Biblica® Open Nkanda wu Moyo, Nguizani Yimona ayi Minkunga 2002
Minkunga 94
Nate thangu mbi batu bambimbi bela nunginanga e ?
A Yave, Nzambi wumvutulanga landi.
A Nzambi, wumvutulanga landi ;
bika wukimonisa !
Telama kuaku ngeyo zuzi di ntoto ;
bika wuvutudila batu badi luniemo
momo bafueni tambula.
Nate thangu mbi batu bambimbi, a Yave ?
Nate thangu mbi batu bambimbi bela monanga khini e ?
Bawu balembo muangisa mambu ma luniemo.
Batu boso bobo beti vanga mambimbi
bafulukidi mu luyanu.
Bawu balembo diatidila batu baku, a Yave,
balembo yamisa kiuka kiaku.
Balembo vondi difuola ayi nkebi ;
balembo vondi bana ba sana.
Balembo tubi : “Yave kakadi mona
ayi Nzambi yi Yakobi kakadi matala.”
Lukeba beno bakambulu diela luidi va khatitsika batu !
Bosi beno bivungisi thangu mbi luela bela nzayilu e ?
Niandi wutula dikutu kalendi wa ko e ?
Niandi wukubika dieso kalendo mona ko e ?
Niandi weti vana makanda thumbudulu makanda
kalendi vana thumbudulu ko e ?
Niandi ko weti longa mutu kambulu nzayilu e ?
Yave zebi mayindu ma mutu ;
zebi ti mawu madi kaka maphamba.
Lusakumunu kuidi mutu wowo weti vana thumbudulu, a Yave,
mutu wowo weti longila mu Mina miaku.
Weti kumvana lusadusu mu bilumbu bi phasi
nate dibulu dinneni diela mana kabu mu diambu di batu bambimbi.
Bila Yave kalendi yekula batu bandi ko
kalendi loza kiuka kiandi ko.
Tsambusu yela buela ba diaka yisonga
ayi baboso bobo badi mintima milulama
bela landakana yawu.
Nani wela kuthelumina va ntuala batu bambimbi e ?
Nani wela telama mu diambu diama
mu nuanisa bobo bamvanganga mambimbi e ?
Enati Yave kasia kuphana lusadusu ko
nganu mu thinu nsualu ndivuandila dio sui mu lufua.
Mu thangu ndituba ; “kulu kuama kueka sialumuka” ;
luzolo luaku, a Yave, lutsimba.
Mu thangu mayindu maba mawombo mu minu ;
mbombolo aku yinata khini mu muelꞌama.
Kundu ki luyalu ki batu bamvanganga mambimbi
kilenda ba kithuadi ayi ngeyo ko e ?
Kioki kinatanga khuamusu mu zinzengolo ziandi e ?
Bankutakananga mu nuanisa batu basonga
ayi zengila mutu kambu bila
nkanu wu lufua.
Vayi Yave wuyika suamunu kiama kingolo ;
ayi Nzambi ama niandi ditadi dingolo diodi ndieti suamina.
Wela kuba vutudila mu diambu di masumu mawu,
ayi wela kuba bunga mu diambu di mambimbi mawu.
Yave, Nzambi eto, wela kuba bunga.
Biblica® Open Nkanda wu Moyo, Nguizani Yimona ayi Minkunga 2002. Copyright © 2002 Biblica, Inc. Licensed under CC BY-SA 4.0. “Biblica” is a trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.