ମାପୁରୁଦି ସତ୍ ବାକ୍ୟ
୧ କରିନ୍ତିୟ 16
ମାପୁରୁଦି ଲୋକାଙ୍ଗ୍ ଡାବୁଙ୍ଗ୍ ସାହାଜ୍ୟଦି ଉଣ୍ତିଙ୍ଗ୍ ବାତିଙ୍ଗ୍ମାଲ୍ନିକା
ଜିହୁଦାଦୁ ମାନି ମଣ୍ତଲିଦି ବିସ୍ବାସ୍ସିରି ଉଣ୍ତିଙ୍ଗ୍ ଡାବୁଙ୍ଗ୍ ସାହାଜ୍ୟ ସିନି ବିସୟ୍ତାନ୍ ନା ମାଟା : ନାନ୍ ଗାଲାତିଆଦି ରାଜିଦି ମଣ୍ତଲିଆଙ୍ଗାଁ ଆମାକା କିଦେଙ୍ଗ୍ ଆଦେସ୍ ସିତାମାନା, ଆକା ନେଗେନ୍ତାନ୍ ମାନାଦୁ । ମି ସୁବିଦା ଇସାବ୍ତାନ୍ ୱିଜୁ ଆଦିୱାର୍ଙ୍ଗୁଁ ଇୟା ପାଣିଦିଙ୍ଗ୍ ଏସ ଡାବୁଙ୍ଗୁଁ ଉଣ୍ତା କିଜ ୱେର୍ଏ ଇଡ୍ଦୁ । ଆର୍ତିଙ୍ଗ୍, ନାନ୍ ୱାତିଙ୍ଗ୍ ଏଣ୍ତେସ୍ ମିଙ୍ଗିଁ ମାରି ଡାବୁଙ୍ଗୁଁ ଲସ୍ତେଙ୍ଗ୍ ପଡ଼ାଏତ୍ । ମାରି, ନାନ୍ ୱାତିଙ୍ଗ୍ ମିର୍ ଆମାୱାରିଙ୍ଗ୍ ନେଗିକାର୍ ଇଜି ଅଡ଼୍ବିଜିନିଦେର୍, ନାନ୍ ୱାରିଙ୍ଗ୍ ଆକୁ ସିଜି ଜିରୁସାଲମତୁ ମି ଡାବୁଙ୍ଗୁଁ ଆସ୍ସୋସନି ଉଣ୍ତିଙ୍ଗ୍ ପୋକ୍ନା । ମାତର୍ ନାନ୍ ବା ସନ୍ଡ୍ରେଙ୍ଗ୍ ଦରକାର୍ ଆତିଆଙ୍ଗାଁ, ୱାର୍ ନା ୱାଲେ ସନ୍ଡ୍ରେଙ୍ଗ୍ ଆଟ୍ନାର୍ ।
ପାଉଲତି ବୁଲାନି ଜୋଜନା
ନାନୁ ମାସିଦୋନିଆଦୁ ବୁଲାଦେଙ୍ଗ୍ ସଲ୍ସିନା । ବୁଲାନିକା ୱିଜିତିଙ୍ଗ୍ ନାନୁ ମି ଲାକ୍ତୁ ଡ଼େସି ୱାନା । ନା ବଦା ଆତିଆଙ୍ଗାଁ, ମି ୱାଲେ ଏସୋ ଦିନ୍ ତେବାନା, ଆର୍ତିଙ୍ଗ୍ ପିନିକାଡ଼ା କାଟେକିନା । ତାନିୱେନ୍କା ଏମେମାନୁ ସନା ଉଣ୍ତିଙ୍ଗ୍ ବଦାକିନା, ମିର୍ ବା ନାଙ୍ଗିଁ ଆବେନ୍ ସନି ଉଣ୍ତିଙ୍ଗ୍ ସାହାଜ୍ୟ କିଦେଙ୍ଗ୍ ଆଟ୍ନିଦେର୍ । ମାତର୍ ସନି ସାରିଦୁ ମି ୱାଲେ କେବଲ ସାଣେକ୍ତି ଉଣ୍ତିଙ୍ଗ୍ ବେଟ୍ବୁଡ଼ାଦେଙ୍ଗ୍ ନା ବଦା ସିଲେତ୍ । ନାନ୍ ଆସା କିଜିନା, ମାପୁରୁଦି ବଦା ଆତିଙ୍ଗାଁ, ନାନ୍ ମି ୱାଲେ ନାଣ୍ତଦିନ୍ ସାନ୍ଦି ତେବାନା । 3
