ମାପୁରୁଦି ସତ୍ ବାକ୍ୟ
୧ ଜୋହନ 3
ମାପୁରୁଦି କଡ଼ର୍
ସୁଡ଼ୁଦୁ, ବୁବା ମାଙ୍ଗିଁ ଏସା ଜିବନ୍ନୋନାନ୍, ମା ଉଣ୍ତିଙ୍ଗ୍ ୱାନି ଜିବନ୍ନୋନିକା ନିସା ନାଣ୍ତ ଜେ, ମାଡୁ ମାପୁରୁଦି ୱାଜା ଦର୍ଆତି ମାନିକା । ସତ୍ତାନ୍ ମାଡୁ ୱାନି କଡ଼ର୍ ଆୟାଉଣ୍ତିଙ୍ଗ୍ ଜଗତ୍ ମାପୁରୁଙ୍ଗୁଁ ନେସ୍ଇତିମାନିଙ୍ଗ୍, ମାଙ୍ଗିଁ ବା ସିନେ କିଦେଙ୍ଗ୍ ଆଟ୍ଏତ୍ । ଏ ନା ତଡ଼୍କୁ, ଇଲେଇ ମାଡୁ ମାପୁରୁଦି କଡ଼ର୍, ମାତର୍ ୱାଜିନିକାଡ଼ାଦୁ ମାଡୁ ଇନିକା ଆନିକା, ଆକା ଇୟାସାନ୍ଧି ୱେଙ୍ଗେଏତ୍ । ନିସନେ ମାତ୍ର ମାଡୁ ନେସ୍ନିକା ଜେ, କ୍ରିସ୍ତ ଏସ୍ତିୱାଲେ ତରାୟ୍ଆନାନ୍, ନାସ୍ତିୱାଲେ ମାଡୁ ୱାନି ୱାଜା ଆନାଟ୍, ଇରିଙ୍ଗ୍ ୱାନ୍ ଏଣ୍ତେସ୍, ମାଡୁ ଆୟାୱାଜା ୱାନିଙ୍ଗ୍ ସୁଡ଼ୁନାଟ୍ । ମାରି ଆମାକାର୍ କ୍ରିସ୍ତଦିମାନୁ ଇୟା ଆସା ତିଆର୍ କିତାମାନାର୍, ୱାର୍ କ୍ରିସ୍ତଦି ୱାଜା ନିଜେଦିଙ୍ଗ୍ ପବିତ୍ର କିଜି ଇଡ୍ନାର୍ ।
ଏନ୍ଆପିନ୍ ପାପ୍ କିନାନ୍, ୱାନ୍ ମାପୁରୁଦି ନିୟମ୍ ମାନାଏନ୍, ଇରିଙ୍ଗ୍ ପାପ୍ତି ଅରତ୍ ଆଜିନାତ୍ ମାଟାଦିଙ୍ଗ୍ ମାନାଇକା । 2ମାରି ମିର୍ ନେସ୍ନିଦେର୍ ଜେ, କ୍ରିସ୍ତ ପାପ୍ ଅତେଙ୍ଗ୍ ଇଜି ୱାତା ମାର୍ର୍ହାନ୍, ମାରି ୱାନିମାନୁ ପାପ୍ ସିଲେତ୍ । ଏନ୍ କ୍ରିସ୍ତଦି ୱାଲେ ମିସାଜି ତେବାନାନ୍, ୱାନ୍ ପାପ୍ କିଏନ୍; ମାତର୍ ଏନ୍ ପାପ୍ କିନାନ୍, ୱାନ୍ କ୍ରିସ୍ତଙ୍ଗ୍ ଏସ୍କାଙ୍ଗ୍ବା ସୁଡ଼ୁଏନ୍, ଏସ୍କାଙ୍ଗ୍ ୱାନିଙ୍ଗ୍ ନେସ୍ଏନ୍ ।
ଏ କଡ଼ର୍, ଏନ୍ ମିଙ୍ଗିଁ ବାୟା କିମାକିନ୍; ଏନ୍ ସତ୍ପାଣି କିନାନ୍, କ୍ରିସ୍ତ ଏଣ୍ତେସ୍ ଦାର୍ମୁଦିକାନ୍, ୱାନ୍ ଆୟାୱାଜା ଦାର୍ମୁଦିକାନ୍ । ଏନ୍ ପାପ୍ କିନାନ୍, ୱାନ୍ ସୟତାନ୍ତି ମାଣୁକୁ ଜନମ୍, ଇରିଙ୍ଗ୍ ସୟ୍ତାନ୍ ଜଗତ୍ ତିଆର୍ଆତି ଆଗ୍ଡ଼ିରାନ୍ନେ ପାପ୍ କିଜିୱାଜିନାତ୍ । ଆୟା ସୟ୍ତାନ୍ତି ପାଣିଦିଙ୍ଗ୍ ଦ୍ୱଂସ କିନି ଉଣ୍ତିଙ୍ଗ୍ ମାପୁରୁଦି ମାରିନ୍ ୱାତାନ୍ ।
