Ephesô 4:2

1Gư̆n-jîng, ăñ, cro ăm jam bơh Yang, răc-dăn oh mi rôh lŏ păl jîng dubă dî păl î jơno hôi-săc mà oh mi rôh lŏ sŏng dî hôi-săc, 2bơh î lơ̆gay jơno tơng-êt să î jơno niem-lơhơn, băl î nùs ăt-ăl, kŏng-ăt băl î găp nơ̆m jơno kơñ-kơloh, 3grat lơ̆ pran lơi jư jơno dubă băl Yang Hwîng dê nơ̆m jơno tơmklăc-băl jơno tơmrơm. 4Nư̆ng du-lăm să-jăn gư̆m du hôi Yang Hwîng, kŭng gư̆ptî oh mi sŏng dî hôi-săc trôh du jơno cang-kơnơm nơ̆m jơno hôi-săc mơ̆n dê, 5nư̆ng du hôi Yang, du jơno don, du gơnoăr lơh ƀaptem, 6nư̆ng du hôi Yang Tơm Trồ, Bàp jơh lơ̆gay cro dê, Bơtao ăm cŭngsî lơ̆gay cro, bơh tăl să cro gư̆m nơ̆m tăl să cro. 7Mơya, jơno sơmah sŏng dî e ma kơp du hôi cro nơ̆m ƀòn mơ̆n jăt sơnoa nơ̆m jơno e gời Yang Dŏng-Klàs. 8Gư̆n-jîng, tom jơno cêh lah:

“Tơm tô̆ Kơnràñ hao lêh cŭngsî lơ̆gay anẵu yơng,

Kơnràñ swà lai tề-bơlăm băl tơmpôl cro kŏng ăm jam,

î e khăi jơno e gời ma kon-mơnùs.”

9Mơya, “Kơnràñ hao lêh cŭngsî” gơtha la mơmơh dilah ơ̆-iyŏ la Kơnràñ kŭng jư sŏng nơ̆m lơ̆gay anẵu yôh nơ̆m ù ơ̆h? 10Sătan Bơtao jư lờt kŭng la Bơtao sŏng hao lêh cŭngsî yơng rlo lơ̆gay kơp dăp trồ, lơi Kơnràñ digơlăn lơh bîng-jut lơ̆gay jơno. 11Sătan Kơnràñ sŏng ăn du pơnah lơh jîng cro gơnoăr bơtău dơng, du pơnah lơh jîng cro gơnoăr-hwơr, du pơnah lơh jîng cro tơs bơtău Jơno Niem, du pơnah lơh jîng cro gơnoăr bơtău î cro bơtău, 12lơi iyà trôh jơno rcăng lai lơ̆gay cro sang-goh ma gơnoăr duh bră, gôtrê trôh jơno băt-tơngñă să-jăn nơ̆m Yang Dŏng-Klàs, 13trôh dî jơ lơ̆gay ƀòn mơ̆n mơ̆t trôh nơ̆m jơno dubă băl nơ̆m jơno don î jơno wơng gư̆t Kon Yang Tơm Trồ, gôjîng cro tăl dơng, dî sơnoa wêl-tăl Yang Dŏng-Klàs, 14lơi ƀòn mơ̆n ơ̆ hôm iyŏ la cro kơmom, kŏng tơlơ̆ eo ma î kơbồt swà jăt ayua cal jơno bơtê bơh jơno pơlum cro nde kơnơm bơh jơno kai-kơnĕ bơh jơno blăc pơlum, jơno mablăc. 15Ala bơh gư̆n, tơm tô̆ tơs tơlôh jơno tơpăt-ngăn nơ̆m jơno kơñ-kơloh, ƀòn mơ̆n digơlăn tăl teh dơng nơ̆m kơp pơnah gôtrê trôh Kơnràñ, Bơtao la găl, rơ̆ la Yang Dŏng-Klàs, 16bơh nơ̆m anẵu Kơnràñ mà lơ̆gay să-jăn dî dubă băl gư̆m tơmklăc-băl î găp kơnơm bơh kơp jơno tơmkăt tơmdŏng, jăt gư̆ptî pran ayua lơh bră nơ̆m kơp du pơnah, lơh ma să-jăn teh dơng, lơi băt-tơngñă dêh nơ̆m jơno kơñ-kơloh.

