ମାପୁରୁଦି ସତ୍ ବାକ୍ୟ
୨ ତେସଲନିକିୟ 2
ତାଗ୍ଇ ଲୋକ୍
ଏ ତଡ଼ାନ୍କୁ ନି ତାଙ୍ଗିଁକି, ପ୍ରବୁ ଜିସୁ କ୍ରିସ୍ତଦି ଡ଼େସିୱାନିଦିନ୍ତି ବିସୟ୍ତାନ୍ ମାରି ୱାନି ଲାକ୍ତୁ ମାଡ୍ ୱିଜେରେ ଉନ୍ଡ୍ରେମାନୁ ଆନି ବିସୟ୍ତାନ୍ ମିଙ୍ଗିଁ ବାତିଙ୍ଗ୍ମାଲ୍ଜିନାପ୍ । ପ୍ରବୁଦି ଦିନ୍ ୱାତାତ୍ନି ଇଜି ଏମାଣାନ୍ ୱେନ୍ଞ୍ଜି ମିର୍ ଇନ୍ଙ୍ଗାଁଆନିଙ୍ଗାଁ ମାରି ବେମ୍ରି ଆମାଟ୍ । ମାପ୍ ପ୍ରଚାର୍ କିନିୱାଲେ ଇୟାୱାଜା ଇନି ମାଟା ୱେର୍ତାମାନାପ୍ ମାରି ଇୟା ବିସୟ୍ତାନ୍ ଇନିକା ରାସ୍ସି ୱେର୍ତାମାନାପ୍ ଇଜି ଏସଲୋକାଙ୍ଗ୍ ଏତ୍ ମାନାତ୍ । ଇୟାୱାଜା ୱେର୍ସି ମିଙ୍ଗିଁ ଏନ୍ ଏଣ୍ତେସ୍ ୱାଜାବା ବେମ୍ରି କିମାକିନ୍ । ମାପୁରୁଦି ବିରୁଦ୍ତାନ୍ ସାରାସାରିୱେନ୍କାରି ଜୁଦ୍ ଗଟାଇ ସାନ୍ଦି ମାରି ଆୟା ଅଦାର୍ମୁଦି ଲୋକ୍ ପୁରାୱେର୍ଇ ସାନ୍ଦି ମାରି ୱାନିଙ୍ଗ୍ ନର୍କଦି ପୋକ୍ଇ ସାନ୍ଦି ପ୍ରବୁଦି ଆୟା ଦିନ୍ ରେଏତ୍ । ଆୟା ତାଗ୍ଇଆତ୍ମା ଲୋକାଦି ୱାର୍ଗିଜିସାନିକା ୱିଜୁ ପୁଜାଦି ଦିୟାମ୍ ମାରି ପୁଜାସିତି ଜିନିସ୍ତି ବିରୁଦ୍ କିନାତ୍ ମାରି ନିଜେଦିଙ୍ଗ୍ ୱିଜେରିଙ୍ଗ୍ ମୁସ୍କୁ ଇଡାୟ୍ଆଦେଙ୍ଗ୍ ଆସା କିନାତ୍ । ଇୟାୱାଜା ଜେ ୱାନ୍ ମାପୁରୁଦି ମନ୍ଦିର୍ତୁ ବାସ୍ସି ନିଜେଦିଙ୍ଗ୍ ମାପୁରୁ ଇଜି ତରାନାତ୍ ।
ମିଙ୍ଗିଁ ଇନିକା ଏତ୍ ସିଲେତ୍ ? ନାନ୍ ମି ୱାଲେ ମାର୍ଇୱାଲେ ମିଙ୍ଗିଁ ଇୟାୱିଜୁ ବିସୟ୍ ୱେର୍ତାମାର୍ଆ । ଏଣ୍ତେସ୍ବା ଆୟା ସନିରାଉ ଇଲେଇ ଗଟାଏତ୍, ଇରିଙ୍ଗ୍ ତାନିଙ୍ଗ୍ ବିରୁଦ୍ କିଦେଙ୍ଗ୍ ଇଲେଇ ଉନ୍ଡ୍ରି ସାକ୍ତି ମାନାତ୍, ଆକା ଇନିକା ମିର୍ ନେସ୍ନିଦେର୍ ! ମାତର୍ ଆୟା ବେଡ଼ାଦୁ ଆୟା ତାଗ୍ଇଦୁବା ଇଗାୱାନାତ୍ । ଇୟାଦାପ୍ରେ ୱାନି ମାର୍ଗିତିମାନି ତାଗ୍ଇ ପାଣି କିଜିନାତ୍; ମାତର୍ ୱାନି ବିରଦ୍କିତି ଲୋକ୍ ଆକ ସଲ୍ଇ ସାନ୍ଦି ଆୟା ଗଟଣେଙ୍ଗ୍ ଗଟେଆଉ । ତାନେୱେନ୍କା ଆୟା ତାଗ୍ଇ ଦୁବା ଇଗାୱାନାତ୍; ମାତର୍ ଏସ୍ତିୱାଲେ ପ୍ରବୁ ଜିସୁ ୱାନାନ୍, ୱାନ୍ ୱାନି ୱେୟୁଦି ପୁଣ୍ତାଦାନ୍ ତାନିଙ୍ଗ୍ ଜୁଦ୍ କିନାନ୍, ମାରି ୱାନି ଜାୟ୍ତି ଆଗ୍ଡ଼ି ୱାନ୍ ଦଂସ୍ ଆନାନ୍ । 