ମାପୁରୁଦି ସତ୍ ବାକ୍ୟ
ଏବ୍ରି 7
ମଲ୍କିସେଦକଦି ଜାଜକ ପଦ୍
ଇୟା ମଲ୍କିସେଦକ ସାଲେମତି ରାଜା ମାରି ପେରି ମାପୁରୁଦି ଜାଜକ ମାର୍ହାନ୍ । ଅବ୍ରାହାମ ନି ୱାନି ସାଙ୍ଗର୍ ଏସ୍ତିୱାଲେ ନାଲ୍ଏର୍ ରାଜାରିଙ୍ଗ୍ ଆରାକିଜି ଜୁଦ୍ଧଦାନ୍ ୱାଜିମାର୍ଇ ବେଡ଼ାଦୁ, ନାସ୍ତିୱାଲେ ମଲ୍କିସେଦକ ୱାନିଙ୍ଗ୍ ବେଟ୍ଆଜି ଆସିର୍ବାଦ୍ କିତାମାର୍ହାନ୍ । ମାରି ଅବ୍ରାହାମ ୱାନିଙ୍ଗ୍ ଜୁଦ୍ଧଦୁଜିଣାତି ସମ୍ପତିଦି ଏକ ଦସମାଂସ ସିତାମାରାନ୍ । ମଲ୍କିସେଦକଦି ଦରୁଦି ଆଗ୍ଡ଼ିରି ଅର୍ତ ଆଜିନାତ୍ “ଦାର୍ମୁଦି ରାଜା” ୱାନ୍ ସାଲେମତି ରାଜାଦି ଅର୍ତ ଆଜିନାତ୍ “ସାନ୍ତି ରାଜା ।” ମଲ୍କିସେଦକଦି ବୁବା କି ୟାୟା ମାରି କୁଟୁମ୍ ନି ୱାନି ଜନମ୍ ମାରି ଜିବନ୍ତି ବିସୟ୍ତାନ୍ ଇନିକା ବା ଜାଣା ସିଲେତ୍ । ୱାନ୍ ମାପୁରୁଦି ମାରିନ୍ ୱାଜା; ୱିଜୁଦିନ୍ ଜାଜକ ଆଜି ତେବାଜି ୱାତାମାନାନ୍ ।
ଅଡ଼୍ବିଜ ସୁଡ଼ୁଦୁ, ଇୟା ଲୋକ୍ ଏଣ୍ତେସ୍ ପେରିକାନ୍ । ମା ୱେଙ୍ଗିଁତି ପୁର୍ବେଦିଡକ୍ରା ଅବ୍ରାହାମ ଜୁଦ୍ଧଦୁଜିଣାତି ସମ୍ପତିଦି ଏକ ଦସମାଂସ ୱାନିଙ୍ଗ୍ ସିତାମାର୍ଆନ୍ । ଲେବିରି ଆମା କୁଟୁମ୍ତିକାର୍ ଜାଜକ ପାଣି କିନାର୍, ୱାର୍ ମୋସାଦି ନିୟମ୍ତି ଇସାବ୍ତାନ୍ ଇସ୍ରାଏଲତି ତଡ଼ାନ୍କା ମାଣୁକୁ ଦସମାଂସ ଦାନ ଲସ୍ନାର୍, ଇସ୍ରାଏଲତିଲୋକୁ ଅବ୍ରାହାମଦି କୁଟୁମ୍ ମାରି ଲେବିରି ନିଜେ ଜାତିଆତିଙ୍ଗ୍ ବା ୱାରିମାଡ଼ାନ୍କୁ ଇୟା ଦସ୍ବାଗ୍ ଲସ୍ସିମାର୍ହାର୍ । ମଲ୍କିସେଦକ ଲେବି କୁଟୁମ୍ତିକାନ୍ ଆଏତିଙ୍ଗ୍ ବା, ୱାନ୍ ମାପୁରୁଦି ପାର୍ମାଣ୍ତି ଅବ୍ରାହାମଦିମାଡ଼ାନ୍ ଏକ ଦସମାଂସ ଦାନ ପୋଇଜି ୱାନିଙ୍ଗ୍ ଆସିର୍ବାଦ୍ କିତାମାର୍ହାନ୍ । ଆସିର୍ବାଦ୍ କିନି ଲୋକୁ ଆସିର୍ବାଦ୍ ପୋଇନି ଲୋକାମାଣୁକୁ ଏନ୍ ପେରିକାନ୍, ଇବେନୁ ଇନିକା ଅଡ଼୍ବିନିକା ସିଲେତ୍ । ଏକ ଦସମାଂସ ଦାନ ଲସ୍ନି ଯାଜକର୍ ସାତିୱାଜା ଲୋକୁ, ମାତର୍ ମଲ୍କିସେଦକ ସାସ୍ତ୍ରଦି ବାକ୍ୟ ଇସାବ୍ତାନ୍ ୱାନ୍ ଇଲେଇବା ଜିବନ୍ମାନାନ୍ । ମାରି ଅବ୍ରାହାମ ମଲ୍କିସେଦକଦିଙ୍ଗ୍ ଦସବାଗ୍ତାନ୍ ଉନ୍ଡ୍ରି ବାଗ୍ ଦାନ ସିତିୱାଲେ, ଏମେ ଲେବିଦି କୁଟୁମ୍ତି ଯାଜକର୍ ଇଲେଇ ଦସମାଂସ ଦାନ୍ ଲସ୍ସିନାର୍, ଆୟା ଲେବି ବା ମଲ୍କିସେଦକଦିଙ୍ଗ୍ ଆୟା ଦାନ୍ ସିତାମାରାନ୍ ଇଜି ଇନ୍ଡ୍ରେଙ୍ଗ୍ ଆଟ୍ନିକା । ଲେବି ନାସ୍ତିୱାଲେ ଜନମ୍ ଆଏନ୍ ମାରାନ୍ ସତ୍, ମାତର୍ ଅବ୍ରାହାମ ମଲ୍କିସେଦକଦିଙ୍ଗ୍ ବେଟ୍ ଆତିୱାଲେ ପୁର୍ବେଦିଡକ୍ରାଦାଦା ଅବ୍ରାହାମଦି କୁଟୁମ୍ତି ୱାଜା ଲେବି ୱାନି ମେନ୍ଦଲ୍ତୁ ମାର୍ଆନ୍ ଇଜି ଇରିଙ୍ଗ୍ବା ବୁଲ୍ ଆଏତ୍ ।
ଇୟା ଲେବିୟରି ଜାଜକଦି ମାନାଜି ଇସ୍ରାଏଲ ଜାତିଦିଙ୍ଗ୍ ୱାନି ନିୟମ୍ ସିଆୟ୍ ଆତାମାର୍ହାତ୍ । ଲେବିୟରି ପାଣି ଜଦି ସାରାସାରି ଆତାତ୍ମାନ୍ଦି, ଆର୍ତିଙ୍ଗ୍ ହାରୋଣଦି ଉତରାଦିକାରି ଇୟା ଲେବିୟ ଜାଜକରିଙ୍ଗ୍ ଡ଼ିସ୍ସି ସିଜି, ମଲ୍କିସେଦକଦି ଉତରାଦିକାରି ୱାଜା ଆଇକାନ୍ ଅରେନ୍ ଜାଜକ ୱାଦେଙ୍ଗ୍ ଇନିକା ଦରକାର୍ ମାର୍ହାତ୍ । ଜାଜକ କୁଟୁମ୍ତି ବାଦ୍ଲେ ଆତିଙ୍ଗ୍ ନିୟମ୍ତୁ ବା ବାଦ୍ଲେ ଆନି ଦରକାର୍ । ଏମେୱାନି ବିସୟ୍ତାନ୍ ମାପ୍ ଇୟାୱିଜୁ ମାଟା ଇଜିନାପ୍, ମା ଆୟା ପ୍ରବୁ ଜିସୁ ଆଇ ଉନ୍ଡ୍ରି କୁଟୁମ୍ ମାର୍ହାନ୍; ଆୟା କୁଟୁମ୍ତୁ ଏନ୍ ଏସାଙ୍ଗ୍ ଯାଜକ ପାଣି କିଏର୍ । ଇକା ଟିକ୍ ଜେ, ୱାନ୍ ଜିହୁଦା କୁଟୁମ୍ତୁ ଜନମ୍ ଆତା ମାର୍ହାନ୍ ମାରି ଯାଜକ ଆନି ଉଣ୍ତିଙ୍ଗ୍ ମୋସା ଇୟା କୁଟୁମ୍ତି ଦରୁ ରାସ୍ଏନ୍ ।
