కొత్త కరార్
1 కొరింతి 1
కొరింతికుఙ్ వాయ్త పేలె పత్రిక
దెయ్యం తన్నె విచారున్ వాలడ్ యేసు క్రీస్తున్ అపొస్తులున్ లంఙ్ అనెంఙ్ ఇసా కూగ్ తా పౌలు, దాదకేర్ సొస్తెనేసు, కొరింతిలె అనెకాద్ సంగమున్, ఇంతె క్రీస్తు యేసుక్ పవిత్రనడ్ అనెంఙ్ ఇసా కూగెంఙ్ ఇసా, అమే ప్రబు యేసు క్రీస్తుద్ పేరుఙ్ అర్రొకొద్ జాగత్ పార్తన కలెకరుంఙ్ సోయ్ ఎరదిసా లయిపుడ్ అన్సాద్. నేండె బాంద్ ఎద్ద దెయ్యం తన ప్రబుంద్ ఎద్ద యేసు క్రీస్తునె కృప, సాంతి రొంబడెంఙ్ ఇసా.
క్రీస్తునె ఆసిర్వద్
క్రీస్తు యేసుంద్ ఇముంఙ్ రొంబటాద్ దెయ్యమ్నె కృప ఓలిప్సాత్, ఇమ్మె బదోల్ అన్నె దెయ్యముంఙ్ ఎప్పుడి దన్యావద్ సియ్‍సాత్. అదుఙి ప్రబుంద్ ఎమ్‍దు యేసునున్ నీర్ కైసతీర్ గని అముదు సియ్ తాద్ అసిర్వాదున్ ఎదుని గెల్పెతమ్. నీర్ క్రీస్తున్ బదోల్ కరె ఇమున్ లోప ఇల్తిన్ అదుంఙ్ ఇసా అమ్నుఙ్ అరొకొద్ గొట్టికున్. అదుంఙ్ ఎత్తి కృప వరలత్తి తానయ్ కమ్మి తోతెద్ ఇసా నెండె ప్రబు యేసు క్రీస్తున్ కాడ్కెరెంఙ్ ఇసా ఓల్సతుమ్. అమ్మె ప్రబు యేసు క్రీస్తునె వరెక దినములుంఙ్ కిరోస్, విరొద్ పుసెంఙ్ ఇసా ఇమున్ గొట్టి కల్సద్. నేండె ప్రబు యేసు క్రీస్తుంద్ ఇనెకాంద్ తన్నె పోరకున్ ఇముంఙ్ సటీ మిరయెంఙ్ కూగ్త దెయ్యమున్ నమ్సెటాంద్.
సంగముత్ పూట్ పాట్ ఎరెకాద్
దాదకేర్ అని బాయినెలార! నెండె ప్రబు యేసు క్రీస్తునే పేరడ్ అన్ ఇముఙ్ వింతి కలెకద్ తానేద్ ఇంతే అమ్నాయ్ కలయూత్ ముడుత్న, ఇమ్మెత్ ఇముంఙ్ ఎడాల్సెటా అనేంఙ్ తోద్ ఇసా ఓలుర్. మన్నాడ్ ఒక్కొ విచారడ్ కలయుత్ అండ్రు. దాదకేర్ అని బాటిల్సార్, ఇమ్మతి నీర్ కరె అన్సా ఇసా క్లోయె ఎల్లతరున్ వాలడ్ కరిల్తిన్. ఇమున్ లొపాల్, “అన్ పౌలు ఎందున్” ఒక్కొంద్, అన్ద అపొల్లో ఎన్దున్, మరోక్కోనే, అన్ కేప మరోక్కొనున్, అన్దు క్రీస్తుద్ ఎందున్ అని ఇడ్సరిసా వింతన్. క్రీస్తుద్ కుగ్తద్ ఎద్సనా? పౌలు ఇమున్ ఇసా సిలువత్ అనుబవ్ సుంత్తెద్? పౌలు పేరడ్ నీర్ బాప్తిస్మ సుంతీర్? అన్ క్రీస్పునుంగ్, గాయి అన్నె పేరడ్ నిర్ బాప్తిస్మసుమ్‍తిర్ ఇసా ఎరేనా ఇడ్‍తేతిలంఙ్‍. అదుఙి దెయ్యముంఙ్ దన్యవాద్ ఇడ్సాత్. ఎదుఙ్ ఇసా ఇంతే అనే పేరాడ్ నిర బాప్తిస్మ సుంసాతీర్ ఇసా ఇడుర్ తనయ్ కరాబ్ ఎరేద్. స్తెపన్నే ఎలతరున్ నయ్ బాప్తిస్మ సియ్తన్. ఇవ్రుఙ్ సాయూత్ మరొకోరుఙ్ సియ్తన్ ఇసా అనుంఙ్ ఎర్కతోతేద్. క్రీస్తుంద్ ఇస అముదు బాప్తిస్మ సియెంఙ్ పన్కెతెంద్. అమ్నె సొయ్త కబుర్ ఎర్తం ఎర్సెటా సిలువ గొట్టిక్లాడ్ తోద్‍గ ఏకున్ సొయ్త కబుర్ ఇడ్డెఙి అముదు అన్ పన్కతంద్.
క్రీస్తునె సక్తి అని దెయ్యమ్నె గ్యానం
సిలువనె సందేస్, నాస్ కలెకరున్ సోయ్ అనేద్ అమూన్ దెయ్యమ్నె సక్తి.
అదుంఙ్ సటీయ్ “ఙ్ గ్యనిక్లెఙ్ గ్యనమున్ కరాబ్ కతన్.
సోయ్తరే తెల్విన్ ఎర్తం కతన్” ఇసా వాయుత్ అన్సాద్.
గ్యాని ఎత్తి అన్సాద్? మేదావి ఎత్తి అన్సాద్? సమకలి తర్క వది ఎత్తి అన్సాద్? ఈ దున్యత్ గ్యానం దెయ్యమి వెర్రితనం కత్తంద్ తా! దున్యతర్ సిమ్కనఙ్ గ్యనమడి దెయ్యమున్ నమ్తెర్ అదుంఙ్ ఎత్తి, సొయ్త కబుర్ ఇడ్డెకద్ వెర్రితనం వాలడ్ ఒర్కిలెకరున్ బత్కిపెంఙ్ దెయ్యనే దయనడ్ తయార్ కత్తెర్. యూదులె ఇడ్డెక, సమత్కాల్ ఎరెంఙ్ ఇసా కొర్‍సార్. గ్రీకులాంఙ్ గ్యాన్ పాజె ఇసా కిర్వనెర్. ఇంత్తే అమ్ సిలువన్ బదొల్ సక్సం ఎత్న క్రీస్తున్ ఇడ్సానన్సతుమ్ కల్సనండతుమ్. అముదు యూదులుంఙ్ ఒక్కొ అడ్డమ్, గ్రీకు దేస్తరుంఙ్ బుద్దికరిల్సెటర్లాఙ్ అండాద్.
గని దెయ్యమ్నె కుగేకద్ గదితరుఙ్ ఏరతే ఔర్ యూదులేనా గ్రీకు దేసంతరేనా క్రీస్తు వార్త దెయ్యమ్నె సక్తిఙ్ గ్యనమి ఎద్దిన్; తానుంఙ్ ఇంతే, దెయ్యమ్నె “కరిల్సేటదుఙ్” మన్కకెరున్ ఎన కరిలేకద్. దెయ్యమ్నె “కమ్‍జొర్” మన్కకెరె కమ్‍జోరుంఙ్‍ ఎన జోరతద్. దాదకేర్ అని బాయినెలార, ఇముంఙ్ గదీత ముడేకా గొట్టి ఓల్సనంసాతిర్. లోక పైలిక్ ఎద్ద ఇంమత్తి గ్ గ్యనులు, దండిత్‍, సోబత కాంన్దాతర్ అనెకర్లాంఙ్ తోతెర్. దాదకేర్ అని బాయినెలార బుద్ది లజ్జవర్గలెఙ్ దెయ్యం ఈ దున్యత్ కరిల్సేటదుఙ్ అనెకరుంఙ్ ఆస్తెంద్. అని జోరతవున్ లజ్జావర్గలేం దెయ్యమ్నె లోకముత్ కమ్‍జోర్ అనెకనుఙ్ గెలిప్తెంద్‍. అనెకదున్ సొబనడ్ ఇదరేఙ్ ఈ దున్యత్ పేర్ సోయ్ తొసేటవున్ దెకుల్ దెయ్యం ఆస్తిన్.
తన్నేముదర్వై సొబనడ్ ఇడ్గతివిసా ఇత్తి దెయ్యనే ఉద్దేసం. ఇంతే దెయ్యం కత్తదుంఙ్ వాలడ్ నీర్ నీతివాలడ్ సియ్యెకాంద్ క్రీస్తు యేసున్వై అన్సాతిర్. అముదు దెయ్యమున్ వాలడ్ నేండుఙ్ బుద్ది, నిర్దోసి, మపి అండిన్. అదుఙి లహీపుత్ అండాద్ ఇసా అదుఙి, మదాత్ ఎద్దెంద్ మన్కక్ ప్రబున్ సుమ్మూతి మదత్ వేలెంఙ్.
కొత్త కరార్. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.