ମାପୁରୁଦି ସତ୍ ବାକ୍ୟ
ମାତିଉ 22
ପେଡ଼ି ବୋଜିଦି କାତା
(ଲୁକ ୧୪:୧୫-୨୪)
ଜିସୁ ମାରିଡ଼େସି କାତାଦାନ୍ ଲୋକାଙ୍ଗ୍ ୱେର୍ତାନ୍ । ମାପୁରୁଦିରାଜି ଇୟାୱାଜା । ଅର୍ଲେନ୍ ଅରେନ୍ ରାଜା ନିଜେଦି ମାରିନ୍ତିଙ୍ଗ୍ ପେଡ଼ି ବୋଜି ତିଆର୍କିତାନ୍ । କୁକ୍ତିମାରିଇ ଲୋକାଙ୍ଗ୍ ବୋଜିଦୁ କୁକ୍ସ ତାତେଙ୍ଗ୍ ଇଜି ୱାନ୍ ସାକର୍କାଙ୍ଗ୍ ପୋକ୍ତାନ୍ । ମାତର୍ ଆୟା ଲୋକୁ ୱାଦେଙ୍ଗ୍ ବଦା କିଏତାର୍ । ରାଜା ମାରିଡ଼େସି ଆଇ ସାକର୍ଙ୍ଗାଁ ମାଣ୍କୁ ଇୟା କାବୁର୍ ୱେର୍ସି ପୋକ୍ତାନ୍, ପେଡ଼ି ବୋଜି ତିଆର୍ଆତାତ୍ନି, ବାଲ୍ସିତି ବାଲ୍ସିତି କଡି ମାରି ଗାଡ଼ାଲ୍ କୟ୍ତାରୋ ୱିଜୁ ତିଆର୍ଆତାମାନାତ୍, ବୋଜିଦୁ ବେଗି ରାଦୁ । ମାତର୍ ୱାର୍ ଇୟା ମାଟାଦିଙ୍ଗ୍ ଆସ୍ଏଣ୍ଗା ନିଜେନିଜେଦି ପାଣି କିଦେଙ୍ଗ୍ ଆସ୍ତାର୍ ଅରେନ୍ ୱାନି କିଡ଼ିଇଦୁ ସୋର୍ହାନ୍, ମାରି ଅରେନ୍ ନିଜେଦି ଦୁକାନ୍ତୁ ସର୍ହାନ୍ ମାରି ଏସ ଲୋକୁ ରାଜାଦି ସାକର୍କାଙ୍ଗ୍ ଆସ୍ତାରୋ ଡାକ୍ସି ଡାକ୍ସି ସାୟାମାର୍ଗାଡାକ୍ତାର୍ । ରାଜା ନାଣ୍ତ ରିସା ଆଜି ସନ୍ୟରିଙ୍ଗ୍ ପୋକ୍ତାନ୍, ୱାର୍ ଆୟା ସାୟାମାର୍ଗାଡାକ୍ତି ୱାରିଙ୍ଗ୍ ସାୟାମାର୍ଗାଡାକ୍ତାରୋ ୱାରି ଗାଡ଼୍ତିଙ୍ଗ୍ ଆଡ୍କାତାର୍ । ତାନେ ୱେନ୍କା ରାଜା ସାକର୍କାଙ୍ଗ୍ କୁକ୍ତାନ୍ନୋ ଇର୍ହାନ୍, ନା ପେଡ଼ି ବୋଜି ତିଆର୍ ଆତାମାନାତ୍, ମାତର୍ ନାନ୍ କୁକ୍ତିମାରିଇ ଲୋକୁ ଜଗ୍ସିଲେର୍ । ଇଲେଇ ପେରି ପେରି ସାକ୍ଡ଼ିଆଙ୍ଗ୍ ସୋଲ୍ସ ଏସ ଲୋକାଙ୍ଗ୍ ପଇନିଦେର୍, ୱିଜେରିଙ୍ଗ୍ ମା ବୋଜିଦୁ କୁକ୍ସତାଗାଟ୍ । ଆବେଟ୍ ସାକର୍କୁ ସାକ୍ଡ଼ିଦିଙ୍ଗ୍ ସାକ୍ଡ଼ି ବୁଲାଜି ନେଗିକାନ୍ଆପିନ୍ ମାରି ତାଗ୍ଇକାନ୍ଆପିନ୍; ଏସ ଲୋକାଙ୍ଗ୍ ପୋୟ୍ତାର୍, ୱିଜୁ ଲୋକାଙ୍ଗ୍ କୁକ୍ତା ତାତାର୍ ମାରି ପେଡ଼ି ଇଲୁଦୁ ବର୍ତିଆତାର୍ ।
