Ephesô 3:20

1Tài bơh bră gư̆n, ăñ, Pol, la cro ăm jam bơh Yang Dŏng-klàs Jesu dê tài bơh oh mi rôh lŏ lang bol bơdih — 2bơh gô la oh mi rôh lŏ sŏng kơnău bơh gơnoăr bră ăt-bồ jơno sơmah-sơmai Yang Tơm Trồ dê, la jơno sŏng dî jao ma ăñ bơh oh mi rôh lŏ, 3jăt jơno sơđah tơmpơl sŏng dî sơđah ma ăñ, rơ̆ la jơno ndăp-ndơ gư̆ptî ăñ sŏng cêh dubă dư̆ng-iè jơno cŭngsî gư̆n. 4Tơm tô̆ đŏk trôh jơno rơ̆, oh mi rôh lŏ rơp digơlăn gư̆t loh-lang jơno gư̆t wă ăñ jê bơh jơno ndăp-ndơ Yang Dŏng-Klàs dê, 5la jơno sŏng ơ̆ dî sơđah tơlôh ma kon so nŏk-noi cro dê nơ̆m lơ̆gay rai lai, nơ̆m jơ dô, bơh Yang Hwîng, jơno gư̆n sŏng dî sơđah tơlôh e ma lơ̆gay cro gơnoăr bơtău sang-goh Kơnràñ dê băl î cro gơnoăr-hwơr — 6rơ̆ la: lơ̆gay lang bol bơdih la cro cơdô̆ băl, la lơ̆gay pơnah dubă băl nơ̆m du să-jăn gư̆m la lơ̆gay cro tơmpà băl jơno hăư nơ̆m Yang Dŏng-klàs Jesu kơnơm bơh Jơno Niem, 7bơh Jơno Niem gư̆n mà ăñ sŏng dî sơlôh gôjîng du hôi cro dê̆-gơna kơnơm bơh jơno e gời jơno sơmah Yang Tơm Trồ dê, la jơno sŏng dî dờp e ma ăñ jăt bră lơh gơnăp-gơnoăr Kơnràñ dê. 8Jơno sơmah gư̆n sŏng dî dờp e ma ăñ — cro lŭi lang rlo lơ̆ nơ̆m lơ̆gay kơp cro sang-goh — lơi tơs bơtău ma lơ̆gay lang bol bơdih jơno kơnhơ̆p-mơ̆nda ơ̆ gư̆t nhẵư Yang Dŏng-Klàs dê 9gừn lơi lơh nê̆-năn ma kơp cro jơno găy la jơno ăt-bồ jơno ndăp-ndơ la jơno sŏng dî ămpôn ndăp swà găn bơh lơ̆gay kơp rai nơ̆m Yang Tơm Trồ, Bơtao mon bơjîng lơ̆gay jini-jơno, 10lơi ma jơ dô, kơnơm bơh Hîh Jư̆m Goh, jơno jăk-sai gư̆t nhẵư Yang Tơm Trồ digơlăn rang sơđah ma bơtao ăt-bồ dà lơgơ î tơmpôl cro ăt-bồ nơ̆m lơ̆gay anẵu cŭngsî trồ, 11jăt jơno rcăng rơndăp miek miek mà Kơnràñ lơh sŏng nơ̆m Yang Dŏng-Klàs Jesu, Yang ƀòn mơ̆n, 12mà nơ̆m Bơtao gư̆n, ƀòn mơ̆n dî nùs khơ̆n-sa î gung dà swà trôh en Yang Tơm Trồ bơh jơno khơ̆n-sa kơnơm bơh jơno don anẵu Kơnràñ. 13Gư̆n-jîng, ăñ dăn oh mi rôh lŏ bư̆ng tơblơ̆ nùs bơh lơ̆gay jơno gleh-glăr ăñ jê tài bơh oh mi rôh lŏ, mà lơ̆gay jơno gư̆n la jơno gơklŏ oh mi rôh lŏ dê.

14Tài bơh jơno gư̆n, ăñ cơdơn krô̆ng sơđàp măt Bàp, 15la Bơtao mà bơh Kơnràñ kơp nŏk-noi cŭngsî trồ î nteàh ù dî ăn sơnăn măt, 16lơi dăn Kơnràñ, jăt jơno kơnhơ̆p-mơ̆nda jơno gơklŏ Kơnràñ dê, lơh oh mi rôh lŏ dî pran-kơdăng bơh gơnăp-gơnoăr kơnơm bơh Yang Hwîng Kơnràñ dê nơ̆m kon-mơnùs đah ngglăm, 17lơi Yang Dŏng-Klàs ăm nơ̆m nùs oh mi rôh lŏ kơnơm bơh jơno don, tơm tô̆ sŏng dî oh mi rôh lŏ tăm reah î bơkhê mơnang nơ̆m jơno kơñ-kơloh, 18lơi ma oh mi rôh lŏ băl î jơh lơ̆gay cro sang-goh, dî pran lơi wơng gư̆t mơmơh tîgay la dơng, lơmŏng, yơng, jrô, 19î lơi đăl gư̆t jơno rlo ma jơno wơng gư̆t, rơ̆ la jơno kơñ-kơloh Yang Dŏng-Klàs dê, lơi ma oh mi rôh lŏ dî tôh bîng bơh lơ̆gay jơno bîng-tăl Yang Tơm Trồ dê.

20Dăn blăc mađah Bơtao digơlăn lơh jơno rlo ma lơ̆gay jơno mà ƀòn mơ̆n răc-dăn hala kơlôi jăt jơno gơnăp-gơnoăr ndăng lơh nơ̆m ƀòn mơ̆n 21Dăn Kơnràñ dî jơno gơklŏ nơ̆m Hîh Jư̆m Goh î nơ̆m Yang Dŏng-Klàs Jesu swà găn kơp nŏk-noi miek miek ơ̆lơ̆ ơ̆lŭi. Amen.