కొత్త కరార్
రోమీ 8:31
Verse 31 is marked below, with the whole chapter around it. Read from the start
సోయ్త ఆత్మాత్ పానం 6 ఆత్మ కొత్త
అపుడ్ క్రీస్తున్ యేసునత్తి అనెక ఔరుంఙ్ ఎ సిక్సా తోద్ క్రీస్తు యేసున్ పొయ్ పానం సియ్యెక ఆత్మ నియమ్ పాపడ్ తిక్కెక నియమ్ తన అన్ పుస్తిన్. ఎనంఙ్ ఇంతే మేనుత్ సబావమున్ సుమ్ముత్ నియమ్ సాస్త్రముత్ బలహీనం అనెకదున్ వాలడ్ అద్ ఎదున్ ఇదరేంఙ్ సలెతేన్ అదున్ దెయ్యమ్ ఇదర్తీన్. మెనున్ తోద్తే ఆత్మన్ అర్తమ్ కత్ అడుగెకార్ నేడత్తి నియమ్ సాస్త్రం సంమంద్ అనెక నీతి విదిన్ తయార్ కలెంఙ్ ఇసా పాపముంఙ్ సటీ అమ్నే సరీరముత్ పాపముంఙ్ సిక్స సితెంద్. ఎనంఙ్ ఇంతె సా‍రిర్ నె ఇసొబడ్ నియమ్ సాస్త్రం కమ్‍జోర్ అనెకదుంఙ్ వాలడ్ అద్ ఎదున్ కలెంఙ్ సాలెతినొ అదునీ దెయ్యం కత్తిన్. సరీరమున్ ఎరెకడ్ ఆత్మన్ వెంట బరొస ఇడుత్ అడ్గనెర్ నియమ్ సాస్త్ర కలయ్తద్ నీతి విదిన్ ఇదరెంఙ్ ఇసా పాపులుంఙ్ సటీ దెయ్యం తన్నె సొత పోరకున్ పాప్‍న్నే సరిరడ్ పన్కుత్, సరిరముత్ పాపుంఙ్ సిక్స సియ్తెంద్. సరీరాడ్ అనెకర్ సరిరున్ పొయ్ ఆత్మఙ్ కలైతార్ అసా గ్యాన్ ఇడ్‍సార్. సరీర్లంఙ్ మన్ తిక్‍సాద్. ఆత్మ లంఙ్ అనెకా పానం, సమాదాన్. తానుంఙ్ ఇంతె సరీరలంఙ్ అనెకా మన్ దెయ్యముంఙ్ విరోద్ పాని కల్‍సాద్. అద్ దెయ్యమ్నె నియంసాస్త్రముఙ్ కలయేద్, కలయేకా సక్తి అదుంఙ్ తోతెద్నయ్. అదుంఙ్ ఎత్తి సరీర్ సబావ్ దెయ్యముంఙ్ కుసీ కలేర్.
దెయ్యమ్నె ఆత్మ ఇమ్మతి వస్తి కత్తె ఇమంతి ఆత్మనె సబావి అన్సాద్. సరీర్నె సబావ్ ఎరెద్. ఎరంతి ఎన క్రీస్తు ఆత్మ తోసెటా అండె అంద క్రీస్తునంతద్‍ ఎరెంద్. క్రీస్తు నంత్తి అండె పాప్పుంఙ్ఞ బదోల్ ఇమ్మె సరీర్ తిక్తిన్ గని నీతింఙ్ సటీ ఇమ్మె ఆత్మ పానం అన్సాద్. తిక్‍తరంతన యేసు క్రీస్తున్ సులుప్త ఆత్మ ఇమున్ లోపా అండినింత్తె, అమ్నె తికెకదుంఙ్ తయార్ అనెకా ఇమ్మె సరీరులున్‍ నై ఇమ్మతి బత్కేకా తన్నె ఆత్మనాడ్ బత్కిప్సాంద్.
