ମାପୁରୁଦି ସତ୍ ବାକ୍ୟ
ଲୁକ 3
ଡୁବନ୍ସିନି ଯୋହନତି ପ୍ରଚାର୍
(ମାତିଉ ୩:୧-୧୨; ମାର୍କ ୧:୧-୮; ଜୋହନ ୧:୧୯-୨୮)
ତିବିରିୟା କାଇସର୍ଦି ସାସନ୍କିଜି ମାର୍ଇ ୱାଲେରି ପନ୍ଦର ବାର୍ସେକ୍ତି ମାଟା, ଏସ୍ତିୱାଲେ ସାସନ୍କିନି ପନ୍ତିୟ ପିଲାତ୍ ଜିହୁଦା ଦେସ୍ତୁ ପେରିରାଜା ମାର୍ଆନ୍ ମାରି ହେରୋଦ ଗାଲିଲିଦି ପେରିରାଜା, ମାରି ୱାନି ତଡ଼ାନ୍ ପିଲିପ୍ପ ଇତୁରିୟା ମାରି ତ୍ରାକନିଦି ଦେସ୍ତୁ ପେରିରାଜା ମାର୍ଆର୍, ମାରି ଲୁସାନିୟା ଅବିଲିନି ଦେସ୍ତୁ ପେରିରାଜା ମାର୍ହାନ୍ ।
ମାରି ହାନାନ ମାରି କୟାପା ୱିଜେରିଙ୍ଗ୍ପେରି ଜାଜକର୍ ମାର୍ହାର୍, ନାସ୍ତିୱାଲେ ମାପ୍ରୁଦି ବାକ୍ୟ ସୁନ୍ସାନ୍ ବାଡିଦୁ ଜିକରିୟଦି ମାରିସି ଜୋହନ ଲାକ୍ତୁ ଇଗା ୱାତାତ୍ । ଆବେଟ୍ ଡୁବନ୍ ସିନି ଜୋହନ ଜର୍ଦନ ଗାଡାଦି ଲାକ୍ତୁରି ୱିଜୁ ରାଜିତରିଣ୍ତ୍ ସଲ୍ସି, “ପାପ୍ତାନ୍ ମନ୍ତିଙ୍ଗ୍ ଡ଼େପ୍ସି ଡୁବନ୍ଅତୁ ଇଜି ୱେର୍ତେଙ୍ଗ୍ ଆସ୍ତାନ୍,”
ଏଣ୍ତେସ୍ ଜିସାଇୟ ବାବବାଦିଦି ସାସ୍ତ୍ରଦୁ ରସ୍ତାମାନ୍ତା,
“ସିମ୍ରାବାଡିଦୁ ନାଣ୍ଡ୍ ଆଉଲିଆଜିମାନି ଅରେନ୍ୱାନି ବଲ୍,
ପ୍ରବୁଦି ସାରି ତିଆର୍ କିଦୁ,
ୱାନି ସାରି ସାଡ଼ୁକୁ କିଦୁ;
ୱିଜୁ ରିଆଙ୍ଗାଁଦି ଗରନ୍ତି ଗୁଟାଦି ବାଡିଦୁ ବର୍ତି କିଆନାତ୍,
ମାରି ୱିଜୁ ପେରି ଗରକ୍ ମାରି ଇସ୍ରି ଗରକ୍ ସାର୍ଦିନେ,
ବାକୁଲି ସାରିୱିଜୁ ସାଡ଼ୁକୁ ଆନାତ୍,
ମାରି ଗୁଟାଟେମୁଦି ବୁମି ସାର୍ଦିଜି ସାରିଦି ୱାଜା ଆନାତ୍;
ମାରି, ୱିଜୁ ଲୋକୁ ମାପୁରୁଦି ରକିୟା ସୁଡ଼ୁନାଟ୍ ।” 1