“ରାଜା କୁଡ଼ାଆଙ୍ଗାଁ ସୁଡ଼ୁଦେଙ୍ଗ୍ ୱାତାନ୍ । ୱାନ୍ ସୁଡ଼ୁତାନ୍, ୱାରି ଲୋଇରାନ୍ ଅରେନ୍ ପେଡ଼ି ଆଙ୍ଗିଁ ଆରାଏନ୍ । ରାଜା ୱାନିଙ୍ଗ୍ ୱେନ୍ବାତାନ୍, ବନ୍ଦୁ, ପେଡ଼ି ଆଙ୍ଗିଁ ଆରାଏଣ୍ତା ଏଣ୍ତେସ୍ ଇୟା ବାଡିଦୁ ୱାତି ? ଆୟାକାନ୍ ଆଲେତାନୋ ତେବାତାନ୍ । 1ରାଜା ସେବାକିନିକାଙ୍ଗ୍ ଇର୍ହାନ୍, ୱାନି କିକୁ ପାଦାମ୍କୁ ତର୍ସୋ ଆତେରେ ସିକାଟିଦୁ ପୋକ୍ତୁ । ଆବେନୁ ୱାନ୍ ଆଡ଼ାବାଜି ୱାନି ପାଲୁକୁ କାତ୍ରେକିନାନ୍ ।”
କାତା ୱେର୍ତେଙ୍ଗ୍ ୱିସ୍ତାନ୍ନୋ ଜିସୁ ଇର୍ହାନ୍, “ନାଣ୍ତ ଲୋକୁ କୁକାୟ୍ଆତାମାନାର୍, ମାତର୍ ଉଣା ଲୋକୁ ବାସେଆତାମାନାର୍ ।”
ସିସୁଟୁ ସିନି ବିସୟ୍ତାନ୍ ପ୍ରସ୍ନ
(ମାର୍କ ୧୨:୧୩-୧୭; ଲୁକ ୨୦:୨୦-୨୬)
ଏସଲୋକ୍ ପାରୁସିର୍ ସଲ୍ସି ଜିସୁଙ୍ଗୁଁ ପ୍ରସ୍ନ ୱେନ୍ବାଜି ୱାନିଙ୍ଗ୍ ଗୁଟାଦୁ ଆରେପ୍ତେଙ୍ଗ୍ ଇଜି ଉପାୟ୍ ପୟ୍ତାର୍ । ୱାର୍ ନିଜେଦି ଏସଲୋକ୍ ସିସୁରିଙ୍ଗ୍ ମାରି ହେରୋଦ ଦଲତୀ ଏସ ଲୋକାଙ୍ଗ୍ ଜିସୁଦି ଲାକ୍ତୁ ପୋକ୍ତାର୍ । ୱାର୍ ୱାଜି ଜିସୁଙ୍ଗୁଁ ଇର୍ହାର୍, “ଏ ଗୁରୁ, ମାପ୍ ନେସ୍ନାପ୍, ନିନ୍ ସତ୍ ଇନି ମାରି ନିନ୍ ମାପୁରୁଦି ସତ୍ ବିସୟ୍ତାନ୍ ସିକିୟା ସିନି । ମାରି ଆଇକାର୍ ଇନିକା ଅଡ଼୍ବିନାର୍ ଆୟା ବିସୟ୍ତାନ୍ ବେମ୍ରିଆଇ, ଇରିଙ୍ଗ୍ ନିନ୍ ଏମେୱାରି ମାଟାଦିଙ୍ଗ୍ ମନ୍ସିଇ । ଆର୍ତିଙ୍ଗ୍ ମାଙ୍ଗିଁ ଇନିଆ, ଇୟା ବିସୟ୍ତାନ୍ ନି ମାଟାଇନିକା ? କାଇସର୍ ରାଜେଙ୍ଗ୍ ସିସୁଟୁ ସିନିକା ନିୟମ୍ତି ଇସାବ୍ତାନ୍ ଟିକ୍ ନୋ ବୁଲ୍ ?”
