ମାପୁରୁଦି ସତ୍ ବାକ୍ୟ
୧ କରିନ୍ତିୟ 8
ଦିୟାମ୍କାଙ୍ଗ୍ ବଗ୍ ସିନି ବିସୟ୍ତି ପ୍ରସ୍ନ
ଦିୟାମ୍କାଙ୍ଗ୍ ସିନି ବଗ୍ ବିସୟ୍ତାନ୍ ନା ମାଟା ଇକା, ମା ୱିଜେରିଙ୍ଗ୍ ବୁଦି ମାନାତ୍ ଇଜି ମିର୍ ଆମାକା ୱେର୍ସିନିଦେର୍, ଆକା ମାପ୍ ନେସ୍ନାପ୍ । ବୁଦି ଲୋକ୍ତିଙ୍ଗ୍ ଆକାର୍ କିନାତ୍, ମାତର୍ ଜିବନ୍ନୋନିମାଣୁକୁ ଲୋକ୍ତିଙ୍ଗ୍ ମିସାକିନାତ୍ । ଜଦି ଏନ୍ ଇନିକା ନେସ୍ତାମାନା ଇଜି ଏତ୍ କିନାନ୍, ଆର୍ତିଙ୍ଗ୍ ୱାନିନ୍ଦି ଏଣ୍ତେସ୍ ନେସ୍ନିକା ମାନାତ୍, ୱାନ୍ ଇୟାସାନ୍ଧି ଆୟାୱାଜା ନେସ୍ଏନ୍ । ଜଦି ଏନ୍ ମାପୁରୁଙ୍ଗୁଁ ଜିବନ୍ନୋନାନ୍, ୱାନିଙ୍ଗ୍ ମାପୁରୁ ନେସ୍ନାନ୍ ।
ଆଦେଙ୍ଗ୍ ବମେଆଙ୍ଗ୍ ସିନି ବଗ୍ ଉଣି ବିସୟ୍ତାନ୍ ମାପ୍ ନେସ୍ନାପ୍ ଜେ, ଦୁନିଆଦୁ ଦିୟାମ୍ ଇଜି ଇନିକା ସିଲେତ୍, ମାରି ଅରେନ୍ ମାପୁରୁଙ୍ଗୁଁ ଡ଼ିସ୍ତିଙ୍ଗ୍ ଏନ୍ ସିଲେନ୍ । ଇରିଙ୍ଗ୍ ମୁସ୍କୁପୁର୍ତୁ ଆପିତ୍ ମାରି ଦୁନିଆଦୁ ଆପିତ୍, ଆମାୱାନିକାଙ୍ଗ୍ ଦିୟାମ୍ ଇଜି ଇନାର୍, ଜଦି ୱାକ୍ ତେବାଦେଙ୍ଗ୍ ଆଟ୍ନେମାନେ, ଇୟାୱାଜା ଗାଦି “ଦିୟାମ୍କୁ” ମାରି ଗାଦି “ପ୍ରବୁରୁ” ତେବାନାର୍ । ମାତର୍ ମା ଅରେନ୍ମାତର୍ ମାପୁରୁ, ଆମା ବୁବାଦିମାଣୁକୁ ୱିଜୁ ବିସୟ୍ ତିଆର୍ ଆତାମାନାତ୍, ମାରି ମାଡୁ ୱାନି ଉଣ୍ତିଙ୍ଗ୍ ଜିତିମାନିକା, ମାରି ଅରେନ୍ମାତର୍ ପ୍ରବୁ, ଜିସୁ କ୍ରିସ୍ତ, ୱାନି ମାଣ୍କୁ ୱିଜୁ ବିସୟ୍ ତିଆର୍ ଆତାମାନାତ୍ ମାରି ୱାନିମାଣୁକୁ ମାଡୁ ଜିତିମାନିକା ।
ମାତର୍ ୱିଜେରେ ଇୟା ସତ୍ ନେସ୍ଏର୍; ଏସ ଲୋକ୍ ଇୟାସାନ୍ଦିବା ଦିୟାମ୍ ମାନାତ୍ ଇଜି ଅଡ଼୍ବିଜି ଦିୟାମ୍କାଙ୍ଗ୍ ସିନି ବଗ୍ ତିନାର୍, ମାରି ୱାରି ବୁଦି ଦୁର୍ବଲ୍, ଆଦେଙ୍ଗ୍ ଆୟା କାଦି ଉଣି ମାଣ୍କୁ ୱାର୍ କାରାପ୍ ଆନାର୍ । ମାତର୍ କାଦିଦାନ୍ ମାପୁରୁଦି ୱାଲେ ମା ଜାଣାସିନା ଇନିକା ବାଦେଲେ ଆଏତ୍; ଉଣୁଇତିଙ୍ଗ୍ ମାଙ୍ଗିଁ ଇନିକା ଆଏତ୍, ମାରି ଉଟିଆଙ୍ଗାଁ ମାଙ୍ଗିଁ ଇନିକା ପୁଟ୍ଏତ୍ ।
ମାତର୍ ଜାଗାର୍ତା, ଏସ୍ତିୱାଲେ ମି ଇୟା ଅଦିକାର୍ ଏଣ୍ତେସ୍ ଦୁର୍ବଳ୍ଦିକାର୍ ତାକାନି କାରଣ୍ ଆଏତ୍ । ଇରିଙ୍ଗ୍ ବୁଦି ଜେ ମିର୍, ମିଙ୍ଗିଁ ଜଦି ଏନ୍ ମନ୍ଦିର୍ତୁ ଉଣିମାନୁ ବାସ୍ନିକା ସୁଣାନ୍, ଆର୍ତିଙ୍ଗ୍ ୱାନ୍ ମୋନ୍ତୁ ଦୁର୍ବଲ୍ ବିସ୍ବାସି ଆତିମାରିଙ୍ଗ୍ବା ଇନିକା ବଗ୍ ତିନ୍ଡ୍ରେଙ୍ଗ୍ ୱେଡ଼ିକା ଆଏନ୍ ? ଆର୍ତିଙ୍ଗ୍ ଆମା ଦୁର୍ବଲ୍ ବିସ୍ବାସ୍ତି ତଡ଼ାନ୍ ଉଣ୍ତିଙ୍ଗ୍ କ୍ରିସ୍ତ ସାତା ମାର୍ର୍ହାନ୍, ୱାନ୍ ମି “ବୁଦିଦାନ୍” ନାସ୍ଟୁ ଆଜିନାତ୍ । ଇୟାପ୍ରକାର୍ତାନ୍ ତଡ଼ାନ୍କା ବିରୁଦ୍ତାନ୍ ପାପ୍ କିଜି ମାରି ୱାରି ସାସ୍ସିଲି ବୁଦିଦିଙ୍ଗ୍ ଡାକ୍ସି ମିର୍ କ୍ରିସ୍ତଦି ବିରୁଦ୍ତାନ୍ ପାପ୍ କିଜିନିଦେର୍ । ମାରି ଜଦି ଆମା କାଦି ନା ତଡ଼ାନ୍ତି ୱେର୍ଏ ଆଜି ୱାନିଙ୍ଗ୍ ପାପ୍ ସାରିଦାନ୍ ତର୍ସି ଅନାତ୍, ଇୟାଉଣ୍ତିଙ୍ଗ୍ ନାନ୍ ଏସ୍କାଙ୍ଗ୍ବା କାଣ୍ତା ତିନ୍ଏ ।
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.