ମାପୁରୁଦି ସତ୍ ବାକ୍ୟ
ମାତିଉ 4
ସୟତାନ୍ତି ମାଣାନ୍ ଜିସୁ ପରିକା କିଆୟ୍ଆତାନ୍
(ମାର୍କ ୧:୧୨-୧୩; ଲୁକ ୪:୧-୧୩)
ଇୟା ୱେନ୍କା ପବିତ୍ରଆତ୍ମା ଜିସୁଙ୍ଗୁଁ ସିମ୍ରା ବାଡିଦୁ ଅତାତ୍ । ଆବେ ୱାନ୍ ସୟତାନ୍ତି ମାଣାନ୍ ପରିକା କିଆୟ୍ଆତାନ୍ । ସାଲିସ୍ ଦିନ୍ ନି ସାଲିସ୍ ନାଡ଼ା ଉପାସ୍ ତେବାତି ୱେନ୍କା ଜିସୁ ବାଙ୍ଗାଁ ସାତାନ୍ । ନାସ୍ତିୱାଲେ ସୟତାନ୍ ୱାନି ଲାକ୍ତୁ ୱାଜି ଇର୍ହାତ୍, “ନିନ୍ ଜଦି ମାପୁରୁଦି ମାରିନ୍, ଇୟା କାଲ୍କାଙ୍ଗ୍ ରୁଟିଙ୍ଗ୍ ଆଦେଙ୍ଗ୍ ଆଦେସ୍ ସିଆ ।”
ମାତର୍ ଜିସୁ ଇର୍ହାନ୍, “ଦାର୍ମୁସାସ୍ତ୍ରଦୁ ରାସାତାମାନାତ୍, ଲୋକୁ ଆବ୍କା ରୁଟିଦାନ୍ ଜିଏନ୍ । ମାତର୍ ମାପୁରୁଦି ୱେୟୁଦାନ୍ ସନି ୱିଜୁ ବାକ୍ୟ ୱାନି ଜିବନ୍ତି ଉଣ୍ତିଙ୍ଗ୍ ଦର୍କାର୍ ।”
ଇୟା ୱେନ୍କା ସୟତାନ୍ ଜିସୁଙ୍ଗୁଁ ପବିତ୍ର ଗାଡ଼୍ ଜିରୁସାଲାମ୍ତୁ ଅତାତ୍ । ଆବେ ୱାନିଙ୍ଗ୍ ମନ୍ଦିରତି ସାତ୍ ମୁସ୍କୁରି ଟିପୁଦୁ ନିଲ୍ପିସ୍କିଜି ୱାନିଙ୍ଗ୍ ୱେର୍ତାତ୍, ନିନ୍ ଜଦି ମାପୁରୁଦି ମାରିସି, ଇବେଣ୍କୁ ଆଡ୍ଗି ଗାତ୍ଆ । ଦାର୍ମୁସାସ୍ତ୍ରଦୁ ରାସାତାମାନାତ୍,
ମାପୁରୁ ନି ସାକା ଅତେଙ୍ଗ୍ ମୁସ୍କୁପୁର୍ତି ଦୁତ୍କାଙ୍ଗ୍ ଆଦେସ୍ ସିନାନ୍ ।
ୱାକ୍ ନିଙ୍ଗିଁ କିକାଣ୍କୁ ପେର୍ଜିଆସ୍ନେ ।
ଆବେଟ୍ ନି ପାଦାମ୍ଆଙ୍ଗ୍ଁ କାଲ୍କାଣି ସିନାଆଟ୍ଏତ୍ ।
ଜିସୁ ଇର୍ହାନ୍, “ଦାର୍ମୁସାସ୍ତ୍ରଦୁ ରାସାତାମାନାତ୍, ନିନ୍ ପ୍ରବୁ ନିଜେଦି ମାପୁରୁଙ୍ଗ୍ ପରିକା କିମା ।”
ୱେନ୍କା ସୟତାନ୍ ୱାନିଙ୍ଗ୍ ଉନ୍ଣ୍ତ୍ରି ନିର୍ଇ ଗରନ୍ତି ଟିପୁଦୁ ଅତାତ୍ ମାରି ୱାନିଙ୍ଗ୍ ସାରାଦୁନିଆଦି ୱିଜୁ ରାଜିଦି ଦନ୍ ସମ୍ପତ୍ତି ତର୍ସି ଇର୍ହାତ୍, “ଜଦି ନିନ୍ ମେଣ୍ତେଙ୍ଗ୍ ଗଟ୍କିଜି ନାଙ୍ଗିଁ ମାଡ଼ିସ୍କିନି, ଇୟାୱିଜୁ ନିଙ୍ଗିଁ ନାନ୍ ସିନା ।”
