ମାପୁରୁଦି ସତ୍ ବାକ୍ୟ
ଜୋହନ 3:16
Verse 16 is marked below, with the whole chapter around it. Read from the start
ଜିସୁ ନି ନିକଦିମ
ପାରୁସିର୍ ଲୋଇ ନିକଦିମ ଦର୍ତି ଅରେନ୍ ଲୋକୁ ମାର୍ଆନ୍, ୱାନ୍ ଜିହୁଦିରି ଅରେନ୍ ନେତା ମାର୍ହାନ୍ । ୱାନ୍ ନାଡ଼ା ସମୟତୁ ଜିସୁଦି ଲାକ୍ତୁ ୱାଜି ୱାନିଙ୍ଗ୍ ଇର୍ଆନ୍, ଏ ଗୁରୁ, ନିନ୍ ଜେ ମାପୁରୁ ମାଣ୍କୁ ୱାତିମାନି, ଇକା ମାପ୍ ନେସ୍ନାପ୍, ଇରିଙ୍ଗ୍ ନିନ୍ ଇୟା ଏମେ ୱିଜୁ କାବାଆନି ପାଣି କିଜିନି, ମାପୁରୁ ନିୱାଲେ ସିଲେତିଙ୍ଗ୍ ଆୟାୱିଜୁ ଏନ୍ କିଦେଙ୍ଗ୍ ଆଟ୍ଏନ୍ ।
ଜିସୁ ୱାନିଙ୍ଗ୍ ଇର୍ହାନ୍, “ସତ୍ ସତ୍ ନାନ୍ ନିଙ୍ଗିଁ ଇଜିନା, ମାରିଡ଼େସି ଜନମ୍1 ଆଏତିଙ୍ଗ୍ ଏନ୍ ମାପୁରୁଦି ରାଜି ସୁଡ଼ୁଦେଙ୍ଗ୍ ଆଟ୍ଏନ୍ ।”
ନିକଦିମ ଜିସୁଙ୍ଗୁଁ ୱେନ୍ବାତାନ୍, “ଡକ୍ରା ଆତିଙ୍ଗ୍ ଲୋକୁ ଏଣ୍ତେସ୍ କିଜି ଜନମ୍ ଆଦେଙ୍ଗ୍ ଆଟ୍ନାନ୍ ? ୱାନ୍ ଇନିକା ରିଜା ନିଜେଦି ଆଇସି ପଟାଦୁ ଡ଼ୁଗୁଜି ଜନମ୍ ଆନାନ୍ ?”
ଜିସୁ ଇର୍ଆନ୍, ସତ୍ ସତ୍ ନାନ୍ ନିଙ୍ଗିଁ ଇଜିନା, “ଏର୍ ନି ଆତ୍ମାଦାନ୍ ଜନମ୍ ଆଏତିଙ୍ଗ୍ ଏନ୍ ମାପୁରୁଦି ରାଜିଦୁ ଡ଼ୁଗୁଦେଙ୍ଗ୍ ଆଟ୍ଏନ୍ । ମେନ୍ଦଲ୍ତାନ୍ ଆମାକା ଜନମ୍, ଆକା ମେନ୍ଦଲ୍ତିକା; ମାରି, ଆତ୍ମାଦାନ୍ ଆମାକା ଜନମ୍, ଆକା ଆତ୍ମାଦିକା । ନିଙ୍ଗିଁ ଜେ ମାରିଡ଼େସି ଜନମ୍ ଆଦେଙ୍ଗ୍ ଆନାତ୍ ଇଜି ନାନ୍ ଜେ ନିଙ୍ଗିଁ ଇର୍ଆ, ଆବେନ୍ କାବା ଆମା । ଗାଲି ଆମା ତରିନ୍ ବଦାକିନାତ୍, ଆୟା ତରିନ୍ ସନାତ୍, ମାରି ମିର୍ ତାନି ବଲ୍ ୱେନିଦେର୍, ମାତର୍ ଆକା ଆମାଟ୍କୁ ୱାନାତ୍ ମାରି ଏମେ ସନାଟ୍, ଆକା ନେସ୍ଇଦେର୍; ଆତ୍ମାଦାନ୍ ଜନମ୍ ଆତି ୱିଜେରି ଲୋକୁ ଆୟାୱାଜା ।”
ନିକଦିମ ଜିସୁଙ୍ଗୁଁ ଇର୍ହାନ୍, “ଇୟାୱିଜୁ ଏଣ୍ତେସ୍ ଆଦେଙ୍ଗ୍ ଆଟ୍ନାତ୍ ?”