ମାତର୍ ପେଣ୍ଟିକସ୍ଟ ପଣ୍ତୟ ଦିନ୍ତିନାଣ୍ତିଙ୍ଗ୍ ସାନ୍ଦି ନାନୁ ଇବେନୁ ଏପିସ୍ଦୁ ତେବାନା । ଇବେନୁ ନା ବିରୁଦ୍ତାନ୍ ଗାଦିଲୋକ୍ ମାରିଙ୍ଗ୍ ବା, ନେଗି ପାଣି କିଦେଙ୍ଗ୍ ନା ଉଣ୍ତିଙ୍ଗ୍ ଅସାର୍ ସେର୍ଲା ରେଆତା ମାନାତ୍ । 4
ତିମତି ମି ଲାକ୍ତୁ ୱାତାନ୍, ୱାନିଙ୍ଗ୍ ନେଗେନ୍ତାନ୍ କୁକ୍ତୁ । ମାତର୍ ୱାନ୍ ବା ନା ୱାଜା ପ୍ରବୁଦି ପାଣି କିଜିନାନ୍ । ଏନ୍ ୱାନିଙ୍ଗ୍ କାଡ଼ାମାକିର୍ । ସାନ୍ତିଦାନ୍ ସନ୍ଡ୍ରେ ମିର୍ ୱାନିଙ୍ଗ୍ ପୁରା ସାହାଜ୍ୟ କିନିଦେର୍ । ଆର୍ତିଙ୍ଗ୍, ୱାନ୍ ତଡ଼ାନ୍କା ୱାଲେ ନା ଲାକ୍ତୁ ଡ଼େସି ୱାନାର୍ । ୱାରିଙ୍ଗ୍ କାପ୍କିଜିନାନ୍ ତେବାତାମାନା ।
ତଡ଼ାନ୍ ଆପୋଲୋଦି ବିସୟ୍ତାନ୍ ଇଜିନାନ୍ ଜେ, ଆଇ ତଡ଼ାନ୍କା ୱାଲେ ମି ମାଣ୍କୁ ସନି ଉଣ୍ତିଙ୍ଗ୍ ନାନୁ ୱାନିଙ୍ଗ୍ ବେସିଦେବେଙ୍ଗ୍ ୱେଡ଼ିକା କିତାମାନାନ୍ । ମାତର୍ ଇଲେଇ ସନି ଉଣ୍ତିଙ୍ଗ୍ ୱାନ୍ ଏମେମାଣୁକୁ ବା ରାଜିଆଏତାନ୍ । ୱେନ୍କା ସୁଜୋଗ ପୟ୍ତାନ୍, ୱାନ୍ ସତେନେ ମି ଲାକ୍ତୁ ୱାନାନ୍ ।
ସାରାସାରି ମାଟା
ମିର୍ କାପ୍କିଜ ମାନ୍ଡ୍ରୁ, ବିସ୍ବାସ୍ଦୁ ତିର୍ ତେବାଦୁ, ବପୁ ମାରି ସାକ୍ତିଆଦୁ । ମି ୱିଜୁ ପାଣି ଜିବନ୍ନୋନିମାଣୁକୁ ପୁରା ଆପିତ୍ । 5
ମିର୍ ସ୍ତିପାନ୍ ମାରି ୱାନି ଇଲୁଦି ବିସୟ୍ତାନ୍ ନେସ୍ନିଦେର୍ । ୱାର୍ ଆକାୟାଦି ଆଗ୍ଡ଼ିରି କ୍ରିସ୍ଟାନ୍ ବିସ୍ବାସ୍ସିର୍ । ୱାର୍ ମାପୁରୁଦି ଲୋକାଙ୍ଗ୍ ସେବାଦୁ ନିଜେଦିଙ୍ଗ୍ ସର୍ପେ ଆତାମାନାନ୍, ତଡ଼ାନ୍କୁ ନି ତାଙ୍ଗିଁକି; ନାନ୍ ମିଙ୍ଗିଁ ବାତିଙ୍ଗ୍ମାଲ୍ଜିନା, ମିର୍ ଇୟାୱାରିନ୍ଦି ମାରି ଇୟାୱାରି ୱାଲେ ପାଣି ମାରି ସେବା କିଜିମାନି ଲୋକାରି ୱେନ୍କା ସାନ୍ଡ୍ରୁ ।