17Gư̆n-jîng, ăñ tơs jơno dô gư̆m tơngkah oh mi rôh lŏ nơ̆m Yang ơ̆ tom jîng ăm gư̆ptî lang bol bơdih te, ƀòn gô jîng ăm nơ̆m jơno ơ̆ kwơ jăt tơngoh-kơlôi mơ̆n dê. 18Bơh tơngoh ƀòn gô sŏng kŏng lơh gôjîng kơnăm ñô̆ng, gôjîng tơm wĭc î jơno jîng Yang Tơm Trồ tài bơh jơno wì-lơngôh ăm nơ̆m ƀòn gô, bơh nùs ƀòn gô kră kơdăng. 19Tơm tô̆ gôjîng roh jơno gư̆t wơng, ƀòn gô lơi să-jăn mơ̆n nơ̆m jơno ham-kơñ lơi lơh tìs lơ̆gay jơno sơmơ̆-sơmĭñ bơh nùs ham-kơñ. 20Mơya oh mi rôh lŏ ơ̆ tom bơtê gư̆t Yang Dŏng-Klàs gư̆p tîgư̆n, 21bơh nên-nôn ngăn la oh mi rôh lŏ sŏng kơnău bơh Kơnràñ î dî ƀăn mơntău sŏng nơ̆m Kơnràñ, jăt gư̆ptî jơno tơpăt-ngăn nơ̆m Yang Jesu, 22lah păl hồ lơi căư bơh oh mi rôh lŏ lơ̆gay jơno găy gôtrê ma jơno gung dà bơh lai ƀua, rơ̆ la cro yo kŏng ôm-lề bơh jơno ham-kơñ blăc pơlum, 23mà dî tơmbơgăl jîng mhăy kơnơm bơh hwîng-nùs nơ̆m tơngoh mơ̆n, 24gư̆m dờp cù să cro mhăy, la cro dî mon bơjîng jăt Yang Tơm Trồ — nơ̆m jơno tơpăt-durư̆ng î sang-goh jơno tơpăt dê.

25Gư̆n-jîng, tơm tô̆ sŏng lơi căư jơno mablăc, kơp hê cro păl tơs jơno tơpăt-ngăn î cro tĕdơ mơ̆n, tài bơh ƀòn mơ̆n la să-jăn băl î găp. 26Oh mi rôh lŏ dî khuh tơcao mà ơ̆ tìs-glài. Lơi cĕ măttơnge ơ̆ ñăp cŭngsî jơno tơcao oh mi rôh lŏ, 27kŭng bư̆ng lơi tô̆ lơwah ma cà-ràk. 28Cro kơntô̆ng-kơño bư̆ng kơntô̆ng-kơño te. Mơya, niem rlo, cro gư̆n păl grat pran lơh bră niem î kơ̆mpang tê tơm mơ̆n, lơi ma cro gư̆n dî jơno găy lơi tơmpà ma cro găy ndăng ăm nơ̆m jơno kơsòt-rƀah. 29Bư̆ng lơi jơno tơs sơmơ̆-sơmĭñ găy tơlôh bơh yôi oh mi rôh lŏ, mà tơs cĕ lơ̆gay jơno niem-lơhơn lơi blăc trôh ma jơno băt-tơngñă cro găy nơ̆m jơno kơsòt-rƀah, lơi jơno gư̆n digơlăn iyà jơno sơmah ma cro iet kơnău, 30gừn bư̆ng lơh moat-jrum Yang Hwîng Goh Yang Tơm Trồ dê, kơnơm bơh Kơnràñ mà oh mi rôh lŏ dî tăp ƀăng-kì ma nge dŏng tơwai. 31Lơi căư cĕ bơh oh mi rôh lŏ lơ̆gay jơno sràt-bơtăng, dôh nùs, tơcao nùs, tơmbơkai, tơs bờk, băl î lơ̆gay jơno bờk-mơsăk. 32Ala bơh gư̆n, rang sơđah cĕ ma găp nùs lơbăn-niem, kơñ-kơloh, hồ-toh ma găp kŭng gư̆ptî Yang Tơm Trồ sŏng hồ-toh oh mi rôh lŏ nơ̆m Yang Dŏng-Klàs.