Jăng 14

1“Nùs-nhơ̆m oh mi bư̆ng mơrêh-mơrăñ. Oh mi don anẵu Yang Tơm Trồ gừn oh mi kŭng don anẵu ăñ. 2Nơ̆m hîh Bàp ăñ dî khăi ngăn anẵu ăm. Mà dilah ơ̆ tom, gừn nên-nôn ngăn ăñ rơp tơs î oh mi lờt, bơh ăñ swà lơi rcăng ma oh mi du-anẵu. 3Dilah ăñ swà î rcăng ma oh mi du-anẵu, gừn ăñ rơp trôh du dơ̆ te gừn lơ-e oh mi swà jăt î ăñ, lơi ăñ ăm sơgăy gừn oh mi kŭng ăm sơrơ̆. 4Oh mi sŏng gư̆t gung trôh anẵu mà ăñ ndăng swà.” 5Thôma lùp Kơnràñ lah: “Ơ Yang, ƀòn hî ơ̆ gư̆t Kơnràñ swà sơgăy. Mơmơh ƀòn hî digơlăn gư̆t gung dî?” 6Yang Jesu tơs î ông lah: “Ăñ la gung swà, jơno-tơpăt ngăn, î jơno jîng; ơ̆ cro găy trôh dî î Bàp dilah ơ̆ kơnơm bơh ăñ. 7Dilah oh mi gư̆t ăñ lờt, gừn oh mi kŭng rơp gư̆t Bàp ăñ. Bơh dô, oh mi gư̆t Kơnràñ î tơmpơl sŏng Kơnràñ.” 8Philip tơs î Kơnràñ lah: “Ơ Yang, dăn sơđah Bàp ma ƀòn hî, tîgư̆n la tăl ma ƀòn hî lờt.” 9Yang Jesu tơs î ông lah: “Ăñ sŏng ăm î oh mi du jŏ tô̆ jơ tơnge tîgư̆n mà amî hôm dahrăư gư̆t ăñ ya, Philip? Cro găy tơmpơl ăñ lờt la tơmpơl Bàp sŏng. Ngglơh amî tơs lah: ‘Dăn sơđah Bàp ma ƀòn hî’? 10Amơh amî ơ̆ don lah ăñ ăm nơ̆m Bàp, î Bàp ăm nơ̆m ăñ ya? Lơ̆gay jơno mà ăñ tơs î oh mi gừn ơ̆-iyŏ tài bơh sătan ăñ tơs tơlôh, mơya Bàp ăm jîng miek nơ̆m ăñ ndăng lơh bră Kơnràñ dê. 11Don cĕ ăñ, lah ăñ ăm nơ̆m Bàp, î Bàp ăm nơ̆m ăñ; hôm dilah ơ̆h gừn don cĕ tài bơh lơ̆gay bră lơh ăñ jê. 12Iyŏ ngăn, iyŏ ngăn, ăñ tơs î oh mi, cro găy don nơ̆m ăñ, gừn cro rơ̆ kŭng rơp lơh lơ̆gay bră mà ăñ lơh; rơp lơh lơ̆gay bră dơng rlo gư̆n te, bơh ăñ mơñ trê băl î Bàp. 13Lơ̆gay kơp jơno găy mà oh mi e sơnăn ăñ hôi-dăn, ăñ rơp lơh jơno gư̆n măư, lơi Bàp dî jong-rơ kơnơm bơh Kon. 14Dilah oh mi e sơnăn ăñ dăn ăñ jơno găy, ăñ rơp lơh jơno gư̆n. 15Dilah oh mi kơñ-kơloh ăñ, gừn oh mi rơp prăp jư lơ̆gay jơno-bơlăm ăñ jê, 16ăñ kŭng rơp răc-dăn Bàp, gừn Kơnràñ rơp dờp ma oh mi Bơtao mơ̆ndơm-mơ̆nieng nde lơi Bơtao gư̆n ăm î oh mi trôh dî miek miek, 17rơ̆ la Hwîng Tơpăt Ngăn, la Bơtao mà dunya ơ̆ tom dưñ-lăñ dî, tài bơh dunya ơ̆ tơmpơl Kơnràñ, kŭng ơ̆ gư̆t Kơnràñ. Oh mi gừn gư̆t Kơnràñ, bơh