Minkunga 90

BUKU YI NYA

Wutulonga mu tanga bilumbu bieto

Lusambulu lu Moyize, mutu Nzambi.

1Yave, ngeyo wuba buangu kieto kivuanda

mu tsungi ka tsungi.

2Tuamina miongo mibutuka

voti tuamina wuvanga ntoto ayi nza ;

tona mu thangu ka thangu, ngeyo widi Nzambi.

3Ngeyo wumvutulanga batu mu fundu-fundu

bu weti tuba :

“Vutuka mu fundu-fundu, e e bana ba batu.”

4Bila va meso maku mili di mimvu midedikini

banga lumbu kimosi kiviokidi zono ;

voti banga thangu yimosi va builu,

5ngeyo weti botula batu mu tulu tu lufua,

badi banga biti bimona va nsuka.

6Va nsuka bimenini bimona,

va masika bilebukidi ayi biyumini.

7Tulembo lalakana mu diambu di nganzi aku

ayi tsisi tulembo moni

mu diambu di miangu miaku.

8Ngeyo wutudidi mambimbi meto va ntualꞌaku,

masumu meto masuama

va ntuala kiezila ki zizi kiaku.

9Bilumbu bieto bioso bilembo mani

ku tsi nganzi aku ;

tulembo manisa mimvu mieto ayi luniongo.

10Tezo ki bilumbu bieto kidi ki lusambudi lumimvu

voti lunana enati ngolo zidi yeto.

Sina kiawu kidi kaki kiphasi ayi kimianga.

Bila luzingu lueti lulembo vioki nsualu

ayi tulembo yendi.

11Nani zebi lulendo lu nganzi aku e ?

Muingi miangu miaku miba tola banga lukinzu lolo fueni tambula.

12Wutulongisa tanga bilumbu bieto mu bufuana

muingi tubaka ntima wu duenga.

13Bika buela fuema, a Yave.

Nate thangu mbi mela bela e ?

Bika wumona bisadi biaku kiadi.

14Mu nsuka, bika wutuyukutisa mu luzolo luaku lu ngolo ;

buna tuela yimbilanga mu khini ayi buna tuela yangalala

mu bilumbu bioso.

15Wutuyangidikanga boso buididi bilumbu biobi wutumonisina phasi

boso buididi mimvu miomi tuyamusunu.

16Bika mavanga maku mamonoso kuidi bisadi biaku ;

kiezila kiaku kuidi bana bawu.

17Bika nlemvo wu Yave, Nzambi eto wubanga va beto,

bika mu diambu dieto, wukindisa kisalu ki mioko mieto.

Nyinga, kindisa kisalu ki mioko mieto.