ମାପୁରୁଦି ସତ୍ ବାକ୍ୟ
ଜାକୁବ 5
ମାଜନଲୋକ୍ ଉଣ୍ତିଙ୍ଗ୍ ଜାଗ୍ରାତାମାଟା
ଏ ମାଜନ୍ ଲୋକ୍, ନା ମାଟା ୱେନ୍ଡ୍ରୁ । ମି ଆମା କାସ୍ଟୁ ଆଦେଙ୍ଗ୍ ସୋଲ୍ସିନାତ୍, ଆୟାଉଣ୍ତିଙ୍ଗ୍ ଆଡ଼୍ବାଦୁ ମାରି ଦୁଃକ୍ କିଦୁ । 1ମି ଦନ୍ ୱିଜିତାତ୍ନି, ମାରି ମି ୱାତିଗନ୍ଦା ସେଦା ତିରାତ୍ନି । ମାରି ମି ବାଙ୍ଗାଁରାମ୍ ମାରି ୱେଣ୍ତିଦୁ କିଟିଙ୍ଗ୍ ଆସ୍ତାତ୍ନି ମାରି ଇୟା କିଟିଙ୍ଗ୍ ମି ବିରୁଦ୍ତାନ୍ ସାକି ସିନାତ୍, ମାରି ମି ମେନ୍ଦଲ୍ତିଙ୍ଗ୍ ସିସୁୱାଜା ତିନାତ୍ । ଇୟା ୱିଜ୍ନିଦିନ୍ତୁ ମିର୍ ଦନ୍ ଉଣ୍ତା କିଜିନିଦେର୍ । ୱେନ୍ଡ୍ରୁ, ମି କିଡ଼ିଇଦୁ ପାଣି କିଜିମାନି ପାଣିକିନିୱାରିଙ୍ଗ୍ ବୁତି ସିଇଦେର୍ । ୱାରି ମାଟା ୱେନ୍ଡ୍ରୁ । ପାସି କୟ୍ନିୱାରି ମାଟା ସାକ୍ତିମାନ୍ ପ୍ରବୁ ମାପୁରୁ ୱେର୍ଆ ମାନାନ୍ । ଇୟା ଦୁନିଆଦୁ ମି ଜିବନ୍ ସୁକ୍ ମାରି ୱେଡ଼ିକାଦାନ୍ ଦିନ୍କାଟେକିଜିନିଦେର୍ । ସାନିଦିନ୍ତି ଉଣ୍ତିଙ୍ଗ୍ ମିର୍ ମଟାରଟା ଆତିମାନିଦେର୍ । ମିର୍ ଦସ୍ ସିଲି ଲୋକାଙ୍ଗ୍ ଦସ୍ ଆସ୍ସି ସାୟାମାର୍ଗାଡାକ୍ତିମାନିଦେର୍; ୱାର୍ ମିଙ୍ଗିଁ ବିରୁଦ୍ କିଦେଙ୍ଗ୍ ଆଟ୍ଏତାର୍ ।
ସାସ୍ ଆସ୍ସି ପାର୍ତାନା କିଦୁ
ମାରି, ଏ ତଡ଼ାନ୍କୁ ନି ତାଙ୍ଗିଁକି, ପ୍ରବୁଦି ୱାନିଦିନ୍ ସାନ୍ଦି ସାସ୍ ଆସ୍ସି ତେବାଦୁ । ସୁଡ଼ୁଦୁ, ଚାସ୍ପାଣିକିନିକାନ୍ ଏଣ୍ତେସ୍ ୱାନି ଡଡିଦୁ ନାଣ୍ତ୍ ପାସି ପୟ୍ନି ଉଣ୍ତିଙ୍ଗ୍ ସାସ୍ ଆସ୍ସି ପାର୍ତୁମ୍ତି ନି ସାରାସାରିଦି ପିରୁଦିଙ୍ଗ୍ କାପ୍କିନାନ୍ । ଆୟାୱାଜା, ମି ଜିବନ୍ତିଙ୍ଗ୍ ବା ସାସ୍ ଆସ୍ସି କାପ୍କିଦୁ । ମି ଆସା ଡାଟ୍ ମାନିତ୍, ଇରିଙ୍ଗ୍ ପ୍ରବୁଦି ୱାନିଦିନ୍ ଲାକ୍ତୁ ୱାତାତ୍ନି ।
