কুলিজকুরাআ কামি 25

ফীষ্ট শাসক রাঃআ সামাংরে পৌল রাঃআ দরবার।

1ফীষ্ট শাসক ইনা তালুকতে এ হিজু রাঃআ আপি মাহা তায়মতে কৈসরিয়া শেহার হাতেন যিরুশালেম শেহার তে সেনেনায়।

2ইনাতে মারাং বামড়েকু হেৎদ ইহুদিকু রাঃআ মাপরাং মাপরাং হড় ইনিরা হান্ডে পৌল রাঃআ বিরুধরে আর্জিকেয়াকু

3হেৎদ কষামুদিকিৎ তেকু ইনি রাঃআ বিরুধরে নিয়া দায়া-দুলাড় নাম রাঃআ আশা লাগায়নাকু, যাতে পৌলকে যিরুশালেম শেহার তে রাঃআ কুলিকাআকু। ইঙ্কূ হরা তালারে পৌলকে গজ নাতিনাং ফাসিয়া আডা সানালাৎ কুয়া।

4মেন্খান ফীষ্ট শাসক গাম রুয়াড়কাতে গামকেৎকু য়ায়, পৌল কৈসরিয়া শেহার তে হাঁডেৎ মেনাইয়া, ইঞহঅ এনথাংতে নিশ্চয়ই সেনাইঞ

5এন্তে ইনি গামকেয়ায়, আপেয়া তালারে অকয় আই-দাড়িয়ান, ইঙ্কূ ইঞ লঅ এনথাংতে সেনঃঅকাআকু, ইনি হড়রাঃআ যদি যাহানা দোষ তাহিনা এন্খান ইনিরাঃআ চেতাংরে দোষ লাদিকাআকু।

6হেৎদ ইঙ্কূ য়া হান্ডে আট-গেলে মাহা রাঃআ বেশি তাহিনো রাঃআ তায়ম ইনি কৈসরিয়া শেহার তে সেনেনায়, হেৎদ তায়্ম হুলাং দরবার আসনরে দুবয়েন্তে পৌলকে আগু নাতিনাং হুকুম এমকেৎকু য়ায়।

7ইনি হাজিরেনায় খানঃঅ যিরুশালেম শেহার হাতেন হিজাকান ইহুদি লাউড়িয়াকু ইনিরাঃআ চারুধার তে তিঙ্গুয়েন্তে ইনি রাঃআ বাব্ত্তে গাদা মারাং মারাং দোষ রাঃআ থুতি গাম লাগায়নাকু, মেন্খান ইনি রাঃআ প্রমাণ উদু কাকু দাড়িলাআ।

8নাতেরে পৌল নিজে রাঃআ ইঞতেৎতে সায় কাতে গামকেয়ায়, ইহুদিকু রাঃআ আরিচালি রাঃআ বিরুধরে, বাড়িচ রাঃআ বিরুধরে, বাংখান কৈসর রাঃআ বিরুধরে ইঞ যাহানা কাইঞ অপরাধতাৎ আইঞ।

9মেন্খান ফীষ্ট শাসক ইহুদিকু রাঃআ হক হুই সানাকিয়া খানঃঅ পৌলকে তেলা এমকাতে গাম লাগায়নায়, আম কি যিরুশালেম শেহার তে সেনকাতে ইঞা মেৎরে নিয়া যত বাব্ত্তে দরবার তে সায়এমেয়াম?

10পৌল গাম রুয়াড় কেয়ায়, কৈসর রাঃআ দরবার আসন রাঃআ সামাংরে তিঙ্গু মেনাইঞা, নেথাংরে ইঞা দরবার হুই জরুর। ইঞ ইহুদিকু রাঃআ নাতিনাং যাহান কাইঞ অন্যায়তাৎআ, নিয়াটা আপে বেশ লেকা সারিয়াপে।

11এন্খান যদি ইঞ দায়ীয়াইঞ হেৎদ গজঃ রাঃআ যোগ্য় যাহানা করাতাৎ আইঞ, এন্খান ইঞ গজঃতে কাইঞ বাধায়া, মেন্খান নিকু ইঞা চেতাং অকা অকা দোষ লাদিতাৎ আকু নিয়া যত যদি যাহানা কা হুইঅয়া নিকুয়া তিহিরে ইঞকে জিমারাঃআ যাহায়রাঃআ আইদারি বাআয়না, ইঞ কৈসর রাঃআ হান্ডে আর্জিয়েআইঞ।

12ইন্তং ফীষ্ট শাসক মন্ত্রী দরবার লঅ থুথিকু গটাগুটি কাতে গাম রুয়াড় কেয়ায়, আম কৈসর রাঃআ হান্ডে আর্জিতাৎ আম, কৈসর রাঃআ হান্ডেগে সেনম।

আগ্রিপ্প রাপাজ রাঃআ হান্ডে পৌল রাঃআ ইঞতেৎতে সায়।

13হেৎদ কথক মাহা পারমেনা খানঃঅ আগ্রিপ্পা রাপাজ হেৎদ বর্নিকী কৈসরিয়া শেহার তে হাজিরেনায় হেৎদ ফীষ্ট শাসক কে জহারকিয়ায়।

14হেৎদ ইঙ্কিন গাদা মাহা এনথাংরে বাসায়নাকিন হেৎদ ফীষ্ট শাসক রাপাজ রাঃআ হান্ডে পৌলরাঃআ জাগার হাজিরকাতে গামকেয়ায়, ফীলিক্স মিয়াৎ হড়কে আটক কাতে দঃহ তুকাতিয়ায়,

