ମାପୁରୁଦି ସତ୍ ବାକ୍ୟ
୨ କରିନ୍ତିୟ 2
ଜଦି ନାନ୍ ମି ଲାକ୍ତୁ ୱାନିକା ମି ଉଣ୍ତିଙ୍ଗ୍ ଦୁଃକ୍ଆଜିନାତ୍, ମି ଲାକ୍ତୁ ମାରି ଏସ୍କାଙ୍ଗ୍ ବା ୱାଦେଙ୍ଗ୍ ନାନୁ ବଦାକିଏ । ମିଙ୍ଗିଁ ଦୁକ୍ ସିତିଙ୍ଗ୍, ନାଙ୍ଗିଁ ଏନ୍ ୱେଡ଼ିକା ସିନାନ୍ ? ମିଙ୍ଗିଁ ଡ଼ିସ୍ତିଙ୍ଗ୍ ମାରି ଆୟାୱାଜା ଏନ୍ ସିଲେର୍ । ଆୟାଉଣ୍ତିଙ୍ଗ୍ ନାନୁ ମିଙ୍ଗିଁ ରାସ୍ତାମାର୍ଆ, ନାନ୍ ଆବେନ୍ ସରିଙ୍ଗ୍; ଏମେୱାରି ଉଣ୍ତିଙ୍ଗ୍ ନା ୱେଡ଼ିକା ଆତାତ୍ମାନ୍ଦି, ୱାରିମାଡ଼ାନ୍କୁ ଏଣ୍ତେସ୍ ନାନ୍ ଦୁକ୍ ପୟ୍ଏ । ସତ୍ତାନ୍ ନା ଡାଟ୍ ବିସ୍ବାସ୍ ଜେ, ନା ୱେଡ଼ିକାଦୁ ମି ୱେଡ଼ିକା । ନାଣ୍ତ ଦୁକ୍ ନି କାସ୍ଟୁଦାନ୍ ଜିବନ୍ତାନ୍ ଆଡ଼୍ବାଜି ଆଡ଼୍ବାଜି ନାନୁ ଏମେ ସିଟି ରାସ୍ତାମାର୍ଆ, ମିଙ୍ଗିଁ ଦୁକ୍ ସିଦେଙ୍ଗ୍ ସିଲେ, ମାତର ମିଙ୍ଗିଁ ନାନୁ ଏସଜିବନ୍ନୋନା, ଇକା ୱେର୍ନିକା ମାରାତ୍ ଆୟାଚିଟିଦି ଆଦେସ୍ ।
ଦସି ଲୋକ୍ତି କେମା
ଜଦି ଏନ୍ ଏମେୱାନିଙ୍ଗ୍ ଦୁକ୍ ସିନାନ୍, ୱାନ୍ ନେ ନା ମୋନ୍ତୁ ଦୁକ୍ ସିଏନ୍, ଏସ ନାଣ୍ତ ମିଙ୍ଗିଁ ବା ଦୁକ୍ ସିଜିନା । ଇୟା ବିସୟତାନ୍ ନାନୁ ନାଣ୍ତ ବୋଜୁ ସିନିଉଣ୍ତିଙ୍ଗ୍ ମିଙ୍ଗିଁ ବଦାକିଏଜିନା । ମି ମାଡ଼ାନ୍କୁ ଏସଲୋକ୍ ବଦାଦାନ୍ ଆୟା ଲୋକ୍ତିଙ୍ଗ୍ ଆମା ଦଣ୍ତସିତାମାନାର୍, ଆକା ୱାନି ଉଣ୍ତିଙ୍ଗ୍ ବେସି । ୱାନ୍ ଏଣ୍ତେସ୍ ନାଣ୍ତ ଦୁକ୍ତାନ୍ ଆଏନ୍, ଆୟାଉଣ୍ତିଙ୍ଗ୍ ଇଲେଇ ୱାନିଙ୍ଗ୍ କେମା ମାରି ସାନ୍ତି ସିଦେଙ୍ଗ୍ ମି ପାଣି । ମିଙ୍ଗିଁ ନା ଅନୁରଦ୍, ମିର୍ ୱାନିଙ୍ଗ୍ ଲାଡ୍ ମାରି ୱେଡ଼ିକା କିଜିନିଦେର୍ ଇଜି ୱେରସ୍ ସିଦାଟ୍ । ମିର୍ ୱିଜୁଦିନ୍ ନା ମାଟା ମାନାଦେଙ୍ଗ୍ ତିଆର୍ ନୋ ସିଲେ, ଆକା ନେସ୍ନି ଉଣ୍ତିଙ୍ଗ୍ ନାନ୍ ଆୟା ଆକୁ ରାସ୍ତାମାର୍ଆ । ଜଦି ମିର୍ ଏଙ୍ଗ୍ବା କେମା କିନିଦେର୍, ନାନ୍ ବା ୱାନିଙ୍ଗ୍ କେମା କିନା । ଜଦି ଇନି ବିସୟତାନ୍ ଏମେୱାନିଙ୍ଗ୍ କେମାକିନାମାନାନ୍, ଆକା ୱାନିଙ୍ଗ୍ କ୍ରିସ୍ତଦି ଆଗ୍ଡ଼ିରାନ୍ ମି ଉଣ୍ତିଙ୍ଗ୍ କିତାମାନା । ଆର୍ତିଙ୍ଗ୍ ସୟତାନ୍ ମା ବିରୁଦ୍ତାନ୍ ଇନି ପାଣି କିନି ଉଣ୍ତିଙ୍ଗ୍ ସୁଜୋଗ ପୟ୍ଏତ୍; ତାନି ୱିଜୁ ପାଣି ମାପ୍ ନେସ୍ନାପ୍ । 