ମାପୁରୁଦି ସତ୍ ବାକ୍ୟ
ମାତିଉ 19:26
Verse 26 is marked below, with the whole chapter around it. Read from the start
ଆଡ଼୍ସିଙ୍ଗ୍ଡ଼ିସ୍ନି ବିସୟ୍ତାନ୍ ଜିସୁଦି ସିକିୟା
(ମାର୍କ ୧୦:୧-୧୨)
ଜିସୁ ଇୟାୱିଜୁ ମାଟା ୱେର୍ତି ୱିସ୍ତି ୱେନ୍କା ଗାଲିଲି ଡ଼ିସ୍ସି ଜର୍ଦନ ଗାଡାଦି ଆୟାପାଡ଼୍କା ମାନି ଜିହୁଦା ରାଜିଦୁ ସୋର୍ହାର୍ । ମାରି, ନାଣ୍ତ ଲୋକୁ ୱାନି ୱେନ୍କା ୱେନ୍କା ସୋର୍ହାର୍ ମାରି ୱାନ୍ ଗାଦି ରଗ୍ଲୋକାଙ୍ଗ୍ ନେଗେନ୍କିତାନ୍ ।
ଏସଲୋକ୍ ପାରୁସିର୍ ୱାନି ଲାକ୍ତୁ ୱାତାରୋ ୱାନିଙ୍ଗ୍ ଗୁଟାଦୁ ଆର୍ପ୍ତେଙ୍ଗ୍ ସେସ୍ଟାକିତାର୍ । ୱାର୍ ୱାନିଙ୍ଗ୍ ୱେନ୍ବାତାର୍, “ମସାଦି ନିୟମ୍ ଇସାବ୍ତାନ୍ ଅରେନ୍ ଇନି ବିସୟ୍ତାନ୍ ନିଜେଦି ଆଡ଼୍ସିଙ୍ଗ୍ ଡ଼ିସ୍ନିଆକୁ ସିଦେଙ୍ଗ୍ ଆଟ୍ନାନ୍ ନୋ ?”
ଜିସୁ ଇର୍ହାନ୍, ମିର୍ ଇନିକା ସାସ୍ତ୍ରଦୁ ପଡ଼ାଇଦେର୍ ନୋ, ତିଆର୍କିତିମାଲିକ୍ ଆଗ୍ଡ଼ିରାନ୍ନେ ୱାରିଙ୍ଗ୍ ମେମାରି ନି ଆଇମା କିଜି ତିଆର୍ କିତାନ୍ ? ନାସ୍ତିୱାଲେ ମାପୁରୁ ଇର୍ହାମାର୍ହାନ୍, “ଇୟାଉଣ୍ତିଙ୍ଗ୍ ଅରେନ୍ ମେମାର୍ଏନ୍ ନିଜେଦି ବୁବାୟାୟେଙ୍ଗ୍ ଡ଼ିସ୍ସି ନିଜେଦି ଆଡ଼୍ସି ୱାଲେ ତେବାନାନ୍ ମାରି ଆୟା ରିଏର୍ ଅରେନ୍ଆନାର୍ । ୱାର୍ ମାରି ରିଏର୍ ଆଏର୍, ମାତର୍ ଅରେନ୍ନେ । ଆମାୱାରିଙ୍ଗ୍ ମାପୁରୁ ମିସାକିତାମାନାନ୍, ଆକା ଲୋକୁ ୱାରିଙ୍ଗ୍ ୱେରେଏ କିମାକିର୍ ।” 1
ପାରୁସିର୍ ୱାନିଙ୍ଗ୍ ୱେନ୍ବାତାର୍, “ଆର୍ତିଙ୍ଗ୍ ଆଇମାଦିଙ୍ଗ୍ ଡ଼ିସ୍ନି ଆକୁ ସିଜି ଡ଼ିସ୍ନି ଉଣ୍ତିଙ୍ଗ୍ ମୋସା ଏନ୍ଦା ନିୟମ୍ କିତାମାନାନ୍ ?”