ଜିସୁ ୱାନିଙ୍ଗ୍ ଇର୍ହାନ୍, “ନିନ୍ ଇସ୍ରାଏଲ୍ତି ଅରେନ୍ ଗୁରୁ ଆଜି ବା ଇନିକା ଇୟାୱିଜୁ ବୁଜାଇଜିନି ? ନାନ୍ ନିଙ୍ଗିଁ ସତ୍ ସତ୍ ଇଜିନା, ମାପ୍ ଆମାକା ନେସ୍ନାପ୍, ଆକା ଇନାପ୍, ମାରି ଆମାକା ସୁଡ଼ୁତାମାନାପ୍, ଆୟା ବିସୟ୍ତାନ୍ ସାକି ସିନାପ୍, ମାରି ମିର୍ ମା ସାକି ମାନାଇଜିନିଦେର୍ । ନାନ୍ ମିଙ୍ଗିଁ ଦୁନିଆଦି ବିସୟ୍ ୱେର୍ତିଙ୍ଗ୍ ଜଦି ମିର୍ ବିସ୍ବାସ୍ କିଇଦେର୍, ଆରିଙ୍ଗ୍ ମିଙ୍ଗିଁ ମୁସ୍କୁପୁର୍ତି ବିସୟ୍ ୱେର୍ତିଙ୍ଗ୍ ଏଣ୍ତେସ୍ ବିସ୍ବାସ୍ କିନିଦେର୍ ? ଏମେ ମନୁସ୍ୟପୁତ୍ର ମୁସ୍କୁପୁର୍ତାନ୍ ରେତାତାନ୍, ୱାନିଙ୍ଗ୍ ଡ଼ିସ୍ତିଙ୍ଗ୍ ମାରି ଏନ୍ବା ମୁସ୍କୁପୁର୍ତୁ ସଲ୍ଏର୍ ।”
ମାରି, ମୋସା ଏଣ୍ତେସ୍ ସୁନ୍ସାନ୍ବାଡିଦୁ ସାରାସ୍ତିଙ୍ଗ୍ ମୁଣ୍ତାଦୁ ମୁସ୍କୁ ପେର୍ତାମାର୍ହାର୍, ମନୁସ୍ୟପୁତ୍ର ବା ଆୟାୱାଜା ମୁସ୍କୁ ପେରାନାନ୍, ଏଣ୍ତେସ୍ ଏନ୍ଆପିନ୍ ୱାନିମାନୁ ବିସ୍ବାସ୍ କିନାନ୍, ୱାନ୍ ଏସ୍କାଙ୍ଗ୍ୱିଜ୍ଇ ଜିବନ୍ ପଇନାନ୍ । ଇରିଙ୍ଗ୍ ମାପୁରୁ ଇୟା ଜଗତ୍ତିଙ୍ଗ୍ ନିସା ଜିବନ୍ ନତାନ୍ ଜେ, ୱାନ୍ ନିଜେଦି ଅରେନ୍ ମାରିନ୍ତିଙ୍ଗ୍ ସିତାନ୍, ଏଣ୍ତେସ୍ ଏନ୍ଆପିନ୍ ୱାନିମାନୁ ବିସ୍ବାସ୍ କିନାନ୍, ୱାନ୍ ନାସ୍ଟୁ ଆଏଣ୍ତା ଏସ୍କାଙ୍ଗ୍ୱିଜ୍ଇ ଜିବନ୍ ପଇନାନ୍ । ମାପୁରୁ ୱାନି ମାରିନ୍ତିଙ୍ଗ୍ ଦୁନିଆଦୁ ବିସାର୍ କିନି ଉଣ୍ତିଙ୍ଗ୍ ପକ୍ଏନ୍, ମାତର୍ ଦୁନିଆ ଏଣ୍ତେସ୍ ୱାନି ମାଣାନ୍ ରକିୟା ଆନାତ୍, ଇୟାଉଣ୍ତିଙ୍ଗ୍ ପୋକ୍ତାମାନାନ୍ ।
ଏନ୍ ମାରିନ୍ମାନୁ ବିସ୍ବାସ୍ କିନାନ୍, ୱାନ୍ ବିସାର୍ କିଆୟ୍ଆଏନ୍; ଏନ୍ ବିସ୍ବାସ୍ କିଏନ୍, ୱାନ୍ ବିସାର୍ ଆତା ୱିଜିତାନ୍ନି, ଇରିଙ୍ଗ୍ ୱାନ୍ ମାପୁରୁଦି ଅରେନ୍ ମାରିନ୍ତି ଦର୍ତାନ୍ ବିସ୍ବାସ୍ କିଏନ୍ । ମାରି, ଆୟା ବିସାର୍ ଇୟା, ଜଗତ୍ତଦୁ ଜାୟ୍ ତରିତା ମାନାତ୍, ମାରି ଲୋକୁ ଜାୟ୍ତି ବାଦୁଲୁ ସିକାଟିଦିଙ୍ଗ୍ ବଦା କିତାର୍, ଇରିଙ୍ଗ୍ ୱାରି ପାଣିୱିଜୁ ତାଗିଇକା । ଇରିଙ୍ଗ୍ ଏନ୍ ତାଗିଇପାଣି କିନାନ୍, ୱାନ୍ ଜାୟ୍ତିଙ୍ଗ୍ କାଡ଼୍ନାନ୍, ମାରି ଆତିଙ୍ଗ୍ ୱାନି ପାଣିଦି ଦୋସ୍ ତରାନାତ୍, ଇୟାଉଣ୍ତିଙ୍ଗ୍ ୱାନ୍ ଜାୟ୍ ଲାକ୍ତୁ ରେଏନ୍ । ମାତର୍ ଏନ୍ ନେଗିପାଣି କିନାନ୍, ଏଣ୍ତେସ୍ ୱାନ୍ କିତିମାନି ପାଣିୱିଜୁ ମାପୁରୁଦି ବଦାଦାନ୍ କିତାନ୍ ଇଜି ତରାନାତ୍, ଆୟାଉଣ୍ତିଙ୍ଗ୍ ୱାନ୍ ଜାୟ୍ ଲାକ୍ତୁ ୱାନାନ୍ ।
ଜିସୁ ମାରି ଡୁବନ୍ସିନି ଜୋହନ୍
ତାନେୱେନ୍କା ଜିସୁ ମାରି ୱାନି ସିସୁର୍ ଜିହୁଦା ଦେସ୍ତୁ ସର୍ହାର୍, ମାରି ୱାନ୍ ଆୟାବାଡିଦୁ ୱାରି ୱାଲେ ମାନ୍ଜି ଡୁବନ୍ ସିଦେଙ୍ଗ୍ ଆସ୍ତାନ୍ । ଜୋହନ୍ ବା ସାଲମ ଲାକ୍ତୁରି ଏନୋନଦୁ ଡୁବନ୍ ସିଜିମାର୍ହାନ୍, ଇରିଙ୍ଗ୍ ଆୟା ବାଡିଦୁ ନାଣ୍ତ ଏରୁ ମାରେଏ, ମାରି ଲୋକୁ ୱାଜି ଡୁବନ୍ ଅସିମାର୍ହାର୍ । 2ଜୋହନ୍ ଆୟା ସାନ୍ଦି ଜଇଲ୍ତୁ ତେବାଏତା ମାର୍ହାନ୍ ।
ଆୟାମାନୁ ନେଗେନ୍ଆନିପାଣିଦି ବିସୟ୍ତାନ୍ ଜୋହନ୍ତି ଏସ ସିସୁରି ତରିଟାନ୍ ଅରେନ୍ ଜିହୁଦି ୱାଲେ ଆସ୍ସିସାତାର୍ । ମାରି, ୱାର୍ ଜୋହନ୍ତି ଲାକ୍ତୁ ସଲ୍ସି ୱାନିଙ୍ଗ୍ ଇର୍ହାର୍, ଏ ଗୁରୁ, ଏନ୍ ଜର୍ଦନ ଗାଡାଦି ଆୟା ପାଡ଼୍କା ନି ୱାଲେ ମାର୍ହାନ୍, ଆମାୱାନି ବିସୟ୍ତାନ୍ ନିନ୍ ସାକ୍ୟ ସିତିମାନି, ସୁଡ଼ୁଆ, ୱାନ୍ ଡୁବନ୍ ସିଜିନାନ୍ ମାରି ୱିଜେରେ ୱାନି ଲାକ୍ତୁ ସଲ୍ସିନାର୍ ।
ଜୋହନ୍ ଇର୍ହାନ୍, ମାପୁରୁ ସିଏତିଙ୍ଗ୍ ଲୋକୁ ଇନିକା ପଇଦେଙ୍ଗ୍ ଆଟ୍ଏନ୍ । 3ନାନ୍ ଜେ କ୍ରିସ୍ତ ଆଏ, ମାତର୍ ୱାନି ଆଗ୍ଡ଼ି ୱାତା ମାନା, ଇକା ନାନ୍ ଇର୍ଆମାର୍ହା ଇଜି ମିର୍ ନିଜେନିଜେ ନା ସାକି । ଏନ୍ ଆଇଲି ତାନାନ୍, ୱାନ୍ କାନ୍ୟାମୁରୁଲି, ମାତର୍ କାନ୍ୟାମୁରୁଲିଦି ଏମେ ସଙ୍ଗ୍ ଲାକ୍ତୁ ନିନାନ୍ନୋ ୱାନି ମାଟା ୱେନାନ୍, ୱାନ୍ କାନ୍ୟାମୁରୁଲିଦି ବଲୁ ଉଣ୍ତିଙ୍ଗ୍ ନାଣ୍ତ ୱେଡ଼ିକାଆନାନ୍ । ମାରି, ଇୟାୱାଜା ନା ଇୟା ୱେଡ଼ିକା ପୁରା ଆତାମାନାତ୍ । ୱାନିଙ୍ଗ୍ ଏଣ୍ତେସ୍ବା ପିର୍ଦେଙ୍ଗ୍ ପଡ଼ାନାତ୍, ମାତର୍ ନାଙ୍ଗିଁ ଉଣା ଆଦେଙ୍ଗ୍ ମାନାତ୍ ।
