ମାପୁରୁଦି ସତ୍ ବାକ୍ୟ
ଏପିସିୟ 6
ବୁବାୟାୟା ନି କଡ଼ର୍ ଆଇଲିକ୍
ଏ କଡ଼ର୍, ପ୍ରବୁଦି ଉଣ୍ତିଙ୍ଗ୍ ବୁବାୟାୟାରିଙ୍ଗ୍ ମାନାନିକା ମି ବିସ୍ବାସି ଲୋକା ପାଣି, ଇରିଙ୍ଗ୍ ଇକାନେ ଟିକ୍ ସାଲାବୁଲା । “ମି ବୁବାୟାୟାରିଙ୍ଗ୍ ମାନାଦୁ ।” ଇୟା ମାଟାଦୁ ଉନ୍ଡ୍ରି ପାର୍ମାଣ୍ ମିସାକିଜି ୱେର୍ଆଇ ଆତାମାନାତ୍, “ଏଣ୍ତେସ୍ ମି ନେଗିକା ଆନାତ୍ ମାରି ମିର୍ ଦୁନିଆଦୁ ନାଣ୍ତ ଦିନ୍ ଜିନିଦେର୍ ।” 2
ଏ ବୁବାୟାୟାର୍, କଡ଼ରିଙ୍ଗ୍ ଗିଦ୍ରି ଆନି ନାନି ଇନି ପାଣି କିମାଟ୍, ମାତର୍ ପ୍ରବୁଦି ବିସ୍ବାସ୍ତାନ୍ ବ୍ୟବ୍ହାର୍ କିଦୁ ମାରି ସିକିୟାଦୁ ୱାରିଙ୍ଗ୍ ଜାତୁନ୍ କିଦୁ ।
କଟିସାକର୍ ନି ମାଲିକ୍
କଟିସାକର୍, ମିର୍ କ୍ରିସ୍ତଦି ସେବା କିଜିନାପ୍ ଅଡ଼୍ବିଜି ମନ୍ତାନ୍ ତିଲାଜି ନି ତିର୍ଗିଜି ଦୁନିଆଦି ମାଲିକାଙ୍ଗ୍ଁ ମାନାନିଦେର୍ । କେବଲ ମାଲିକ୍ ମିଙ୍ଗିଁ ସୁଡ଼ୁନିୱାଲେ ୱାନି ୱେଡ଼ିକା ଆନି ଉଣ୍ତିଙ୍ଗ୍ଁ ଇକା କିଏଣ୍ତା, କ୍ରିସ୍ତଦି କଟିସାକର୍ ୱାଜା ମି ୱିଜୁ ମନ୍ ସିଜି ମାପୁରୁଦି ବଦା ମାନାଦୁ । କେବଲ ଲୋକା ସେବାକିଜିନାପ୍ ଅଡ଼୍ବିଏଣ୍ତା ପ୍ରବୁଦି ସେବା କିନି ୱାଜା ୱେଡ଼ିକାଦାନ୍ ପାଣି କିଦୁ । ମନ୍ତୁ ଇଡ୍ଦୁ, ୱାନ୍ କଟିସାକର୍ ଆପିନ୍ କି ମୁକ୍ଡ଼ାତିକାନ୍ ଆପିନ୍ ପ୍ରବୁ ୱିଜୁ ଲୋକ୍ତିଙ୍ଗ୍ ୱାନି ନେଗିପାଣି ଉଣ୍ତିଙ୍ଗ୍ ପୁରସ୍କାର୍ ସିନାନ୍ । 4
ଏ ମାଲିକ୍କୁ, ମି କଟିସାକର୍କା ଉଣ୍ତିଙ୍ଗ୍ଁ ନେଗେନ୍ତାନ୍ ବ୍ୟବ୍ହାର୍ କିଦୁ ମାରି ୱାରିଙ୍ଗ୍ଁ ଆଦ୍ରିସ୍କିମାଟ୍ । ମନ୍ତୁ ଇଡ୍ଦୁ, ମିର୍ ନି ମି କଟିଦାସ୍କୁ ୱିଜେରେ ମୁସ୍କୁପୁର୍ତି ପ୍ରବୁଦି ଆଡ୍ଗି ମାନିକା । ୱାନ୍ ୱିଜେରିଙ୍ଗ୍ଁ ସାମାନ୍ତାନ୍ ବିଚାର୍ କିନାନ୍ ।
