ମାପୁରୁଦି ସତ୍ ବାକ୍ୟ
ଏବ୍ରି 5
ୱିଜେରେ ପେରିଯାଜକ ନିଜେଜାତିଦି ଲୋକା ଲୋଇରାନ୍ ବାସେଆଜି ମାରି ନିଯୁକ୍ତ ଆନାର୍ । ୱାନ୍ ୱାରି ତରିଟାନ୍ ପାପ୍ କେମା ଉଣ୍ତିଙ୍ଗ୍ ବଲି ନି ପୁଜା ସିଜି ମାପୁରୁଙ୍ଗୁଁ ସେବା କିନାର୍ । ୱାନ୍ ନିଜେ ଆଇଆଇ ଜାତିଦି ଦୋସ୍ ଦୁର୍ବଲତୁ ପୁରାଆଜିମାନିଙ୍ଗ୍ ଦୋସ୍ କିଜିମାନି ବୁଦିସିଲି ଲୋକା ଉଣ୍ତିଙ୍ଗ୍ ୱାନ୍ କାର୍ମୁ ସୁଣାନ୍ । ମାରି, କେବଲ ଜେ ଆଇୱାରି ପାପ୍ ଉଣ୍ତିଙ୍ଗ୍ ୱାନିଙ୍ଗ୍ ପୁଜା ସିଦେଙ୍ଗ୍ ପୋଡ଼ାନାତ୍, ଆକା ସିଲେ, ମାତର୍ ୱାନି ନିଜେଦି ପାପ୍ ଉଣ୍ତିଙ୍ଗ୍ ବା ୱାନିଙ୍ଗ୍ ପୁଜା ସିଦେଙ୍ଗ୍ ପୋଡ଼ାନାତ୍ । ଏନ୍ ନିଜେ ନିଜେଦିଙ୍ଗ୍ ପେରିଜାଜକଦି ସମ୍ମାନ୍ ପଦ୍ତୁ ବାସେ ଆଦେଙ୍ଗ୍ ଆଟ୍ଏନ୍ । ହାରୋଣଦି ୱାଜା ଜେ କେବଲ ମାପୁରୁଦି ମାଡ଼ାନ୍ ବାସେଆତାମାର୍ହାନ୍, ୱାନ୍ ପେରିଜାଜକ ପଦ୍ ପୋଇନାନ୍ ।
ଆୟାୱାଜା ପେରିଜାଜକ ପଦ୍ଦୁ ସନ୍ମାନ୍ ପୟ୍ଦେଙ୍ଗ୍ କ୍ରିସ୍ତ ନିଜେଦିଙ୍ଗ୍ ଆସ୍କିଆଏନ୍ ମାରାନ୍ । ମାରି ମାପୁରୁ ୱାନିଙ୍ଗ୍ ଆସ୍କିଜି ଇର୍ହାମାର୍ହାନ୍,
“ନିନୁ ନା ମାରିନ୍,
ନେରୁ ନାନୁ ମି ବୁବା ଆତା ।”
ଆଇ ବାଡିଦୁ ୱାନ୍ ଇକାବା ଇର୍ହାମାନାନ୍,
“ନିନୁ ଜାଜକ ପଦ୍ଦୁ ମଲ୍କିସେଦକଦି ଉତ୍ତରାଦିକାରି ୱାଜା
ୱିଜୁଦିନ୍ତି ଉଣ୍ତିଙ୍ଗ୍ ଜାଜକ ତେବାନି ।” 1
ଆମା ମାପୁରୁ ୱାନି ସାନିମାଣୁକୁ ରକିୟା କିଦେଙ୍ଗ୍ ଆଟ୍ନାନ୍, ୱାନି ଲାକୁତୁ ମାପୁରୁ ଇୟା ଜିବନ୍ତୁ ଆଡ଼୍ବାଜି କାଣେରୁଙ୍ଗୁଁ ୱାକ୍ସି ବାତିଙ୍ଗ୍ମାଲ୍ଜି ପାର୍ତନା କିତାମାର୍ହାନ୍ । ୱାନ୍ ସାନ୍ତି ନି ଦାର୍ମୁ ଆତିମାନିଙ୍ଗ୍, ମାପୁରୁ ୱାନି ପାର୍ତନା ୱେର୍ହାନ୍ । ଜଦିବା