ମାପୁରୁଦି ସତ୍ ବାକ୍ୟ
୧ ତିମତି 4:12
Verse 12 is marked below, with the whole chapter around it. Read from the start
ମିଚ୍ ଗୁରୁର୍
ପବିତ୍ରଆତ୍ମା ପୁରାନେସ୍ନି ୱାଜା ୱେର୍ସିନାତ୍ ଜେ, ଦୁବାଆତ୍ମାଦି ତାଗ୍ଇ ସିକିୟାଦୁ ଆର୍ଜି ଅର୍ଲେନ୍ ଏନ୍ ଏନ୍ କ୍ରିସ୍ତ ବିସ୍ବାସ୍ତାନ୍ ଇନିଙ୍ଗାଁ ଆନିଙ୍ଗାଁ ଆନାର୍ । ଇକାର୍ ଏସ ଟକ୍ ନି ମିଚ୍ୱେର୍ନିକାର୍, ୱାରି ବୁଦି ୱେତାଦୋ ନିରୁ ଆତାମାନାତ୍ । ପେଡ଼ି କିନିକା ମାରି ଇନି ଇନି କାଦିଙ୍ଗ୍ ଉଣିକା ନେଗେନ୍ସିଲେତ୍ ଇଜି ୱାର୍ ୱେର୍ସିନାର୍ । ମାତର୍ ଆମା କ୍ରିସ୍ତବିସ୍ବାସ୍ସିର୍ ସତ୍ ତିଆର୍ କିତାମାନାନ୍, ୱାର୍ ମାପୁରୁ ତିଆର୍ କିତିମାନିକା ଉଣି କାଦି ଉଣ୍ତିଙ୍ଗ୍ ୱାନିଙ୍ଗ୍ ଦନ୍ୟବାଦ୍ ସିଜି ଆକା ୱେଡ଼ିକା ମୋନ୍ତାନ୍ ଉନ୍ଣ୍ତେ ଆଟ୍ନାର୍ । ମାପୁରୁ ଆମାକା ତିଆର୍ କିତାମାନାନ୍, ଆୟାୱିଜୁ ନେଗିକା, ଆବେଣୁକୁ ଆମାକାବା ଅଲଗା ଆଦେଙ୍ଗ୍ ଆଟ୍ଏତ୍ । ୱାନିଙ୍ଗ୍ ଦନ୍ୟବାଦ୍ ସିଜି ୱାନି ୱିଜୁ ଦାନ୍ତିଙ୍ଗ୍ ୱେଡ଼ିକାଦାନ୍ ମାନାନିକା ମାନାତ୍ । ଇରିଙ୍ଗ୍ ମାପୁରୁଦି ବାକ୍ୟ ମାରି ପାର୍ତାନାଦାନ୍ ୱିଜୁ ବିସୟ୍ ପବିତ୍ର ଆନାତ୍ ।
କ୍ରିସ୍ତ ଜିସୁଦି ନେଗି ସେବାକିନିକାନ୍
ତିମତି, ଇୟାୱିଜୁ ବିସୟ୍ ନିନ୍ ତଡ଼ାନ୍ ନି ତାଙ୍ଗିଁକାଙ୍ଗ୍ ସିକିୟା ସିତିଙ୍ଗ୍ କ୍ରିସ୍ତ ଜିସୁଦି ଅରେନ୍ ନେଗି ସେବା କିନିକାନ୍ ଆନି, ମାରି ନିନ୍ ଆମା ବିସ୍ବାସ୍ ମାରି ନେଗି ବୁଦିଦୁ ବୁଲାଜିନି, ଆୟା ବିସୟତି ବାକ୍ୟଦାନ୍ ସାକ୍ତି ଆନି; ମାପୁରୁଙ୍ଗୁଁ ଅପମାନ୍ କିଜି ୱାର୍ଇ ମାଟେଙ୍ଗ୍ ଡ଼ିସ୍ସି, ମି ଦାର୍ମୁ ଜିବନ୍ତିଙ୍ଗ୍ ବପୁ କିଦେଙ୍ଗ୍ ଅବ୍ୟାସ୍ କିଦୁ । ଇରିଙ୍ଗ୍ ମେନ୍ଦଲ୍ତି ବ୍ୟାୟାମ୍ତି ଦର୍କାର୍ ମାନାତ୍ । ମାତର୍ ଆତ୍ମିକ ପୁରା କିଦେଙ୍ଗ୍ ୱିଜୁଦାନ୍ ନେଗେନ୍ ଆନାତ୍, ଇରିଙ୍ଗ୍ ଇୟାମାଣାନ୍ ଲୋକୁ ରୁଣ୍ତି ବିସୟ୍ତାନ୍ ଇୟାଜୁଗ୍ତିଲୋକ୍ ମାରି ସାତି ଲୋକ୍ ଜିବନ୍ଆଜି ତେବାନାନ୍ ଇଜି ବିସ୍ବାସ୍ ପୟ୍ତାମାନା । ଇକା ପୁରା ସତ୍ ମାରି ୱିଜେରେ ଇକା ତରିସ୍ କିଜି ପୁରା ଜିବନ୍ତାନ୍ ବିସ୍ବାସ୍ କିନିକା ମାନାତ୍ । ଆମା ରକିୟାକର୍ତ୍ତାମାନୁ ବିସ୍ବାସ୍ କିତିଙ୍ଗ୍ ୱିଜେରେ ରକିୟା ପୟ୍ଦେଙ୍ଗ୍ ଆଟ୍ନାର୍, ଆୟା ଜିବନ୍ ମାପୁରୁମାନୁ ଆସା ଇଡ୍ଜି ମାଡ୍ ନିସା କାସ୍ଟୁ ବିସ୍ବାସ୍ କିଜି ଇୟା ପାଣି କିଜି ସୋଲ୍ସିନାପ୍ ।
ମିର୍ ଇୟାୱିଜୁ ବିସୟ୍ ମାଟା ସିଜି ୱାରିଙ୍ଗ୍ ସିକିୟା ସିଦୁ । ନି ନିଜେଦି ୱାର୍ଗିନିକା, ବ୍ୟବ୍ହାର୍, ଜିବନ୍ନୋନିକା, ବିସ୍ବାସ୍ ମାରି ପବିତ୍ରଦୁ ନେଗେନ୍ତାନ୍ ସେବା ତର୍ତେଙ୍ଗ୍ଁ ଆଟ୍ତିଙ୍ଗ୍, ଉଣା ବୟସ୍ ଆତିମାରିଙ୍ଗ୍ବା ମିଙ୍ଗିଁ ଏନ୍ ସେମାର୍ କିଦେଙ୍ଗ୍ ଆଟ୍ଏନ୍ । ନାନ୍ ନି ଲାକ୍ତୁ ୱାନି ସାନ୍ଦି ନିନୁ ଦାର୍ମୁସାସ୍ତ୍ର ପଡ଼ାନିକା, ଉପଦେସ୍, ସିକିୟାସିନି ପାଣି କିଜିମାନ୍ଆ । ମଣ୍ତ୍ଲିଦି ନେତାର୍ ମିଙ୍ଗିଁ ମାପୁରୁଦି ବାକ୍ୟ ୱେର୍ସି ମି ମୁସ୍କୁ କିୟୁଇଡ୍ନି ୱାଲେ ମିର୍ ଆମା ଅନୁଗ୍ରହଦି ଦାନ୍ ପୟ୍ତିମାନି, ତାନିଙ୍ଗ୍ ୱେଡ଼ା କିମାଟ୍ । ନାନ୍ ରାସ୍ତିମାନିକା ୱିଜୁ ପାଣି ଜିବନ୍ତି ୱାଲେ ମାନାଦେଙ୍ଗ୍ ଅବ୍ୟାସ୍ କିଦୁ ୱେନ୍କା ମି ପାଣିକିତି ୱେନ୍କା ୱିଜେରି ଉଣ୍ତିଙ୍ଗ୍ ଜାଗାର୍ତା ମାନ୍ଡ୍ରୁ । ନିଜେଦି ବିସୟ୍ତାନ୍ ମାରି ନିଜେଦି ସିକିୟା ବିସୟ୍ତାନ୍ ଜାଗାର୍ତା ମାନ୍ଡ୍ରୁ, ଇୟାୱିଜୁ ବିସୟ୍ତାନ୍ ଲାଗେଆଜି ମାନ୍ଡ୍ରୁ, ମାତର୍ ଆକା କିତିଙ୍ଗ୍ ମିର୍ ନିଜେ ପରିତ୍ରାଣ ପୋଇନିଦେର୍ ମାରି ମିର୍ ଆଇୱାରିଙ୍ଗ୍ ରକିୟା ବା ପୁରା କିନିଦେର୍ ।
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.