ମାପୁରୁ ସିତିମାନି ୱିଜୁ ଜୁଦ୍କିନିସାଜୁ
ସାରାସାରି ୱେନ୍କା, ପ୍ରବୁଦି ୱାଲେ ମିସାଜି ୱାନି ପେରିସାକ୍ତିଦୁ ବପୁ ଆଦୁ । ମାପୁରୁ ସିତିମାନି ୱିଜୁ ଜୁଦ୍ସାଜୁଦାନ୍ ତିଆର୍ ଆଦୁ, ଏଣ୍ତେସ୍ ସୟତାନ୍ତି ତାଗ୍ଇ ପାଣିଦି ଆଗିଡ଼ି ନିନ୍ଡ୍ରେଙ୍ଗ୍ ଆଟ୍ନିଦେର୍ । ଇରିଙ୍ଗ୍ ମାଡ୍ ଦୁନିଆଦୁ ବାସାଜିମାନି ଲୋକା ବିରୁଦ୍ତାନ୍ ଜୁଦ୍ କିଇକା; ମାଡ୍ ୱାର୍ଇବାଦଡ଼୍ତି ତାଗ୍ଇ ସାକ୍ତି ମାରି ସିକାଟି ଜୁଗ୍ତି ସାସନ୍କିନିକାତ୍, ଅଦିକାରି ମାରି ୱିଜୁ ଦୁନିଆଦି ତାଗିଇ ଆତ୍ମିକ ସାକ୍ତି ବିରୁଦ୍ତାନ୍ ଜୁଦ୍ କିଜିନିକା । ମାତର୍ ଇଲେଇ ମାପୁରୁସିତିମାନି ଜୁଦ୍ସାଜୁ ଆରାଦୁ; ଆତିଙ୍ଗ୍ଁ କାକୁର୍ତି ଦିନ୍ତୁ ମିର୍ ସାତ୍ରୁଦି ଆଗ୍ଡ଼ି ନିନ୍ଡ୍ରେଙ୍ଗ୍ ଆଟ୍ନିଦେର୍ ମାରି ସେସ୍ ସାନ୍ଦି ଜୁଦ୍ କିଜିବା ଡାଟ୍ତାନ୍ ତେବାନିଦେର୍ ।
ଆଦେଙ୍ଗ୍ ଜାଗାର୍ତା ଆଦୁ, ସତ୍ନାନି ବେଲେଟୁ ଗାଟିଦୁ ମି ଜୁକି ସାରିବେଡ଼୍ତି ତର୍ତୁ, ଦାର୍ମୁ ନାନି ମି ବକାଦିସାଜୁ ଆରାଦୁ, ମାରି ସାନ୍ତିଦି ସୁସମାଚାର୍ତି ଉଣ୍ତିଙ୍ଗ୍ ରସ୍ତିନାନି ପାଦାମ୍ତୁ ଜୁତେଙ୍ଗ୍ ଆରାଜି ଡାଟ୍ ଆଜି ନିଲ୍ତୁ । ୱିଜୁଦିନ୍ ବିସ୍ବାସ୍ତି ସାଜୁ ପିଣ୍ତଦୁ, ତେନି ସାକାଦାନ୍ ସୟତାନ୍ ମାଣାନ୍ ପୋକ୍ନି ୱିଜୁ ସିସୁ ଇଟା ନାପ୍ତେଙ୍ଗ୍ ମିର୍ ଆଟ୍ନିଦେର୍ । ମାରି ପରିତ୍ରାଣନାନି ଜୁଦ୍ଦି ଟପି ଆରାଦୁ, ପବିତ୍ରଆତ୍ମା ସିତିମାନି ମାପୁରୁଦି ବାକ୍ୟନାନି କାଣ୍ତା ଆସ୍ତୁ । ମାପୁରୁଦି ସାକା ଲସ୍ସି ପାର୍ତାନାଦି ୱାଲେ ଇୟାୱିଜୁ କିଦୁ । ୱିଜୁ ୱେଡ଼ାଦୁ ପବିତ୍ର ଆତ୍ମାଦି ସାଲାକିନି ଇସାବ୍ତାନ୍ ପାର୍ତନା କିଦୁ । ଜାଗାର୍ତା ମାନ୍ଡ୍ରୁ; ଏସାଙ୍ଗ୍ ୱାନ୍ଦ୍ମାଟ୍ । ମାପୁରୁଦି ଲୋକା ଉଣ୍ତିଙ୍ଗ୍ ୱିଜୁୱାଲେ ପାର୍ତନାଦୁ ଏତ୍ କିଦୁ । ନା ଉଣ୍ତିଙ୍ଗ୍ ବା ପାର୍ତନା କିଦୁ, ଏଣ୍ତେସ୍ ସୁସମାଚାର୍ତି ମାର୍ଗିତିମାନି ମାଟା ୱେର୍ତେଙ୍ଗ୍ ମାରି ତିଲାଏଣ୍ତା ଆକା ୱେର୍ତେଙ୍ଗ୍ ମାପୁରୁ ନା ୱେୟୁଦୁ ଟିକ୍ ବାକ୍ୟ ସିନାନ୍ । ଇଲେଇ ଜଇଲ୍ତୁ ମାରିଙ୍ଗ୍ଁ ବା ନାନୁ ସୁସମାଚାର୍ ଉଣ୍ତିଙ୍ଗ୍ ଅରେନ୍ ରାଜାଦୁତ୍ । ପାର୍ତନା କିଦୁ, ଏଣ୍ତେସ୍ ନାନୁ ସାସ୍ତି ୱାଲେ ଟିକ୍ତାନ୍ ସୁସମାଚାର୍ ୱେର୍ତେଙ୍ଗ୍ ଆଟ୍ନା ।
ସାରାସାରି ମାଡ଼ିସ୍କିନିକା
ନା ଅବସ୍ତା ବିସୟ୍ତାନ୍ ମିର୍ ଏଣ୍ତେସ୍ ନେସ୍ତେଙ୍ଗ୍ ଆଟ୍ନିଦେର୍, ଆୟାଉଣ୍ତିଙ୍ଗ୍ ମା ଲାଡ୍ତି ତଡ଼ାନ୍ ମାରି ପ୍ରବୁଦି ପାଣି କିଜିମାନି ବିସ୍ବାସିରି ସେବାକିନି ତୁକିକ ନା ବିସୟ୍ତାନ୍ ମିଙ୍ଗିଁ ୱିଜୁ ମାଟା ୱେର୍ନାନ୍ । ମାପ୍ ୱିଜେରେ ଏଣ୍ତେସ୍ ମାନାପ୍, ଆୟା ମାଟା ୱେର୍ସି ମିଙ୍ଗିଁ ୱେଡ଼ିକା କିବିସ୍ କିଦେଙ୍ଗ୍ଁ ଇଜି ନାନୁ ୱାନିଙ୍ଗ୍ଁ ମି ଲାକ୍ତୁ ପକ୍ତାଜିନା । ବୁବା ମାପୁରୁ ନି ପ୍ରବୁ ଜିସୁ କ୍ରିସ୍ତ ବିସ୍ବାସି ତଡ଼ାନ୍କାଙ୍ଗ୍ଁ ନି ତାଙ୍ଗିଁକାଙ୍ଗ୍ଁ ସାନ୍ତି, ଜିବନ୍ନୋନିକା ମାରି ବିସ୍ବାସ୍ ସିପିନ୍ । ମା ପ୍ରବୁ ଜିସୁ କ୍ରିସ୍ତଦି ଉଣ୍ତିଙ୍ଗ୍ଁ ଏମେୱାରି ଜିବନ୍ନୋନିକା ୱିଜ୍ଏତ୍, ୱାନ୍ ୱାରିଙ୍ଗ୍ ଉଣ୍ତିଙ୍ଗ୍ ଦୟା କିପିନ୍ ।
Source notes (6)
- Cross-reference କଲସିୟ ୩:୨୦.
- Cross-reference କଲସିୟ ୩:୨୧.
- Cross-reference କଲସିୟ ୩:୨୨-୨୫.
- Cross-reference କଲସିୟ ୪:୧ କଲସିୟ ୩:୨୫.
- Cross-reference ପ୍ରେରିତ ୨୦:୪; ୨ ତିମତି ୪:୧୨.
- Cross-reference କଲସିୟ ୪:୭,୮.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.