ମାପୁରୁଦି ସତ୍ ବାକ୍ୟ
ଗାଲାତିୟ 6
ନିଜେନିଜେଦି ବଜୁ ପିଣ୍ତ୍ଦୁ
ଏ ତଡ଼ାନ୍କୁ ନି ତାଙ୍ଗିଁକି ! ଜଦି ଅରେନ୍ ତାଗ୍ଇ ପାଣିଦୁ ଦାରା ପଡ଼ାନାନ୍, ମି ଲୋଇ ଏମେକାର୍ ପବିତ୍ରଆତ୍ମାଦି ମାଣାନ୍ ସାଲାନାନ୍, ୱାର୍ ୱାନିଙ୍ଗ୍ ବୁଜାକିନିକା ମାନାତ୍, ମାତର୍ ମିର୍ ଇୟା ପାଣି ନେଗେନ୍ତାନ୍, ସାନ୍ତିଦାନ୍ କିନିକା ମାନାତ୍ । ମାରି ଜାଗାର୍ତା, ନିଜେ ଏଣ୍ତେସ୍ ଆୟାୱାଜା ପାଣି କିଦେଙ୍ଗ୍ ଲାଲାୟ୍ ଆମାଟ୍ । ନିଜେନିଜେଦି ବଜୁ ପିଣ୍ତ୍ଦେଙ୍ଗ୍ ଇଜି ସାହାଜ୍ୟ କିଦୁ । ଇକା କିନି ମାଣାନ୍ ମିର୍ କ୍ରିସ୍ତଦି ମାଟା ମାନାନିଦେର୍ । ନେସ୍ଏଜି ବା ଜେ ନିଜେଦିଙ୍ଗ୍ ନେସ୍ତାମାନା ଇଜି ଅଡ଼୍ବିତିଙ୍ଗ୍, ୱାନ୍ ନିଜେଦିଙ୍ଗ୍ କେବଲ ଟକେ କିଜିନାନ୍ । ୱିଜେରେ ନିଜେ ନିଜେଦି ସାଲାବୁଲାନିକା ବିଚାର୍ କିଜି ସୁଣି ଦର୍କାର୍ । ଜଦି ଆକା ନେଗିକାଆନାତ୍, ଆୟାଉଣ୍ତିଙ୍ଗ୍ ୱାନ୍ ନିଜେଦିଙ୍ଗ୍ ଜିଣାତିକାନ୍ ଇଜି ଅଡ଼୍ବିତାମାନା ମାରି ଆଇୱାନି ପାଣିଦି ୱାଲେ ନିଜେଦି ଜିଣାନିତାନିଙ୍ଗ୍ ତୁସ୍ସି ୱାନ୍ ଗର୍ବ କିମାକିନ୍ । ଇରିଙ୍ଗ୍ ୱିଜେରିଙ୍ଗ୍ ନିଜେ ନିଜେଦି ବଜୁ ପିଣ୍ତ୍ଦେଙ୍ଗ୍ ପଡ଼ାନାତ୍ ।
କ୍ରିସ୍ତଦି ସୁସମାଚାର ଅଜାନି ୱାଲେ ସିକିୟାସିନି ଗୁରୁଙ୍ଗ୍ ନିଜେ ପୟ୍ଜି ମାନି ୱିଜୁ ନେଗି ବିସୟ୍ତି ମିସାକିନିକା ମାନାତ୍ ।
ମାପୁରୁ ଟକେ ଆଏନ୍ : ଆକା କିଦେଙ୍ଗ୍ ସଲ୍ସି ମିରୁ ନିଜେ ଟକେ ଆମାଟ୍ । ଲୋକୁ ଆମାକା ୱିତ୍ନାର୍, ଆକାନେ କୟ୍ନାର୍ । ଏନ୍ ଦୁନିଆ ଇସାବ୍ତାନ୍ ଆସାଦି କିଡ଼ିଇଦୁ ୱିତୁ ୱିତ୍ନାନ୍, ୱାନ୍ ସାନି ରୁପ୍ତି ପାସି ଉଣ୍ତା କିନାନ୍ । ଜଦି ୱାନ୍ ପବିତ୍ର ଆତ୍ମାଦି କିଡ଼ିଇଦୁ ୱିତ୍ନାନ୍, ଆର୍ତିଙ୍ଗ୍ଁ ଏସ୍କାଙ୍ଗ୍ୱିଜିଇ ଜିବନ୍ତି ପାସି ଉଣ୍ତା କିନାନ୍ । ଆଦେଙ୍ଗ୍ ସତ୍ପାଣି କିଦେଙ୍ଗ୍ ମାଡ୍ ୱାଦ୍ନି ନେଗେତ୍ ସିଲେ । ଇରିଙ୍ଗ୍ ଆବେଟାନ୍ ୱାନ୍ଦ୍ଏତିଙ୍ଗ୍, ଟିକ୍ ସମୟ୍ତୁ ମାଡ୍ ପାସି ଉଣ୍ତାକିଦେଙ୍ଗ୍ ଆଟ୍ନିକା । ଆଦେଙ୍ଗ୍ ଏସ ଦେବେଙ୍ଗ୍ ସାରି ପୁଟ୍ନାତ୍, ୱିଜୁଦିନ୍ ୱିଜେରି, ବିସେସ୍କିଜି ଏମେକାର୍ ମା ବିସ୍ବାସି ପରିବାର୍ତୁ, ୱାରି ନେଗିକା କିନିକା ମା ପାଣି ।