15চিন্তং ইঞ যিরুশালেম শেহার রে তাহিলেনাইঞ, ইন্তং ইহুদিকু রাঃআ মারাং বামড়েকু হেৎদ মুরুব্বিকু ইনি হড়টা রাঃআ বাব্ত্তে আর্জিকেৎ তেকু ইনি রাঃআ বিরুধরে কুড়াই রাঃআ বিন্তিলাদআকু।

16ইঞ ইঙ্কূ কে নিয়া উত্তর এমলাদ কুয়াইঞ, অকয় রাঃআ নুতুমতে দোষ এম হহুয়া, চিমিন ভুর দোষ-এমিজকু লঅ সামনা-সামনি কাকিনা (মোকাবিলা কাকুয়া) হেৎদ এমতান দোষ বাবদতে ইঞতেৎতে সায় রাঃআ অক্ত কা নামেআয়, ইমিন ভুর যাহান হড়কে সম্পা রোম শেহারয় কুরাঃআ চল লহয়।

17এন্তে ইঙ্কূ মিশাতে নেথাংতে হিজেনাকু খানঃঅ ইঞ কাইঞ দেরিকাতে গাপা হুলাং দরবার আসনরে দুবকাতে ইনি হড়কে আগু নাতিনাং আঁচুকেৎকু য়ায়।

18হেৎদ দোষ এমিজকু তিঙ্গুয়েন্তেকু, ইঞ চিল্কা লেকানা দোষ আটকারেকেনাইঞ, এনকা লেকানা যাহান দোষ ইনিরাঃআ বাব্ত্তে কা রাকাবলেনা,

19মেন্খান ইনিরাঃআ বিরুধরে আপেয়া নিজেরাঃআ ধর্ম বাব্ত্তে হেৎদ যীশু নুতুমতে যাহান গজঃ হড়, অকয়কে পৌল জীউৎ গামিকেনায়, ইনিরাঃআ বাব্ত্তে হুডাঙ তর্ক হাজির কেয়ায়।

20ইন্তং নিয়া সব বিষয় চিল্কাতে পাঞ্জা হুইওয়া, ইঞ গটা কাইঞ দাড়িলা মেন্তে গামকেয়াইঞ, আম কি যিরুশালেম শেহার তে সেনকাতে নিয়া বিষয়কুতে দরবার নাতিনাং রাজিমেনামা।

21মেন্খান পৌল আপিলকাতে সম্রাটরাঃআ দরবার রাঃআ নাতিনাং বাঞ্চা তাহিতে বিন্তিকেয়ায় খানঃঅ, ইঞ চিমিন ভুর ইনিকে কৈসররাঃআ হান্ডে কাইঞ কুল দাড়িইঞ, ইমিন ভুর আটক কাতে দঃহঅরাঃআ হুকুম এমকেৎকু য়াইঞ।

22ইন্তং আগ্রিপ্পা রাপাজ ফীষ্ট শাসক কে গামকিয়ায় ইঞহঅ ইনি হড়রাঃআ হান্ডে থুতি আয়ুম সানালিঞা। ফীষ্ট শাসক গামকেয়ায়, গাপা আয়ুম নামেআম:

আগ্রিপ্প রাপাজ রাঃআ সামাংরে পৌল।

23এন্তে গাপা হুলাং আগ্রিপ্প হেৎদ বর্ণীকী পুরা সাজা-সাপড়াকাতে হিজেনায় হেৎদ জুলু পতিদকু হেৎদ নাঙ্গা র রেঙ্কূ মাপরাং হড়কু লঅ দরবার থাংতে হাজিরেনাকু, হেৎদ ফীষ্ট শাসক রাঃআ হুকুমতে পৌলকে আগু হুইয়েনা।

24ইন্তং ফীষ্ট শাসক গামকেয়ায়, এ রাপাজ আগ্রিপ্প হেৎদ আলে লঅ দরবার হাজিরাকান গমকেকু, আপে যতচ নিইকে নেলিতানাপে, নিইরাঃআ বাব্ত্তে ইহুদিকুরাঃআ দলবল সমেত যত হড় যিরুশালেম শেহার রে হেৎদ নেএ নেথাংরে ইঞা হান্ডে আর্জিকাতে জোরতে গামলাদআকু, ইনিরাঃআ অটঅ বাঞ্চা তাহিনোরাঃআ জরুর বাআয়না।

25মেন্খান ইঞ নেলকেয়াইঞ যে ইনি হড় গজ লেকানা যাহানহঅ কামী কায় করাতাৎ আয়। এন্খান ইনি নিজে চিন্তং সম্রাটরাঃআ হান্ডে আপিলতাৎ আয় ইন্তং ইঞ ইনিকে সম্রাটরাঃআ হান্ডে কুলগে গটা কেয়াইঞ।

26মেন্খান মারাং সম্রাটরাঃআ হান্ডে অলরাঃআ লেকানা এনকান গটা যাহানা কাইঞ নামলাদআ। ইনা নাতিনাংগে ইঞ আপে যতচ রাঃআ সামাংরে, বিশেষকাতে রাপাজ আগ্রিপ্পা রাপাজ, আমা সামাংরে ইনিকে আউ তিয়াইঞ যাতে ইনিকে কুলিকাতে অন্তত ইঞ অল দাড়ি কাইঞ।

27চিয়াচি ইঞা মতে, যাহান আটক কে চালান এমরাঃআ অক্ত ইনিরাঃআ দোষকুহঅ সারিতকা লাক্তি তানা।