ମାପୁରୁଦି ସତ୍ ବାକ୍ୟ
ପ୍ରେରିତ 23
ପାଉଲ ପେରିସବା ତରିନ୍ ସିଦା ସୁଡ଼୍ଜି ଇର୍ହାନ୍, “ଏ ଇସ୍ରାଏଲ୍ତି ତଡ଼ାନ୍କୁ ! ନେର୍ ସାନ୍ଦି ମାପୁରୁଦି ଆଗ୍ଡ଼ି ନାନୁ ଏଣ୍ତେସ୍ ଜିତାମାନା, ଆୟା ବିସୟ୍ତାନ୍ ନା ମନ୍ ପୁରା ନେଗିକା ।” ଇୟା ମାଟା ୱେନ୍ଜି ପେରି ଜାଜକ ହନନିୟ ପାଉଲତି ମକମି ସାପୁଡ଼ୁ ଡାକ୍ତେଙ୍ଗ୍ଁ ପାଉଲତି ଲାକ୍ତୁ ନିର୍ଇ ମାନି ଲୋକାଙ୍ଗ୍ ଆଦେସ୍ ସିତାନ୍ । 1ପାଉଲ ୱାନିଙ୍ଗ୍ଁ ଇର୍ହାନ୍, “ଏ ଅଡ଼ିନି ପେଡ଼୍ୱା ଉସ୍ତି ଗଡା, ମାପୁରୁ ସତେନେ ନିଙ୍ଗିଁ ଡାକ୍ନାନ୍ । ନିୟମ୍ ଇସାବ୍ତାନ୍ ନା ବିସାର୍ କିଦେଙ୍ଗ୍ଁ ନିନୁ ଆବେ ବାସ୍ତିମାନି, ଜଦିବା ନାଙ୍ଗିଁ ଡାକ୍ତେଙ୍ଗ୍ଁ ଇଜି ଆଦେସ୍ ସିଜି ନିନୁ ନିୟମ୍ ରୁକ୍ସିନି ।”
ପାଉଲତି ଲାକ୍ତୁମାନି ଲୋକୁ ୱାନିଙ୍ଗ୍ ଇର୍ହାର୍, “ନିନୁ ମାପୁରୁଦି ପେରି ଜାଜକତିଙ୍ଗ୍ଁ ଅପମାନ୍ କିଜିନି !”
ପାଉଲ ଇର୍ହାନ୍, “ଏ ଇସ୍ରାଏଲ୍ ତଡ଼ାନ୍କୁ, ୱାନ୍ ନେତାର୍ରି ପେରି ଜାଜକ ଇଜି ନାନୁ ନେସେଏ ମାର୍ହା । ଦାର୍ମୁସାସ୍ତ୍ରଦୁ ରାସାତାମାନାତ୍, ମିର୍ ନିଜେଦି ଲୋକା ସାସନ୍କିନିୱାନିଙ୍ଗ୍ଁ ତାଗ୍ଇ ମାଟା ଇନ୍ମା ।” 2
ଜିହୁଦି ଦଲ୍ତୁ ଏସ ପାରୁସିର୍ ନି ମାରି ଏସ ସାଦୁକିର୍ ମାନିକା ସୁଡ଼୍ଜି ପାଉଲ ପେରିସଭାଦିଙ୍ଗ୍ଁ କୁକ୍ସି ଇର୍ହାନ୍, “ଏ ଇସ୍ରାଏଲ୍ତି ତଡ଼ାନ୍କୁ, ନାନୁ ଅରେନ୍ ପାରୁସି, ପାରୁସି କୁଟୁମ୍ତୁ ନା ଜନମ୍ । ସାତି ୱାରି ମାରିଡ଼େସି ନିଙ୍ଗ୍ଁନିମାନୁ ନାନୁ ଆସା କିନି ଉଣ୍ତିଙ୍ଗ୍ଁ ଇବେ ନା ବିସାର୍ କିଜିନାର୍ ।”