ଜିସୁ ୱାରିଙ୍ଗ୍ ଇର୍ହାନ୍, “ମି ଜିବନ୍ତି ଆଟୁୱାଦିଙ୍ଗ୍ ସୁଡ଼୍ଜି ମୋସା ମିଙ୍ଗିଁ ଇୟାୱାଜା କିତାମାର୍ହାନ୍ । ମାତର୍ ତିଆର୍ଆତି ଆଗ୍ଡ଼ି ଇୟାୱାଜା ନିୟମ୍ ସିଲେତାତ୍ । 2ମାତର୍ ନାନ୍ ମିଙ୍ଗିଁ ଇଜିନା, ଏନ୍ଆପିନ୍ ନିଜେଦି ଆଡ଼୍ସିଙ୍ଗ୍ ଦାରିପାଣି ଦସ୍ ଡ଼ିସ୍ତିଙ୍ଗ୍ ଆଇ ଇନି ବିସୟ୍ତାନ୍ ଡ଼ିସ୍ନାନ୍ ନୋ ଆଇ ଆଇମାଦିଙ୍ଗ୍ ପେଡ଼ିଆନାନ୍, ୱାନ୍ ନିଜେ ଦାରିପାଣି କିନାନ୍ ।”
ସିସୁର୍ ୱାନିଙ୍ଗ୍ ଇର୍ହାର୍, “ଆଡ଼୍ସି ୱାଲେ କନ୍ଲିଦି ଜଦି ଇୟାୱାଜା ବିସୟ୍ମାନି ମାଟା, ଆର୍ତିଙ୍ଗ୍ ପେଡ଼ିଆଇକା ନେଗେତ୍ ।”
ଜିସୁ ଇର୍ହାନ୍, “ଇୟା ସିକିୟା ୱିଜେରି ଉଣ୍ତିଙ୍ଗ୍ ସିଲେ । ମାପୁରୁଦି ମାଣାନ୍ ଏମେୱାରିଙ୍ଗ୍ ଇକା ସିଆୟ୍ଆତାମାନାତ୍, କେବଲ୍ ୱାର୍ ଇକା ମାନାଦେଙ୍ଗ୍ ଆଟ୍ନାର୍ । ଇନିଇନି ବିସୟ୍ତାନ୍ ଲୋକୁ ପେଡ଼ିଆଏଣ୍ଗା ତେବାନାସୋନାର୍ । ଏସଲୋକ୍ ଜନମ୍ତାନ୍ ପେଡ଼ିଆନି ଉଣ୍ତିଙ୍ଗ୍ ଜଗ୍ସିଲେର୍, ଏସ ଲୋକାଙ୍ଗ୍ ଲୋକୁ ଆୟାୱାଜା କିତାମାନାର୍, ମାରି ଏସଲୋକ୍ ମୁସ୍କୁପୁର୍ତି ଉଣ୍ତିଙ୍ଗ୍ ପାଣିକିଦେଙ୍ଗ୍ ପେଡ଼ିଆଏଣ୍ଗା ତେବାନାର୍ । ଏମେକାର୍ ଇୟା ସିକିୟାଦି ଅର୍ତ ବୁଜାଦେଙ୍ଗ୍ ଆଟ୍ସିନାର୍, ୱାର୍ ଆକା ମାନାପିର୍ ।”
ଜିସୁ ଇସ୍ରି କଡ଼ରିଙ୍ଗ୍ ଆସିର୍ବାଦ୍ କିନାନ୍
(ମାର୍କ ୧୦:୧୩-୧୬; ଲୁକ ୧୮:୧୫-୧୭)
ନାସ୍ତିୱାଲେ ଇସ୍ରିକଡ଼ରି ମୁସ୍କୁ କିୟୁ ଇଡ୍ଜି ପାର୍ତନା କିଦେଙ୍ଗ୍ ଇଜି ଏସଲୋକ୍ ୱାରିଙ୍ଗ୍ ଜିସୁଦି ଲାକ୍ତୁ ତାତାର୍ । ଆୟା ଲୋକାଙ୍ଗ୍ ସିସୁର୍ ଆଦ୍ରିସ୍ କିତାର୍ । ମାତର୍ ଜିସୁ ଇର୍ହାନ୍, “ଇସ୍ରି କଡ଼ରିଙ୍ଗ୍ ନା ଲାକ୍ତୁ ୱାଦେଙ୍ଗ୍ ସିଦୁ । ୱାରିଙ୍ଗ୍ ବାଦାକିମାଟ୍, ଇରିଙ୍ଗ୍ ମୁସ୍କୁପୁର୍ତି ଅଦିକାରି ଏମେକାର୍ ୱେରିୱାଜା ଆୟା ଲୋକ୍ତି ଅଦିକାରି ।”
ମାରି, ୱାରି ମୁସ୍କୁ କିୟୁ ଇଡ୍ଜି ଆସିର୍ବାଦ୍ କିତି ୱେନ୍କା ୱାନ୍ ଆବେଟ୍ତାନ୍ ସୋର୍ହାନ୍ ।
ଅରେନ୍ ମାଜନ୍ ମୁରୁଲି
(ମାର୍କ ୧୦:୧୭-୩୧; ଲୁକ ୧୮:୧୮-୩୦)
ଅର୍ଲେନ୍ ଅରେନ୍ ମୁରୁଲି ଜିସୁଦି ଲାକ୍ତୁ ୱାତାନ୍ନୋ ୱେନ୍ବାତାନ୍, “ଏ ଗୁରୁ, ଏସ୍କାଙ୍ଗ୍ୱିଜିଇ ଜିବନ୍ ପୟ୍ନି ଉଣ୍ତିଙ୍ଗ୍ ନାନ୍ ଇନି ନେଗି ପାଣି କିଦେଙ୍ଗ୍ ଆନାତ୍ ?”