ଏନ୍ ମାପୁରୁଦିମାଣୁକୁ ଜନମ୍, ୱାନ୍ ପାପ୍ କିଏନ୍, ଇରିଙ୍ଗ୍ ମାପୁରୁଦି ୱିତୁ ୱାନିମାନୁ ମାନାତ୍, ମାରି ମାପୁରୁ ୱାନି ବୁବା, ୱାନ୍ ପାପ୍ କିଦେଙ୍ଗ୍ ଆଟ୍ଏନ୍ । ଇବେନୁ ଏନ୍ ମାପୁରୁଦି ମାରିନ୍ ମାରି ଏନ୍ ସୟତାନ୍ଦି ମାରିନ୍, ଇକା ତରାୟ୍ଆନାତ୍ : ଏନ୍ ସତ୍ପାଣି କିଏନ୍, ମାରି ନିଜେଦି ତଡ଼ାନ୍ତିଙ୍ଗ୍ ଜିବନ୍ନୋଏନ୍, ୱାନ୍ ମାପୁରୁଦି ମାରିନ୍ ଆଏନ୍ ।
ଅରେନ୍ ଆଇୱାନିଙ୍ଗ୍ ଜିବନ୍ନୋଦୁ
ଅରେନ୍ ଆଇୱାନିଙ୍ଗ୍ ଜିବନ୍ନୋନିକା ମାନାତ୍, ଇୟା ମାଟା ମିର୍ ପୁର୍ବେଦାନ୍ ୱେର୍ଇମାନିଦେର୍ । ପାପ୍ଆତ୍ମାଦି ମାରିନ୍ ଜେ କୟିନ, ୱାନି ୱାଜା ଆମାଟ୍, ୱାନ୍ ନିଜେଦି ତଡ଼ାନ୍ତିଙ୍ଗ୍ ସାୟାମାର୍ଗାଡାକ୍ତାନ୍ । ୱାନି ତଡ଼ାନ୍ତିଙ୍ଗ୍ ୱାନ୍ ଏନ୍ଧା ସାୟାମାର୍ଗାଡାକ୍ତାନ୍ ? ୱାନି ନିଜେଦି ପାଣି ପାପ୍ତୁ ମାର୍ହାତ୍; ମାତର୍ ୱାନି ତଡ଼ାନ୍ ୱିଜୁଦିନ୍ ସତ୍ପାଣି କିଜିମାର୍ହାନ୍ ।
ମାରି, ଏ ତଡ଼ାନ୍କୁ ନି ତାଙ୍ଗିକ୍, ଇୟା ଜଗତ୍ତି ଲୋକୁ ମିଙ୍ଗିଁ ଜେ କାଡ଼ାନାର୍, ଇବେନୁ କାବା ଆମାଟ୍ । 4ମାପୁ ନେସ୍ନାପ୍ ଜେ, ଇଲେଇ ମାପୁ ସାନିତାନିଙ୍ଗ୍ ଜିଣାଜି ଜିବନ୍ ପୟ୍ତା ମାନାପ୍, ଇରିଙ୍ଗ୍ ମାପୁ ତଡ଼ାନ୍କାଙ୍ଗ୍ ଜିବନ୍ନୋଜିନାପ୍ । ଏନ୍ ଜିବନ୍ନୋଏନ୍, ୱାନ୍ ସାନି ଅଦିକାର୍ତାନ୍ ତେବାନାନ୍ । ଏନ୍ ନିଜେଦି ତଡ଼ାନ୍ତିଙ୍ଗ୍ କାଡ଼ାନାନ୍, ୱାନ୍ ଅରେନ୍ ନରକ୍ଦିକାନ୍; ମାରି ନରକଦୁ ଏସ୍କାଙ୍ଗ୍ୱିଜ୍ଇ ଜିବନ୍ ସିଲେତ୍, ଇକା ମିରୁ ନେସ୍ନିଦେର୍ । ଜିସୁ କ୍ରିସ୍ତ ମା ଉଣ୍ତିଙ୍ଗ୍ ନିଜେଦି ଜିବନ୍ ସିତି ମାଣୁକୁ ମାଡୁ ଜିବନ୍ନୋନି ସିକ୍ୟା ପୟ୍ତାମାନାପ୍; ମାରି ତଡ଼ାନ୍କା ଉଣ୍ତିଙ୍ଗ୍ ମା ଜିବନ୍ ବା ସିନିକା ମାନାତ୍ । ଜଦି ଅରେନ୍ ଜଗତ୍ଦୁ ମାଜନ୍ ଲୋକୁ ତଡ଼ାନ୍ତି କାକୁର୍ତି ସୁଡ଼ୁଜି ବା ୱାନି ଉଣ୍ତିଙ୍ଗ୍ ଦୟା କିଏନ୍, ୱାନିମାନୁ ମାପୁରୁଦି ଜିବନ୍ନୋନିକା ମାନାତ୍ ଇଜି ଏଣ୍ତେସ୍ ୱେର୍ତେଙ୍ଗ୍ ଆଟ୍ନାନ୍ ? ଏ କଡ଼ର୍, ରାଦୁ, ମାଡୁ ବାକ୍ୟଦାନ୍ ନୋ ୱେତଲ୍ତାନ୍ ଜିବନ୍ନୋଏଣ୍ଗା, ପାଣିଦାନ୍ ମାରି ସତ୍ତାନ୍ ଜିବନ୍ନୋନିକା ।
