ମାପୁରୁଦି ସତ୍ ବାକ୍ୟ
ଜାକୁବ 3
ୱେତଲ୍
ଏ ନା ତଡ଼ାନ୍କୁ ନି ତାଙ୍ଗିଁକ୍ ମି ଲୋଇ ୱିଜୁଲୋକ୍ ଗୁରୁର୍ ଆମାଟ୍, ଇରିଙ୍ଗ୍ ମିର୍ ନେସ୍ନିଦେର୍ ଜେ, ମା ୱାଜା ସିକିୟା ଗୁରୁର୍ ଆଇୱାରି ବାଦ୍ଲୁ ନାଣ୍ତ୍ତାନ୍ କାସ୍ଟୁଦି ୱାଜା ବିସାର୍ ଆନାର୍ । ମାଡୁ ୱିଜୁଲୋକ୍ ଗାଦି ଦେବେଙ୍ଗ୍ ବୁଲ୍ କିନିମାନିକା । ଜଦି ଏନ୍ ୱାନି ୱାର୍ଗିଜିସାଜିମାନୁ ମୁଡ଼ୁକେ ପାପ୍ କିଏନ୍, ଆର୍ତିଙ୍ଗ୍ ୱାନ୍ ନେଗିକାନ୍ ମାରି ନିଜେଦି ମେନ୍ଧଲ୍ତିଙ୍ଗ୍ ପୁରା ନେଗେନ୍ ଇଟ୍ତାମାନାନ୍ । ଗଡ଼ାଦିଙ୍ଗ୍ ତିର୍ କିନି ଉଣ୍ତିଙ୍ଗ୍ ମାଡ୍ ତାନି ୱେୟୁଦୁ ନାସୁ ତର୍ନିକା ମାରି ମା ବଦାଦାନ୍ ତାନିଙ୍ଗ୍ ବୁଲାକିଦେଙ୍ଗ୍ ଆଟ୍ନିକା । ଉନ୍ଡ୍ରି ପେରି ଜାହାଜ୍ ବିସୟ୍ତାନ୍ ସିନ୍ତା କିଦୁ । ଜାଜ୍ ସାଲାକିନିକାନ୍ ନାଣ୍ତ୍ ଗାଲି କିଜିମାରିଙ୍ଗ୍ବା, ପୁରା ଇସ୍ରି ମଙ୍ଗ ସାହାଜ୍ୟଦାନ୍ ତାନିଙ୍ଗ୍ ଡାଟ୍ କିଜି ବଦାଦାନ୍ ସାଲାକିଜି ଅନାନ୍ । ଆୟାୱାଜା ୱେତଲ୍ ଉନ୍ଡ୍ରି ଇସ୍ରିକା ଆତିଙ୍ଗ୍ବା ପେରି ପେରି ମାଟେଙ୍ଗ୍ ଇନ୍ଞ୍ଜି ଗର୍ବ କିଦେଙ୍ଗ୍ ଆଟ୍ନାତ୍ । ଅଡ଼୍ବିଜ ସୁଡ଼ୁଦୁ, ଏଣ୍ତେସ୍ ସିସୁଡ଼ିବୁ ଇସ୍ରିକା ଆତିଙ୍ଗ୍ବା ଏସ ପେରି ବନ୍ତିଙ୍ଗ୍ ସିସୁ କାସିସ୍ କିନାତ୍ ।
ୱେତଲ୍ ବା ସିସୁ ୱାଜା; ଇୟା ଦୁନିଆଦୁ ନାଣ୍ତ ତାଗ୍ଇ ବିସୟ୍ତୁ ପୁରାବର୍ତି; ମାରି ଆକା ମା ମେନ୍ଦଲ୍ ଲଇ ମାନିଙ୍ଗ୍ ତାଗ୍ଇ ମାଟେଙ୍ଗ୍ ୱେର୍ସି ମା ୱିଜୁ ମେନ୍ଦଲ୍ତିଙ୍ଗ୍ ମାଇସ୍ କିନାତ୍ । ୱେତଲ୍ତି ନରକ୍ସିସୁଦୁ ମା ୱିଜୁଦିନ୍ତି ଜିବନ୍ ୱେପିସ୍ କିନାତ୍ । ଲୋକ୍ ୱିଜୁ ବନ୍ତି ଜାତୁ, ପଟିଙ୍ଗ୍, ଉଜ୍ଜି ବୁଲାନିକେଙ୍ଗ୍ ମାରି ଏର୍ତୁମାନି ଜିବନ୍ମାନିକେଙ୍ଗ୍ ତେବାକିଦେଙ୍ଗ୍ ଆଟ୍ତାମାନାତ୍ । ମାତର୍ ଏନ୍ ଏସ୍କାଙ୍ଗ୍ ୱେତ୍ଲତିଙ୍ଗ୍ ତିର୍ କିଦେଙ୍ଗ୍ ଆଟ୍ଏନ୍ । ଆକା ସତ୍ସିଲିକା ମାରି ଇଡ୍ଦେଙ୍ଗ୍ ଆଟ୍ଏର୍; ସାନିନାନି ୱିସାମ୍ତୁ ପୁରାବର୍ତି । ମାଡୁ ୱେତଲ୍ତାନ୍ ପ୍ରବୁ ବୁବା ମାପୁରୁଙ୍ଗୁ ଦନ୍ୟବାଦ୍ ସିନାପ୍ । ମାରି ଇୟା ୱେତଲ୍ତାନ୍ ମାପୁରୁଦି ରୁପ୍ତାନ୍ ତିଆର୍ଆତି ଲୋକ୍ତିଙ୍ଗ୍ ଆନାଦୁରିଆ ବା ସିନିକା । ଆୟା ଉନ୍ଡ୍ରି ୱେୟୁଦାନ୍ ଦନ୍ୟବାଦ୍ ମାରି ଆନାଦୁରିଆ ସନାତ୍ । ଏ ନା ତଡ଼ାନ୍କୁ ନି ତାଙ୍ଗିଁକି, ଇୟାୱାଜା ଆନିକା ନେକ୍କା ସିଲେତ୍ । ଉନ୍ଡ୍ରି ଜଲାଦାନ୍ ସାୱି ନି ସାପ୍ରା ଏରୁ ସତେଙ୍ଗ୍ ଆଟ୍ନେ ନୋ ? ଏ ନା ତଡ଼ାନ୍କୁ ନି ତାଙ୍ଗିଁକି, ତଗା ମାରାନ୍ତୁ ଇନିକା ଜିତ ପଲ୍ ଆସ୍ନାତ୍ ? ଅଙ୍ଗୁର୍ ତିୱାଦୁ ଇନିକା ତଗା ଆସ୍ନାତ୍ ? ଆୟାୱାଜା କାରିୟା ଏରୁ ସନି ଜଲାଦାନ୍ ସାୱି ଏରୁ ସୋଉ ।
ମୁସ୍କୁପୁର୍ତାନ୍ ୱାତିମାନି ବୁଦି
ମି ଲଇ ଏନ୍ ଇନିକା ଜ୍ଞାନି ନି ବୁଦିମାନିକାନ୍ ଏନ୍ ମାନାନ୍ ? ୱାନ୍ ବୁଦିମାନିକାନ୍ ମାରି ସାନ୍ତିଦି ୱାଲେ ସତ୍ପାଣି କିଜି ୱାନି ଜିବନ୍ତୁ ଇୟାତାନି ପାର୍ମାଣ୍ ସିପିନ୍ । ମାତର୍ ଜଦି ମି ଜିବନ୍ତୁ ରିସା, ଆକାର୍ ମାରି ଦାରା ୱାଜା ମାନାତ୍, ନିଜେଦି ବୁଦି ମାରି ଜ୍ଞାନ୍ ଉଣ୍ତିଙ୍ଗ୍ ଗର୍ବ କିଜି ସତ୍ତି ବିରୁଦ୍ତାନ୍ ଗର୍ବ କିମାଟ୍ । ମିଚ୍ ୱେର୍ମାଟ୍ । ଇୟାୱାଜା ବୁଦି ମାପୁରୁଦି ମାଡ଼ାନ୍ ରେଏତ୍; ଆକା ଦୁନିଆଦିକା, ମେନ୍ଦଲ୍ତିକା, ତାଗ୍ଇ ମାଣାନ୍ ଆନାତ୍ । ଆମାମାନୁ ରିସା ମାରି ଆକାର୍, ଆବେନୁ ସାନ୍ତିସିଲେତ୍ ମାରି ୱିଜୁ ରକମ୍ତି ତାଗ୍ଇପାଣି ମାନାତ୍ । ମାତର୍ ମୁସ୍କୁରାନ୍ ୱାନି ବୁଦି ଆଗ୍ଡ଼ି, ପବିତ୍ର; ଆକାବା ସାନ୍ତି ସିନାତ୍, କାର୍ମୁ ମାରି ସଙ୍ଗ୍ ଆନିକା । ଆକା ସତ୍ପାଣିଦୁ ପୁରାବର୍ତି ମାରି ନାଣ୍ତ୍ଦାନ୍ ସତ୍ପାଣିଦୁ ପଲ୍ ଆସିସ୍ କିନାତ୍; ଆକା ୱିଜୁ ଲୋକାଙ୍ଗ୍ ସାନ୍ତି ମାରି ବାଣ୍ତିସ୍ କିଏତ୍ । ସାନ୍ତି ତିଆର୍କିତିମାନି ଲୋକା ମାଣୁକୁ ୱିତାତି ମାନି ୱିତୁଦାନ୍ ଦାର୍ମୁଦିନାନି ପାସି ଆସ୍ନାତ୍ ।
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.