକା ଇଜିନାତ୍, ୱେନ୍ଡ୍ରୁ !
ଏମେକାର୍ ଜିଣାନିକା ଲାବକିନାର୍, ନାନୁ ୱାରିଙ୍ଗ୍ ମାପୁରୁଦି ମୁସ୍କୁପୁର୍ତି ଡଡିଦୁ ଆସ୍ତିମାନି ଜିବନ୍ ମାରାତି ପଲ୍ ତିନି ଉଣ୍ତିଙ୍ଗ୍ ଅଦିକାର୍ ସିନା ।
ସ୍ମୁର୍ଣ୍ଣା ମଣ୍ତଲି ଉଣ୍ତିଙ୍ଗ୍ କାବୁର୍
ସ୍ମୁର୍ଣ୍ଣାଦୁ ମାନି ମଣ୍ତଲିଦି ଦୁତ୍ଦି ଲାକୁତୁ ରାସ୍ତୁ : ଏନ୍ ଆରାମ୍ ନି ସାରାସାରିୱେନ୍କା ମାରି ଏନ୍ ସାତାନ୍ନୋ ଡ଼େସି ଜିବନ୍ ଆତାନ୍, ୱାନି ଲାକ୍ତୁରାନ୍ ଇୟା କାବୁର୍ : ମି ଦୁଃକ୍କାସ୍ଟୁ ୱିଜୁ ନାନ୍ ନେସ୍ନା; ନାନୁ ବା ନେସ୍ନା ଜେ, ମିର୍ କାକୁର୍ତିଲୋକୁ; ମାତର୍ ସତ୍ତାନ୍ ମିର୍ ମାଜନ୍ ଲୋକ୍ । ଏମେକାର୍ ନିଜେଦିଙ୍ଗ୍ ଜିହୁଦି ଇଜି ଇନାର୍, ମାତର୍ ସତ୍ତୁ ଜିହୁଦିର୍ ଆଏର୍ ମାରି ଏମେକାର୍ ସୟତାନ୍ଦି ୱେନ୍କା ସନାର୍, ୱାର୍ ଏଣ୍ତେସ୍ ମିଙ୍ଗିଁ ଅପମାନ୍ କିଜି ମାଟା ଆଜିନାର୍, ଆକା ନାନୁ ନେସ୍ନା । ମିର୍ ଏମେ ୱିଜୁ ଦୁଃକ୍କାସ୍ଟୁ କିଦେଙ୍ଗ୍ ସଲିସିନିଦେର୍, ଆୟାଉଣ୍ତିଙ୍ଗ୍ ତିଲାମାଟ୍ । ୱେନ୍ଡ୍ରୁ ! ମି ମାଣୁକୁ ଏସ ଲୋକାଙ୍ଗ୍ ଜଇଲ୍ତୁ ନିରିସି କିଜି ସୟତାନ୍ ପରିକା କିନାତ୍ । ମାତର୍ ମି ଇୟା କାସ୍ଟୁ କେବଲ୍ ସାଣେକ୍ ଦିନ୍ସାଦି ତେବାନାତ୍ । ଇବେନୁ ସାନିତାନିଙ୍ଗ୍ ତିୟେଲ୍ ମାରିଙ୍ଗ୍ବା, ନା ଉଣ୍ତିଙ୍ଗ୍ ବିସ୍ବାସ୍ ତେବାତିଙ୍ଗ୍, ନାନୁ ମିଙ୍ଗିଁ ଜିବନ୍ନାନି ଟପି ସିନା । 3
ୱେନ୍ଡ୍ରେଙ୍ଗ୍ ଗିତଣି ମାରିଙ୍ଗ୍, ମଣ୍ତଲିକାଙ୍ଗ୍ ମାପୁରୁଦି ଆତ୍ମା ଇନିକା ଇଜିନାତ୍, ୱେନ୍ଡ୍ରେରୁ ଏମେକାର୍ ଜିଣାଜି ଲାବକିନାର୍, ରିଜାସାନିକା ୱାରିଙ୍ଗ୍ ମୁଟ୍ତେଙ୍ଗ୍ ଆଟ୍ଏତ୍ ।
ପର୍ଗମ ମଣ୍ତଲି ଉଣ୍ତିଙ୍ଗ୍ କାବୁର୍
ପର୍ଗମ ମଣ୍ତଲିଦି ଦୁତ୍ଦି ଲାକ୍ତୁ ରାସ୍ତୁ : ଏମେୱାନି ଲାକ୍ତୁ ରିଆଙ୍ଗାଁଦାରାଦି କାଣ୍ତା ମାନାତ୍, ୱାନି ଇୟା କାବୁର୍ । ନାନୁ ନେସ୍ନା, ମିର୍ ସୟତାନ୍ଦି ସିଂହାସନ୍ ଲାକୁତୁ ବାସାକିଜିନିଦେର୍ । ମାତର୍ ମିର୍ ନା ଉଣ୍ତିଙ୍ଗ୍ ବିସ୍ବାସ୍, ଇୟାୱାଜାନେ ସୟତାନ୍ ବାସାକିନି ଜାଗାଦୁ ଏସ୍ତିୱାଲେ ନା ଅରେନ୍ ବିସ୍ବାସ୍ତି ସାକିସିନି ଆନ୍ତିପାଦିଙ୍ଗ୍ ସାୟାମାର୍ଗା ଡାକ୍ତାର୍, ନାସ୍ତିୱାଲେ ବା ମି ବିସ୍ବାସ୍ ଡ଼ିସ୍ଇମାରିଇଦେର୍ । ମାତର୍ ନି ବିରୁଦ୍ତାନ୍ ନା ଏସ ବିସୟ ଇନିକା ମାନାତ୍ । ଆବେନୁ ମି ୱାଲେ ମାନି ଏସ ଲୋକୁ, ବାଲାମଦି ସିକିୟାଦାନ୍ ବୁଲାସାଲା ଆଜିନାର୍ । ବାଲାମ ପୁଜାସିନି ବଗ୍ ତିନ୍ଡ୍ରେଙ୍ଗ୍ ମାରି ଦାରିପାଣି କିନି ଉଣ୍ତିଙ୍ଗ୍ ଇସ୍ରାଏଲ୍ତି ଲୋକାଙ୍ଗ୍ ୱେର୍ନି ଉଣ୍ତିଙ୍ଗ୍ ବାଲାକଦିଙ୍ଗ୍ ଅଜାକିତାମାରାନ୍ । ଟିକ୍ ଆୟାୱାଜା ନୀକଲାୟତିୟରି ମାଟାଦି ୱେନ୍କା ସୋଲ୍ସିମାନି ଲୋକୁ ମି ଲୋଇ ମାନାର୍ । ମି ପାପ୍ ଡ଼ିସ୍ତୁ; ସିଲେତିଙ୍ଗ୍ ନାନୁ ବେଗି ମି ଲାକୁତୁ ୱାଜି ନା ୱେୟୁଦାନ୍ ସୋସିମାନି କାଣ୍ତାଦାନ୍ ଆୟା ଡଙ୍ଗାର୍ଙ୍ଗାଁ ବିରୁଦ୍ତାନ୍ ଜୁଦ୍ କିନା । 4
ଏମେକାର୍ ୱେନି ଉଣ୍ତିଙ୍ଗ୍ ଗିତଣି ମାନାତ୍, ମଣ୍ତଲିଙ୍ଗାଁ ମାପୁରୁଦି ଆତ୍ମା ଇନିକା ଇଜିନାତ୍, ଆକା ୱେନ୍ଡ୍ରୁ । “ଏମେକାର୍ ଜିଣାନିକା ଲାବ କିନାର୍, ନାନୁ ୱାରିଙ୍ଗ୍ ଇଟ୍ତିମାନି ମାନ୍ନାଦାନ୍ ଏସ ସିନା । ୱାରି ମାଣ୍କୁ ୱିଜେରିଙ୍ଗ୍ ପୁନି ଦରୁ ରାସ୍ତିମାନି ଅଡ଼ିନି କାଲୁ ସିନା । ଆୟା ପୁନି ଦରୁ ଇନିକା, କାଲୁଦିଙ୍ଗ୍ ମାନାନିକାନ୍ ଡ଼ିସ୍ତିଙ୍ଗ୍ ଆଇକାନ୍ ଏନ୍ ଆକା ନେସ୍ତେଙ୍ଗ୍ ଆଟ୍ଏର୍ ।”