ୱାନ୍ ମାପୁରୁଦି ମାରିନ୍ ମାର୍ହାନ୍, ୱାନ୍ ଦୁଃକ୍ ବୋଗଦି ମାଡ଼ାନ୍ ମାନାଦେଙ୍ଗ୍ ଅଜାତାନ୍ । ଇୟାୱାଜା ମାପୁରୁ ୱାନିଙ୍ଗ୍ ଅରେନ୍ ନେଗି ପେରି ଜାଜକ ଇଜି ଜଗ୍ ଆସ୍କିତାନ୍, ୱାନ୍ ୱାନି ମାଟାମାନାନି ଲୋକା ଉଣ୍ତିଙ୍ଗ୍ ୱିଜୁଦିନ୍ତି ରକିୟାଦି ୱେଡ଼ିକା ଆତାନ୍ । ମାରି ୱାନ୍ ମଲ୍କିସେଦକଦି ଉତ୍ତରାଦିକାରି ୱାଜା ପେରିଜାଜକ ଆତାନ୍ ଇଜି ମାପୁରୁ ୱେର୍ତାନ୍ ।
ବିସ୍ବାସ୍ ଡ଼ିସ୍ନି ବିସୟ୍ତାନ୍ ଜାଗାର୍ତା ମାଟା
ଇୟା ବିସୟତାନ୍ ମା ନାଣ୍ତ ମାଟେଙ୍ଗ୍ ମିଙ୍ଗିଁ ୱେର୍ତେଙ୍ଗ୍ ବଦା କିଜିନାପ୍ । ମାତର୍ ମି ବୁଜାନି ସାକ୍ତି ଉଣା । ଆଦେଙ୍ଗ୍ ମିଙ୍ଗିଁ ବୁଜାକିନିକା ବେସିକାସ୍ଟୁ । ଇରିଙ୍ଗ୍ ମିର୍ ଆତ୍ମିକ ଜିବନ୍ତୁ ୱେନ୍ଡ୍ରେଙ୍ଗ୍ ସିତିଡ଼ି । 2ମିର୍ ଆଇୱାରିଙ୍ଗ୍ ସିକିୟା ସିନି ବେଡ଼ା ଆତାତ୍ନି, ଆତିଙ୍ଗ୍ ଇଲେ ବା ମାପୁରୁଦି ବାକ୍ୟଦି ପାର୍ତୁମ୍ ବିସୟୱିଜୁ ମିଙ୍ଗିଁ ସିକ୍ୟା ସିଦେଙ୍ଗ୍ ଗୁରୁ ଦର୍କାର୍ ଆଜିନାତ୍ । ମିର୍ ଆଟୁୱା କାଦି ଉଣି ବାଦ୍ଲୁ ଇୟାସାନ୍ଦି ପାଲୁ ଉଣିଜିନିଦେର୍ । ଏନ୍ ୱାର୍ଇ ପାଲୁ ଉଣାନ୍, ୱାନ୍ ଇସ୍ରି କୋଡ଼ଦି ଅବସ୍ଥାଦାନ୍ ମାନାନ୍ । ନେଗି ତାଗ୍ଇ ବିସୟ୍ତାନ୍ ୱାନି ବୁଦି ଆଏଦେ । ଆଇ ତରିଟାନ୍ ଆଟ୍ୱା କାଦି ପେରିବୟସ୍ତି ଲୋକା ଉଣ୍ତିଙ୍ଗ୍; ୱାର୍ ଜିବନ୍ତି ଆଇଆଇ ବୁଦିଦାନ୍ ନେଗିକା ନି ତାଗ୍ଇ ବିସୟ୍ତାନ୍ ନେସ୍ନାର୍ ।
Source notes (2)
- Cross-reference ମାତିଉ ୨୬:୩୬-୪୬; ମାର୍କ ୧୪:୩୨-୪୨; ଲୁକ ୨୨:୩୯-୪୬.
- Cross-reference ୧ କରିନ୍ତିୟ ୩:୨.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.