ମାରି, ୱାନିମାନୁ ଡୁବନ୍ ଅତେଙ୍ଗ୍ ଇଜି ସସି ୱାଜିମାନି ୱିଜୁଲୋକାଙ୍ଗ୍ ସୁଡ଼ୁଜି ଇର୍ଆନ୍, “ଏ ବିସ୍ମାନି ସାରାସ୍ତି କୁଟୁମ୍, ମାପୁରୁଦି ୱାଜିମାନି ରିସାଦାନ୍ ଉର୍କୁତେଙ୍ଗ୍ ଇଜି ଏନ୍ ମିଙ୍ଗିଁ ୱେର୍ତାନ୍ ? 2ମିର୍ ପୁରା ଜିବନ୍ତିଙ୍ଗ୍ ସତ୍ତାନ୍ ପାପ୍ ପାଣିଦାନ୍ ମନ୍ ଡ଼େପ୍ତି ମାନିଦେର୍, ଇକା ମି ନେଗି ପାଣିଦାନ୍ ତର୍ତୁ; ମାରି, ଅବ୍ରାହାମ ମା ବୁବା, ମୋନ୍ତୁ ମୋନ୍ତୁ ବା ଇୟାୱାଜା ଇନ୍ମାଟ୍; ଇରିଙ୍ଗ୍ ନାନ୍ ତୋ ମିଙ୍ଗିଁ ଇଜିନା, ମାପୁରୁ ଇୟା କାଲ୍କାଣ୍କୁ ବା ଅବ୍ରାହାମତି କୁଟୁମ୍ ତିଆର୍କିଦେଙ୍ଗ୍ ଆଟ୍ନାନ୍ । 3ମାରି, ମାରାକା ମଦଲ୍କୁ କାତ୍ତେଙ୍ଗ୍ ଇଜି ପାଡ଼ିସି ତିଆର୍କିତା ଇଟ୍ତାମାନାର୍; ମାରି, ଏମେ ମାରାନ୍ ନେଗି ପଲ୍ ଆସ୍ଏତ୍, ଆୟାୱିଜୁ ମାରାକାଙ୍ଗ୍ କାତ୍ନାର୍ ରୋ ସିସୁଦୁ ପୋକ୍ନାର୍ ।”
ଆବେଟ୍ ଲୋକ୍ ୱିଜେରେ ୱାନିଙ୍ଗ୍ ୱେନ୍ବାତାର୍, “ଆରିଙ୍ଗ୍ ମାପ୍ ଇନିକା କିନାପ୍ ?”
ଜୋହନ ୱାରିଙ୍ଗ୍ ଇର୍ଆନ୍, “ଆମାୱାନିଙ୍ଗ୍ ରୁଣ୍ତି ଆଙ୍ଗିଁଙ୍ଗ୍ ମାନେ, ୱାନ୍ ଆମାୱାନିଙ୍ଗ୍ ଇନିକା ସିଲେତ୍, ୱାନିଙ୍ଗ୍ ଉଣ୍ତ୍ରି ସିପିନ୍ ମାରି ଆମାୱାନିଙ୍ଗ୍ କାଦି ମାନାତ୍, ୱାନ୍ ଆଇୱାନିଙ୍ଗ୍ ଆବେ ମିସାକିପିନ୍ ।” 4
ମାରି ଏସ ସିସ୍ଟୁ ଲୋସ୍ନିକାର୍ ବା ଡୁବନ୍ ଅତେଙ୍ଗ୍ ଇଜି ୱାତିକାର୍ ୱାନିଙ୍ଗ୍ ୱେନ୍ବାତାର୍, “ଏ ଗୁରୁ, ମାପ୍ ଇନିକା କିନାପ୍ ?”
ମାରି ଜୋହନ ୱାରିଙ୍ଗ୍ ୱେର୍ତାନ୍, “ମି ଉଣ୍ତିଙ୍ଗ୍ ଏସୋ ଲୋସ୍ନି ନିୟମ୍ ମାନାତ୍ ନାସ ଲୋସ୍ତୁ, ତାନି ବାଦୁଲ୍ ନାଣ୍ଡ୍ ଲସ୍ମାଟ୍ ।”
ସନ୍ୟର୍ ବା ଜୋହନତିଙ୍ଗ୍ ୱେନ୍ବାତାର୍, “ମାରି ମାପ୍ ଇନିକା କିନାପ୍ ?”