ଆର୍ତିଙ୍ଗ୍ ମାଡୁ ନେସ୍ତେଙ୍ଗ୍ ଆଟ୍ନିକା ଜେ, ସତ୍ତାନ୍ ମା ତେବାନିକା ମାରି ମାଡୁ ତିଲାଇ ମୋନ୍ତାନ୍ ମାପୁରୁଦି ଲାକ୍ତୁ ତେବାଦେଙ୍ଗ୍ ଆଟ୍ନିକା । ଜଦି ଆମାଇନି ବିସୟ୍ତାନ୍ ମା ବୁଦି ମାଙ୍ଗିଁ ଦୋସ୍ କିନାତ୍, ମାଡୁ ମନେ ଇଡିନିକା ମାନାତ୍, ଇରିଙ୍ଗ୍ ମାପୁରୁ ମା ବୁଦିଦାନ୍ ପେରିକାନ୍ ମାରି ୱାନ୍ ୱିଜୁ ମାଟା ନେସ୍ନାନ୍ । ନା ତଡ଼୍କୁ, ମା ବୁଦି ଜଦି ମାଙ୍ଗିଁ ଦୋସ୍ କିଏତ୍, ଆର୍ତିଙ୍ଗ୍ ମାପୁରୁଦି ଲାକ୍ତୁ ମା ସାହାସ୍ ମାନାତ୍ । ମାରି ୱାନିଙ୍ଗ୍ ମାଡୁ ଇନି ଇନିକା ଲସ୍ନିକା, ଆୟାୱିଜୁ ୱାନିମାଣୁକୁ ପୟ୍ନିକା, ଇରିଙ୍ଗ୍ ମାଡୁ ୱାନି ମାଟା ମାନାନିକା, ମାରି ୱାନି କାଣ୍କାଙ୍ଗ୍ ଆମାକା ନେଗିକା, ଆକା କିଜିନାପ୍ । 5ୱାନି ମାଟା ଇକା ଜେ, ମାଡୁ ୱାନି ମାରିନ୍ ଜିସୁ କ୍ରିସ୍ତଦି ଦର୍ତାନ୍ ବିସ୍ବାସ୍ କିନିକା ମାରି କ୍ରିସ୍ତଦି ଆଦେସ୍ ଇସାବ୍ତାନ୍ ନିଜେନିଜେଦିଙ୍ଗ୍ ଜିବନ୍ନୋଜିସାନିକା । ଏନ୍ ମାପୁରୁଦି ମାଟା ମାନାନାନ୍, ୱାନ୍ ମାପୁରୁଦି ମାଟା ଏତ୍ କିନାନ୍ : ମାପୁରୁ ୱାନିମାନୁ ତେବାନାନ୍ ମାରି ୱାନ୍ ମାପୁରୁଦିମାନୁ ତେବାନାନ୍, ମାରି ମାପୁରୁ ମାମାନୁ ତେବାନାନ୍, ଇୟା ମାଟା ମାଙ୍ଗିଁ ସିତିମାନି ୱାନି ଆତ୍ମାଦି ସାହାଜ୍ୟଦାନ୍ ମାଡୁ ନେସ୍ତେଙ୍ଗ୍ ଆଟ୍ସିନିକା ।
Source notes (5)
- Cross-reference ଜୋହନ ୧:୧୨.
- Cross-reference ଜୋହନ ୧:୨୯.
- Cross-reference ଜୋହନ ୧୩:୩୪.
- Cross-reference ଜୋହନ ୫:୨୪.
- Cross-reference ଜୋହନ ୧୩:୩୪; ୧୫:୧୨,୧୭.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.