యేసునే వారసుంద్
అదుంఙ్ ఎత్తి దాదకేర్ బయినే, సరీర్ నె ఇసొబడ్ అడ్‍గెకాదుంఙ్ నేండ్ అదుంఙ్ తనయ్ కరజ తోతెమ్. నీర్ సరీర్ అనుసర్ అడుగ్తె తిక్కెంఙ్ తయార్ అండాతీర్ గని ఆత్మా సరీరమూత్ కార్యలున్ అలుంఙ్ తే నీర్ బత్కుసాతీర్. దెయ్యమ్నె ఆత్మా ఎంతెమాందిన్ అడిగిప్సారొ, ఔర్ సిమ్కన దెయ్యమ్నె పోరకేర్లంఙ్ అంసాతీర్. తనుంఙ్‍, ఇంతె మల్ల అర్సెంఙ్ పాతన్ ఒర్కి పడుత్ నీర్ సుమ్ తాద్ బానిసాలెత్న ఆత్మ ఏరెద్, దత్తక్ సుం తా పోరక్. ఆ ఆత్మాన్ వలాడి నేండ్, “అబ్బా! బబా!” ఇసా దెయ్యమున్ కూగ్సతుమ్. నేండ్ దెయ్యమ్నె పోరకేర్ ఇసా ఆత్మ నేండె ఆత్మనాడ్ సక్సి సియ్సాద్. నేండ్ సిన్నా ఎద్దె వరసు లాఙ్. అండె దెయ్యమ్నె వరసు. అనాయ్ క్రీస్తు నత్తి గిన మహిమా రొబాడెంఙ్ అమ్నాడ్ కస్టా సిమ్కన సోసిప్తె, క్రీస్తు నత్తి వరసులం.
వారెకా మహిమా
నేండుంఙ్ సెరెంఙ్ కలెకా మహిమాన్ పఙ్ఙితా కస్టా పొల్సెక ఏరె ఇసా అన్ ఇసానండాత్. దెయ్యమ్నె పోరకేర్ సెద్దెరింతె సమయముంఙ్ సటీ దున్య తార్ గూల్ అసానడ్ కైసనండాద్. తానుంఙ్ ఇంతె తన్నె మన్ గు‍రించి ఎర్సెట అదున్ వెంటా అండాద్ కరబ్ కలెకదున్ గురైనా దున్య, కరాబ్ కలెంఙ్ ఎద్దతి బానిసాలెత్న తన కుర్యుత్, దెయ్యమ్నె పోరకేర్ సుమ్ముత్ మహిమత సోయ్త రొబాడ్ గల్సాత్ ఇసా నిరిక్సనాడ్ అండాద్. పఙ్ఙి దూక్ దున్య సిమ్కన ఒక్కొద్ ఎత్న ములుఙ్సా ప్రసవ వేదన పడ్సనండాద్ అదున్ నేడుంఙ్ ఒర్కి. అంతేయ్ తోద్, ఆత్మ పేలె పలమూన్ రొంబటార్ నేండ్ గిన దత్తక్ సుం తా పోరక్ సటీ, ఇంతె నేండ్ సరీర్ సాయెకదుంఙ్ సటీ ఒర్కిసియ్స లోప లోపాలి ములుంఙ్ఞ స నండాతుమ్. తానుంఙ్ ఇంతె నేండ్ ఈ ఆసనాడ్ రక్సన సుం తామ్. నేండ్ కట్సాననెకాద్ కన్కెద్దాపుడ్ ఇంకా బరోసనాడ్ పని తొతేద్. తన్నె ముండట్ కన్కెద్దదూన్ అదుంఙ్ సటీ ఏంద్ కల్సా నండాద్? నేండ్ ఓల్సెటదుంఙ్ సటీ బరోసనాడ్ ఓల్తమింతె, అదుఙ్ సట్టి సైనాడ్ పావొల్సాతుమ్.
అనాయ్ పరిసుద్దత్మ గిన నెండె కాంజొరున్ మాదత్ కల్సంద్. తానుంఙ్ ఇంతె నేండ్ బరబార్ ఎనంఙ్ పార్తన కలెకదో ఒర్కితోద్. గని, గొట్టిక్లాడ్ ముడెంఙ్ ఇసా వేల తోసెట మూల్గ్సా పరిసుద్దత్మన్ నేండ్ పకంఙ్ కూగ్సనండాంద్. అముదు దెయ్యమ్నె సంకల్పన ప్రకారం పవిత్రులే పక్సంవై కూగ్సనంసాత్. తానుంఙ్ ఇంతె మన్నులున్ సోయ్ ఓలుత్ అమ్నుంఙ్ ఆత్మ అలొసనా తనెదో ఒర్కి.