ୱାରି ଲୋଇ ଦଲ୍ ଏର୍ପିସିସାନିକା ମାରି ୱାନ୍ ଟିକ୍ ଇୟା ମାଟା ଇନି ସାଙ୍ଗେ ସାଙ୍ଗେ ପାରୁସି ନି ସାଦୁକିରି ଲୋଇ ଆଉଲି ଆରାମ୍ ଆତାତ୍ । 3ଇରିଙ୍ଗ୍ଁ ସାଦୁକିରି ଇସାବ୍ତାନ୍ ସାତି ଲୋକା ମାରିଡ଼େସିନିଙ୍ଗିଁକା ସିଲେତ୍, ମୁସ୍କୁପୁର୍ତି ଦୁତ୍ ମାରି ଆତ୍ମେଙ୍ଗାଁ ପେଡେନ୍ ସିଲେତ୍; ମାତର୍ ପାରୁସିର୍ ଇୟା ମୁଣ୍ତ୍ରି ବିସୟ୍ତାନ୍ ବିସ୍ବାସ୍ କିନାର୍ । ୱାରି ଆଉଲି ନାଣ୍ତ ଆଦେଙ୍ଗ୍ ଆସ୍ତାତ୍ ମାରି ପାରୁସିର୍ ଦଲତି ଏସ ଦାର୍ମୁଗୁରୁର୍ ନିଲ୍ସି ଟାଟ୍ତାନ୍ ଇର୍ହାର୍, “ମାପ୍ ୱେନିମାନୁ ଇନି ଦସ୍ ପେଏଜିନାପ୍ ! ସତେନେ ୱାନି ୱାଲେ ଅରେନ୍ ଆତ୍ମା ବା ମୁସ୍କୁପୁର୍ତି ଦୁତ୍ ମାଟା ଇନାମାନାନ୍ ।”
ଆସ୍ସିସାନିକା ନିସା ପେରିକା ଆତାତ୍ଜେ, ଲୋକୁ ପାଉଲତିଙ୍ଗ୍ଁ କୟ୍ଜି ମକା ମକା କିନାର୍ ଇଜି ସନ୍ୟରି ନେତା ତିଲାତାନ୍ । ଆଦେଙ୍ଗ୍ ୱାନ୍ ଜାଟିକିନିୱାରି ଲୋଇରାନ୍ ପାଉଲତିଙ୍ଗ୍ଁ ରକିୟା କିଜି ୱାନିଙ୍ଗ୍ଁ ଦୁର୍ଗ ଲୋଇ ଅତେଙ୍ଗ୍ ଇଜି ସନ୍ୟରିଙ୍ଗ୍ ଆଦେସ୍ ସିତାନ୍ ।
ଆୟା ନାଡ଼ା ପ୍ରବୁ ପାଉଲତି ଲାକ୍ତୁ ନିଲ୍ସି ଇର୍ହାନ୍, “ସାସ୍ ଆସ୍ଆ ! ନିନୁ ଇବେ ଜିରୁସାଲାମ୍ତୁ ନା ଉଣ୍ତିଙ୍ଗ୍ଁ ସାକି ସିତିମାନି । ରୋମ୍ତୁ ବା ନିନୁ ସତେନେ ଆୟାୱାଜା ସାକି ସିନି ।”
ପାଉଲତିଙ୍ଗ୍ଁ ସାୟାମାର୍ଗାଡାକ୍ତେଙ୍ଗ୍ଁ ଇଜି ଉପାୟ୍