ମଲ୍କିସେଦକଦି ୱାଜା ଅରେନ୍ ଜାଜକ
ଇବେନୁ ଟିକ୍ ବୁଜାଜିନାତ୍ ଜେ, ମଲ୍କିସେଦକଦି ୱାଜା ଆଇ ଅରେନ୍ ଜାଜକ ୱାତାନ୍ । ମାତର୍ ୱାନ୍ ଲୋକ୍ ତିଆର୍କିତି ନିୟମ୍ ମାରି ପଦ୍ତି ମାଡ଼ାନ୍ ଜାଜକ ଆଏନ୍ ମାର୍ହାନ୍; ୱିଜ୍ଇ ଜିବନ୍ତି ସାକ୍ତି ପାଣି ୱାନ୍ ଯାଜକ ଆତାମାର୍ହାନ୍ । ଇରିଙ୍ଗ୍ ଦର୍ମସାସ୍ତ୍ରଦୁ ରାସାତା ମାନାତ୍, “ନିନୁ ମଲ୍କିସେଦକଦି ଉତରାଦିକାରି ୱାଜା ୱିଜୁଦିନ୍ତି ଯାଜକ ଆନି ।” ଇବେନୁ ପାଡ଼୍ଇ ନିୟମ ସାକ୍ତିସିଲେତ୍ ମାରି ଦରକାର୍ ସିଲେତାତ୍ଆକା ତାନିଙ୍ଗ୍ ଡ଼ିସ୍ତା ସିତାର୍ । ଇରିଙ୍ଗ୍ ମୋସା ସିତିମାନି ନିୟମ୍ତାନ୍ ଇନି ବିସୟ୍ ପୁରା ପୋଇଦେଙ୍ଗ୍ ଆଟ୍ଏତାର୍ । ଇଲେଇ ମାଙ୍ଗିଁ ଉନ୍ଡ୍ରି ସାହାସ୍ତି ଆସା ସିତାମାନାନ୍; ଆୟାମାଡ଼ାନ୍ ମାପୁ ମାପୁରୁଦି ଲାକୁତୁଆନି ଉଣ୍ତିଙ୍ଗ୍ ଆଟ୍ତାମାନାନ୍ ।
ନାଣ୍ତଦାନ୍ ନାଣ୍ତ ମା ଉଣ୍ତିଙ୍ଗ୍ ମାପୁରୁଦି ପାର୍ମାଣ୍ ବା ମାନାତ୍ । ହାରଣଦି କୁଟୁମ୍ତିକାର୍ ଯାଜକ ପଦଦୁ ଆସ୍କିଆୟା ଆତିୱାଲେ ଇୟାୱାଜା ଇନି ପାର୍ମାଣ୍ ସିଆୟ୍ଏତ୍ ମାରାତ୍ । ମାତର୍ କ୍ରିସ୍ତ ଯାଜକ ଆନି ବେଡ଼ାଦୁ ମାପୁରୁ ପାର୍ମାଣ୍ କିଜି ୱାନିଙ୍ଗ୍ ୱେର୍ତାମାର୍ହାର୍,
“ପ୍ରବୁ ଉନ୍ଡ୍ରି ପାର୍ମାଣ୍ କିତାମାନାନ୍”
ୱାନ୍ ୱାନି ପାର୍ମାଣ୍ ବାଦ୍ଲେ କିଏନ୍ :
ନିନୁ ୱିଜୁଦିନ୍ତି ଜାଜକ ଆନି ।
ଇୟା ମାଟା ଉଣ୍ତିଙ୍ଗ୍ ଜିସୁ ଉଡ୍ରି ପେରି ନିୟମ୍ତି ପୁରା ସିତାମାନାନ୍ ।
