ମାପୁରୁଦି ସତ୍ ବାକ୍ୟ
୧ ପିତର 5
ମାପୁରୁଦି ମେଣ୍ତେଙ୍ଗ୍ମାନ୍ଧା
ନାନ୍ ଅରେନ୍ ପେରିନେତା ଇସାବ୍ତାନ୍ ମିଙ୍ଗିଁ ମଣ୍ତ୍ଲିଦି ପେରିନେତାରିଙ୍ଗ୍ ମାଡ଼ିସ୍ କିଜିନା । ମାରି କ୍ରିସ୍ତଦି ଦୁଃକ୍ ପୟ୍ନିମାନୁ ନାନ୍ ଅରେନ୍ ସାକି ମାରି ୱାନି ଗୌରବ୍ ତରାୟ୍ଆନି ବେଡ଼ାଦୁ ନାନ୍ ଆବେନୁ ସାକି ତେବାନା । 1ମାପୁରୁ ମି କିୟୁଦୁ ଆମା ମେଣ୍ତେଙ୍ଗ୍ ମାନ୍ଦାଦି ଦାଇତ୍ ସିତାମାନାନ୍, ନାନୁ ମାଡ଼ିସ୍ କିଜିନା, ମିରୁ ଜାସେକିନିୱାଜା ଆକା କିଏଣ୍ଗା ୱେଡ଼ିକାଦାନ୍ ୱାନିକାଙ୍ଗ୍ ସେବା କିଦୁ । ମାତର୍ ମାପୁରୁଦି ବଦାଦାନ୍ ନେଗି ମୋନ୍ତାନ୍, ଦନ୍ ଆସାଦି ଉଣ୍ତିଙ୍ଗ୍ ଆକା କିଏଣ୍ଗା, ମାତର୍ ୱେଡ଼ିକାଦାନ୍ ଆକା କିଦୁ । ମାରି ଆମାୱାରି ଦାଇତ୍ବୋଜୁ ମି କିୟୁଦୁ ସର୍ପେ ଆତାମାନାତ୍, ୱାରି ମୁସ୍କୁ ସାସନ୍ କିଏଣ୍ଗା ମାନ୍ଦା ଉଣ୍ତିଙ୍ଗ୍ ନିଜେଦି ଜିବନ୍ତୁ ସାରିତର୍ନି ଲୋକା ୱାଜା ଆଜି ଆକା ତରତୁ । ଏସ୍ତିୱାଲେ ପେରି ମେଣ୍ତେଙ୍ଗ୍ଗାଉଡ଼ୁ ୱାନାନ୍, ମିରୁ ଗୌରବ୍ଦି ମୁକୁଟ୍ ପୋଇନିଦେର୍ । ତାନି ଜାୟ୍ ଏସ୍କାଙ୍ଗ୍ ନାମ୍ଏତ୍ ।
ଆୟାୱାଜା, ଏ ମୁରୁକଡ଼ର୍ ମିରୁ ପେରିନେତାରି ମାଟା ମାନାଦୁ । ମିରୁ ୱିଜେରେ ନିଜେନିଜେଦି ସେବା କିନି ଉଣ୍ତିଙ୍ଗ୍ କାର୍ମୁନାନି ଆଙ୍ଗିଁ ଆରାଦୁ । ସାସ୍ତ୍ରଦୁ ରାସାତାମାନାତ୍, “ମାପୁରୁ ଆକାର୍ ଲୋକାଙ୍ଗ୍ ବିରୁଦ୍ କିନାନ୍, ମାରି ସାନ୍ତି ଲୋକାଙ୍ଗ୍ ଦୟା କିନାନ୍ ।” 2ମାରି, ମାପୁରୁଦି ସାକ୍ତିମାନି କିୟୁ ଆଡ୍ଗି ନିଜେ ନିଜେଦିଙ୍ଗ୍ ତେବାକିଦୁ; ଏଣ୍ତେସ୍ ୱାନ୍ ମିଙ୍ଗିଁ ଟିକ୍ ବେଡ଼ାଦୁ ମୁସ୍କୁ ପେର୍ନାନ୍ । ମି ୱିଜୁ ସିନ୍ତାଦି ବଜୁ ମାପୁରୁ ମୁସ୍କୁ ସର୍ପେ କିଦୁ, ଇରିଙ୍ଗ୍ ୱାନ୍ ମି ଜାତୁନ୍ ଅନାନ୍ ।