ମାତର୍ ଜିସୁ ୱାରି ତାଗ୍ଇ ଉପାୟ୍ ନେସ୍ସି ଇର୍ହାନ୍, “ଏ କପଟିର୍, ନାଙ୍ଗିଁ ଗୁଟାଦୁ ଆରେପ୍ତେଙ୍ଗ୍ ଏନ୍ଦା ସେସ୍ଟାକିଜିନିଦେର୍ ? ଆମା ଅଦଲିଦାନ୍ ସିସୁଟୁ ତର୍ସିନିଦେର୍, ଆବେନୁ ଉନ୍ଡ୍ରି ତାସ ନାଙ୍ଗିଁ ତର୍ତୁ !”
ୱାର୍ ଉନ୍ଡ୍ରି ଅଦ୍ଲି ଡାବୁଙ୍ଗ୍ ତାତାରୋ ୱାନିଙ୍ଗ୍ ସିତାର୍ । ୱାନ୍ ୱାରିଙ୍ଗ୍ ୱେନ୍ବାତାନ୍, “ଇୟା ଅଦ୍ଲି ମୁସ୍କୁ ଏ ବମା ମାରି ଦର୍ ମାନାତ୍ ?”
ୱାର୍ ଇର୍ହାର୍, କାଇସର୍ଦି, “ଜିସୁ ୱାରିଙ୍ଗ୍ ଇର୍ହାନ୍, ଆର୍ତିଙ୍ଗ୍ ଆମାକା କାଇସର୍ଦି, ଆକା କାଇସର୍ ରାଜେଙ୍ଗ୍ ସିଦୁ ମାରି ଆମାକା ମାପୁରୁଦି, ଆକା ମାପୁରୁଙ୍ଗ୍ ସିଦୁ ।”
ୱାର୍ ଇକା ୱେନ୍ଞ୍ଜି କାବାଜି ୱାନିଙ୍ଗ୍ ଡ଼ିସ୍ସି ସୋର୍ହାର୍ ।
ଡ଼େସିନିଙ୍ଗିଁନି ବିସୟ୍ତାନ୍ ପ୍ରସ୍ନ
(ମାର୍କ ୧୨:୧୮-୨୭; ଲୁକ ୨୦:୨୭-୪୦)
ଆୟାନାଣ୍ତିଙ୍ଗ୍ ସାଦୁକି ଦଲତୀ ଏସ ଲୋକୁ ଜିସୁଦି ଲାକ୍ତୁ ୱାତାର୍ । ସାଦୁକିର୍ ବିସ୍ବାସ୍କିଜି ମାର୍ହାର୍ ଜେ, ମାରିଡ଼େସିନିଙ୍ଗିଁନିକା ସିଲେତ୍ । ୱାର୍ ଜିସୁଙ୍ଗୁଁ ୱେନ୍ବାତାର୍, “ଏ ଗୁରୁ, ମୋସା ଇର୍ହାମାନାନ୍, ଜଦି ଅରେନ୍ ଲୋକୁ କଡ଼କକ୍ରା ଆଏଣ୍ତା ସାନାସନାନ୍, ଆର୍ତିଙ୍ଗ୍ ୱାନି ତଡ଼ାନ୍ ୱାନି ଆଡ଼୍ସିଙ୍ଗ୍ ପେଡ଼ି ଆନାନ୍ ମାରି ୱାରି କଡ଼ର୍ ଆୟା ସାତି ଲୋକ୍ତି କଡ଼ର୍ ଇଜି ସିନାଆନାର୍ । ୱେନ୍ଡ୍ରୁ, ମା ଲୋଇ ସାତ୍ଲୋକ୍ ତଡ଼ାନ୍କୁ ମାର୍ହାର୍ । ପେରି ତଡ଼ାନ୍ କଡ଼କକ୍ରା ଆଏଣ୍ତା ସାତା ସର୍ହାନ୍ ଆକା ୱାନି ୱେନ୍କାରି ତଡ଼ାନ୍ ତଡ଼ାନ୍ତି ଆଡ଼୍ସିଙ୍ଗ୍ ପେଡ଼ିଆତାନ୍ । ମାତର୍ ଇୟାୱାନି ୱେନ୍କାରିକାନ୍, ମଜାୟ୍ଏନ୍ ମାରି ସାରାସାରି ସାତ୍ଲୋକ୍ ସାନ୍ଦି ଆୟାୱାଜା ଗଟାତାତ୍ । ସାରାସାରିୱେନ୍କା ଆୟା ଆଇମା ସାତା ସୋର୍ର୍ହାତ୍ । ଆମା ନାଣ୍ତିଙ୍ଗ୍ ସାତି ଲୋକୁ ମାରିଡ଼େସିନିଙ୍ଗିଁନାର୍, ଇୟା ଆଇମା ଏ ଆଇମା ଇଜି ସିନାଆନାତ୍ ? ୱିଜେର୍ତ ତାନିଙ୍ଗ୍ ପେଡ଼ି ଆତାମାର୍ହାର୍ ।”
ଜିସୁ ୱାରିଙ୍ଗ୍ ଇର୍ହାନ୍, “ମିର୍ ଏସ ବାୟାର୍ ! ଦାର୍ମୁସାସ୍ତ୍ର ନି ମାପୁରୁଦି ସାକ୍ତି ନେସ୍ଇଦେର୍ । ମାରିଡ଼େସିନିଙ୍ଗିଁନି ୱେନ୍କା ସାତି ଲୋକୁ ୱିଜେରେ ମୁସ୍କୁପୁର୍ତି ଦୁତ୍କା ୱାଜା ତେବାନାର୍ । ୱାର୍ ପେଡ଼ିଆଏର୍ କି ପେଡ଼ି କିଏର୍ । ସାତି ଲୋକୁ ମାରିଡ଼େସିନିଙ୍ଗିଁନି ବିସୟ୍ତାନ୍ ମାପୁରୁ ଆମାକା ୱେର୍ତାମାନାନ୍, ମିର୍ ଇନିକା ସାସ୍ତ୍ରଦୁ ଏସ୍କାଙ୍ଗ୍ ପଡ଼ାଇଦେର୍ ? ମାପୁରୁ ଇର୍ଆମାନାନ୍, ମାପ୍ ଅବ୍ରାହାମ, ଇସ୍ହାକ୍ ମାରି ଜାକୁବଦି ମାପୁରୁ ।”
“ୱାନ୍ ଜିବନ୍ମାନିୱାରି ମାପୁରୁ ସାତିୱାରି ମାପୁରୁ ଆଏନ୍ ।”
ଲୋକୁ ଜିସୁଦି ସିକିୟା ୱେନ୍ଞ୍ଜି କାବାଆତାର୍ ।
ପେରି ଆଜ୍ଞା
(ମାର୍କ ୧୨:୨୮-୩୪; ଲୁକ ୧୦:୨୫-୨୮)
ଏସ୍ତିୱାଲେ ପାରୁସିର୍ ୱେର୍ଆର୍ ଜେ ଜିସୁ ସାଦୁକିରିଙ୍ଗ୍ ଚୁପ୍କିବିସ୍ତାମାନାନ୍, ୱାର୍ ଉନ୍ଡ୍ରେମାନୁ ଆଜି ଜିସୁଦି ଲାକ୍ତୁ ୱାତାର୍ ମାରି ୱାରି ମାଣ୍କୁ ଅରେନ୍ ଦାର୍ମୁଗୁରୁ ଜିସୁଙ୍ଗୁଁ ଗୁଟାଦୁ ଆରେପ୍ତେଙ୍ଗ୍ ଇଜି ଉନ୍ଡ୍ରି ମାଟା ୱେନ୍ବାତାନ୍, ୱାନ୍ ୱେନ୍ବାତାନ୍ “ଗୁରୁ, ମୋସାଦି ନିୟମ୍ତୁ ଆମା ଆଜ୍ଞା ୱିଜେରିମାଣ୍କୁ ପେରିକା ?”