ୱାନ୍ ୱାରିଙ୍ଗ୍ ୱେର୍ତାନ୍, “ସାକ୍ତିଦାନ୍ ନି ସାଲାକିଦାନ୍ ଏ ଦନ୍ ରେଲ୍ଜ ଅମାଟ୍, ମାରି ମି ଦରମା ଡାବୁଙ୍ଗୁଁ ଏସ ପଇଜିନିଦେର୍ ନାସଦାନ୍ ୱେଡ଼ିକା ମାଣ୍ତ୍ରୁ ।”
ୱିଜୁ ଲୋକୁ କାପ୍କିଜି ମାର୍ଆର୍ଆକା, ଜୋହନ ଏମୋ କ୍ରିସ୍ତ ଆନାନ୍, ଇକା ଜୋହନତି ବିସୟ୍ତାନ୍ ୱିଜେରେ ନିଜେ ନିଜେଦି ମୋନ୍ତୁ ଅଡ଼୍ବିଜି ମାର୍ଆର୍ । ଆୟାଉଣ୍ତିଙ୍ଗ୍ ଜୋହନ ୱିଜେରିଙ୍ଗ୍ ଇର୍ଆନ୍, “ନାନ୍ ତୋ ମିଙ୍ଗିଁ ଏର୍ତୁ ଡୁବନ୍ ସିଜିନା, ମାତର୍ ନା ମାଣ୍ନା ଏନ୍ ପେରିକାନ୍, ୱାନ୍ ୱାଜିନାନ୍, ୱାନି ଜୁତେଙ୍ଗ୍ତି ଗାଟି କୁତ୍ତେଙ୍ଗ୍ ବା ନାନ୍ ଜଗ୍ ସିଲେ; ୱାନ୍ ମିଙ୍ଗିଁ ପବିତ୍ର ଆତ୍ମାଦୁ ମାରି ସିସୁଦୁ ଡୁବନ୍ ସିନାନ୍ । ୱାନି କିୟୁଦୁ ସେରିଇ ମାନାତ୍, ଆବେଟ୍ ୱାନ୍ କାଡ଼ାତୁମାନି କୁଲିଙ୍ଗ୍ ଟୁଟ୍ନାନ୍ ମାରି ନିଜେଦି କଲ୍କିଦୁ ଉଣ୍ତାକିନାନ୍ ମାରି କୁଲିଙ୍ଗ୍ ପଟୁ ଏସ୍କାଙ୍ଗ୍ ନାମ୍ଇ ସିସୁଦୁ ଆଡ଼ାକ୍ନା ପୋକ୍ନାନ୍ ।”
ଜୋହନ ଇୟାୱାଜା ନାଣ୍ଡ୍ ମାଟା ୱେର୍ସି, ମାରି ରକମ୍ ରକମ୍ତି ୱେଡ଼ିକାଦି ବାକ୍ୟ ଇଜି ଲୋକା ଲାକ୍ତୁ ନେଗିକାବୁର୍ ୱେର୍ତାନ୍ ମାରି ମନ୍ ଡ଼େପ୍ତେଙ୍ଗ୍ ଲୋକାଙ୍ଗ୍ ବୁଜାକିତାନ୍; 5ମାତର୍ ଜୋହନ ରାଜା ହେରୋଦତିଙ୍ଗ୍ ଆଟ୍ୱାଦାନ୍ ଇଜିମାର୍ଆନ୍ ଇରିଙ୍ଗ୍ ୱାନ୍ ୱାନି ତଡ଼ାନ୍ତି ଆଡ଼୍ସିଙ୍ଗ୍ ହେରୋଦିଆଦିଙ୍ଗ୍ ପେଡ଼ି ଆତାମାର୍ଆନ୍ ମାରି ନାଣ୍ତ ତାଗିଇ ପାଣି କିତାମାର୍ଆନ୍ । ଆୟାୱାଜା ହେରୋଦ ଜୋହନତିଙ୍ଗ୍ ଜଇଲ୍ତୁ ଇଟ୍ଟାନ୍ନୋ ନିଜେଦି ୱିଜୁ ତାଗିଇ ପାଣିଦି ୱାଲେ ଇକାବା ମିସାକିତାନ୍ ।
ଜୋହନ ଜିସୁଙ୍ଗୁଁ ଡୁବନ୍ ସିତାନ୍
(ମାତିଉ ୩:୧୩-୧୭; ମାର୍କ ୧:୯-୧୧)
