1 Kôrintô 12

1Hôm gôtrê bơh lơ̆gay jơno sơmah mađah hwîng, ơ oh mi rôh lŏ, ăñ ơ̆ kơñ oh mi rôh lŏ ơ̆ gư̆t jơno găy. 2Oh mi rôh lŏ gư̆t lah tơm tô̆ ƀòn mơ̆n hôm la cro bơdih, oh mi rôh lŏ kŏng pơlum mơ̆ndơm trôh î lơ̆gay rồp-ràk kơmblău, jăt dubă cro pơlum mơ̆n. 3Gư̆n-jîng, ăñ kơñ e ma oh mi rôh lŏ gư̆t lah ơ̆ cro găy kơnơm bơh Hwîng Yang Tơm Trồ dê mà tơs wăl lah: “Jesu la cro păl kŏng sràt-rma!”, gừn dilah ơ̆ kơnơm bơh Yang Hwîng Goh, ơ̆ cro găy digơlăn sơnăn “Yang Jesu la Yang.”

4Pơnah nde, tom khăi jơno phadêh-phadai bơh lơ̆gay jơno sơmah e gời, mơya nư̆ng băl du hôi Yang Hwîng. 5Tom khăi jơno phadêh-phadai bơh lơ̆gay bră tơmdŏng, mơya tom nư̆ng du hôi Yang. 6Tom khăi jơno phadêh-phadai bơh lơ̆gay gơnoăr bră lơh, mơya tom nư̆ng du hôi Yang Tơm Trồ, la Bơtao lơh lơ̆gay bră nơ̆m lơ̆gay cro. 7Mơya jơno lơh sơđah Yang Hwîng Goh dê dî dờp e ma kơp cro lơi iyà wăl jơno kwơ mang băl. 8Bơh ñăư Yang Hwîng, jơno jăk-sai dî dờp e ma cro dô, hôm jơno gư̆t jăk dî dờp e ma cro nde jăt băl du hôi Yang Hwîng rơ̆, 9bơh dubă băl du hôi Yang Hwîng dî dờp e ma cro dô jơno don, hôm băl du hôi Yang Hwîng rơ̆ dî dờp e ma cro nde bơh jơno sơmah-sơmai sămƀeah kòp jê, 10sŏng e ma cro dô, lơ̆gay bră lơh gơnăp-gơnoăr; e cro tò, dî jơno tơs hwơr; e cro năy, pran ayua tơmcơlah lơ̆gay hwîng; e ma cro nde, lơ̆gay jơno pha să pha hê tơs phadêh; mà e cro nde te, tơs wăl lơ̆gay jơno gơtha kơp jơno tơs. 11Mơya tom nư̆ng du hôi gư̆m dubă băl î Yang Hwîng lơh nê̆-năn lơ̆gay bră rơ̆, tơm tô̆ tơmpà gô dubă phadêh-phadai ma kơp să cro lơh-jăt nùs-kơñ Kơnràñ dê.

12Bơh gôlơh gư̆ptî să-jăn la du hôi mà tom khăi pơnah să-jăn, hôm lơ̆gay pơnah să-jăn dê, bulah dî khăi, gừn nư̆ng la du-lăm să-jăn; Yang Dŏng-Klàs kŭng tîrơ̆ ya. 13Ngăn, tài bơh dubă băl î Yang Hwîng, lơ̆gay ƀòn mơ̆n dî lơh ƀaptem tơmơ̆t nơ̆m du-lăm să-jăn, bulah la cro Juđa hala cro Grek, bulah la cro lơh dê̆ hala cro khăt-gơboh, gừn lơ̆gay dî lơh ma jơno ñô du hôi Yang Hwîng. 14Bơh să-jăn ơ̆-iyŏ la du pơnah să-jăn, mơya la khăi pơnah să-jăn te. 15Dilah jư̆ng tơs lah: “Bơh ăñ ơ̆-iyŏ la tê, gư̆n-jîng ăñ ơ̆-iyŏ la gôtrê đah să-jăn,” gừn ơ̆-iyŏ bơh tîrơ̆ mà gô ơ̆ gôtrê đah să-jăn. 16Gừn dilah tua tơs lah: “Bơh ăñ ơ̆-iyŏ la măt, gư̆n-jîng ăñ ơ̆ gôtrê ma să-jăn dê,” gừn ơ̆-iyŏ bơh tîrơ̆ mà gô ơ̆ gôtrê đah să-jăn ờ. 17Dilah lơ̆gay să-jăn la gơ-măt, gừn bră iet kơnău anẵu găy? Dilah lơ̆gay să-jăn la trôm tua, gừn jơno ñhìp anẵu găy? 18Gư̆n-jîng, tơblơ̆ wăl, Yang Tơm Trồ sŏng rơndăp ăn lơi lơ̆gay pơnah să-jăn nơ̆m să-jăn, kơp du-lăm nơ̆m khà ƀòn gô, jăt gư̆ptî nùs-kơñ Kơnràñ dê. 19Hôm dilah lơ̆gay ờs la du pơnah să-jăn, să-jăn gừn ăm anẵu găy teh? 20Mà bơh tîrơ̆, bulah tom khăi pơnah să-jăn, mơya nư̆ng tom du-lăm să-jăn. 21Pơnah nde, măt ơ̆-rgê tơs î tê lah: “Ăñ ơ̆ cang kơp kơñ bơh mê,” hala găl kŭng tîrơ̆ jăt î jư̆ng lah: “Ăñ ơ̆ tom kơp kơñ bơh mê.” 22Tơblơ̆ wăl, lơ̆gay pơnah să-jăn nơ̆m să-jăn gôlơh gư̆ptî la lơbăn-lơñô rlo gừn la pơnah cang-kơnơm sơlơ rlo te; 23pơnah găy nơ̆m să-jăn mà ƀòn mơ̆n tơmpơl gôlơh gư̆ptî la ờs dờm rlo gừn ƀòn mơ̆n ăn lơi ma ƀòn gô jơno kingam dơng rlo, gừn lơ̆gay pơnah să-jăn ơ̆ niem ƀòn mơ̆n dê gừn dî jơno mhơ̆ wăl niem dơng mang rlo, 24hôm lơ̆gay pơnah să-jăn ƀòn mơ̆n dê sŏng her lờt, gừn ơ̆ dî nùs-kơñ rơ̆ te. Mơya, Yang Tơm Trồ sŏng rơndăp tơmkot lơ̆gay pơnah nơ̆m să-jăn băl î găp, dờp khăi te jơno kingam e ma jơno găy êt dî kingam, 25bulah lơi ơ̆ tom jơno tơmcơlah nơ̆m să-jăn, mơya mà lơ̆gay pơnah să-jăn kah kơlôi trôh băl î găp. 26Dilah du pơnah să-jăn kŏng jê-kơkua, gừn lơ̆gay khăi pơnah să-jăn kŭng kŏng băl; dilah du pơnah să-jăn dî kingam, gừn lơ̆gay pơnah să-jăn sơhờp băl î gô. 27Pơnah nde, oh mi rôh lŏ la să-jăn Yang Dŏng-Klàs dê, gừn la kơp pơnah dêh lơ̆gay să-jăn dê. 28Yang Tơm Trồ sŏng lơh nên du pơnah cro nơ̆m Hîh Jư̆m Goh, lai ngăn la cro gơnoăr bơtău dơng, dơ̆ bea la lơ̆gay cro gơnoăr-hwơr, dơ̆ păy la lơ̆gay cro bơtău, sŏng gư̆n trôh lơ̆gay cro lơh gơnoăr phadêh, ma-ngkơi gư̆n la lơ̆gay jơno sơmah sămƀeah kòp jê, dŏng-kơl, ăt-bồ, gư̆m lơ̆gay jơno tơs nde. 29Tom iyŏ lơ̆gay la cro gơnoăr bơtău dơng ờ? Tom iyŏ lơ̆gay la cro gơnoăr-hwơr ờ? Tom iyŏ lơ̆gay la cro bơtău ờ? Tom iyŏ lơ̆gay gừn lơh jơno gơnoăr phadêh ờ? 30Tom iyŏ lơ̆gay cro tom jơno sơmah sămƀeah kòp jê ờ? Tom iyŏ lơ̆gay cro tơs jơno tơs phadêh-phadai ờ? Tom iyŏ lơ̆gay cro tơs sơndrẵu dẵư dî ờ? 31Mơya păl lơ̆ nùs kơp kơñ lơ̆gay jơno sơmah-sơmai dơng mang rlo. Hôm ƀăt jơ dô, ăñ nư̆ng e ma oh mi rôh lŏ tơmpơl du-lăm gung niem-lơhơn rlo lơ̆.