ଜିସୁ ଇର୍ହାନ୍, “ଆକ ଆଆ ସୟତାନ୍ ! ଦାର୍ମୁସାସ୍ତ୍ରଦୁ ରାସାତାମାନାତ୍, କେବଲ୍ ନି ପ୍ରବୁ ମାପୁରୁଙ୍ଗ୍ଁ ମାଡ଼ିସ୍ କିଆ ମାରି ୱାନି ସେବା କିଆ ।”
ନାସ୍ତିୱାଲେ ସୟତାନ୍ ଜିସୁଙ୍ଗୁଁ ଡ଼ିସ୍ତା ସର୍ହାତ୍, ମୁସ୍କୁପୁର୍ତି ଦୁତ୍କୁ ୱାଜି ଜିସୁଦି ସେବାକିତେ ।
ଜିସୁ ଗାଲିଲିଦୁ ୱାନି ପାଣି ଆରାମ୍ କିତାନ୍
(ମାର୍କ ୧:୧୪-୧୫; ଲୁକ ୪:୧୪-୧୫)
ଯୋହନତିଙ୍ଗ୍ ଜଇଲ୍ତୁ ଇଟ୍ତାମାନାର୍ ଇଜି ୱେନ୍ଞ୍ଜି ଜିସୁ ଗାଲିଲି ରାଜିଦୁ ସର୍ହାନ୍ । 3ମାତର୍ ନାଜରିତଦୁ ତେବାଏଣ୍ତା ସବୁଲୁନ ନି ନପ୍ତାଲି ରାଜିଦୁ ମାନି ଗାଲିଲି ଗାଡା ପାଡ଼ିଦୁ ମାନି କପର୍ନାହୁମ୍ତୁ ବାସାତାନ୍ । ଇୟାମାଣାନ୍ ଜିସାୟ ବାବବାଦିଦି ମାଟା ସତ୍ ଆତାତ୍, ୱାନ୍ ଇର୍ହାମାର୍ର୍ହାନ୍ ।
“ସବୁଲୁନ ଦେସ୍ ମାରି ନପ୍ତାଲି ଦେସ୍, ସାମ୍ଦୁର୍ ଲାକ୍ତୁରି,
ନି ଜର୍ଦନ ଗାଡା ଆୟା ପାଡ଼ିଦି,
ଅଣଜିହୁଦିରି ଗାଲିଲି !
ସିକାଟିଦି ନିଡ଼୍ଗାଦୁ ବାସାକିଜିମାନି ଲୋକୁ
ଉନ୍ଣ୍ତ୍ରି ପେରି ଜାୟ୍ ସୁଣାର୍
ସାନି ସିକାଟିଦି ରାଜିଦୁ ମାନି ଲୋକା ମୁସ୍କୁ
ଆୟା ଜାୟ୍ ତରାଇଆନାତ୍ ।” 4
ଆୟା ସମୟତାନ୍ ଜିସୁ ପ୍ରଚାର୍କିଜି ଇର୍ହାନ୍, “ପାପ୍ତାନ୍ ମନ୍ତିଙ୍ଗ୍ ଡ଼େପ୍ତୁ, ଇରିଙ୍ଗ୍ ମାପୁରୁଦି ରାଜି ଇଗା ୱାଜିନାତ୍ ।”
ଜିସୁ ନାଲ୍ଏର୍ ମିନ୍କୁ ଆସ୍ନିୱାରିଙ୍ଗ୍ କୁକ୍ତାନ୍
(ମାର୍କ ୧:୧୬-୨୦; ଲୁକ ୫:୧-୧୧)
ଜିସୁ ଗାଲିଲିଦି ସାମ୍ଦୁର୍ ପାଡ଼ି ସିଜି ବୁଲାଜିମାନିୱାଲେ ସିମୋନ୍ ପିତର ମାରି ଆନ୍ଦ୍ରିୟ ଦର୍ତି ରିଏର୍ ମିନ୍କୁ ଆସ୍ନିୱାରିଙ୍ଗ୍ ବେଟ୍ବୁଡ଼ାତାନ୍ ! ଇୟା ରିଏର୍ ତଡ଼ାନ୍କୁ ଜାଡ଼ି ପକ୍ସି ଗାଡାଦୁ ମିନ୍କୁ ଆସ୍ସିମାର୍ହାର୍ । ଜିସୁ ୱାରିଙ୍ଗ୍ କୁକ୍ସି ଇର୍ହାନ୍, “ନା ୱାଲେ ରାଦୁ । ନାନ୍ ମିଙ୍ଗିଁ ଲୋକାଙ୍ଗ୍ ମାପୁରୁ ଲାକ୍ତୁ ତାନିକା ଅଜାକିନା ।” ୱାର୍ ଆୟାଦାପ୍ରେ ୱାରି ଜାଡ଼ି ଡ଼ିସ୍ସି ଜିସୁୱାଲେ ୱାଲେ ସର୍ହାର୍ ।