Kơnràñ ăm miek î oh mi gư̆m rơp ăm nơ̆m oh mi. 18Ăñ trôh băl î oh mi, rơp ơ̆ lơi căư oh mi gư̆ptî konđơi ơ̆h. 19Hôm dư̆ng-iè tô̆ nge te, dunya ơ̆ tơmpơl ăñ te; mơya oh mi gừn tơmpơl ăñ, bơh ăñ jîng, oh mi kŭng rơp jîng. 20Nơ̆m nge gư̆n, oh mi rơp gư̆t lah ăñ ăm nơ̆m Bàp ăñ, oh mi ăm nơ̆m ăñ, gừn ăñ kŭng ăm nơ̆m oh mi. 21Cro găy dî lơ̆gay jơno-bơlăm ăñ î prăp jư gô, gư̆n la cro kơñ-kơloh ăñ; gừn cro kơñ-kơloh ăñ rơp dî Bàp ăñ kơñ-kơloh; ăñ kŭng rơp kơñ-kơloh cro gư̆n î rang sơđah sătan ăñ ma cro gư̆n.” 22Juđa (ơ̆-iyŏ la Iskariôt) tơs î Kơnràñ lah: “Ơ Yang, bră găy tom tơlôh mà Kơnràñ mơñ rang sơđah bơh sătan Kơnràñ ma ƀòn hî mà ơ̆-iyŏ ma dunya?” 23Yang Jesu kla dẵư gư̆m Kơnràñ tơs î ông lah: “Dilah cro găy kơñ-kơloh ăñ, gừn cro rơ̆ rơp prăp jư jơno ăñ. Bàp ăñ rơp kơñ-kơloh cro gư̆n; gừn Ƀòn Mơ̆n rơp trôh î cro gư̆n, sŏng gư̆n lơh jîng du-anẵu ăm nơ̆m cro gư̆n. 24Cro ơ̆ kơñ-kơloh ăñ gừn ơ̆ prăp jư jơno ăñ. Jơno mà oh mi kơnău ơ̆-iyŏ la jơno ăñ, ma la jơno Bàp, Bơtao pơđơ ăñ.

25Nơ̆m jơ hôm ăm î oh mi, ăñ sŏng tơs î oh mi lơ̆gay jơno dô. 26Mơya, Bơtao mơ̆ndơm-mơ̆nieng — la Yang Hwîng Goh mà Bàp rơp e sơnăn ăñ pơđơ trôh — Bơtao gư̆n rơp bơtău tơngkah oh mi lơ̆gay bră î tơs tơngkah wăl ma oh mi lơ̆gay jơno mà ăñ sŏng tơs î oh mi. 27Ăñ lơi wăl ma oh mi jơno lơngăp-lơnge; Ăñ dờp jơno lơngăp-lơnge ăñ jê ma oh mi, ăñ dờp ma oh mi ơ̆-iyŏ gư̆ptî dunya dờp. Nùs-nhơ̆m oh mi bư̆ng mơrêh-mơrăñ, kŭng bư̆ng kơ̆mbrit-kơ̆mbròt. 28Oh mi bơh lai tom kơnău lah ăñ sŏng tơs î oh mi lah: ‘Ăñ swà sŏng gư̆n ăñ rơp trôh î oh mi.’ Dilah oh mi kơñ-kơloh ăñ, oh mi nên-nôn ngăn dî jơno sơhờp-sờhơn tơm jơ ăñ ndăng trôh băl ma Bàp, bơh Bàp dơng mang rlo ma ăñ. 29Jơ dô, Ăñ sŏng tơs lai bră tom tơlôh ma oh mi, lơi tơm tô̆ bră tom tơlôh gừn oh mi dî nùs don. 30Ăñ rơp ơ̆ tơs khăi jơno te î oh mi, bơh cro ăt-bồ dunya dô ndăng trôh. Gừn gô ơ̆ dî pơnah găy nơ̆m anẵu ăñ, 31mơya lơi dunya gư̆t dî lah ăñ kơñ-kơloh Bàp, î Bàp sŏng tơs bơtău ma ăñ amơh tîgay, gừn ăñ lơh gư̆p tîgư̆n. Ñă cĕ atẵy, ƀòn mơ̆n păl swà tơlôh bơh nơ̆m anẵu dô.”