ମାରିନାଣ୍ତିଙ୍ଗ୍ଁ ସାଲ୍ଦି ଏସ ଜିହୁଦି ଲୋକୁ ଉଣ୍ତାଜି ଉନ୍ଡ୍ରି ଉପାୟ୍ କିତାର୍ । ପାଉଲତିଙ୍ଗ୍ଁ ସାୟାମାର୍ଗା ଡାକ୍ଇ ସାନ୍ଦି ୱାର୍ ଉଣୁଏପ୍ ଇଜି ପାର୍ମାଣ୍ କିତାର୍ । ଚାଲିସ୍ଲୋକ୍ତାନ୍ ନାଣ୍ତ ଲୋକୁ ଇୟା ଉପାୟ୍କିତାର୍ । ୱାର୍ ସଲ୍ସି ପେରି ଜାଜକ ନି ଜିହୁଦି ନେତାର୍ରିଙ୍ଗ୍ ଇର୍ହାର୍, “ପାଉଲତିଙ୍ଗ୍ଁ ସାୟାମାର୍ଗା ଡାକ୍ଇ ସାନ୍ଦି ଇନିକା ବା ଉଣୁଏପ୍ ଇଜି ମାପ୍ ଉନ୍ଡ୍ରି ଡାଟ୍ତାନ୍ ପାର୍ମାଣ୍ କିତାମାନାପ୍ । ଆଦେଙ୍ଗ୍ଁ ୱାନି ବିସୟ୍ତାନ୍ ନାଣ୍ତ ସତ୍ ମାଟା ନେସ୍ନି ସାଲାକି ତର୍ସି ପେରିସଭା ଆଗ୍ଡ଼ି ନି ମି ଲାକ୍ତୁ ପାଉଲତିଙ୍ଗ୍ଁ ମାରି ଉନ୍ଡ୍ରି ଦେବା ତାତେଙ୍ଗ୍ଁ ଇଜି ରୋମିୟ ସନ୍ୟରି ନେତେଙ୍ଗ୍ଁ ବାତିଙ୍ଗ୍ଁ ମାଲ୍ଦୁ । ମାତର୍ ୱାନ୍ ଇବେ ୱାନି ଆଗ୍ଡ଼ି ସାରିଦୁ ମାପ୍ ୱାନିଙ୍ଗ୍ଁ ସାୟାମାର୍ଗାଡାକ୍ତେଙ୍ଗ୍ଁ ଇଜି ତିଆର୍ ଆନାମାନାପ୍ ।”
ମାତର୍ ପାଉଲତି ବାଣେଜେଙ୍ଗ୍ ଇୟା ଉପାୟ୍ ମାଟା ୱେନ୍ଜି, ଦୁର୍ଗ ଲୋଇ ସଲ୍ସି ପାଉଲତିଙ୍ଗ୍ଁ ଇକା ୱେର୍ତାନ୍ । ପାଉଲ ରୋମିୟ ପାଣିକିନିୱାରି ଲୋଇ ଅରେନ୍ୱାନିଙ୍ଗ୍ଁ କୁକିସି ଇର୍ହାନ୍, “ଇୟା ମୁରୁଲିଙ୍ଗ୍ଁ ସନ୍ୟରି ନେତା ଲାକ୍ତୁ ଅଆ, ୱାନ୍ ୱାନିଙ୍ଗ୍ଁ ଏସ ଇନିକା ମାଟା ମାନାତ୍ ।” ପାଣିକିନିକାନ୍ ୱାନିଙ୍ଗ୍ଁ ସନ୍ୟରି ନେତା ଲାକ୍ତୁ ଅସି ଇର୍ହାନ୍, “ତରାତିମାନି ପାଉଲ ନାଙ୍ଗିଁ କୁକ୍ସି ଇୟା ମୁରୁଲିଙ୍ଗ୍ଁ ନି ଲାକ୍ତୁ ତାତେଙ୍ଗ୍ଁ ଇର୍ହାନ୍ । ନିଙ୍ଗିଁ ୱାନ୍ ଏସ ଇନି ମାଟା ମାନାତ୍ ।”
ସନ୍ୟରି ନେତା ୱାନି କିୟୁ ଆସ୍ସି ନିଜେ ଅତାତ୍ ମାରି ୱେନ୍ବାତାନ୍, “ନାଙ୍ଗିଁ ଇନିକା ୱେର୍ନିକା ମାନାତ୍, ଇନ୍ଆଁ !”