ଜିସୁ ଅଡ଼ପ୍ ଆଗ୍ଡ଼ି ସଲ୍ସି ରିଏର୍ ତଡ଼ାନ୍ ଜାକୁବ ମାରି ଯୋହନ ଦର୍ତି ଜେବଦଦି ରିଏର୍ ମାରିସିରିଙ୍ଗ୍ ବେଟ୍ବୁଡ଼ାତାନ୍ । ଇୟା ତଡ଼୍ ରିଏର୍ ମାରି ୱାରି ବୁବାସି ଡଙ୍ଗାଁଦୁ ବାସ୍ସି ୱାରି ଜାଡ଼ି ମଦାକିଜିମାର୍ହାର୍ । ଜିସୁ ୱାରିଙ୍ଗ୍ ବା କୁକ୍ତାନ୍ ମାରି ୱାର୍ ଦାପେ ଦାପେ ଡଙ୍ଗାଁ ନି ବୁବାସିଙ୍ଗ୍ ଡ଼ିସ୍ସି ଜିସୁୱାଲେ ୱାଲେ ସର୍ହାର୍ ।
ଜିସୁଦି ସିକିୟା, ପ୍ରଚାର୍ ମାରି ନେଗେନ୍ କିନିକା
(ଲୁକ ୬:୧୭-୧୯)
ଜିସୁ ୱିଜୁ ଗାଲିଲି ରାଜି ସୁଡ଼୍ଜି ୱିସ୍ସି ପାର୍ତନାକିନି ଇଲ୍କାଙ୍ଗ୍ ସିକିୟା ସିଦେଙ୍ଗ୍ଆସ୍ତାନ୍ । ମାପୁରୁଦି ରାଜିଦି ସୁସମାଚାର୍ ପ୍ରଚାର୍ କିତାନ୍ ମାରି ରକମ୍ ରକମ୍ତି ରଗ୍ ନି କାସ୍ଟୁଦୁକା ଆତି ଲୋକାଙ୍ଗ୍ ନେଗେନ୍କିତାନ୍ । ୱାନି ବିସୟ୍ତାନ୍ ସିରିଆ ଦେସ୍ ୱିଜୁ ତରିନ୍ ୱେଙ୍ଗିଁତା ସର୍ହାତ୍ ମାରି ଲୋକୁ ଦୁବାକାସ୍ତିୱାରିଙ୍ଗ୍, ମୁର୍ଚା ରୋଗ୍ ଆସ୍ତିକାର୍ ମାରି ପକିୟାଗାତ୍ ରଗ୍ ୱିଜୁ ରକମ୍ତି ରଗ୍ତୁ ମାନି ଲୋକାଙ୍ଗ୍ ମାରି ୱିସାମ୍ତୁ ମାନି ୱିଜୁ ଲୋକାଙ୍ଗ୍ ୱାନି ଲାକ୍ତୁ ତାତାର୍, ମାରି ୱାନ୍ ୱାରିଙ୍ଗ୍ ନେଗେନ୍କିତାନ୍ । ମାରି ଗାଲିଲି, ଦେକାପଲି ରାଜି6, ଜିରୁସାଲାମ୍, ଜିହୁଦା ଦେସ୍ ମାରି ଜର୍ଦନ ଗାଡା ଆୟା ପାଡ଼ିଦାନ୍ ନାଣ୍ତ ଲୋକୁ ୱାଜି ୱାନି ୱାଲେ ସର୍ହାର୍ ।
Source notes (6)
- Cross-reference ଏବ୍ରି ୨:୧୮; ୪:୧୫.
- Cross-reference ମାତିଉ ୧୪:୩; ମାର୍କ ୬:୧୭; ଲୁକ ୩:୧୯,୨୦.
- Cross-reference ଜୋହନ ୨:୧୨.
- Cross-reference ମାତିଉ ୩:୨.
- Cross-reference ମାତିଉ ୯:୩୫; ମାର୍କ ୧:୩୯.
- Footnote ଦେକାପଲି ଉନ୍ଡ୍ରି ଦେସ୍
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.