1କ୍ରିସ୍ତଦି ସୁସମାଚାର୍ ୱେର୍ନି ଉଣ୍ତିଙ୍ଗ୍ ତ୍ରୋୟା ଦିପଦୁ ଇଜି ନାନ୍ ସୁଡ଼ୁତା, ଇୟା ପାଣି ଉଣ୍ତିଙ୍ଗ୍ ପ୍ରବୁ ସାରି ରେତା ମାନାନ୍ । ମାତର୍ ତଡ଼ାନ୍ ତିତସତିଙ୍ଗ୍ ଆବେନ୍ ସୁଡ଼ୁଏଣ୍ତା ନାନ୍ ଦାନ୍ଦା ଆତା । ଆଦେଙ୍ଗ୍ ଆବେଣି ଲୋକାମାଣୁକୁ ଡ଼ିସ୍ତାନୋ ନାନ୍ ମାସିଦୋନିଆଦୁ ସର୍ଆ ।
କ୍ରିସ୍ତଦି ମାଣ୍କୁ ଜିଣାନିକା
ମାପୁରୁଦି ଦନ୍ୟବାଦ୍ ଆପିତ୍ । ଇରିଙ୍ଗ୍ ୱାନ୍ ଜିସୁ କ୍ରିସ୍ତଦିମାଣୁକୁ ୱିଜୁଦିନ୍ ମାଙ୍ଗିଁ ଜିଣାନି ସାରିଦୁ ଆଗ୍ଡ଼ି ଅନାନ୍ । ମାରି ବାସ୍ନା ଦୁପୁଣି ୱିଜୁତରିନ୍ ୱେଙ୍ଗିଁତି ୱାଜା କ୍ରିସ୍ତଦି ବୁଦି ଆଇୱାରିଙ୍ଗ୍ ସିନିଉଣ୍ତିଙ୍ଗ୍ ମାପୁରୁ ମାଙ୍ଗିଁ ବ୍ୟବହାର୍ କିତାମାନାନ୍ । ଇରିଙ୍ଗ୍ ଏମେକାର୍ ରକିୟା ପୟ୍ତାମାନାର୍ ମାରି ଏମେକାର୍ ନାସ୍ଟୁ ସାରିଦୁ ମୁଜିତାମାନାର୍, ୱିଜେରିମାଣୁକୁ ମାପ୍ ଆଜିନାପ୍ ମାପୁରୁଦି ଉଦେସ୍ତାନ୍ ସିଆୟ୍ଆତିମାନି କ୍ରିସ୍ତଦି ବାସ୍ନା ଦୁପ୍ଣି ୱାଜା । ଆମାକାର୍ ସାତି ସାରିଦୁ ବୁଲାଜିନାର୍; ୱାରି ଲାକ୍ତୁ ଇୟା ବାସ୍ନାନାନିକା ସାନିକା, ଆମାକାର୍ ରକ୍ୟା ପୟ୍ତାମାନାର୍, ୱାରି ଉଣ୍ତିଙ୍ଗ୍ ଇକା ଜିବନ୍ମାନିବାକ୍ୟ । ମାତର୍ ଇୟା ପାଣି କିନି ଉଣ୍ତିଙ୍ଗ୍ ଏନ୍ ଡାଟ୍ । ଗାଦିଲୋକ୍ ନିଜେ ଲାବବାନ୍ ଆଦେଙ୍ଗ୍ଁ ମାପୁରୁଦି ବାକ୍ୟ ବ୍ୟବହାର୍ କିଜିନାର୍ । ମାଡ଼ୁ ମାତର ଆୟାୱାଜା ସିଲେ । ମାଙ୍ଗିଁ ମାପୁରୁ ପୋକିସି କିତିମାନିଙ୍ଗ୍ ମାଡ଼ୁ ବିସ୍ବାସ୍ତାନ୍ ୱାନି ଆଦେସ୍ ମାନାଜିନି ମାରି ମାପୁରୁଦି ସାକିଦାନ୍ କ୍ରିସ୍ତଦି ଦାସ ୱାଜା ପ୍ରଚାର କିନାପ୍ ।
Source notes (1)
- Cross-reference ପ୍ରେରିତ ୨୦:୧.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.