2ଆୟା ତାଗ୍ଇଦୁବା ସୟ୍ତାନ୍ତି ସାକ୍ତିଦାନ୍ ନାଣ୍ତ୍ଡାଟ୍ ଆଜି ୱାନାତ୍ ମାରି ନାଣ୍ତ କାବାଆନି ପାଣି କିଜି ସାଲାକି କିନାତ୍ । ଗାଦିଲୋକ୍ ୱାନି ମାଟା ଆସ୍ସି ବାୟା ଆଜି ନାସ୍ଟୁ ଆନାର୍ । ଆମା ସତ୍ତିଙ୍ଗ୍ ମାନାଜି ୱାନି ଉଣ୍ତିଙ୍ଗ୍ ମିସାଆଜିମାନି ମାଣାନ୍ ୱାର୍ ରକିୟା ପୟ୍ତାର୍ମାନ୍ଧି, ତାନିଙ୍ଗ୍ ମାନାଏତି ମାନିଙ୍ଗ୍ ୱାରି ଇୟା ଦଣ୍ତ୍ ଆନାତ୍ । ମାରି, ଇୟାଉଣ୍ତିଙ୍ଗ୍ ୱାର୍ ଏଣ୍ତେସ୍ ମିଚ୍ତାନ୍ ବିସ୍ବାସ୍ କିନାର୍, ଆୟାଉଣ୍ତିଙ୍ଗ୍ ମାପୁରୁ ୱାରି ଲାକ୍ତୁ ବାୟାଆନି ସାକ୍ତି ପୋକ୍ନାନ୍ । ଆମାକାର୍ ସତ୍ତାନ୍ ବିସ୍ବାସ୍ କିଏର୍, ମାତର୍ ଅଦାର୍ମୁପାଣିଦୁ ୱେଡ଼ିକା କିନାର୍, ୱାର୍ ୱିଜେରେ ଇୟାୱାଜା ବିଚାର୍ ଆନାର୍ ।
ମିର୍ ରକିୟା ଉଣ୍ତିଙ୍ଗ୍ ମନୋନିତ
ଏ ତଡ଼ାନ୍କୁ ନି ତାଙ୍ଗିଁକି, ମି ଉଣ୍ତିଙ୍ଗ୍ ମାପୁରୁଙ୍ଗ୍ ୱିଜୁଦିନ୍ ଦନ୍ୟବାଦ୍ ସିନିକା ନେଗେତ୍ । ମାତର୍ ପ୍ରବୁ ମିଙ୍ଗିଁ ଜିବନ୍ନୋନାନ୍ । ସତ୍ତାନ୍ ମି ବିସ୍ବାସ୍ ଉଣ୍ତିଙ୍ଗ୍ ମାପୁରୁ ମିଙ୍ଗିଁ ପ୍ରାତୁମ୍ତି ୱାଜା ଆସ୍କିତାମାନାନ୍ ଏଣ୍ତେସ୍ ପବିତ୍ରଆତ୍ମାଦି ସାକ୍ତିଦାନ୍ ମିର୍ ରକ୍ୟା ପୟ୍ନିଦେର୍ ମାରି ଉନ୍ଡ୍ରି ପବିତ୍ର କୁଟୁମ୍ ଆନାତ୍ । ମି ଲାକ୍ତୁ ମାପ୍ ଆମା ସୁସମାଚାର୍ ପ୍ରଚାର୍ କିତାମାନାପ୍, ୱାନି ମାଣାନ୍ ମାପୁରୁ ମିଙ୍ଗିଁ ଇୟାଉଣ୍ତିଙ୍ଗ୍ କୁକ୍ତାମାନାନ୍ । ମା ପ୍ରବୁ ଜିସୁ କ୍ରିସ୍ତଦି ଗୌରବ୍ଦୁ ମିସାକିନି ଉଣ୍ତିଙ୍ଗ୍ ୱାନ୍ ମିଙ୍ଗିଁ କୁକ୍ତାମାନାନ୍ । ଏ ତଡ଼ାନ୍କୁ ନି ତାଙ୍ଗିଁକି, ମା ପ୍ରଚାର୍ ମାରି ମା ବଇଦୁ ମାପ୍ ମି ଲାକ୍ତୁ ଆମା ସତ୍ ୱେର୍ତା ମାନାପ୍, ତାନିଙ୍ଗ୍ ଡାଟ୍ତାନ୍ ଆସ୍ସ ଇଡ୍ଦୁ; ଆବେନ୍ ତିଲାଏଣ୍ଗା ମାନ୍ଡ୍ରୁ ।
ମା ପ୍ରବୁ ଜିସୁ କ୍ରିସ୍ତ ନିଜେ ମାରି ମା ଆମା ବୁବା ମାପୁରୁ ମାଙ୍ଗିଁ ଜିବନ୍ନୋଜି ଦୟାଦାନ୍ ମାଙ୍ଗିଁ ଡାଟ୍ତି ସାସ୍ ମାରି ନେଗି ଆସା ସିତାମାନାନ୍ । ୱାନ୍ ମି ଜିବନ୍ତିଙ୍ଗ୍ ୱିଜୁଦିନ୍ ସତ୍ ପାଣି କିଦେଙ୍ଗ୍ ମାରି ସତ୍ ବାକ୍ୟ ୱେର୍ତେଙ୍ଗ୍ ପୋକ୍ସି ମାରି ବପୁ ସିପିନ୍ ।
Source notes (2)
- Cross-reference ୧ ତେସଲନିକିୟ ୪:୧୫-୧୭.
- Cross-reference ମାତିଉ ୨୪:୨୪.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.