ଏ ତଡ଼ାନ୍କୁ ନି ତାଙ୍ଗିଁକି, ନିଜେନିଜେଦିମାନୁ ଦୋସ୍ ଆସ୍ସିସାମାଟ୍, ଆର୍ତିଙ୍ଗ୍ ମାପୁରୁ ମି ବିସାର୍ କିଏନ୍ । ସୁଡ଼ୁଦୁ ! ପେରିବିସାର୍କିନିକାନ୍ ସେର୍ଲା ଲାକ୍ତୁ ନିର୍ଆମାନାନ୍ । ଏ ତଡ଼ାନ୍କୁ ନି ତାଙ୍ଗିଁକି, ଆମା ବାବବାଦିରି ପ୍ରବୁଦି ଦର୍ତାନ୍ ମାଟା ସିତାମାର୍ହାର୍, ୱାରିଙ୍ଗ୍ ଏତ୍ କିଦୁ । ଦୁଃକ୍କାସ୍ଟୁ ସମୟ୍ତୁ ସାସ୍ ନି ସାକା ଆନି ଉଣ୍ତିଙ୍ଗ୍ ୱାର୍ ମି ଲାକ୍ତୁ ମାନିର୍ । ୱାରି ସାସ୍ ଉଣ୍ତିଙ୍ଗ୍ ମାପ୍ ୱାରିଙ୍ଗ୍ ଦନ୍ୟ ଇଜି ୱେର୍ସିନାପ୍ । ମିର୍ ଆୟୁବଦି ସାସ୍ ବିସୟ୍ ୱେର୍ଇମାନିଦେର୍ ମାରି ସାରାସାରିୱେନ୍କା ପ୍ରବୁ ଏଣ୍ତେସ୍ ୱାନିଙ୍ଗ୍ ଆସିର୍ବାଦ୍ କିତାମାର୍ହାନ୍, ଆକା ନେସ୍ତିମାନିଦେର୍ । ଇରିଙ୍ଗ୍ ପ୍ରବୁଦି ଦୟା ମାରି କାର୍ମୁଦୁ ବର୍ତି । 2
ଏ ନା ତଡ଼ାନ୍କୁ ନି ତାଙ୍ଗିଁକି, ପାର୍ମାଣ୍ କିନିୱାଲେ ମୁସ୍କୁପୁର୍ ନୋ ଦୁନିଆ ନୋ ଆଇ ଇନି ବିସୟ୍ ଅସି ପାର୍ମାଣ୍ କିମାଟ୍ । ମି “ହଁ” ମାଟା “ହଁ” ଆପିତ୍, “ସିଲେ” ମାଟା “ସିଲେଣ୍” ଆପିତ୍ । ଆର୍ତିଙ୍ଗ୍ ମିର୍ ବିସାର୍ତୁ ଦଣ୍ତ୍ ପୟ୍ଇଦେର୍ ।
ମି ଲୋଇରାନ୍ ଏନ୍ ଇନିକା ଦୁଃକ୍କାସ୍ଟୁ ପୟ୍ଜିନାନ୍ ? ୱାନ୍ ପାର୍ତାନା କିପିନ୍ । ଏନ୍ ଇନିକା ୱେଡ଼ିକା କିଜିନାନ୍ ? ୱାନ୍ ପ୍ରସଂସାଦି ପାଟା ପାରିନ୍ । 