దెయ్యమున్ ప్రేమ్ కత్ తార్, అముదు తన్నె ఇసొబాడ్ కుగూత్ ఔరున్, సోయ్ ఎన్ననంఙ్ దెయ్యం సిమ్కనన్ కలపూత్ ఎర్గల్సాంద్ ఇసా నేండుంఙ్ ఒర్కి. తానుంఙ్ ఇంతె తన్నె పోరక్ ఎంతెయొ మంది దాదకేర్ పేలెతంద్ అనెంఙ్ ఇస. దెయ్యం పేలెని ఒర్కిల్ తా ఔరుంఙ్, తన్నె పోరకున్ పొలీన రూపం సుమ్మెంఙ్ పేలెని నిర్నాయ్ కతెంద్. ఎరున్ పేలెని నిర్నయం కత్తెందో ఔరున్ కూగ్తెంద్, ఎరున్ కూగ్తెందో ఔరుంఙ్ నీతిమంతులఙ్ అసతెంద్. అంతేయ్ తోద్, ఎరున్ నితిమంతులఙ్ ఇట్టెంద్ ఔరుంఙ్ మహిమ సియ్తెంద్.
యేసు క్రీస్తునె దేయ్యంనె ప్రేమ
ఇదవున్ వాలడ్ నేండ్ తనెవిసతుంమ్? దెయ్యం నేండ్ పకంఙ్ అనె నేండుంఙ్ విరోద్ ఎంద్ ఎద్దద్? తన్నె సొ తా పోరకూన్ నేండుంఙ్ పుకమెయ్ సియెంఙ్ సటీ వెన్కంఙ్ వరెతెంద్ నేండుంఙ్ సదరుంఙ్ సటీ అమ్నున్ సియ్యుత్ దెయ్య అమ్నాడ్ సదరున్ నేండుంఙ్ సియ్సెటా అందదా? దెయ్యం నివ్డిప్తర్ పొయ్ తప్పు ఇదరెకాంద్ అముదు ఏంద్? నిర్దొసిలంఙ్ ఇదరెకాంద్ దెయ్యమి. ఏర్ సిక్సా సియ్సార్? క్రీస్తు ఇసా? తిక్తాంద్, మరి అంతె ఎరెకడి తిక్తతన సుల్తంద్, దెయ్యమ్నె ఉన్నపకంఙ్ ఉదుత్ అనెకద్, నేండుంఙ్ సటీ ప్రర్దనా ఇదరెకాంద్ గిన అమ్‍ది. క్రీస్తు ప్రేమ్ తాన నేండున్‍ ఎరి దౌ కాలెంఙ్ సలేర్? కస్టము, వాలడ్, హింసలు, కరువ్, వస్త్రంహీనత, ఉపద్రవం, తికెకద్, ఇదా నేండున్‍ వెగ్రె ఇదర్సావా.
కీర్తన 44: 22 ఇదూన్ వాలడ్ తనేద్ వయూత్‍ అండాద్ ఇంతె,
“ఇనుంఙ్ సటీ ఆమ్ రోజి తిక్కెకా తక్లిబ్.
లుంఙ్ సటీ తయార్ఇదర్త గొర్రెలంఙ్ అమున్ ఆస్తేర్.”
ఇంతే ఇదసిమ్మనాత్ నేడున్ ప్రేమ్ ఇదర్తనున్ వాలడ్ నేండ్ పూర విజేయం రొంబాడద్. అన్ కరే నమ్మెకద్ ఇంతె తనేద్, తిక్కెకాద్, ఎన పానం కాద్ ఎన, దూత్ ఎన, సార్కర్ ఎన, పఙ్ఙి అనెకా ఎన, వరెకా ఎన, సక్తిక్ ఎన, పొదె ఎక్కద్, బూడున్ ఎక్కద్, స్రుస్టిత్ అనెకాద్ పెన తనెద్ ఎన ఎక్కాద్ గని, నేండె ప్రబు క్రీస్తు యేసు నత్తి దెయ్యమ్నె ప్రేమ్ తన నేండుంఙ్ అలది ఇదరెంఙ్ సలే.
కొత్త కరార్. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.