ତୁୟତିରା ମଣ୍ତଲି ଉଣ୍ତିଙ୍ଗ୍ କାବୁର୍
ତୁୟତିରା ମଣ୍ତଲିଦି ଦୁତ୍ଦି ଲାକୁତୁ ରାସ୍ତୁ : ଇୟା କାବୁର୍ ମାପୁରୁଦି ମାରିନ୍ଦି ଲାକୁତୁରାନ୍ ୱାତାମାନାତ୍ । ୱାନି କାଣୁକୁ କାସ୍ସିମାନି ସିସୁ ୱାଜା ମାରି ୱାନି ପାଦାମ୍ ଜାୟ୍ତି ପିତଲ୍ ୱାଜା । ମି ପାଣିକିତିକା, ମି ଜିବନ୍ନୋନିକା, ବିସ୍ବାସ୍ ମି ସେବା ପାଣି ମାରି ସାସ୍ ନାନୁ ନେସ୍ନା ! ନାନୁ ବା ନେସ୍ନା ଜେ, ମିର୍ ପୁର୍ବେ ଏମେକା କିଜିମାରିଇଦେର୍, ଇଲେଇ ତାନିମାଣୁକୁ ନାଣ୍ତ କିଜିନିଦେର୍ । ମାତର୍ ନି ବିରୁଦ୍ତାନ୍ ନାନୁ କେବଲ୍ ନିସ ଇନିକା ମାନାତ୍, ମାପୁରୁଦି କାବୁରୁଅନିତାନି ୱାଜା ନିଜେଦି ପରିଚୟ ସିଜିମାନି ଯେଜେବଲ୍ ଦର୍ତି ଆଇମାଦିଙ୍ଗ୍ ନିନ୍ ଜିବନ୍ନୋନିକା ସିତିମାନି । ବାବବାଦିନି ନା ଦାସ୍ରିଙ୍ଗ୍ ଦାରିପାଣି କିଦେଙ୍ଗ୍ ମାରି ଦିୟାମ୍କା ଲାକ୍ତୁ ସିଆୟ୍ଆତିମାନି ବଗ୍ ତିନ୍ଡ୍ରେଙ୍ଗ୍ ସିକିୟା ସିଜି ୱାରିଙ୍ଗ୍ ଆଇସାରିଦୁ ପୋକ୍ସିନାତ୍ । ପାପ୍ଦାନ୍ ଡ଼େସିୱାନି ଉଣ୍ତିଙ୍ଗ୍ ନାନୁ ତାନିଙ୍ଗ୍ ସମୟ ସିତାମାନା, ମାତର୍ ୱାଦ୍ ନିଜେଦି ଦାରିପାଣିଦିଙ୍ଗ୍ ଡ଼ିସ୍ତେଙ୍ଗ୍ ଇଛାକିଏଜିନାତ୍ । ଆଦେଙ୍ଗ୍ ନାନୁ ତାନିଙ୍ଗ୍ ମାରି ତାନି ୱାଲେ ଦାରିପାଣିଦୁ ମିସାତି ମାନି ୱିଜେରିଙ୍ଗ୍ ଖାଟେଲ୍ଦୁ ତେର୍ପେନା ମାରି ୱାର୍ ବୟଙ୍କାର୍ କାସ୍ଟୁ ଭୋଗ କିନାର୍ । ଜଦି ୱାର୍ ତାନି ୱାଲେ କିତିମାନି ଦାରିପାଣି ଉଣ୍ତିଙ୍ଗ୍ ଏତ୍ କିଏର୍, ଆର୍ତିଙ୍ଗ୍ ନାନୁ ଇକା ଏଣ୍ତେସ୍ବା କିନା । ତାନି ୱେନେକା ବୁଲାନିୱାରିଙ୍ଗ୍ ବା ସାପିସ୍ କିନା, ଆର୍ତିଙ୍ଗ୍ ମଣ୍ତଲିଙ୍ଗ୍ ୱିଜୁ ନେସ୍ତେଙ୍ଗ୍ ଆଟ୍ନାର୍ ଜେ, ନାନ୍ ଜିବନ୍ତିକାୱିଜୁ ନେସ୍ନା, ଲୋକ୍ଦି ୱିଜୁ ଚିନ୍ତା ମାରି ପାଣି ନାନୁ ନେସ୍ତେଙ୍ଗ୍ ଆଟ୍ନା । ମିର୍ ୱିଜେରେ ଆମାକା କିତିମାନିଦେର୍, ଆୟା ଇସାପ୍ତାନ୍ ନାନୁ ମିଙ୍ଗିଁ କାସ୍ଟୁ ସିନା ।
“ମାତର୍ ତୁୟତିରାଦୁ ମି ଲୋଇରାନ୍ ଏମେକାର୍ ଇୟା ତାଗ୍ଇସିକ୍ୟା ମାନାଇଦେର୍ ମାରି ଆମାତାନିଙ୍ଗ୍ ସୟତାନ୍ଦି ମାର୍ଗିତିମାନି ଅର୍ତଦି ସିକ୍ୟା କିଇଦେର୍, ନାନୁ ୱାରି ମୁସୁକୁ ମାରି ଇନି ବଜୁ ତିଗିଜ ସିଏ । ମାତର୍ ନାନୁ ରେଇମାନି ସାନ୍ଦି ମିଦି ଏମେକା ମାନାତ୍, ଆକା ଡାଟ୍ତାନ୍ ଆସ୍ସୋ ଇଡିଦୁ । ଏମେ ଲୋକୁ ଜିଣାନାର୍ ମାରି ସାରାସାରି ୱେନ୍କା ସାନ୍ଧି ନା ବଦାଦାନ୍ ପାଣି କିନା, ନାନ୍ ବୁବାଦି ଲାକ୍ତୁରାନ୍ ଏମେ ଅଦିକାର୍ ପୋଇତାମାନା, ଆକା ୱାରିଙ୍ଗ୍ ସିନା । ପୃତିବିଦି ଆଇଆଇ ଜାତିଦି ଲୋକାଙ୍ଗ୍ ଲୁୱା ଦଣ୍ତଦାନ୍ ସାସନ୍ କିଦେଙ୍ଗ୍ ମାରି ସିକିଲା ସାଟି ୱାଜା ଗୁଣ୍ତ୍ଗୁଣ୍ତା କିଦେଙ୍ଗ୍ ନାନୁ ୱାରିଙ୍ଗ୍ ଅଦିକାର୍ ସିନା । ନାନୁ ୱାରିଙ୍ଗ୍ ୱିଗାପି ସୁକା ବା ଦାନ୍ କିନା ।”
ୱେନ୍ଡ୍ରେଙ୍ଗ୍ ସାକ୍ତି ମାରିଙ୍ଗ୍, ମଣ୍ତଲିଙ୍ଗାଁ ମାପୁରୁଦି ଆତ୍ମା ଇନିକା ଇଜିନାତ୍, ୱେନ୍ଡ୍ରୁ !
Source notes (4)
- Cross-reference ପ୍ରକାଶିତ ୨୨:୨.
- Cross-reference ପ୍ରକାଶିତ ୧:୧୭; ୨୨:୧୩.
- Cross-reference ପ୍ରକାଶିତ ୨୦:୧୪; ୨୧:୮.
- Cross-reference ଜୋହନ ୬:୪୮-୫୦.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.