3ମି ଲଇ ଏନ୍ ଇନିକା ନବ୍ ? ୱାନ୍ ମଣ୍ତଲିଦି ନେତାରିଙ୍ଗ୍ କୁକିନ୍; ୱାର୍ ପ୍ରବୁଦି ଦର୍ତାନ୍ ନିୟୁ ଉସ୍ସି ଆୟା ଉଣ୍ତିଙ୍ଗ୍ ପାର୍ତାନା କିପିର୍ । ଇୟାୱାଜା ବିସ୍ବାସ୍ତୁମାନି ପାର୍ତାନାଦାନ୍ ରଗ୍ତିୱାନିଙ୍ଗ୍ ନେଗେନ୍ କିନାତ୍ । ପ୍ରବୁ ୱାନିଙ୍ଗ୍ ନେଗେନ୍ କିନାନ୍ ମାରି ଜଦି ୱାନ୍ ପାପ୍ କିନାମାନାନ୍, ଆର୍ତିଙ୍ଗ୍ ୱାନିଙ୍ଗ୍ କେମା ସିଆୟ୍ଆନାତ୍ । ମାରି, ନିଜେନିଜେଦି ମାନୁ ନିଜେ ନିଜେଦି ପାପ୍ ମାନାଦୁ, ମାରି ନେଗେନ୍ ଆନି ଉଣ୍ତିଙ୍ଗ୍ ନିଜେନିଜେଦି ଉଣ୍ତିଙ୍ଗ୍ ପାର୍ତନା କିଦୁ । ଦାର୍ମୁଦି ଲୋକ୍ତି ପାର୍ତାନା ନାଣ୍ତ୍ ପାଣି ପୁରା କିଦେଙ୍ଗ୍ ଆଟ୍ନାତ୍ । ଏଲିୟ ମା ୱାଜା ସୁକ୍ଦୁଃକ୍ତି ଲୋକ୍ ମାର୍ହାନ୍ । ପିରୁ ଆମାକିତି ଇଜି ୱାନ୍ ଉନ୍ଡ୍ରି ମୋନ୍ତାନ୍ ପାର୍ତାନା କିତାମାର୍ହାନ୍, ମାରି ତିନି ବାର୍ସେକ୍ ସଗୋଟା ଲେଜ୍କୁ ସାନ୍ଦି ଦୁନିଆଦୁ ପିରୁ ଆଏତାତ୍ । ୱାନ୍ ମାରିଡ଼େସି ପାର୍ତାନା କିତାନ୍, ମାରି ବାଦ୍ଡ଼ତାନ୍ ପିରୁ ଆତାତ୍ ମାରି ବୁମିଦୁ ମାରିଡ଼େସି ପାସି ଆସ୍ତାତ୍ ।
ଏ ନା ତଡ଼ାନ୍କୁ ନି ତାଙ୍ଗିଁକି, ମି ଲୋଇରାନ୍ ଏନ୍ ଜଦି ସତ୍ ସାରିଦାନ୍ ବାଣାନାନ୍ ମାରି ଆଇକାନ୍ ଅରେନ୍ ୱାନିଙ୍ଗ୍ ସତ୍ସାରିଦୁ ଡ଼େସି ତାନାନ୍, 4ଆର୍ତିଙ୍ଗ୍ ମନ୍ତୁଇଡ୍ଦୁ ଏନ୍ ତାଗ୍ଇସାରିଦାନ୍ ପାପ୍ଲୋକ୍ତିଙ୍ଗ୍ ଡ଼େସି ତାନାନ୍, ୱାନ୍ ଆୟା ପାପି ଲୋକ୍ତି ଆତ୍ମାଦିଙ୍ଗ୍ ସାନିମାଣୁକୁ ରକିୟା କିନାନ୍ ମାରି ୱାନି ନିଜେଦି ନାଣ୍ତ୍ ପାପ୍ କେମା ଆନାତ୍ ।
Source notes (4)
- Cross-reference ମାତିଉ ୬:୧୯.
- Cross-reference ମାତିଉ ୫:୩୪-୩୭.
- Cross-reference ମାର୍କ ୬:୧୩.
- Cross-reference ୧ ପିତର ୪:୮.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.