ଜିସୁ ୱାନିଙ୍ଗ୍ ଇର୍ହାନ୍, ମି ପ୍ରବୁ ମାପୁରୁଙ୍ଗ୍ ପୁରାୱିଜୁ ଜିବନ୍, ପୁରାୱିଜୁ ମେନ୍ଧଲ୍ ମାରି ପୁରାୱିଜୁ ମନ୍ ସିଜି ଜିବନ୍ ନଆ । ଇକା ଆଜିନାତ୍ ୱିଜେରିମାଣାନ୍ ପେରିକା ମାରି ପେରିମାଟା । “ମାରି ଉନ୍ଡ୍ରି ପେରି ଆଜ୍ଞା ଆଜିନାତ୍, ମି ଲାକ୍ତୁରି ଲୋକାଙ୍ଗ୍ ନିଜେଦିଙ୍ଗ୍ ଜିବନ୍ନୋତିୱାଜା ନୋଦୁ । 3ଇୟା ରୁଣ୍ତି ମାଟେଙ୍ଗ୍ ମୁସ୍କୁ ମୋସାଦି ୱିଜୁ ନିୟମ୍ ମାରି ବାବବାଦିରି ସିକିୟା ଆସାଇଡ୍ନାତ୍ ।”
କ୍ରିସ୍ତ ଆଜିନାନ୍ ମସିହ
(ମାର୍କ ୧୨:୩୫-୩୭; ଲୁକ ୨୦:୪୧-୪୪)
ଏସ୍ତିୱାଲେ ପାରୁସିର୍ ଉଣ୍ତାତା ମାର୍ହାର୍, ଜିସୁ ୱାରିଙ୍ଗ୍ ୱେନ୍ବାତାନ୍, “କ୍ରିସ୍ତ ଅର୍ତ ମସିହଦି ବିସୟ୍ତାନ୍ ମିର୍ ଇନିକା ଅଡ଼୍ବିଜିନିଦେର୍ ? ୱାନ୍ ଏ କୁଟୁମ୍ ?”
ୱାର୍ ଇର୍ହାର୍, “ୱାନ୍ ଦାଉଦଦି କୁଟୁମ୍ ।”
ଜିସୁ ୱେନ୍ବାତାନ୍, ଆର୍ତିଙ୍ଗ୍ ଦାଉଦ ମସିହଙ୍ଗ୍ “ନା ପ୍ରବୁ” ଇଜି ଏନ୍ଦା ଇର୍ହାମାନାନ୍ ? ଇରିଙ୍ଗ୍ ଆତ୍ମା ୱେର୍ନିମାଣାନ୍ ୱାନ୍ ରାସ୍ତାମାନାନ୍,
ପ୍ରବୁ ନା ପ୍ରବୁଙ୍ଗ୍ ଇର୍ହାନ୍,
ମାପ୍ ମି ସାତ୍ରୁରିଙ୍ଗ୍ ମି କାଲ୍କା ଆଡ୍ଗି
କିଇ ସାନ୍ଦି ମିର୍ ମା ଉଣି ତରିନ୍ ବାସ୍ତୁ ।
ଜଦି ଦାଉଦ ମସିହଙ୍ଗ୍ ନା ପ୍ରବୁ, ଇଜି ମାନାତା ମାନାନ୍, ଆର୍ତିଙ୍ଗ୍ କ୍ରିସ୍ତ ଅର୍ତ ମସିହ ଏଣ୍ତେସ୍ ଦାଉଦତି ମାରିନ୍ ଆଦେଙ୍ଗ୍ ଆଟ୍ନାନ୍ ?
ଜିସୁଙ୍ଗୁଁ ଏନ୍ ଇୟାତାନି ଉତର୍ ସିଦେଙ୍ଗ୍ ଆଟ୍ଏତାର୍ । ଆୟା ନାଣ୍ତିରାନ୍ ଏନ୍ ୱାନିଙ୍ଗ୍ ମାରି ପ୍ରସ୍ନ ୱେନ୍ବାଦେଙ୍ଗ୍ ସାସ୍ କିଏତାର୍ ।
Source notes (3)
- Cross-reference ମାତିଉ ୮:୧୨; ୨୫:୩୦; ଲୁକ ୧୩:୨୮.
- Cross-reference ପ୍ରେରିତ ୨୩:୮.
- Cross-reference ଲୁକ ୧୦:୨୫-୨୮.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.