ୱିଜୁ ଲୋକୁ ଡୁବନ୍ ଅତି ୱେନ୍କା ଜିସୁ ବା ଡୁବନ୍ ଅତାନ୍ । ମାରି ୱାନ୍ ପାର୍ତନା କିନିୱାଲେ ବାଦଡ଼୍ ରେଆତାତ୍, 6ମାରି ପବିତ୍ର ଆତ୍ମା ପାର୍ୱାଦି ୱାଜା ୱାନି ମେନ୍ଦଲ୍ ମୁସ୍କୁ ୱାଜି ବାସ୍ତାତ୍; ମାରି, ବାଦଡ଼୍ତାନ୍ ଇୟା ବଲ୍ ୱାତାତ୍, “ନିନୁ ନା ଲାଡ୍ତି ମାରିନ୍, ନିବାନୁ ନାନ୍ ନାଣ୍ତ ୱେଡ଼ିକା ।”
ଜିସୁଦି କୁଟୁମ୍
(ମାତିଉ ୧:୧-୧୭)
ଜିସୁ ପାଣି ଆରାମ୍ କିତି ସମୟତୁ ୱାନିଙ୍ଗ୍ ପୁରା ତିରିସ୍ ବାର୍ସେକ୍ ଆତାମାର୍ଆତ୍; ଲୋକୁ ଅଡ଼୍ବିନି ଇସାବ୍ତାନ୍ ଜିସୁ ଜୋସେପତି ମାରିନ୍, ଜୋସେପ ଏଲିତି ମାରିନ୍, ଏଲି ମତ୍ତାତତି ମାରିନ୍; ମତ୍ତାତ ଲେବିତି ମାରିନ୍, ଲେବି ମଲ୍କିତି ମାରିନ୍, ମଲ୍କି ଜନୟତି ମାରିନ୍, ଜନୟ ଜୋସେପ୍ତି ମାରିନ୍, ଜୋସେପ ମତିତ୍ୟାତି ମାରିନ୍, ମତିତ୍ୟା ଆମୋସତି ମାରିନ୍, ଆମୋସ ନାହୁମତି ମାରିନ୍, ନାହୁମ ହେଲ୍ସିତି ମାରିନ୍, ହେଲ୍ସି ନଗୟତି ମାରିନ୍, ନାଗାୟି ମହତତି ମାରିନ୍, ମହତ ମତିତ୍ୟାତି ମାରିନ୍, ମତିତ୍ୟା ସିମିୟତି ମାରିନ୍, ସିମୟି ଜୋସେକତି ମାରିନ୍, ଜୋସେକ ଜୋଦାତି ମାରିନ୍, ଜୋଦା ଜୋହନତି ମାରିନ୍, ଜୋହନ ରେସାଦି ମାରିନ୍, ରେସା ଜିରୁବ୍ବାବେଲତି ମାରିନ୍, ଜିରୁବ୍ବାବେଲ ସଲ୍ଟିୟେଲତି ମାରିନ୍, ସଲ୍ଟିୟେଲ ନେରିଦି ମାରିନ୍, ନେରି ମଲ୍କିଦି ମାରିନ୍, ମଲ୍କି ଅଦିଦି ମାରିନ୍, ଅଦି କୋସାମତି ମାରିନ୍, କୋସାମ ଏଲମ୍ଦାନତି ମାରିନ୍, ଏଲମ୍ଦାନ ଏରଦି ମାରିନ୍, ଏର୍ ଜିହୋସୁୟଦି ମାରିନ୍, ଜିହୋସୁୟ ଏଲିୟେଜରତି ମାରିନ୍, ଏଲିୟେଜର ଜୋରିମତି ମାରିନ୍, ଜୋରିମ ମତ୍ତାତଦି ମାରିନ୍, ମତ୍ତାତ ଲେବିତି ମାରିନ୍, ଲେବି ସିମିୟୋନତି ମାରିନ୍, ସିମିୟୋନ ଜିହୁଦାଦି ମାରିନ୍, ଜିହୁଦା ଜୋସେପ୍ତି ମାରିନ୍, ଜୋସେପ୍ ଜୋନାମତି ମାରିନ୍, ଜୋନାମ ଏଲିୟାକିମତି