1 থিষলনীকীয় 4

ঈশ্বর রাঃআ গুন মাই অক্যয় য়ে করাঃআয়া।

1এন্খান, এ বকইঞ কু, মুচাদরে আলে প্রভু যীশুলিয়া আপেকে উৎসা এমাপে তানালে, চিল্কা পে সেসেন লেন্খান ঈশ্বরএ সন্তুষ্ট আয়, নিয়া বাব্ত্তে আলেয়াআ হান্ডে অকা চেচেদাআ পে হাতা তাৎআ, হেৎদ চিল্কা পে সেসেন তানা, এনে এঙ্কা লেকাগে আলে আপেকে উৎসা এমাপে তানালে আপে গাদা ফুরি এমেপে।

2চিয়া চি আলে প্রভু যীশু লিয়াতে আপেকেলে কিনাঃআ কুলে আচু এমা তাৎ পেয়া, আপে দঅ ইনা সারিগেয়াপে।

3বিশেষকাতেন, নিয়া দঅ ঈশ্বর রাঃআ ইচ্ছা তানা, আপেয়া নির্মলা,

4যেন হড়মালটম হাতেন সাঙ্গিন রে তাহীন পে। আপে যত হড় চেদঃঅপে যে রিলামালা হেৎদ গুনমৌনতে আপান আপিন এরা লঅ চিল্কা তাহি হুইআয়্য়া,

5অক্য়য়কু ঈশ্বরকে কাকু সারিয়া, ইঙ্কূ বিন ইহুদিকু লেকা হড়মো লালচ লেকা দঅ ল্হয়,

6হেৎদ যাহায় যেন নেকান কামিরে তিড়সা পারম কাতে আপনারাআ হাগা কে আলয় ঠেকাই কাঃআয়, চিল্কা মাড়াং হাতেন আপেকে হুসিয়ার কাতে গামাতেৎ পেয়াং, প্রভু দ ইনা যত কাই নাতিনাং যত হড় কে কুড়াই এমাকুয়ায়্য়।

7চিয়াচি ঈশ্বরদ বাড়িছ কামী নাতিনাং দ ল্হয়, মেন্খান রিলামালা কামী নাতিনাং রারাঃআ তাৎ বুয়ায়।

8ইনা নাতিনাং অক্যয় হড় নিয়া কায় মানা বাতায়ায়, ইনিদ মান্মি কে দ ল্হয়, ঈশ্বরকেগে কায় ছুতাং ইআয়্য় , অকয়্য়দ আয়া নিজে রাঃআ রিলামালা আত্মা আপেকে এমাতাৎ পেয়া।

9হেৎদ হাগা দুলাড় বাব্ত্তে আপেকে জাহানা অল রাঃআ লাক্তি বাআয়্য়না, চিয়া চি আপে আপান আপিন দুপুলাড় নাতিনাং ঈশ্বর রাআ হান্ডে চেচেদ নাম তাৎআ পে।

10হেৎদ সার্তি গে, আপে দ মাকিদনিয়া রেঙ্কূ যত হাগা মিসি কু নাতিনাং এঙ্কা গেপে দুলাড়াকু তানা,

11মেন্খান আপেকে নেহর কাতে গামা পেতানাঞ, এ হাগা মিসি কু, ঢের উতার দুলাড় দুপুলাড় পে, হেৎদ আলে আচুকেৎ পে লেকা থিরথার তাহীন পে হেৎদ আপান আপিন কামীতে কামীই পে হেৎদ আপান আপিন তিহি তে কামী-জম পে।

12যেন আপেয়া গুনমৌন বেভার নাতিনাং বাহার হড় কু রাঃআ হান্ডে আপে চিল্কা আতাং তুকা কানাপে, ইনাতে আপেয়া যাহানা তে আলপে অভাব ওয়া।

প্রভু যীশুরাঃআ রুয়াড় হিচু।

13মেন্খান এ হাগাকু আলে কালে আসিতানা, গচ কুরাঃআ বাব্ত্তে আপে কাপে সারিয়া এঙ্কাদ লহয়; চিল্কা ইঙ্কূ য়া আসা বায়ানা, ইনা নাতিনাং যত হড় কু লেকা আল্পে দুঃখ হমরআ।

14চিয়া চি, আলে নিন্তং পাতিয়া কানালে যে, যীশু গচ লেনায় হেৎদ জীউৎ বিরিৎ এনায়, ইনা লেকাগে ঈশ্বর যীশু রে গিতিচ গচা আকানা কুয়া ইনিলো বিরিৎ আগু কুয়ায়্য় য়।

15চিয়া চি নিয়া দ আলে প্রভু রাঃআ জাগার লেকাতে গামাপে তানা, আবু অকয় কু জীউৎ গেয়াবু হেৎদ প্রভু রুয়াড় হিচু যাকিৎ চিনতি লেকা জীউৎ তাহিনাবু, আলেদ গচা কানা কু রাঃআ হাতেন কালে মাড়াং ওয়া।

16চিয়া চি প্রভু দ আয় গে রাস্কা রম্চতে, মারাং সরগ নাগা রাঃআ কন্ঠতে হেৎদ ঈশ্বর রাঃআ রুতু বানাম সাডি তে সরগ হাতেন আড়গু হিচু য়ায়্য়, হেৎদ অকয় কুদ খ্রীষ্ট নুতুম তেকু গচা কানা, ইঙ্কূ দ মাড়াং তেকু জীউৎ বিরিৎ দয়াকু।

17ইনা তায়্মতে আবু অকয় কু জীউৎ মেনাঃবুয়া, অক্যয় কু সারেচ তাহিনাবু, আবু নিরালারে প্রভু লঅ নাপাম নাতিনাং মিশাতে উঙ্কূ লঅ রিঁবিল তেবু সেনাঃবু হেৎদ নেকাগে প্রভুলঅ সারা ঘাড়ি তাহিনাবু।

18নেকা গে আপে আপে নিয়া জাগার তেগে জিউ রাড়েচ দহয়পে।