ସାରାସାରି ଜାଗାର୍ତା ମାଟା ନି ମାଡ଼ିସ୍କିନିକା
ସୁଡ଼୍ଦୁ, ଏସ ପେରି ପେରି ଅଇକର୍ତାନ୍ ନିଜେଦି କିୟୁଦାନ୍ ନାନ୍ ମିଙ୍ଗିଁ ଇକା ରାସ୍ସିନା । ଏମେକାର୍ ଆତ୍ରେଦି ବିସୟ୍ତିଙ୍ଗ୍ ତର୍ଆଇ ଆନାର୍ ମାରି ପେରିକାର୍ ତର୍ନାର୍, ୱାର୍ ନେ ମିଙ୍ଗିଁ ସୁନ୍ନତ ଆଦେଙ୍ଗ୍ ଜାସେ କିଜିନାର୍ । କ୍ରିସ୍ତଦି କ୍ରୁସ ଉଣ୍ତିଙ୍ଗ୍ ତାଡ଼ନା ବଗ୍ କିଇ ଇସାବ୍ତାନ୍ ୱାର୍ ଇକା କିଜିନାର୍, ଏମେକାର୍ ସୁନ୍ନତ ନିୟମ୍ ମାନାନାର୍, ୱାର୍ ବା ମସାଦି ନିୟମ୍ ମାନାଏର୍ । ମିର୍ ସୁନ୍ନତ ଆଦୁ ଇଜି ୱାର୍ ବଦାକିଜିନାର୍ । ଇକା ମେନ୍ଦଲ୍ତି ନିୟମ୍ ମାନାଦେଙ୍ଗ୍ଁ ଇଜି ମିଙ୍ଗିଁ ଟକେ କିଦେଙ୍ଗ୍ ଆଟ୍ତିଙ୍ଗ୍, ୱାର୍ ଗର୍ବ କିନାର୍ । ମାତର୍ ନାନୁ କେବଲ ମା ପ୍ରବୁ ଜିସୁ କ୍ରିସ୍ତଦି କ୍ରୁସ ବିସୟ୍ତାନ୍ ଗର୍ବ କିଜିନା; ଇରିଙ୍ଗ୍ ୱାନି କ୍ରୁସ ଉଣ୍ତିଙ୍ଗ୍ ଦୁନିଆ ନା ଉଣ୍ତିଙ୍ଗ୍ ସାତାମାନାତ୍ ମାରି ନାନୁ ଦୁନିଆ ଉଣ୍ତିଙ୍ଗ୍ ସାତାମାନା । ଏନ୍ ସୁନ୍ନତ ମାରି ଅସୁନ୍ନତ, ଆବେନୁ ଇନିକା ସଲ୍ଏତ୍ ରେଏତ୍, ପୁନି ଜନମ୍ ନେ ସତ୍ ବିସୟ୍ । ଏମେକାର୍ ନିଜେଦି ଜିବନ୍ତୁ ଇୟା ନିତି ମାନାନାର୍, ୱାର୍ ୱିଜେରେ ମାରି ମାପୁରୁଦି ଇସ୍ରାଏଲ୍ତି ଲୋକୁ ୱିଜେରେ ଜିବନ୍ତୁ ସାନ୍ତି ପୟ୍ନାର୍ ମାରି ଦୟା ଏତ୍ କିପିର୍ ।
ସାରାସାରି, ନା ନିସନେ ୱେର୍ନି ମାଟା, ନାଙ୍ଗିଁ ମାରି ଏନ୍ ଦୁକୁ ସିମାକିନ୍ । ଇରିଙ୍ଗ୍ ନା ମେନ୍ଦଲ୍ତୁ ଏମେ ୱିଜୁ ଗାଉ ସିନା ମାନାତ୍, ଆବେଣାନ୍ ତରାଜିନାତ୍ ଜେ, ନାନୁ ଜିସୁଦି ଦାସ୍ ।
ଏ ତଡ଼ାନ୍କୁ ନି ତାଙ୍ଗିଁକି ! ମା ପ୍ରବୁ ଜିସୁ କ୍ରିସ୍ତଦି ଦୟା ମି ଆତ୍ମାଦୁ ୱିଜେରି ଲାକ୍ତୁ ମାନିତ୍ । ଆମେନ୍ ।
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.