ମାରିନ୍, ଏଲିୟାକିମ ମଲାହତି ମାରିନ୍, ମଲାହ ମନାଦି ମାରିନ୍, ମନା ମତତାତି ମାରିନ୍, ମତତା ନାତନତି ମାରିନ୍, ନାତନ୍ ଦାଉଦଦି ମାରିନ୍, ଦାଉଦ ଜେସିଦି ମାରିନ୍, ଜସିୟ ଅବେଦତି ମାରିନ୍, ଅବେଦ ବୟଜତି ମାରିନ୍, ବୟଜ ସେଲହଦି ମାରିନ୍, ସେଲହ ନହସନଦି ମାରିନ୍, ନହସନ ଅମିନାଦବତି ମାରିନ୍, ଅମିନାଦବ ଅଦମିନଦି ମାରିନ୍, ଅଦମିନ ଅର୍ଣ୍ଣିଦି ମାରିନ୍, ଅର୍ଣ୍ଣି ହେସ୍ରଣତି ମାରିନ୍, ହେସ୍ରଣ ପେରସତି ମାରିନ୍, ପେରସ ଜିହୁଦାତି ମାରିନ୍, ଜିହୁଦା ଜାକୁବଦି ମାରିନ୍, ଜାକୁବ ଇସ୍ହାକ୍ତି ମାରିନ୍, ଇସ୍ହାକ୍ ଅବ୍ରାହାମତି ମାରିନ୍, ଅବ୍ରାହାମ ତେରହଦି ମାରିନ୍, ତେରହ ନାହରଦି ମାରିନ୍, ନାହର ସରୁଗଦି ମାରିନ୍, ସରୁଗ ରଗୁଦି ମାରିନ୍, ରଗୁ ପେଲଗତି ମାରିନ୍, ପେଲଗ ଏବରତି ମାରିନ୍, ଏବର ସେଲହତି ମାରିନ୍, ସେଲହ କେନାନତି ମାରିନ୍, କିନାନ୍ ଅରପକେଦତି ମାରିନ୍, ଅରପକେଦ ସେମଦି ମାରିନ୍, ସେମ ନହତି ମାରିନ୍, ନୋହ ଲେମକତି ମାରିନ୍, ଲେମକ ମିତୁସେଲହତି ମାରିନ୍, ମିତୁସେଲହ ହନୋକଦି ମାରିନ୍, ହନକ ଜେରଦତି ମାରିନ୍, ଜେରଦ ମହଲଲେଲତି ମାରିନ୍, ମହଲଲେଲ କେନାନତି ମାରିନ୍, କିନାନ୍ ଏନସତି ମାରିନ୍, ଏନସ ସେତତି ମାରିନ୍, ସେତ ଆଦମ୍ତି ମାରିନ୍, ଆଦମ୍ ମାପୁରୁଦି ମାରିନ୍ ।
Source notes (6)
- Cross-reference ମାତିଉ ୧୨:୩୪; ୨୩:୩୩.
- Cross-reference ଜୋହନ ୮:୩୩.
- Cross-reference ମାତିଉ ୭:୧୯.
- Cross-reference ଲୁକ ୭:୨୯.
- Cross-reference ମାତିଉ ୧୪:୩,୪; ମାର୍କ ୬:୧୭,୧୮.
- Cross-reference ମାତିଉ ୩:୧୭; ମାର୍କ ୧:୧୧; ଲୁକ ୯:୩୫.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.