ମୁସ୍କୁପୁର୍ତାନ୍ ୱାଜିମାନି ଅରେନ୍ ଲୋକୁ
ଏନ୍ ମୁସ୍କୁରାନ୍ ୱାନାନ୍, ୱାନ୍ ୱିଜେରିମାଣ୍କୁ ପେରିକାନ୍, ଏନ୍ ଦୁନିଆଦାନ୍ ୱାନାନ୍, ୱାନ୍ ଦୁନିଆଦିକାନ୍, ମାରି ୱାନ୍ ଦୁନିଆଦି ମାଟା ଇନାନ୍; ଏନ୍ ମୁସ୍କୁପୁରୁତାନ୍ ୱାନାନ୍, ୱାନ୍ ୱିଜେରିମାଣ୍କୁ ପେରିକାନ୍ । ୱାନ୍ ଆମାକା ସୁଡ଼ୁତାମାନାନ୍ ମାରି ୱେରାମାନାନ୍, ଆୟା ବିସୟ୍ତାନ୍ ୱାନ୍ ସାକିୟ ସିନାନ୍, ମାତର୍ ୱାନି ସାକିୟ ଏନ୍ ମାନାଏନ୍ । ଏନ୍ ୱାନି ସାକିୟ ମାନାତା ମାନାନ୍, ମାପୁରୁ ଜେ ସତ୍, ଇକା ୱାନ୍ ପାରାମାଣ୍ କିତାମାନାନ୍ । ଇରିଙ୍ଗ୍ ମାପୁରୁ ଆମାୱାନିଙ୍ଗ୍ ପୋକ୍ତାତା ମାନାନ୍, ୱାନ୍ ମାପୁରୁଦି ବାକ୍ୟ ଇନାନ୍, ଇରିଙ୍ଗ୍ ମାପୁରୁ ୱାନିଙ୍ଗ୍ ପୁରାଦାନ୍ ୱାନି ଆତ୍ମା ସିନାନ୍ । 4ବୁବା ମାରିନ୍ତିଙ୍ଗ୍ ଜିବନ୍ନୋନାନ୍, ମାରି ୱିଜୁ ବିସୟ୍ ୱାନି କିୟୁଦୁ ସର୍ପେ କିତାମାନାର୍ । ଏନ୍ ମାରିନ୍ତିଙ୍ଗ୍ ବିସ୍ବାସ୍ କିନାନ୍, ୱାନ୍ ଏସ୍କାଙ୍ଗ୍ୱିଜ୍ଇ ଜିବନ୍ ପଇନାନ୍, ମାତର୍ ଏନ୍ ମାରିନ୍ତିଙ୍ଗ୍ ଅମାନ୍ୟ କିନାନ୍, ୱାନ୍ ଜିବନ୍ ସୁଡ଼ୁଏନ୍, ମାରି ଆୟା ଲୋକୁ ମୁସ୍କୁ ମାପୁରୁଦି ରିସା ତେବାତାନ୍ ।
Source notes (4)
- Footnote ମାରିଡ଼େସି ଜନମ୍ ମାପୁରୁ ମାଣାନ୍ ପୁନି ଜିବନ୍ ପଇନିକା
- Cross-reference ମାତିଉ ୧୪:୩; ମାର୍କ ୬:୧୭; ଲୁକ ୩:୧୯,୨୦.
- Cross-reference ଜୋହନ ୧:୨୦.
- Cross-reference ମାତିଉ ୧୧:୨୭; ଲୁକ ୧୦:୨୨.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.