ଜିସୁ ୱାନିଙ୍ଗ୍ ଇର୍ହାନ୍, “ନେଗି ପାଣି ବିସୟ୍ତାନ୍ ନାଙ୍ଗିଁ ଏନ୍ଦା ୱେନ୍ବାଜିନି ? ମାପୁରୁ ନେ କେବଲ୍ ନେଗିକାନ୍ । ମାପୁରୁଦି ମାଟେଙ୍ଗ୍ ମାନାତିଙ୍ଗ୍, ଏସ୍କାଙ୍ଗ୍ୱିଜିଇ ଜିବନ୍ ପୟ୍ଦେଙ୍ଗ୍ ଆଟ୍ନି ।”
ୱାନ୍ ୱେନ୍ବାତାନ୍, “ଆମାୱିଜୁ ମାଟେଙ୍ଗ୍ ?”
ଜିସୁ ଇର୍ହାନ୍, “ଲୋକାଙ୍ଗ୍ ସାୟାମାର୍ଗା ଡାକ୍ମାଟ୍, ଦାରିପାଣି କିମାଟ୍, ଡଙ୍ଗାଁ କିମାଟ୍, ଏ ବିରଦ୍ତାନ୍ ମିସ୍ମାଟା ସାକିସିମାଟ୍, ବୁବାୟାୟ୍ଙ୍ଗେ ମାନାଦୁ, ମାରି ଲାକ୍ତୁରି ଲୋକାଙ୍ଗ୍ ନିଜେଦିଙ୍ଗ୍ ଜିବନ୍ନୋତିୱାଜା ଜିବନ୍ନୋଦୁ ।”
ମୁରୁଲି ଇର୍ହାନ୍, “ଇୟାୱିଜୁ ମାଟେଙ୍ଗ୍ ମାନାତାମାନା, ନାନ୍ ମାରି ଇନିକା ନାଙ୍ଗିଁ ଉଣାମାନାତ୍ ?”
ଜିସୁ ୱାନିଙ୍ଗ୍ ଇର୍ହାନ୍, “ଜଦି ନିନୁ ନେଗିକାନ୍ ଆଦେଙ୍ଗ୍ ବଦାକିଜିନି, ସାଙ୍ଗ୍ଆଁ, ନି ୱିଜୁ ସମ୍ପତ୍ତି ପର୍ଜ ଆୟା ଡାବୁଙ୍ଗୁଁ ସିଲିସାତିୱାରିଙ୍ଗ୍ ଦାନ୍ ସିଆ । ଆର୍ତିଙ୍ଗ୍ ନିନ୍ ମୁସ୍କୁପୁର୍ତୁ ଦନ୍ ପଇନି । ଇୟାୱିଜୁ କିଜୱିସ୍ସୋ ନା ୱେନ୍କା ୱେନ୍କା ରାଆ ।”
ମୁରୁଲି ଇୟା ମାଟା ୱେନ୍ଞ୍ଜି ଦୁଃକ୍ ଆଜି ସୋର୍ହାନ୍, ଇରିଙ୍ଗ୍ ୱାନ୍ ପେରି ମାଜନ୍ଲୋକ୍ ମାର୍ହାନ୍ ।
ଜିସୁ ନିଜେଦି ସିସୁରିଙ୍ଗ୍ ଇର୍ହାନ୍, ନାନ୍ ମିଙ୍ଗିଁ ସତ୍ ଇଜିନା, ମାଜନ୍ ଲୋକୁ ବଡ଼େ କସ୍ଟଦାନ୍ ମୁସ୍କୁପୁର୍ତୁ ସନାର୍ । ମାରିଡ଼େସି ନାନ୍ ମିଙ୍ଗିଁ ୱେର୍ସିନା, ମାପୁରୁଦି ରାଜିଦୁ ମାଜନ୍ ଲୋକ୍ତି ସନି ବାଦୁଲୁ ସୁଜିଦି ବର୍ ସିଜି ଉଟ୍ ଡ଼ୁଗୁନିକା ଉସାସ୍ ।
ସିସୁର୍ ଇକା ୱେନ୍ଞ୍ଜି କାବାଆତାରୋ ୱେନ୍ବାତାର୍, “ଆର୍ତିଙ୍ଗ୍ ଏନ୍ ରକିୟା ପଇଦେଙ୍ଗ୍ ଆଟ୍ନାନ୍ ?”