ମୁରୁଲିକଡ଼ ଇର୍ହାନ୍, “ଜିହୁଦି ଅଦିକାରିର୍ ଉପାୟ୍ କିତାମାନାର୍ ଜେ, ପେରିସଭା ପାଉଲତି ବିସୟ୍ତାନ୍ ନାଣ୍ତ୍ ସତ୍ ମାଟା ନେସ୍ତେଙ୍ଗ୍ଁ ବଦା କିତାମାନାର୍ ଇଜି ସାଲାକିଜି ୱାନିଙ୍ଗ୍ଁ ପେରିସଭାଦୁ ଅତେଙ୍ଗ୍ଁ ଇଜି ନିଙ୍ଗିଁ ବାତିଙ୍ଗ୍ଁ ମାଲ୍ନାର୍ । ମାତର୍ ୱାରି ମାଟା ୱେନ୍ମା; ଇରିଙ୍ଗ୍ଁ ସାଲିସ୍ତାନ୍ ନାଣ୍ତ ଲୋକୁ ୱାନିଙ୍ଗ୍ଁ ସାୟାମାର୍ଗା ଡାକ୍ଇ ସାନ୍ଦି ଉଣୁଏର୍ ଇଜି ପାର୍ମାଣ୍ ଅସି କାପ୍କିତାମାନାର୍ । ଇଲେଇ ୱାର୍ ନି ମାଟାଦିଙ୍ଗ୍ କାପ୍କିଜି ଜାଗାର୍ତା ମାନାର୍ ।”
“ନିନୁ ନାଙ୍ଗିଁ ଇକା ୱେର୍ତିମାନି ଇଜି ଏଙ୍ଗ୍ଁ ଇନ୍ମା ।” ସନ୍ୟରି ନେତା ଇକା ୱେର୍ସି ମୁରୁଲିଙ୍ଗ୍ଁ ପକ୍ତାନ୍ ।
ପାଉଲତିଙ୍ଗ୍ କାଇସରିଆଦୁ ପୋକ୍ତାର୍
ସନ୍ୟରି ନେତା ୱାନି ଆଡ୍ଗିମାନି ରିଏରି ପାଣିକିନିୱାରିଙ୍ଗ୍ଁ କୁକିସ୍କିଜି ଇର୍ହାନ୍, “ନେରୁ ନାଡ଼ା ନଅଟା ବେଡ଼ାଦୁ କାଇସରିଆଦୁ ସନ୍ଡ୍ରେଙ୍ଗ୍ଁ ଇଜି ସତୁରି ଲୋକୁ ଗଡ଼ାସାଲାକିନିୱାରିଙ୍ଗ୍ଁ ମାରି ଦୁଇସ ଇଟା ଆସ୍ନିୱାରିୱାଲେ ଦୁଇସ ବୁଲାନି ସନ୍ୟରିଙ୍ଗ୍ଁ ତିଆର୍ କିଦୁ । ପାଉଲତି ସନି ଉଣ୍ତିଙ୍ଗ୍ଁ ଏସ ଗଡ଼େଙ୍ଗ୍ଁ ସିଦୁ ମାରି ନେଗେନ୍ତାନ୍ ୱାନିଙ୍ଗଁ ସାସନକିନି ପେଲିକସ୍ତି ଲାକ୍ତୁ ଅତୁ ।” ସନ୍ୟରି ନେତା ଇୟାୱାଜା ଆକୁ ରାସ୍ତାନ୍ :
“ସନ୍ମାନ୍ତି ସାସନ୍କିନି ପେଲିକସ୍ତିଙ୍ଗ୍ କ୍ଳଡିଅସ୍ ଲୁସିୟାଦି ନମସ୍କାର୍ ଆପିତ୍ । ଜିହୁଦି ଲୋକୁ ଇୟା ଲୋକ୍ତିଙ୍ଗ୍ଁ ଆସ୍ସି ୱାନିଙ୍ଗ୍ଁ ସାୟାମାରାଗ୍ ଡାକ୍ତେଙ୍ଗ୍ଁ ତିଆର୍ ମାର୍ହାର୍ । ୱାନ୍ ଅରେନ୍ ରୋମିୟ ଲୋକୁ ଇଜି ନେସ୍ତାର୍ଆକା ନାନୁ ନା ସନ୍ୟରି ମାଣାନ୍ ୱାନିଙ୍ଗ୍ଁ ରକିୟା କିତା । ୱାରି ବିରଦ୍ତାନ୍ ୱାନ୍ ଇନି ଦସ୍ କିତାମାର୍ହାନ୍, ନେସ୍ତେଙ୍ଗ୍ ଇଜି ନାନୁ ୱାନିଙ୍ଗ୍ଁ ୱାରି ପେରିସଭାଦୁ ଅତା । ମାତର୍ ୱାନ୍ ସାନିଦଣ୍ତ୍ ବା ଜଇଲ୍ ଦଣ୍ଡ୍ ପୟ୍ନି ୱାଜା ଇନି ପାଣି କିଏନ୍ ଇଜି ନାନୁ ନେସ୍ତେଙ୍ଗ୍ଁ ଆଟ୍ତା । ୱାନି ବିରଦ୍ତାନ୍ ଆତିମାନି ଦାବିୱିଜୁ ୱାରି ଦର୍ମଦି ବିସୟ୍ତି ନିୟମ୍ । ମାରି ୱାନି ବିରଦ୍ତାନ୍ ଉନ୍ଡ୍ରି ଉପାୟ୍ ଆତାମାନାତ୍ ଇଜି କାବୁର୍ ପୟ୍ଜି ଦାପ୍ରେ ଦାପ୍ରେ ୱାନିଙ୍ଗଁ ନି ଲାକ୍ତୁ ପୋକ୍ତେଙ୍ଗ୍ ଅଡ଼୍ବିତା । ୱାନି ବିରଦ୍ତାନ୍ ମାନି ଦାବିୱିଜୁ ନି ଲାକ୍ତୁ ୱେର୍ତେଙ୍ଗ୍ଁ ଇଜି ନାନୁ ୱାନି ଦାବିକିନିୱାରିଙ୍ଗ୍ଁ ଇର୍ହାମାନା ।”
ସନ୍ୟର୍ ଆୟା ଆଦେସ୍ ଇସାବ୍ତାନ୍ ପାଉଲତିଙ୍ଗ୍ଁ ଆୟା ନାଡ଼ା ଆନ୍ତିପାତ୍ରିଦୁ ଇପ୍ତାର୍ । ମାରିନାଣ୍ତିଙ୍ଗ୍ଁ ବୁଲାନି ସନ୍ୟର୍ ଦୁର୍ଗଦୁ ଡ଼େସି ସର୍ହାର୍ ମାରି ଗଡେଙ୍ଗ୍ଁସାଲାକିନି ସନ୍ୟର୍ ପାଉଲତିଙ୍ଗ୍ଁ ଅସି କାଇସରିଆଦୁ ଇତାର୍ । ଆବେ ସନ୍ୟରି ନେତା ଆକୁଦିୱାଲେ ପାଉଲତିଙ୍ଗ୍ଁ ସାସନ୍କିନିମାନୁ ସର୍ପେ କିତାନ୍ । ସାସନ୍କିନି ମନ୍ତ୍ରୀ ଆକୁ ପଡ଼ାଜି ପାଉଲତିଙ୍ଗ୍ଁ ଆମା ଦେସ୍ତାନ୍ ୱାତିମାନି ଇଜି ୱେନ୍ବାତାନ୍ । ପାଉଲ ସିଲିସିଆଦିକାଙ୍ଗ୍ଁ ଇଜି ନେସ୍ସି, ୱାନ୍ ଇର୍ହାନ୍, “ନି ଦାବିକିନିକାର୍ ଇତି ୱେନ୍କା ନାନୁ ନି ମାଟା ୱେନା ।” ୱେନ୍କା ପାଉଲତିଙ୍ଗ୍ଁ ହେରୋଦତି ମେଡ଼୍ଇଲୁତୁ ତର୍ସି ଇଡ୍ଦେଙ୍ଗ୍ଁ ଇଜି ଆଦେସ୍ ସିତାନ୍ ।
Source notes (3)
- Cross-reference ମାତିଉ ୨୩:୨୭,୨୮.
- Cross-reference ପ୍ରେରିତ ୨୬:୫; ପିଲିପିୟ ୩:୫.
- Cross-reference ମାତିଉ ୨୨:୨୩; ମାର୍କ ୧୨:୧୮; ଲୁକ ୨୦:୨୭.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.