ସ୍ତିପାନ୍, ଫର୍ତୁନାତ ମାରି ଆଖାୟିକ ଇବେନୁ ୱାତାନ୍ଆକା ନାନୁ ବେସି ୱେଡ଼ିକା । ମିର୍ ସିଲିୱାଲେ ୱାର୍ ୱାଜି ମି ଜାଗା ପୁରାକିତାମାନାର୍ । ୱାର୍ ମିଙ୍ଗିଁ ମାରି ନାଙ୍ଗିଁ ଆତ୍ମାଦିଙ୍ଗ୍ ୱେଡ଼ିକା କିବିସ୍ତାର୍ । ଇୟାୱାଜାଦି ଲୋକୁ ସନ୍ମାନ ପୟ୍ନାର୍ । 6
ଆସିଆ ଦେସ୍ତି ମଣ୍ତଲିଙ୍ଗ୍ ମିଙ୍ଗିଁ ନମସ୍କାର୍ ଜାଣେକିଜିନାତ୍ । ଆକିଲା ମାରି ପ୍ରିସ୍କିଲା ମାରି ୱାରି ଇନ୍ଡ୍ର ଉପାସନା କିଜିମାନି ମଣ୍ତଲି, ପ୍ରବୁଦି ଦର୍ତାନ୍ ମିଙ୍ଗିଁ ଜିବନ୍ତାନ୍ ନମସ୍କାର୍ ଜାଣେକିଜିନା । ଇବେଣି ତଡ଼ାନ୍କୁ ୱିଜେରେ ମିଙ୍ଗିଁ ନମସ୍କାର୍ ଜାଣେକିଜିନାର୍ ।
ମିର୍ ପବିତ୍ର ଚୁମାଦାନ୍ ନିଜେନିଜେଦିଙ୍ଗ୍ ନମସ୍କାର୍ ଜାଣେକିଦୁ ।
ନାନୁ ପାଉଲ ନିଜେଦି କିୟୁଦାନ୍ ଇୟାୱିଜୁ ରାସ୍ସିନା । ମିର୍ ନା ନମସ୍କାର୍ ମାନାଦୁ ।
ଜଦି ଏନ୍ ପ୍ରବୁଙ୍ଗୁଁ ଜିବନ୍ନୋଏନ୍, ୱାନ୍ ଅବିସାପ୍ ଆପିନ୍ ।
ମାରାନାଥା, ଅର୍ତାତ୍ ମା ପ୍ରବୁ ରାପିନ୍ ।
ପ୍ରବୁ ଜିସୁଦି ଦୟା ମିମାନୁ ସାକା ଆପିତ୍ ।
କ୍ରିସ୍ତ ଜିସୁଦି ୱାଲେ ମିସାତିମାନିଙ୍ଗ୍ ମିର୍ ୱିଜେରେ ନା ଜିବନ୍ତି ଜିବନ୍ନୋନିକା ମାନାଦୁ ।
Source notes (6)
- Cross-reference ରୋମିୟ ୧୫:୨୫,୨୬.
- Cross-reference ପ୍ରେରିତ ୧୯:୨୧.
- Cross-reference ପ୍ରେରିତ ୧୯:୮-୧୦.
- Cross-reference ୧ କରିନ୍ତିୟ ୪:୧୭.
- Cross-reference ୧ କରିନ୍ତିୟ ୧:୧୬.
- Cross-reference ପ୍ରେରିତ ୧୮:୨.
ମାପୁରୁଦି ସତ୍ ବାକ୍ୟ. Copyright © 2020 The Word for the World International and Konda Porja Translation Samithi, Dasamanthpur, Odisha. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.