ଜିସୁ ସିସୁରିଙ୍ଗ୍ ସାଡ଼୍କୁ ସାଡ଼୍କୁ ସୁଡ଼୍ଜି ଇର୍ହାନ୍, “ଇକା ଲୋକାଦି ଉଣ୍ତିଙ୍ଗ୍ ଆଟ୍ୱା ଆଦେଙ୍ଗ୍ ଆଟ୍ନାତ୍, ମାତର୍ ମାପୁରୁଦିଙ୍ଗ୍ ଉଣ୍ତିଙ୍ଗ୍ ଆନାତ୍, ଇରିଙ୍ଗ୍ ମାପୁରୁ ୱିଜୁ କିଦେଙ୍ଗ୍ ଆଟ୍ନାନ୍ ।”
ଇକା ୱେର୍ଆନ୍ନୋ ପିତର୍ ଇର୍ହାନ୍, “ସୁଡ଼ୁଦୁ, ମାପ୍ ୱିଜୁ ଡ଼ିସ୍ସି ନି ୱେନ୍କା ୱାତା ମାନାପ୍ । ମାଡ୍ ଇନିକା ପଇନିକା ?” 3
ଜିସୁ ୱାରିଙ୍ଗ୍ ଇର୍ହାନ୍, ନାନ୍ ମିଙ୍ଗିଁ ସତ୍ ଇଜିନା, ପୁନି ଜଗ୍ତି ଏସ୍ତିୱାଲେ ମନୁସ୍ୟପୁତ୍ର ନିଜେଦି ଗୌରବ୍ମୟ୍ ରାଜାଗାଦିଦୁ ବାସ୍ନାନ୍, ନାସ୍ତିୱାଲେ ନା ଇୟା ବାରଲୋକ୍ ସିସୁର୍ ବା ବାରଗୋଟା ରାଜାଗାଦିଦୁ ବାସ୍ନାରୋ ଇସ୍ରାଏଲ୍ତି ବାରଗୋଟା କୁଟୁମ୍ତି ମୁସ୍କୁ ସାସନ୍ କିନିଦେର୍ । ମାରି ଏମେକାର୍ ନା ଉଣ୍ତିଙ୍ଗ୍ ନିଜେଦି ଇଲୁ, ତଡ଼ାନ୍ତିଙ୍ଗ୍ ନି ତାଙ୍ଗିଁ, ବୁବା ନି ୟାୟେଙ୍ଗ୍, କଡ଼କକ୍ରାରିଙ୍ଗ୍ ମାରି ବୁମିବାଡ଼ା ଡ଼ିସ୍ତାମାନାନ୍, ୱାର୍ ତାନି ସଏ ଗୁଣୁ ପୟ୍ନାର୍; ମାରି ଏସ୍କାଙ୍ଗ୍ୱିଜ୍ଇ ଜିବନ୍ ବା ପୟ୍ନାର୍ । 4ମାତର୍ ଆଗ୍ଡ଼ି ମାନି ଏସ ଲୋକୁ ୱେନ୍କା ଆନାର୍ ମାରି ୱେନ୍କା ମାନି ଏସ ଲୋକୁ ଆଗ୍ଡ଼ି ଆନାର୍ ।
Source notes (4)
- Cross-reference ମାତିଉ ୫:୩୧.
- Cross-reference ମାତିଉ ୫:୩୨; ୧ କରିନ୍ତିୟ ୭:୧୦,୧୧.
- Cross-reference ମାତିଉ ୨୫:୩୧; ଲୁକ ୨୨:୩୦.
- Cross-reference ମାତିଉ ୨୦:୧୬; ଲୁକ ୧୩:୩୦.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.