କେବଲ୍ ପାଡ଼ିଇ ନିୟମ୍ତୁ ବା ଆଇ ଯାଜକର୍ ସାତିସରିୱାଜା ଆତିମାନିଙ୍ଗ୍ ୱାର୍ ସାତି ୱେନ୍କା ଆଇକାର୍ ଜାଜକ ଆନାର୍; ଆଦେଙ୍ଗ୍ ୱାର୍ ଇସାପ୍ତୁ ନାଣ୍ତ ମାନାର୍ । ମାତର୍ ଜିସୁ ୱିଜୁଦିନ୍ ଜିବନ୍ମାନାନ୍ । ୱାନି ଜାଜକ ପାଣି ବା ୱିଜୁଦିନ୍ । ଆଦେଙ୍ଗ୍ ଏମେକାର୍ ୱାନି ମାଡ଼ାନ୍ ମାପୁରୁଦି ଲାକୁତୁ ସନାର୍, ୱାରିଙ୍ଗ୍ ରକିୟା କିଦେଙ୍ଗ୍ ୱାନ୍ ଇଲେଇ ମାରି ୱିଜୁଦିନ୍ ଡାଟ୍ ମାନାନ୍, ମାତର୍ ୱାରି ଉଣ୍ତିଙ୍ଗ୍ ମାପୁରୁଦି ଲାକୁତୁ ପାର୍ତନା କିଦେଙ୍ଗ୍ ୱାନ୍ ୱିଜୁଦିନ୍ ଜିତାମାନାନ୍ ।
ଆର୍ତିଙ୍ଗ୍ ମା ୱିଜୁ ଉଣା ପୁରା କିଦେଙ୍ଗ୍ ଜିସୁନେ ଅରେନ୍ ମାତ୍ର ପେରିଯାଜକ । ୱାନ୍ ପବିତ୍ର, ପାପ୍ଦସ୍ ସିଲିକାନ୍, ପାପି ଲୋକାମାଣୁକୁ ଆକମାନିକାନ୍, ମୁସ୍କୁପୁର୍ତୁ ପରିକାନ୍ ଆତାନ୍ । ୱାନ୍ ଆଇଆଇ ପେରିଜାଜକରି ୱାଜା ଆଏନ୍; ୱାରି ୱାଜା ୱାନିଙ୍ଗ୍ ଆଗ୍ଡ଼ି ନିଜେଦି ପାପ୍ ଉଣ୍ତିଙ୍ଗ୍ ମାରି ୱେନ୍କା ଆଇୱାରି ପାପ୍ ଉଣ୍ତିଙ୍ଗ୍ ୱିଜୁଦିନ୍ ପୁଜା ସିଦେଙ୍ଗ୍ ପୋଡ଼ାଏତ୍ । ୱାନ୍ ନିଜେଦିଙ୍ଗ୍ ପୁଜା ସିଜି ଉଡ୍ରେ ଦେବାନେ ଆଇ ଆଇ ବଲିସିଜି ପାଣି କିତାମାର୍ହାନ୍ । ମୋସାଦି ନିୟମ୍ ଇସାବ୍ତାନ୍ ବାସେଆତି ପେରିଜାଜକରି ଦୋସ୍ ଦୁର୍ବଳ ମାନାତ୍; ମାତର୍ ନିୟମ୍ ତିଆର୍କିତି ୱେନ୍କାରି ବେଡ଼ାଦୁ ମାପୁରୁ ନିଜେଦି ବାଦ୍ ମାରି ପାର୍ମାଣ୍ ଇସାବ୍ତାନ୍ ୱାନି ଏମେ ମାରିନ୍ତିଙ୍ଗ୍ ପେରିଜାଜକ ୱାଜା ବାସେ କିତାନ୍, ୱାନ୍ ୱିଜୁଦିନ୍ତିଙ୍ଗ୍ ଉଣ୍ତିଙ୍ଗ୍ ପୁରା ଆତାମାନାନ୍ ।
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.