ତିଆର୍ ଆଜି ଜାଗାର୍ତା ମାନ୍ଡ୍ରୁ, ମି ସାତ୍ରୁ ସୟତାନ୍ ଆଉଲି ଆନି ପାର୍ଟା ନରେସ୍ ୱାଜା ଏଙ୍ଗ୍ ଡ଼ିଙ୍ଗ୍ଦେଙ୍ଗ୍ ପୟ୍ଜି ଅସିନାତ୍ । ମିର୍ ବିସ୍ବାସ୍ତୁ ଡାଟ୍ ତେବାଜି, ତାନିଙ୍ଗ୍ ବିରୁଦ୍ କିଦୁ । ମାରି ଇକା ମିର୍ ନେସ୍ତିମାନିଦେର୍, ଇୟା ଦୁନିଆଦୁ ମାନି ମି ବିସ୍ବାସ୍ତି ତଡ଼ାନ୍କା ଉଣ୍ତିଙ୍ଗ୍ ଇୟାୱାଜା ଦୁଃକ୍ ଗଟେଆଜିନାତ୍ । ୱିଜୁ ଦୟା ସିନି ଆମା ମାପୁରୁ ନିଜେଦି ୱିଜୁଦିନ୍ତି ଗୌରବ୍ତୁ ମିସାନି ଉଣ୍ତିଙ୍ଗ୍ କ୍ରିସ୍ତ ଜିସୁଦି ମାଣୁକୁ ମିଙ୍ଗିଁ କୁକ୍ତାମାନାନ୍ । ୱାନ୍ ନିଜେ ସାଣେକ୍ତି ଦୁଃକ୍ପୟ୍ତି ୱେନ୍କା ମିଙ୍ଗିଁ ପୁରା କିନାନ୍, ତିର୍କିନାନ୍, ସାକ୍ତିକିନାନ୍ ମାରି ଡାଟ୍କିନାନ୍ । ଜୁଗ୍ ଜୁଗ୍ ୱାନିଦି ଆପିତ୍ ! ଆମେନ୍ ।
ସାରାସାରି ମାଟା
ସିଲେଙ୍ଗ୍ ବିସ୍ବାସ୍ତି କ୍ରିସ୍ଟାନ୍ ତଡ଼ାନ୍ ୱାଜା ନାନ୍ ଜିବନ୍ନୋନା, ୱାନି ସାକାଦାନ୍ ନାନୁ ଇୟା ଇସ୍ରି ସିଟି ରାସ୍ତାମାନା । ମାପୁରୁଦି ସତ୍ ଦୟା ବିସୟ୍ତାନ୍ ସାକି ସିଜି ମିଙ୍ଗିଁ ୱେଡ଼ିକା କିନିକା ନା ମାଟା । ଆୟା ଦୟାଦାନ୍ ମିର୍ ଡାଟ୍ ତେବାଦୁ । 4ମାପୁରୁଦି ମାଣୁକୁ ଆସ୍କିଆୟ୍ଆତିମାନି ବାବିଲନ୍ଦି ମଣ୍ତଲି ମାରି ନା ଦାର୍ମୁ ମାରିନ୍ ମାର୍କ ବା ମିଙ୍ଗିଁ ମାଡ଼ିସ୍ କିଜିନାନ୍ । କ୍ରିସ୍ତ ଜିବନ୍ନୋନିକା ନିଜେନିଜେଦିଙ୍ଗ୍ ମାଡ଼ିସ୍କିନିକା ଜାଣେକିଦୁ । କ୍ରିସ୍ତଦିମାନୁ ତେବାତିମାନି ମି ୱିଜେରିଙ୍ଗ୍ ସାନ୍ତି ଆପିତ୍ ।
Source notes (4)
- Cross-reference ଜୋହନ ୨୧:୧୫-୧୭.
- Cross-reference ମାତିଉ ୨୩:୧୨; ଲୁକ ୧୪:୧୧; ୧୮:୧୪.
- Cross-reference ପ୍ରେରିତ ୧୫:୨୨,୪୦.
- Cross-reference ପ୍ରେରିତ ୧୨:୧୨,୨୫; ୧୩:୧୩; ୧୫:୩୭-୩୯; କଲସିୟ ୪:୧୦; ପିଲିମନ ୧:୨୪.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.